أخ

[حلم الطفوله]

السلام عليكم ورحمة الله وبركاته



أول ما ينضرب الشخص منا على راسه ؟؟ هيه على راسه تحديدا؟؟:fa32:



شوه يقول؟؟:oh:



طبعا ما تحتاج لتفكير ولا حذف إجابتين ولا تبديل السؤال ؟؟



يقول وبصوت عالي أخ ...أأخخخخخخخ:fa43:



شفتوا معزتكم لوين وصلت بقلوبنا ؟؟ حتى يوم ننفلع نذكركم:inlove:



دائما تعتز البنت بأخيها ...تفتخر به أمام الملأ ...تذكره بين صديقاتها ... تحبه بلا حدود



هو حب من نوع خاص توطن بقلبي لإخوتي الذكور تحديدا:fa35:



أحبهم حبا قد لا أستطيع أن أعبر عنه بالكلمات فما في قلبي أبلغ من حروف ناطقه



هذا أخي ... ياه كم أشعر بالفخر وأنا أرددها ...



وكم يطغى هذا الاحساس مع كل لحظه أرى فيها موقفا

تجسدت فيها هذه المعاني مجتمعه لتصرخ بحب الأخ



الوالده مع أخوها والوالد مع أخته...يبالهم لماح ياخذلهم لقطه حزتها:fa42:



أخي أخوي أخويه ولد أمي وأبويه ...فديته والله ..لو تدرون بمعزتكم بس:Oo:



يا خويه يا عضيدي لا ترقد بالسيوح ...ارقد بظل بارد بين الحشا واليوف ...لو غلط خبروني



:inlove: :shocked: :ghostface



بس هالحلم الوردي يتلاشى وهالمشاعر تتبدد بلحظه عند البعض ...........تدرون متى ؟؟



لما تقولين لاخوج حبيبج ولد أمج وأبوج وأقرب واحد لقلبج ...طلعني ؟؟



كأنج ارتكبتي معصيه لا قدر الله ؟؟ أو كفرتي يوم قلتي هالكلمه تحديدا ؟؟



بصراااااااااااااااااااااا اااااااااااحه وباختصار ليش كلمة طلعني تقهركم؟؟



ودمتم سالمين:fa51:

[بيور]

والله ودي أعيش هالتجربه ,, ودي يكون لي أخو أكبر عني يفهمني وأفهمه ,,

يمكن لو عرفت الشعور هذا ,, وحسيت به ,, بعرف احساسج ,,

بس موضووع حلو ,, واتمنى خوانا اللي في الواااحاات يسعفووونا بردوووودهم:laugh:


والسموووحة ,,
المتفيجة :blush: ,,

[العجيبة]

أنا أعتقـد انهم ما ينقهـرون ..
بس نحن نحس بقهرهم لانهم بيتمون يفكرون بـ "المسؤوليه " اللي بيتحملونها !!
أو أقصـد " المصاريف " اللي بيصرفونها هيهييه !!

اممم بيني وبينكـم ، ما فيها أي قهـر .. بس هي مجـرد شطارة البنت في كيفية طرح طلبها المستعصي
يعني من الغبااء المستفحل انه تروح تقول انها تبا تطلع قبل ما تنزل المعاشات بثلاث أيام مثلا !
ومن الغبــااااء المستورد انها تطلب الطلعه والأخ توّه راد من دوامه مصدع !!

يعنـي وهييـك تقـريبــاااا ..

الفقـره اللي في النص (اللي فيها المديح ) يا حلم الطفـوله ، يستحسن ويمدحونه استخدامهـا قبل كل كلمه " طلعوني " !!

هههه عيبني الموضوع .. كل فقـرة تخليج تتوقعين المغزى شي ثاني .. وآخر شي عن كلمة " طلعوني " بسسس !!

[نبراس الليل]

السلام عليكم ورحمة الله وبركاته

اول شي احيي الواحات على عضوة مثلك ماشاءالله عليك مواضيعك كلها حلوة بس مروعة نفس الوقت

وثاني شي احب اقول

لكل انسان طبع ومجتمع اختاره يعيش فيه ويمشي على نهجهم يمكن بعض الشباب مايحبون يطلعون خواتهم تفاديا لأي تحرشات والابتعاد عن وقوع اي مشكلة

والبعض قد أسميه بمريض نفسي..أي عندما يرى رجل ومعه إمرأة يظن انهما مجرد اصدقاء
فيطبق هذا الشي على نفسه أي يقول في نفسه عندما اخرج مع أختي سيظن اصدقائي أو الرجال أن التي معي هي صديقتي وهذا مايمنعه ومثل هذا الصنف كثيرون ..

لكن من اللائق أن يقترب الأخ من أخته أكثر فأكثر

والحمدلله إني لم اصبح مثل اللذين ذكرتهم

فلو طلبت مني اختي ان اصطحبها الى القمر فوالله سافعل

شكرا اختي حلم الطفولة على مثل هذه المواضيع الجدا جميلة والرائعة

ننتظر جديدك :fa51: ضربة بعد ضربة =تعود وتحمل الضربات

طارق
اخوكم

[ذنـيـنـي]

البارحه استوت ازمه بين الشباب في ميلسنا بسبب هالموضوع

لي عوده من بعد يلسة الميلس اليوم

:fa32:

[مزن هتان]

هلا

فديت اخواني اموت فيهم
البعض من الاخوان ينقهرون

اممممم اخوي العود يستحي يطلعنا مادري ليش

اما اخوي الثاني عادي عنده مايصدق بس عنده شرط اللي هو او بسيارة البيت او سيارتي خايف على بتروله يمكن

احيانا الخوال والعمام ينقهرون بعد

مثال مزن هتان مستحيييييييييييل تطلب من خوالها :fa32:

بس نجي عند عمامي وخاصه بوحميد والله انه حبيب:inlove: بس يقهر ماياخذنا إلا لـ مطاعم يبينا ننتفخ

مشكوره حلم ع الموضوع

[انامل]

فديت روح روحج
:fa41:
:blush: حلم:blush:
كنت مندمجه معاج حيل
فجأه قلبتي المواجع
:fa56:
هاي مشكله أزليه للاسف
في بيتنا ما تصير أبد قولــــــــــــي ليش
هاه قلتي ليش
:nerd:
يا الغلا

لأنهم ما يطلعونا أساسا
:Oo:
بس تبين الصدق مثل ما تفضلتي
الأخ سند ولو كان صغير يمشي معاج بأي مكان عام
تحسين بالأمان

كفايه ان الأخ مهما كان عمره فممكن يكون محرم يروح معاج
اعرف عايلة كلهن بنات الوالد متوفي يبوون يروحون العمره او الحج بس عدم وجود محرم
مأزم الأمــــــــــــر

يا جماعه الأخوان نعمه
وهمسه لجميع من له أخت
:fa41: :fa35: :fa41:
حن عليها
ايلس بحذاها لو مره
اهديها اي هديه لو مره
حتى لو جلكسي:blush:

قلها مهما كان عمرها
محتاجه شي؟
شي بخاطرج؟
تحبيني؟
شي ناقصج؟
انا وياج ولا تخافين دام راسي يشم الهوا لا تخافين



سامحيني وتحمليني اسمعي كلامي وفاااااااااالج طيب
:blush:
ساعتها شوف بعيون اختك
تلقى السرور اللي ما ينشرى باموال الدنيا
:heart:
الحمدلله على كل حال والله يهدينا جميع ويهدي اخوانا جميع

والبنات بعد هالله هالله باخوانكم
يد وحده ما تصفق:fa47:


حلم:fa42:
موضوع ممتع
عجبني اسلوب سردج:nerd: :blush:
الله لا يحرمني ها الطفل اللي بحلمج الطفولي


مساء المحبه

:fa41: :fa41: :blush: :fa41: :fa41:

[حلم الطفوله]

المتفيجه ...مشكوووووووره عزيزتي على المرور

ولو عندج إخوان أصغر عنج أحسن بيسمعون كلامج وبيطلعون إختهم لكبيره:laugh:

العجيبه ... صدقيني السالفه مب سالفة كيف تقنعينهم يطلعونج:glare:

السالفه كيف تبعدينه عن رباعته قوم بو خمسه وعشرين ساعه... سياسة فرق تسد يمدحونها:fa42:

وأكيد كل شيء بالكلام الحلو بيتحقق ...

بو زايد ....الحمد لله ما عندك إخت ..جان ذليتها عالطلعه :fa55: اونه ما عدنا بنات يطلعون:fa32:

شاكره لك مرورك أخوي بو زايد :laugh: ...

[حلم الطفوله]

نبراس الليل

الله يحفظك لخواتك وأهلك يارب ...وكل يوم اطلعهم مكان :laugh:

يا خوي انا أقصد إنه الولد دايما يتهرب من إنه يطلع أهله مكان ...
يتعلث بإنه مشغول ومتواعد ويا ربعه ونص شغل العالم عليه يوم حد بيقوله ود أهلك مكان
والبنت المسكينه تبدا الإجازه وتنتهي وهيه خاطرها تركب سيارة أخوها وتطلع وياه مكان

يعني الدريول ينفع يودي المدارس والأسواق ...
لكن طلعات وبر ورحلات مستحيل العايله تروح بدون محرم ...حلاتها مع الإخوان والتصعيد:tounge:

ومشكور أخوي طارق على كلامك في حقي والله يحفظك وين ما تكون


ذنيني

نتريا الأزمه وأحداثها .... والحل النهائي لها:laugh:

[حلم الطفوله]

مزن هتان

يعني لا إخوان ولا خوال ولا عمام ؟؟ وين بندق براسنا يعني بهالدنيا:fa32:

الله يخليلج بو حميد ... وجان عالمطاعم تراها تعتبر أحلى طلعه :fa42: الله يحفظج إختي


أغلى اناااااااااااامل بعالم حلم الطفوله:inlove:

تدرين انا وااااااااايد منقهره :glare:

حد عنده إخت عسووووله مثل أنامل وما يطلعها ...:fa32: سمعيه هالرمسه بس

زين يوم عطيتي شباب الواحات دروس التعامل مع خواتهم:blush: تعلموا عاااد

والله كلامج مثل البلسم على القلوب ... الله يحفظج لأهلج يا كل الغلا:fa41:

[ناصر الخالدي]

أختي العزيزة طرح رائع ومتميز وربما لان الموضوع يختص بجنس الرجال وانا منهم فسوف اشارك بوجهة نظري الشخصية ......

الاخوه شعور جميل ونعم كل اخت تفخر بأخوانها كما انه من المفترض أن يفتخر الاخ بااخواته أما أنا فعندي أختان الاولى في الصف الثالث الثانوي علمي وهي فتاة ذكية متفوقة طلباتها المعتادة وحواري معها كالتالي

هي : ناصر شلونك
انا : بخير الله يسلمج شنو تبين عطيني من الآخر
هي : ابيك تحط شكر حق ابلتي في الجريدة
انا : انشألله من عيوني وشدي حيلج

وهذا الطلب يكون عادي والطلب الآخر في صيغة اخرى انظري ماذا تقول

هي : نصور انا عازمتك اليوم على طلعة
انا : لا حبيبتي والله ما ابي اكلف عليكِ :fa44:
هي : لا عادي لا تخاف معي فلوس
انا : اوكي على خير يالله قبلت العزيمة
هي : وناسة وناسة وناسة وناسة :fa34:

الخروج مع اختي شيء جميل لانه يفتح بيننا باب للحوار فأعرف مايدور بداخلها من افكار من تطورات ربما تفكر في شيء معين ربما تريد ان تتخذ قرار فمن خلال الخروج معها استطيع معرفة ما تريد وبالتالي تكون صديقتي واختي في الوقت نفسه

اختي الثانية هاجر في الصف الثاني الإبتدائي كثيرًا ما اخرج معها الى المطاعم والاسواق لانها الطفلة المدللة حوارها معي كالتالي

هاجر : أمانة الله يخليك ودني ابي لعبة
ناصر : اوكي بس اول شيء قولي احبك
هي : احبك احبك احبك
ناصر : اتفقنا

ولكن عندما اكون مشغول وعندي إلتزامات مهمة يتغير الوضع وتختلف الإجابات ولكن المهم انني شخصيــًا احرص على ان اخرج مع اهلي في كل يوم من جمعة من كل اسبوع فهو يوم خاصل للعائلة للوالدة واخواتي واخواني الصغار ..........

في الختام لكِ خالص الشكر والتقدير اختي العزيزة حلم الطفولة.........

[حلم الطفوله]

هاه يا شباب الواحات شفتوا ناصر الخالدي ماشاء عليه ..الله يحفظك لأهلك ويفرحهم بك:fa42:

لا يا أخوي حتى عيالنا يطلعونا ويسولفون ويانا ....يعني لغة الحوار مب معدومه وياهم

هيه مشاغل الدنيا تلهي الانسان ... بس تظل علاقة الرحمه والود بين الإخوان عجيبه

الله يخليلك خواتك ويفرحك فيهم :fa46:

[ذنـيـنـي]

الي كانوا في ضرابه البارحه 3 قروبات و الحكم هو انا بحكم اني من بيت ما فيه بنات :sleepy:


الي في القروب الأول
كانت وجهة نظرهم هي انه البنت لازم ما تتعود على الطلعه و انه هالشي "منقود" عندهم
قلنالهم شو السبب , قالوا ما نبغي ربعنا يشوفونا و و نحن مطلعين اهلنا :crazy:

القروب الثاني
قالوا انه عادي عندهم بيطلعون اهلهم بس بشرط انهم ما يكونون مرتبطين ويا ربعهم و بشرط انه تكون الطلعه في السيارة فقط,, او في مكان ما يكون فيه وايد ناس.

القروب الثالث (( و هم الي عيبني تفكيرهم لأنه شوي تفكيرهم متفتح ))
قالوا مستعدين نطلع اهلنا اي مكان دام انه نحن وياهم,,
و المفروض انه نحن الي نطلعهم و نوديهم اي مكان في خاطرهم

و خروج الشاب مع اخته مافيه شي دام انه المكان مافيه مناكر
و شد انتباهي كلمه قالها واحد من ربعي و هي انه الواحد اذا ما طلع أهله و ما اهتم فيهم
بيدورون على شخص ثاني يهتم فيهم, حتى لو كان هالشخص من غير المحارم :fa55:


انا رأيي من رأي المجموعه الثالثه و أؤيد انه البنات لهم حاجه في الترفيه عن النفس بالخروج مع الاخ, حتى لو مره او مرتين في الشهر,,
و هذا الشي بيقوي العلاقه بين الاخ و اخته,,
الى درجه انه ممكن انها ممكن تقوله اسرارها و ممكن انها تستعين فيه اذا صار لها اي موقف

على فكره,, عندي واحد من الاصدقاء عنده اخت وحيده بين 8 اشقاء,, و طبعا المسكينه ضايعه بينهم لأنه محد مسولها سالفه, الى درجة انها كادت ان تسلك طريق الخطأ لولا انه صديقي قدر يتدارك الموقف و ينتبه للغلط الي "هم" مسؤولين عنه,,
و من هاك اليوم و ربيعي يعتبر يوم الاربعاء Family day خاص بأخته و يوديها الى اي مكان تبغيه و هو يعتبر مخزن اسرار شقيقته و تقوله عن كل صغيره و كبيره في حياتها :fa41:
اشوف انه يعتبر أخ مثالي, ولا شو رايكم :fa42:

[الشوق]

حلم الطفوله انتي رائعه ..
للاسف انا الصغرى بين الاخوان والاخوات
لكن ... اجد نفسي كبيره استطيع الااعتناء بنفسي
لانني وبكل جداره اقولها
عندما وجدت نفسي اكبر شيئا فشيئا وجدت اخواني لديهم بيتا خاصا يضمهم ..
ويضم ابنائهم وبناتهم ..
لذا لم اتمتع بمتعة الاخوه الحقيقيه
..
حـــلم الطفـــــوله
ساعات وايده احن اخوي يعاتبني
ساعات وايده اتمنى انهم ينازعوني
ساعات وايده اتمنى انهم يغارون علي
احاسيس اعترتني فجاه ... وتعتريني في لحظات ..
قد احترم اخي الكبير .. واخاف من المتوسط ..واتحاور مع الصغير واضحك معه
لكن لا استطيع ان اطلب منه اي يخرجني لمكان ما فقط لمجرد التنزه ..

عزيزتي ..
شاكره لج .. هذا الموضوع الرائع
وتسلمين
خويتج/ الشوق

[حلم الطفوله]

ذنيني بما إنك الحكم ...جان وجهتهم للحل الثالث وشجعتهم عليه

صدقني الإخت على كثر حبها لأخوها تحتاج وجوده وحواره وياها وطلعتها وياه...

مشكور أخوي على رجوعك ومشاركتك بالموضوع
ورايك إلي يمكن يغير أراء البعض بالنسبه لهالموضوع:fa42:

بصراحه لو كان عندك خوات كنت بتكون الأخ المثالي بالنسبه لهن:fa51:


الشوق ...إلي كلج رقه وذوق ...:laugh:

يمكن أنا ما أحس بهالشعور وااااااااايد مثلج لأني اعتبر قوم بو آخر العنقود

بس خواني الله يحفظهم كانوا دوم ويااااااااي ...ويا كثر الطلعات والرحلات والسفرات وياهم:fa51:

صحيح كل واحد استقل ببيته وعايلته ...بس صدقيني بيتم ذاك الحب للإخت الصغيره

كافي إنج آخر العنقود ...:blush: الله يحفظج عزيزتي...بس تعالي ليش الإخو المتوسط دوم يخوف:fa52:

[الحساس]

موضوع وايد مهم...

عندي خوات اصغر عني واخو اصغر عني.. يعني البجر بالعايله..

احساسي اني اهتم في والديني اكبر في من اهتم في باجي افراد العايله ولا تسالوني ليش..

اعترف مقصر مهما كان في اتجاه خواتي.. لكن اشوف اخويه معوضهم عن كل شي .. وبالتالي جاسني نوع من التهايز في الاهتمام فيهم.. وهذا هب عذر لي ادري اني اظهرهم بس الي ابغي اقوله
مع الوقت صار حاجز بيني وبين سالفه اني اظهرهم!! مااحيد مول اني ظهرتهم لحالهم .. الا بحاله وجودهم مع الوالده طبعا بالاسبوع مره او اكثر..

احيد اني كتبت موضوع بالفضفضه عن اهتمام الاخ بالاخت .. وهذا لادراكي باهميه العلاقه بين الاخ والاخت .. وطبعامايحس بقدر النعمه الا فاقدها .. والحمدالله ان عندي خوات..

الله رزقنا الشجاعه ونكسر اي حاجز بينا وبين خواتنا..

واخر كلمه والمفروض تطبق وانا اولكم..

مافي اغلى من الاهل ( الوالدين والاخوان) لو شو ماصار هذا دم يربطنا مستحيل نتخلى عن بعض او نضر بعض .... لازم نهتم فيهم ونداريهم...

ودام كل اخ لاخته

[حلم الطفوله]

دكتورنا الحساس

احساسك وشعورك تجاه عايلتك وخواتك جدا جميل

لكن الكلام لازم يترجم ويتجسد بمواقف تحسسون فيه الأهل بهالمحبه

أغلبية العايله تشوفها متعلقه بأخو واحد وااااااااااااايد...لأنه تركزت فكرة إنه حنون العايله

يعني وجود الباقين ضروري ولكن الترابط والمشاعر تكون متذبذبه أحيانا

بالنسبه لك ...سفرك للدراسه فرض عليك الغربه ..وطبيعي بعدك عنهم أكبر عذر يشفعلك

دراستك هالمهنه وتغربك وبعدك عنهم أكيد بيزيد شوقهم لك ...بس من ترجع طلعهم:laugh:

مشكورر على المرور

[الدلووووعة]

صراحة البيت من دون اخوان مول هب شي
نحن فالبيت دوم ناقع ومنقوع طبعا :fa46: الدلوعة تكون امبينهم ^_^
ويوم اخويه الكبير سار عنا عسب يدرس اول اسبوع محد متعود البيت من دونه وانا طبعا
كنت يالسه اقول للوادله اوف ليش جي البيت مستوي ملل ( عاد الوالده على طول ردت هيه ماعندج حد تتظاربين وياه ^_^)

المهم يعني صح انهم ينقهرون من ها الشي من الطلعة طبعا بس
انا ماخليت ها السؤال فخاطريه جان اسئلهم الكبير قالي انتو يوم تسيرون مكان لازم
تحوطون المحلات كلها وبعدين تكرون تتشرون من اواحد وماعرف شو ويعني اللي يسير وياكم
يدوخ من حواطتكم والثاني قال انا يوم اوديكم اقولكم ها الوقت لازم تكونون مخلصين ( طبعا انا واختيه
مايكفينا الوقت يمكن انا يكفيني لنه اسير اشتري اللي اباه وخلاص لاك اختيه مايكفيها انتو طالعو كم الوقت مرات يودونا الظهر لنه ماشي وايد شباب يعني اذا سرنا عالساعة 3 الساعة 4ونص خلاص ويا الطريج وها كله )

بس هم حق سوالف غير الطلعات ينفعون الصراحة غير يوم تيلسين وياهم عاد كل واحد يظهر اللي بخاطره وخاصة يوم يتمعون كلهم :fa34:

وادري اني وايد طولت فالموضوع وخذت راحتي:fa46: ( لني وايد حبيت الموضوع وخاصة انه عن الاخوان فديت اخوانيه )

[حلم الطفوله]

عادي الدلوووووووووعه خذي راحتج:inlove:

الله يخليج حق إخوانج يارب شكلج فرفوشة البيت ...:laugh:

بس تدرين حتى هالسالفه عدنا ؟؟:fa51:

يعني يوم بيوديني أخوي السوق أحسبه يتلعوز بس ما يقول...كاتم فديته:tounge:

بس الطلعه وياهم غير:inlove: كافي إنه اخوي وياي:nerd:

الله يحفظهم لنا يارب

[انامل]

حلمي الطفولـــــــــــــي
لا خليت منج يا قمــــــــــر
:fa41:


الأستاذ ناصـــــــــــــــر
ماشاءالله
هنيئا لأخواتك بك والله يخليكم لبعض ويبعد شر الناس عنكم
:blush:



بقيه الأحبه
مستمتعه في القراءة
:blush:
دمتم أخوه لأخواتكم
هالله هالله فيهن

[حلم الطفوله]

أنامل الإبداع ...فديت روحج:fa35:

بس شو رايج بهالشطار الملونين بالأحمر إلي دخلوا موضوعي وما شاركوا:fa32:

الملهم (http://oasis.bindubai.com/bin/member.php?u=130) , , نجمة دبي (http://oasis.bindubai.com/bin/member.php?u=282) , , ذنـيـنـي (http://oasis.bindubai.com/bin/member.php?u=313) , , ملانـة (http://oasis.bindubai.com/bin/member.php?u=317) , , مزن هتان (http://oasis.bindubai.com/bin/member.php?u=447) , , خــّطاب (http://oasis.bindubai.com/bin/member.php?u=824) , , عافك الخاطر (http://oasis.bindubai.com/bin/member.php?u=1109) , , عايش وهم (http://oasis.bindubai.com/bin/member.php?u=1145) , , نبراس الليل (http://oasis.bindubai.com/bin/member.php?u=1176) , , روح القمر (http://oasis.bindubai.com/bin/member.php?u=1711) , , حركات (http://oasis.bindubai.com/bin/member.php?u=2016) , , حلم الطفوله (http://oasis.bindubai.com/bin/member.php?u=2055) , , فراشة ودّ (http://oasis.bindubai.com/bin/member.php?u=2367) , , العجيبة (http://oasis.bindubai.com/bin/member.php?u=2678) , , المرعب (http://oasis.bindubai.com/bin/member.php?u=2764) , , الدلووووعة (http://oasis.bindubai.com/bin/member.php?u=2998) , , انامل (http://oasis.bindubai.com/bin/member.php?u=3090) , , الفارس2000 (http://oasis.bindubai.com/bin/member.php?u=3159) , , لمّــاح (http://oasis.bindubai.com/bin/member.php?u=3235) , , المقاتل (http://oasis.bindubai.com/bin/member.php?u=3257) , , الشوق (http://oasis.bindubai.com/bin/member.php?u=3392) , , أم خالد (http://oasis.bindubai.com/bin/member.php?u=3446) , , لعوبة2005 (http://oasis.bindubai.com/bin/member.php?u=3720) , , بوسلطان (http://oasis.bindubai.com/bin/member.php?u=4262) , , سيوفي (http://oasis.bindubai.com/bin/member.php?u=4292) , , بلوة حلوة (http://oasis.bindubai.com/bin/member.php?u=4637) , , المتفيجة (http://oasis.bindubai.com/bin/member.php?u=4969) , , بوزايد (http://oasis.bindubai.com/bin/member.php?u=5297) , , نور الإيمان (http://oasis.bindubai.com/bin/member.php?u=5449) , , ناصر الخالدي (http://oasis.bindubai.com/bin/member.php?u=5564)

[عنود الريف]

مرحبا اختي حلم
والله موضوعج ضرب على العوق ..
اثنين من اخواني موول ما جد طلعوني وياهم ..
اخر مرة طلعني فيها اخويه كانت من 5 سنوات .. والثاني مسافر اصلا يدرس برع..
والوالد ريال كبير ما يروم اصلا يسوق سيارة اوحتى يطلع
كله نطلع ويا الوالده والا ساعات ويا بنات اختي رواحنا ..
وعندي اخو من الابو ما يقصر صراحه ويايه .. بس لازم اقووله طلعنا .. وانا ساعات استحي دووم او كل اسبوع اقووله طلعنا .. فبين فترة وفترة يطلعنا .. ما يقصر ..
اختي يوم تحتشر اتقول ما ادري منو يمشي وياهم .. ليكون مودين سبلان وياهم ونحن ما ندري .. لوول
بس شو نسوي ... رضينا بهالشي .. والله كريم ..
تسلمين الغلا على الموضوع ..

[طرفشانه]

مرحبا اختي حلم
موضوع حلو وطرحج له احلى
بس الحمد الله
احمد ربي كل ساعه وحين على اخواني

كل ما اطلب شي منهم سوه لي
يعني نادرا ما يردوني ان بغيت اطلع
وفديت خوالي
ما شاء الله عليهم بعد ما يقصرون
ومره يلست مع خالي واسالته ليش كله اطلعونا احنا البنات والاولاد مخلينهم في البيت عادي
يقولي انتو بنات ما ترومن تظهرن رواحكن وما يصير نحبسكن والولد
بياخذ اليسن ولا بيصد فينا ولا فيكم
وفعلا في وحده من ربيعاتي ما تروم تظهر من البيت الا بشور اخوها
يعني امها وابوها موافقين واخوها لا ما تظهر
وان ظهرت انضربت

بس اتمنى اذا عندنا حد من الاخوان في المنتدي وعنده خوات
ما يقصر وياهن يطلعهن ويستانس وياهن
لانه الطلعه مع الخوات غير عن الطلعه مع الاخوان

والسموحه ان طولت

اختكم

طرفشانه

[بلوة حلوة]

بالنسبــة لي ..

عندي أخــو واااحد :heart: .. وللحيــن ماحيد اني صادفت وياه موقف ..
منعنـي فيه اني اطلع .. سواء وياه أو ويـا خواتي ..
وبـ حكم دوامه .. مانشـوفه الا فـ الويك اند .. ويك اند ايي والي عقبه لاء .!!:fa46:
بـس اخوي تقدرين تقولين انه opeN - MinD:fa47:
فـ مثل ماخبرتج .. مامنعني من طلعه .. ويوم أطلب منه يطلعني عـ طول يقول اوكي:fa34:
ماحيد فـي مرة ناقشني فـ الموضوع ، ليش ؟ ، وين ؟ ، شو تسوين ؟ ، ..
بس اذا ماحددت المكان الي أبى أسيره يسألني وين تبين تروحين انزين ؟!
ومـرات من نفسه *هاي نادرا ماتصير* يودينـاا ويطلعنـاا .. آخر مرة كانت
*سفرة حق لبنان* فـ اجازة عيد الاتحـاااد .. طلعت منه روحه :fa35:
فـ عسب جـي طلعـااتنا كله تكون طلعة بنات .. لان مانحصل ريال يودينا إلا نـادرا ..!:fa36:

.
.

وبالنسبـه لـ باجي الشباب الي يمنعون البنـت من طلعة البيت ..
الأمر اعتقد يتعلق .. بـ غيرتهم:fa35: أو انهم يشوفون ان البنت مكانها البيت :Oo:
انزين البنت شراتكم .. من *البشر *:fa46: .. محتايه تغير جــوو وتطلــع وترفه عن نفسهـااا
مش لازم تـكون طلعتهـاا لـ حايه أو غرض .. شوفيها لو طلعت تغير جـو ؟
اذا ماتبـونهم يطلـعون *طلعة بنات* يعني * بس ماشي ريال وياهم* .. طلعـووهم انتـوا
لو مرة فـ الشهر مش لازم الاسبوع اذا انتـوا ما تأيدون طلعة البنــت من البيت !!
حلــووو انه يكـون في واحد فـ العايله يغـاار على خواته ويخاف عليهم
بس مـش لـ درجة تأثر سلبيــا عليهم .. أو تخليهم يحسون ان هالشي *ظلم* ع قولة بنات اعرفهن:fa36:
!!


.
.

هاللي قـدرت أقوله.. اذا حسيت ان عندي اضافه أو تعليق .. برجـع وبـرز بـ ويهي .. :fa46:

.
.
زين ان عندي اخو وواحد وجـي ولا جـاان مادري شو حياتي لول .. :fa54:
لاني من النـووع اللي يحـب يظهـر وااايـــد .. شاده حيلي يعني ههه :fa51:

.
.

مشـكورة اختـي *حلم* .. عـ الموضوع
يالله بنات طلعـوا حرتكــم:fa51:

[حلم الطفوله]

عنود الريف

الله يعينج يا إختي .... بس البنت إذا ما طلعها أخوها وحافظ عليها ؟؟

من يتوقع بينشد عنها وبيطلعها؟؟ :fa54:

الله يهديهم يا أختي والله يبليهم بحرمه كله تبا تطلع:fa51:

ساعتها بيقول جنة إختي ولا نار حرمتي ...

[حلم الطفوله]

أختي طرفشانه

علاقة الأخوه تقوم على الود والتراحم ...

والله يحفظلج إخوانج ويرزقهم على قد نياتهم يارب ...

مشكوره عزيزتي على رايج وعسى الله يهدي باقي شبابنا ويحسنون علاقتهم ويا خواتهم

الموضوع يمكن ما يكون موضوع طلعه ... بس نحاول توطد العلاقه الأخويه أكثر:laugh:

[لمّــاح]

الــــسلام عــليكم :)

أول شي، انا قــريت المــوضوع اول ماطرحتيه و عيبني وايد :fa44: لكن مابغيت ارد اول شي، بــغيت اشوف ردود الاعضاء و عقب :fa46:

----

انــا بتــكلم عــن نفـسي . .

انا مـــاخذ من الثلاث قــروبات الي تكلم عنهن ذنيني . .

يعني أحس البنت، اتكون حشيمه اكثر و ثجيله و رزينه أكثر يوم تكون في بيتها و ماتكثر طلعاتها ..
و انا من النوع الي ما احب اطلع اهلي في مكان فيه شباب و زحمه، او مكان ادري اني بشوف ربعي فيه و ياما استوت مواقف و ربعي كانو موجودين (( ادري شي عادي و مب مسوي شي غلط لكنه احراج كبير بالنسبة لي )) :fa46:

و صح، انا وياه في نقطة انه نحن الي لازم نداريهم و نطلعهم عشان مايدورون هالشي من برع او من واحد مب محرم، لكن هالشي لازم مايكون على طول، و بحدود، يعني اذا سيرة سناتر لازم اتكون الضهر، او الصبح و في ايام الاسبوع مب الويك اند، عشان الزحمه ..

و البنت مادري ليش لكن احسبها تقدر تعيش في البيت اسبوع بدون ماتطلع، انا عن عمري ماقدر، صح بطيبعتي ك ولد و البنت غير ..
لكن هناك حل، بدال سيرة السناتر، البنات يقدرن يتيمعن في بيت الاهل، هي و الصغارية و بنات خالتها او حد من هلها و الحريم، يتونسون اكثر ..
سؤال يطرح نفسه، شو الاستر و الاحسن، طلعة السناتر ولا يمعة البنات و الاهل ؟؟

و ياما طلبو هلي مني اني اطلعهم، و طلعتهم ..
لكن هناك مشكلة و هي الي خلتني اوقف هالشي و ما اطلعهم الحين ..
صارتلي مواقف كثيره، مثلا، اذا سرنا المكان هذا اقولهم بندش من ورا عشان محد يشوف، و طبعا مايطيعون بحجة انه الباب بعيد و المحل عند المدخل الرئيسي ..
او، يوم بنطلع (( حتى لو مكان قريب )) اقولهم اتغشو او تنقبوا و طبعا ما يطيعون بحجة انه الشيله الي لابسينها ماتخليهم يشوفون و الا هو مكان قريب و ما بيطولون فيه، لكن هالكلام مايدش راسي ،،
يعني بما اني سويت شي زين و طلعتكم، راعوني و راعو مشاعر الاخو و غيرته و تغشو ..
السبب الي يخليني اطلب هالطلب منهم ؟؟

انا شــاب، و اعرف سوالف الشباب ، عيونهم على البنت على طول بغض النضر منو كانت، امه اخته يدته !! :glare:
والله ياما صارت مواقف، شباب ويا بعض، فلان يقول حق اربيعه، شوف شوف اربيعنا منو مركب وياه في الموتر، اربيعه يقول له خاف ربك هاذي من هله !!
ف احاول قد ما اقدر اني اتجنــب هالاشيا، لكن وين الي يفهم ؟؟

انا اؤيد انه الواحد يطلع اخته لكن بشرط اذا كانت تسمع رمسته، لنه في النهاية هو مابيقولها لأ الا لسبب ..

السموحه عالاطالة، و لي عوده اذا لزم الامر ^_^

[حبوبه دبي]

هممممم تبيــن الصــدق !!

اشــوف احلــى الطلعـــات وياخــواني :fa35:

احس انه عندي اخــواااان واحـس براحه فالطلــعه اكيــد من سـوالف الشبـــاب :glare:

بـــس مـــب دووم اظهــر ويــاهم للأســف بحكم عندهم اشغــال ومشــاويــر ،،

وحليلهم مــايقصــرووون بـــس :blush:

بــس نعذرهــم مــرااات !! اكيــد الاخـــو يغــار ع خــواته :blush: شــي طبيعــي ،،

والسمــوحه

[حلم الطفوله]

أحلى بلوه بحياتي:inlove:

الله يحفظلج أخوج ويوفقه بحياته ويسهل دربه دامه يسعد إخته :fa42:

عاااااااااادي حياطي:shocked: قمت ارمس مثلج انا كل يوم رزي ويهج بمواضيعي:blush:

[حلم الطفوله]

وعليكم السلام:laugh:

حشى يا لمااااااااااااح إلا هي طلعه في العمر ....ذليتهم عليها:fa51:

ما أنكر إنه إلي يشوفونه الشباب جدامهم من واقع ملموس ضمن بعض الفئات الله يهديهن

يخليهم يمتنعون ويتهربون من مسؤولية طلعتهم لخواتهم وأهلهم بشكل عام

بس حتى ولو ....الطلعة مب لازم تكون بس لأسواق ...يعني حتى لو تاخذهن بالسياره وتحوط بهن وتشتريلهن شيء حلو من محطة ادنوك مثلا:fa51: ...صدقني بيحسن إنه هالطلعه عدهن بالدنيا

يلسة البيت والأهل مب دايما تحمي البنت ...بالعكس تخليها تقارن حياتها بالثانيات وتتعقد

أعرف وااايدات يعتزن بإخواهن من طلعه وحده طلعهن إياها بالسنه ...واستانسن فيها :fa42:

يالله يا لمااااااااااااح جرب نصيحتي اليوم ...لا اليوم زحمه ...يوم السبت أحسن:laugh:


ترى والله أعلم إنه بناااااااااات هالأيام كلهن يحبن الطلعه ...من الحكره بالبيت:tounge:

[أمواج]

مرحبا و سهلا
:fa47: :fa34: :fa47:
بــ حلم الطفوله

موضووعج توني انتبهت له

والصراحه راحه

وايد عيبني موضووعج
وماشالله برووحج شفتي الاقبال عليه كيف كبير
وهذا إن دل فإنه يدل على شطارتج في طرح الموااضيع
والمواضيع الحساسه بعد
بدش في صلب الموضووع على طوول بدون مقدماات و خراابيط

شو اقوولج يا حلم الطفووله ، البيت من دون اخوااان موول مب شي >>الحين بيستانسون الشباب
بس والله جد انا ما استاانس إلا ويا اخوااني
صح ألقاالي في نص السوالف لطمه عراسي ومن هالقبيل . وصح اضاايق
بس اشتااق لها التصرفااات يوم اكون بعيده عن البيت واكون في السكن .. صدق صدق اتوله على منازعهم حتى .. ساعات اتصل لهم وانا اكون في السكن و اتحرطم عليهم و عقب اسكر ..
ترا يقوولج
- - (( أدعي عليكم من غلاكم وانتوا عليه ماتهونون)) - -

اما عن الطلعاااات فما بقوولج انه اخوااني يعارضوون هالشي
بس مايحبوون كل يوم والثاني اقوولهم بسير المكان الفلاااني يعني بيقولي اخويه مره وحده بودييج و خلصي كل اغراااضج وطبعا لازم بيودييني الصبح عشان الزحمه و الشبااب
وانا وياهم في هالشي .. احس مب حلوه كل يوم انطر وقوولهم ودوني المكان الفلااني ..
تراني ما امدح اخوااني .. ساعات يذلووني ذل على الطلعه .. يعني اذا اطلع ويااهم كل شوي يقولي بسرعه و يالله اتأخرنا ..
اتصدقين يا حلم الطفووله التقرديين ينفع هالايااام
يعني حب الخشووم اييب نتيجه ..
وفي مره سألت اخويه ليش ما اطلعني دووم .. يقولي انا عادي بودييج بس مكان زحمه و مكان اتوقع اشووف حد من ربعي لو تمووتين ما وديييج .. لانه مار بهالموقف يمكن 3 مرااات و احس صدق صدق يفتشل، مع انه اكون ساتره عمري بس يفتشلون يوم يشوفون حد من ربعهم ..

يعني خلاااصه كلاااامي انه الاخواان يوم مايرضوون يودوون خواتهم إلا إذا كان في سبب و سبب يضاايقهم فهم يحاولون يتجنبوون المواااقف اللي تفشلهم ..
عشان جيه يكرهوون كلمه طلعني ..

فأنا عادي عندي وما اتضاااايق من هالشي ..
تبين الصراحه ساعات اقوول حق اخواني (( ماعليه بيي يووم وبتحتاايووني ))

والسمووحه شكلي طولت :fa46:
مب من شي .. الموضووع وايد عايبني
:fa34: :fa34:

[عايش وهم]

السلام عليكم

بن دبي ورطنا بخاصية زوار الموضوع :glare: بدورلي حـــ :devil: ــــل حتى بنشرة الأخبار افضحونا :fa39:


.... اختي حلم الطفوله ..

على الرغم من أن المنزل يخلو حاليا من حس الأخوات إلا أني أعترف أني كنت من المقصرين في السابق في هذا الجانب البسيط الذي كن يطلبنه أخواتي عمر الله بيوتهن بالسعادة و الستر ..

لم تكن هناك مشكلة في الطلب بحد ذاته فالأخت لا تريد يوم كامل و لا حتى نصف يوم ربما هي سويعات من شم الهواء الطلق برفقة أخ حبيب تشعر معه بالأمان و راحة البال و ليس الطلب نابع من ضيق على حد تصوري إنما هي الرغبة المجردة من أية أسباب مادية هي فقط في نظري الخاص أسباب نفسية ناجمة عن التعلق بذاك الأخ و حب تجربة رفقته خارج المنزل و الإستمتاع باهتمامه و احتوائه لها خارج حدود المنزل ...


كنت أفهم هذا الشعور من جملة عتب كن يقلنها "عافانا الله عنك طلعنا شويه"



مرات كنت :Oo: أنزخ ..

غريبه يالس اليوم ما طلعت ..
.. حرام يعني الواحد ييلس وياكم ؟
يعني متوله علينا .. خلاص قوم طلعنا ..


أكاد أجزم أن الأخوات اللائي تذمرن في ردودهن في هذا الموضوع و صاحبته التي لديها حساسيه تجاه الإدارة :glare: أنهن يطلبن هذا الطلب من إخوتهن بوقت غير ملائم (لحظه لحظه لا تاكلوني :Oo: ) و السبب أن الأخت عندما تشعر أنها تريد الخروج مع أخها " تنط " لتفاجئ الغافل بالإقتراح الصغير فمن الطبيعي أن تكون ردة الفعل ( هااا ؟ لا لا مشغول مواعد ربيعي سيارته في الكراج و بمر عليه .. أعذارنا ع طرف إلسانا :devil: ما ننغلب ) فلتجرب كل أخت مع أخها هذه الخطة ..


.. قومي بالإتصال هاتفيا به و لا تواجهيه ..

# ألووو مشغول ؟ (عنبوها اللقافه)
- هي ويا ربعي .. شو تبون ؟ (عنبوها الوغاده)
# خلاص يوم بتفضى اتصلبي .. شي في خاطري و أباك تسويه (لا تقولين تييبه) تراه ما بيرد يتصل .
- خلاص إنزين .. بوفف طو طوط (سلامي عالدفاشه)

.. سيقوم بالإتصال .. فضولا و ليس شهامة :fa46:

# ألوو ها شو مستوي ؟ (اونه مهتم)
- ماشي بطلب منك طلب بس لا تردني .. (فقيره غمظتني)
# قولي شوو (الواد ده حمش أوي)
- (ركزوا عالكلام) ماشي أباك تشوف وقت يناسبك الاسبوع الياي تكشتني فيه و أنا أحس إني وايد بستانس وياك مادري ليش .. ضايجه أنا .. (واسكتي و لا تزيدين كلمه)

بإذن الله ستكون ردة الفعل جميلة .. بالنسبة للإخوة الدائمي الرفض فهم يتنرفزون على الغالب بسبب طريقة السؤال و الطلب المباشر بدون إشعار مسبق فصدقا قد يخرج معكم و يتنزه و لكن بلا مزاج و إن حدث و كان هناك موعد مسبق فهو سيهيئ نفسه نفسيا و ستكون النزهة أروع ما يكون و ليس (يللاا يللاا بسرعه مستعيل أنا)


المشكلة في طريقة الطلب و الوقت و لا أعتقد أنه يوجد شاب يكره التنزه مع عائلته
إلا قليلي الذوق

مب جنا اتبلحنا في هذا الموضوع .. :alien: .. شباب وينكم ؟ الفزعه




اخوكم عايش

[حلم الطفوله]

المتفيزره على العرقوب

جان:blush: من هالكلاااااااااام الحلو:inlove: شكرا من الأعماق

عن نفسي فأنا مثلج ما أتخيل حياتي من دون إخواني الله يحفظهم ويحفظ الكل

الطلعه وياهم ولو حتى بالسياره لها طعه ونكهه ما تتعوض ..بالعكس تفاصيلها تكون محفوره بالذاكره

بس سيرة الأسواق وياهم محدده طبعا بالوقت:fa32: يعني تحصل عند أحسن العايلات

وبيني وبينج صدقهم ..الأسواق يبالها بارض وهم مالهم بارض

بس تدرين ليش طرحت هالموضوع تحديدا ؟؟ لغرض في نفس يعقوب:fa42:

علشان أهيئ شباب الواحه إلي دخلوا وما ردوا للطلعات الإجباريه عاجلا أم آجلا مع الحرم المصون

طلعات الأسواق خصوصا...بيشترون للبيبي وللعيد

طلعات الحدايق عشان اليهال يستانسون كل أسبوع مرتين على الأقل ..عيالهم من بيوديهم

طلعات مشتريات المدارس والمكتبات واللوحات والشفافيات

وطلعات .؟؟؟؟؟؟؟؟؟؟ اتعقدتوا من الحين صح:fa43:

أقول أحسن شيء اتسوونه الحين طلعوا خواتكم أحسن وونسوهم :fa42:

شاكره لج مرورج إختي إلي كان خفيف على القلب:blush:

[راعي الزعـامه]

السلام عليكم

أنا عن نفسي يمكن أطلع ويا اخواتي احيانا
صح الطلعة وياهم يمكن اتكون ممله في بعض الاحيان ... :fa52:
لكني احاول اخفي هالشي وماعطيهم في الويه واقولهم طلعتكم ملل ..
وعموما انا نادرا ماطلع وياهم .. يمكن في الشهر مرتين بس :fa46:

واذا قالولي طلعنا .. يمكن اوافق اذا كان مزاجي يسمح .. ويمكن ارفض اذا كنت مب متفيج ..


وعن بعض الشباب اللي يشوفون الطلعة ويا خواتهم شي عيب و يمكن يسببلهم الاحراج
أنا اشوف ان هالنوعيه يمكن يكونون مرضى نفسيا .. لان الطلعة ويا خواتك انا اشوفه شي عادي ولا يمكن بأي شكل من الاشكال يسببلك الاحراج ..

وايضا يعتبر واجب على الاخو ان يطلع مع خواته .. عشان يحسون ان عندهم اخو وراهم قادر على حمايتهم وتحمل مسؤولياتهم في يوم من الايام ..
وبما اني الولد الوحيد بين خواتي والريال الوحيد في البيت .. فتقريبا انا بمثابة الوالد عندهم .. فاعتبر هاي مسؤولية كبيرة عليه انا تحملها ..

والله يخليلي خواتي مهما اتكلم ما بقدر اوصف حبي لهم .. :inlove:

وشكرا جزيلا اختي حلم الطفولة على الموضوع الرائع .................

تحياتي لج ,,

[عنود الريف]

اخويه عايش وهم ..
اعطيك نتيجة خطتك وانا اللي مجربتنها يمكن من كم من سنه ..
اسوي نفس الحركه .. اصلا اذا كان مشغول او وياه حد ينعرف من رمسته ..
هااه شو ؟
مشغول ؟؟
هيه شو تبين؟؟
ما شي بعدين بخبرك..
واشكره يطنش لين ما يرد البيت ..
ويوم اقوله وهو في البيت .. يقول يصير خير .. اذا ما عندي شي .. بوديج ...
وعفانا الله طوول وقتهم شغل..
واللي يسمع بالشغل يطيح واقف ...
فخطتك ما تنفع ويا اخواني .. للاسف :fa43:
تسلم اخويه ..

[هزاايم]

ربي يسلمج يالشيخه سجلينيه بين المعجبين بج قصديه بالموضوع:fa34:
يعني باختصار بلا لف ودوراان أنا ألف الحمد والشكر له مش من النوع إلي يحب رووحت المولات والسناااتر
يعني حليلي استانس على عزيمه على كرك وروحت الحدب ولو لو وده يفرحني نرووح المزرعه جدى الإسطبل والخيل<<<<هذي المنطقه محظووره عليه:fa46: بالخشه نروحها
وفديتهم خواااني ربي يحفظهم من كثرهم هم إلا إثنين لكنهم يسوون عنديه اكثر >للعلم قبل شهور معدوده عرفت طبيعتهم وعاشرتهم بحكم الظرووف إالي مرت علينا يعني قبلها مش كنت عاارفه عنهم غير إن هذا فلان الفلاني أخوج إي نعم وخلاص < والوالد مش مقصر يعتبر أخويه>>هذا الريال الطيب كل حاجه اعرف عنه لووولز دلووعته

أخو أكبر عنيه ومانشوووفه إلا بالإجازات لأنه يدرس ومش معانا بالداار لكن فديت خشمه هو لي يذكرني بالعيد والمناسبات إذ قاصرين شي ونرووح المولات >>لكنيه ماتسوق من خااطر شراات تسوقي بالسفراات لأنه شكلي غلط بنت مع ولد والكل يتحرانا واحد مع خطيبته وياما قالوها خاطريه افلعهم لكن احتراام لهذا الأخ ابتسم أقول لا إخواان عسب كذى مااطلع معه للأسواق<<والصرااحه عن طلعات للمولات أكيد اكون متغيشه لو بالويك إند وزحمه وحشره ولمه وياااما صاادف يشوف ربعه لكن يتلاحق الموقف يقولي دخلي المحل وأنا لاحقنج فأفهمها

وأخ اصغر عنيه لكن ماشاء الله عليه يعتمد في بعض السوالف>>استانس عالطول و الهيبه رغم إنه 13 سنه<<وهو شكله شااق الحلج على هذي المواصفات>>كنه موتر<<لو طلع يرجع ويقولي هزاايم تذكرتج اليوم فهذي لج وش تتوقعون منه غرشه ديو ولا حلاوه باتسم بويه وأنا بخاااطريه اضحك لكن 13 بتعقد وانا مش قد المسؤوليه بغيبت الوالده ماباليد غير ادعي ليه شراات اليده والصراااحه هذاا غيووووووووووووووووور بدرجه اتمنى يحسدوونه >>الله يعين حرمته<<

بس طلعااتنا مع الوالد غييييييييييييييير ناخذ راحتنا يعني انا الصرااحه احب يوم الوالد يقول رايحين المرين ووك>>تعرفونه أكيد يوم الجمعه كيف يكون<<صح إن أول حاجه نحااول نغير الطلعه لكن يصر لأنه هو إلي مشتهي يروح إهناك و معااه محد يتغشى >>شفتوا أبوو شراته فديته<<يقول كذى ولا كذى إنت متغطيه وحاشمه عمرج محد رااح يقرب ولي يطالع هو المأثوووم لأنج مش مسويه شي(ن)غلط :fa42: أناا معااه دامج مش حاطه الأخضر والأحمر على ويهج ولابسه عبايه حشيمه مش كأنج رايحه عزيمه خلاص يا ابووج حصلتي التصريح من السلطاات العليا

وبكذى هزاايم ماقصرت بالرد صح:fa46: "نغزه يعني قومي يابنت وشلي بعمرج وطلعي من اللنك"
تسلم يمنااج يالشيخه والسمووحه عالإطاله وربي لايهينج ويحفظج من كل شر
وعسااج أزود

[الملهم]

السلام عليكم ورحمة الله وبركاته

الموضوع جميل واعجبني ..
كتبت رد قبل هذا بس امتسح علي ^__^ ..

انا لا انظر ان هناك عيب في طلعة الاخوان مع خواتهم ..
بل ان ذلك حق على البنات ان يفرحوا مثلما نحن نفرح ..

بالنسبة لي اذا طلبوا اخواتي ان ارافقهم واطلعهم افرح واسعد بذلك
لانني سافعل شيئا يفرح اخواتي ويسعد قلبهم ..

الاخوات ليس لهن الا اخوانهم ..
فإذا الاخوان قسوا على الاخوات فإنهن يسبحثن
على من يستطيع ان يسعدهم .. وتبدا المشكلة

أشكركِ على الطرح الجميل
واعجبني موضوعكِ الرائع ^_^

[أكسجين]

.. مساء الود ..

بما اني انحرمت من هذا الشعور ,, فـ سـأكتفي بالقراءة فقط ,,

اخوي الوحيد يصغرني بـ ثلاث سنوات ,, وهو في بداية المرحله الاعدادية !

الله يخلي لنا بابا :fa41: ,,

.. حلم الطفوله ..

جميل ما طرحتيه هُنا عزيزتي ,,

تسلم اناملج ..

ودمتي بـ تميز :fa35: ..

مودتي .. فراشة

[حلم الطفوله]

أخي الكبير عايش وهم

استمتعت وربي بقراءة ردك على الموضوع:laugh:

فحوارك الأول كان يدور بيني وبين أخي ...ودائما ما كان يختم بنفس العباره مني "عافانا الله عنك طلعنا شويه" :tounge: يعيبني أقصص فيه كيفي أخوي

ومثل ما قلت إنه طلب الطلعه لازم يكون بالوقت المناسب .... علشان تكون طالعه من الخاطر وتسجل في شريط أحلى ذكريات الطلعات ويا الإخوان

وشكرا على النصايح إلي قدمتها للأخوات وعلى المعلومات المهمه في سالفة كشف أعذار الإخوان:laugh: ...

والله يحفظ الإخوان لخواتهم ....فعلا كلمة أخ يوم ننكفخ لها حلاتها...كافي هالحنان الأخوي إلي لمسته في سطورك...فعلا شاكره لك مرورك

[حلم الطفوله]

]أخي عاشق القلم[/COLOR]

أحييك وربي على هذا الحب الكبير وحرصك على خواتك ...والله يدوم الود بينكم:laugh:
وعموما انا نادرا ماطلع وياهم .. يمكن في الشهر مرتين بس

وصدقني هالمرتين بالشهر وإلي تحاول فيها إنك ما تحسسهم بالملل إلي فيك بتحصد فيها حب خواتك بسهوله وبتكسبهم كأب وأخ وصديق

شاكره لك مرورك والله يحفظك لأهلك

عنود الريف:laugh:
لا يأس مع الحياة ولا حياة مع اليأس
حاولي مره ومرتين وثلاث وكثر الدق بيفج للحام صدقيني
صدقيني بعدج إخته وما بيرضى إنه يزعلج

[حلم الطفوله]

عزيزتي هزايم:laugh:

الله يحفظلج إخوانج والوالد ...وعسى أيامج كلها أفراح ومسرات

استمتعت وربي بقراية ردج وما فارقتني البسمه أبد وأنا أتخيل هالمواقف إلي ذكرتيها مع كل واحد منكم

ما دام السلطات العليا واثقه وموافقه من قدج:fa42:

[حلم الطفوله]

اخوي الملهم

المهم إنك رديت وكتبت ردك فهذا بحد ذاته أسعدني:fa42:

الله يكملك بعقلك ويحفظلك خواتك لانه الحياة بدونهم صدقني ما لها طعم:blush:

شاكره لك مرورك والله يوفقك

عزيزتي فراشة ود

بالعكس عزيزتي الله يخليلج هالأخو ويكبر ويطلعج كل مكان تحلمين اتسيرينه

بس ما أوصيج علميه من الحين يطلع خواته:fa42:

الله يوفقج إختي

[تحفه]

عليكم السلام و الرحمه

بصراحه انا اعذر الشباب .. لأنهم ما يبون يظهرون خواتهم .. لأن تفكير معظم الشباب *أقرانهم* مش حلو للاسف

بصراحه صريحه صار لي موقف فضيع وايد

انا خواني صغار .. واصلا نحن ما نظهر وي بعض الا مره في الاسبوع ومرات بالشهور ما نظهر لأنهم اونهم كبار وما يبون يظهرون الا وي ابويه ولا ربعهم ولا ولاد خوالي وجي .. وحمدلله خواني متفهمين و عاقلين .. بس الحين ما ادري شفيهم صايرين وايد غيّارين

الموهيم الموقف إن الله يسلمكم

كنّـا نشتغل قروب شباب و بنات قبل فتره وكنا مشرفين على نشاط معين تبع المهرجان

ودوامنا كان من الصبح الساعه تسع لين الساعه 12 فليل !! يعني شي طبيعي إنشوف أهلنا .. بحكم إن شغلنا كان ميداني يعني مش في مكتب او مكان مستقر !

يقوولكم مره واحد - الله يهديه شو صار له -

ياب اخته وهي تقريبا بعمرنا يعني مب ياهل .. وربعه كانو يالسين بعد في موقع الشغل .. ما ادري اشفيه الولد خبل مينون .. قال حق ربعه هاي اختي !!

ربعه سكتو عنه ما قالو له شي .. بس انا كـ بنت .. وايد الموقف لوع جبدي وقززني .. كـ أنه بهالطريقه يعرض اخته لهم !!
اوكي محد كان منتبه لها ليش تشد انتباهم لها ؟؟ .. حتا لو كانو مش مفتكرين فيها بيلسون بيطالعونها صح ولا لا!!

وربعه من وراه قرضوهم لين ما قالو بس !! .. حرام يعني كسرت خاطري البنت :fa36:

في هالموقف هالولد واااااااايد غلط غلطه كبيره بعد ..

وبنفس الفتره وبنفس القروب ..

مره واحد من الشباب شاف اهله .. وشي طبيعي بيسلم عليهم خاصه انهم كانو حريم كبار اعتقد عماته او شي جي ..

الموهيم هو سلم عليهم ويو يشوفون شغلنا .. وواحد من الشباب يلس يعلق على البنات الصغار - مب صغار يعني قدنا - ويقول كيف هايلا اهله !! ما يشبهونه !! هاي شكلها مؤلوف !! وهاي ما ادري بلاها .... وتميت انا مصدومه و مصعوقه من تفكيرهم !!

حتا نحن البنات جدامه ما استحا على ويها .. قلنا شي شباب جيه .. بس روح ارمس وي ربعك

و الاولاد على فكره وايد ايفسرون الاشياء على كيفهم .. اي وحده حلوه ترمس في التيلفون اتحروها مغازلجيه ولا خايسه .. اي وحده كاشخه يعني يايه اتغازل .. اي بنت سواء كاشخه ولا جلحه ملحه راكبه سياره بيسوون لها حركات !!

انا من رايي ايسوون للشباب محاضرات شرات ما يحاضرون البنات ..
ولازم يربونهم على التفكير الصح من نشئتهم

والسموحه ياني رقاد ,, احس اني اخربط لول

[الملهم]

السلام عليكم

تعقيبا على كلام العضوة " ام خدود "
قبل مدة في الكلية على ما اظن في رمضان .. في وقت الدراسة الذاتية يعني
جريب العيد .. ما كان عندنا دراسة بس انكمل الواجبات ..

المهم يوم انا جيت لعند المكتبة شفت وحدة ابنيه قندنا ويا واحد اعرفه ويانا في الكلية
على ما اظن هي اخته لانها اشوي تشبهه .. المهم هي جت المكتبة ويا الولد وجلست في الكمبيوتر
وجالسة اتفهمه او تشرحله شيء .. انا الصراحة انصعقت يعني في المكتبة تقريبا 100 واحد وكلهم
من الفاونديشن وهم ربع الولد يطالعونها واللي يطلع اصوات عشان يلفت انتباه البنيه .. واخوها ما ادري اربيعها ساكت لا ويضحك ويا ربعه .. يعني ايش ها التفكير .. ما يغار عليها ..
حتى لو هي تبا اتفهمه شيء .. عندنا غرف فاضية وشيء كمبيوترات ..

الله يهديهم ..
واسمحلولي على الاطالة ^__^

[حلم الطفوله]

إختي أم خدود

يمكن يكون هذا تفكير فئه قليله جدا من الشباب ...بس الأغلب ما شاء الله عليهم يحبون خواتهم وبالمقابل الإخت تفتخر بإخوانها جدام كل الناس

الشاب يمكن يعبر عن حبه من خلال غيرته على عرضه وخواته وهذا الشيء نفتخر فيه والحمد لله

وفي المقابل البنت لازم تراعي الله بنفسها ومظهرها عشان تزيد ثقة الإخوان فيها ...

وموضوعي يتكلم عن الطلعات ويا الإخوان بس :fa42:

شاكره لج مرورج وتصبحين على خير

[تحفه]

بشمو مثلا بيفتخر فيها وهم في موضع عادي .. يعني البنت مب رايحه تستلم جايزه ولاشي
عاديه حالها حال البنات

وصح كلامج .. حمدلله مش كل الشباب جي يفكرون .. وتسلمين على الموضوع الحلو .. سوري نسيت اشكرج

[الجديدة]

السلام عليكم و رحمه الله وبركاته
أختي حلم الطفوله ما تكتبيه يحدث في معظم البيوت مع اختلاف بسيط
بالنسبه لي أنا اعتبرك كلامك صحيح مع بعض اخوتي و لا ينطبق مع اخواتي الباقين
الله يخلي لي خواني هم كثير ما شاء الله عليهم
حد من أمي و أبوي و حد من زوجة أبوي
المهم اللي من أمي و أبوي ثلاثه كبار نعتمد عليهم في السيرات و الطلعات وايد
بس واحد منهم بعد ما تزوج صار ما يودينا مثل أول ما اعرف شو صار له.
أخوي الثاني قبل الزواج يطلعنا و يعطينا اقتراحات للامكان اللي نروحها، بعد الزواج زاد في الطلعات و بعد ما نسي خواته اللي كان يطلعهن صار يودينا المراكز، للاهل و المعارض لانه في نظره ما حد راح يودينا و لازم نتعرف على العالم الخارجي مع الاهل و بحضور مش بعيد عنهم.
الاخ الثالث يودينا و يطلعنا بعد ما نقعد على راسه ساعات لين يوافق

اخواني من ابوي اثنان و لله الحمد
واحد يوافق يطلعنا اي مكان بس لازم نصب له بترول و نتعشى على حسابنا.
الثاني من النوع اللي يستحي حد يشوفه مع خواته في اي مكان فما يطلعنا اي مكان.
بس انا افضل اطلع مع اخواني الي معي في البيت و خاصه المتزوج حديثا .

بعدين احنا البنات اذا ما طلعنا مع الاهل و الاخوه مع من بنطلع مع السواق
اتمنى من الاخوة أنهم يراعوا البنات و يحاولوا أنهم يطلعوهم و لو مره في الشهر
موضوع حلو و تسلم اناملك المبدعه على الموضوع

[حلم الطفوله]

نورتي الموضوع عزيزتي الجديده

ليش الإخوان يتغيرون عقب ما يعرسون على خواتهم؟؟ هذا بروحه يباله موضوع:fa32:

ما أدري بس يمكن التغير يكون لفتره بسيطه مثلا ببداية حياته الزوجيه ...حرمه ومسؤوليه الله يعينه

يمكن أنا ما حسيت بهالشيء لانه أغلب طلعاتي وياهم وبطلب رسمي من زوجاتهم وعيالهم:blush:

الله يهديهم ...الإخت لها حق على أخوها وتكون محتاجه له أكثر عقب ما يعرس ...البعض ينسى والبعض يتناسى والبعض مشاغله تمنعه ... والبعض يخاف من ؟؟؟؟ هيه منها:fa35:

بس الأكيد إنه الإخت لو فقدت حنان أخوها عقب زواجه بتفقد شيء من الصعب يتعوض بمال الدنيا

شاكره لج مرورج عزيزتي ...وما عليج ايلسي على راسهم وذكريهم بواجبات الأخوه يمكن ناسين :fa32:

[حلم الطفوله]

:fa51: دامكم دخلتوا شاركونا بآرائكم :fa51:

[وعد]

الصراحه الصراحه
الاخوان صراحه ما فيهم خير يحبون نفسهم وووووووووووووووووووايد:fa55:


تشكرات اختي حلم الطفولة

[عافك الخاطر]

اممم دخلت الموضوع اكثر عن مرة وقريت الردود ..ما اعرف شو ارد :look:
اممم انا عندي ثلاث اخوان .. اثنين معرسين ..وواحد :fa36: ما احصله الا يوم يبا شي او شي مناسبة ..المعرسين ما اقدر اقولهم طلعوني .. ! تعرفين حريم الأخو بعد :fa44:
احياناً تطلع بادرات منهم وعادي نطلع ..بس ما استانس ما ادري ليش:fa36:
اما الثالث .. نادراً ما يطلعنا.. كله مشغوول وماله خلق :rock: لا تقولين حاولي.. حاولنا واايد:fa48:
عشان جي اتعودت على طلعة الخوات :fa35:
وموضوع ممتع عزيزتي :)
.....
.

[خيال الروح]

السلام عليكم ,,

موضوع رائع ,, واستمتع وانا اقرى ردود الاعضاء
اكتشفت انه اغلب الاعضاء ما يطلعون خواتهم ,,,,
بصراحه احس انه بعض الشباب أنانين ,, يحبون نفسهم وراحتهم :fa55:
واذا فكرو يطلعونج بعد عناء من المحاوله وياهم ,,,
أول شي يكونون مستعيلين ( جنه وراهم شغل الدنيا ) ,, وطول الدرب امبوزين ومكشرين ,,, :fa51:

الحمدلله الله عاطيني أخوان مثل العسل ,, ما جد يوم طلبت منهم يطلعون وما رضوا
الا اللهم اذا كانو متواعدين وي ربعهم يطلعوني بيوم ثاني ,,

وتسلمين عزيزتي حلم الطفوله على الموضوع ,,

,
,

[الـيـاه]

مشكوره ياحلوه :fa35: على هالموضوع

الصراحـه انا استغرب من الشباب اللي من هاك النوع .. يا انه مايطلع اهله لان حاط في باله
ان البنت مكانها البيت .. اونه مايطلعهم عسب ربعه مايشوفونه وياهم ؟

ليش شو بيستوي ترا هلك ظاهرين بحشمتهم :glare:

بالعكس احس جي انت تطلع كبير فعين الناس انك تهتم في اهلك ومخصصلهم وقت للظهره وياهم
يعني في اماكن مابيسيرولها ألا بريال .. فـ حرام تخلي هالشي في خواطرهم
عسب والله انت ماتبا تخلي ربعك يشوفونك :sleepy:!!

منو أولا ربعك وألا هلك ؟
وإذا البنت محتشمه ومالها خص في حـد وسايره لغرض معين وين المشكله ..
مافي شي يقول ان الحرمـه عيب تظهر من بيتها > دامها ماتخالف الشريعة الإسلاميه :crazy:

حمدالله ماعندي اخو عود يطفربي جي لول
بس بعد يعني فالمستقبل لو ياني ريل تفكيره جي ومايظهرني ( برده بيت هله هو وقشاره ) ههه
لا جد :tounge: .. ان شاء الله يكون فاهم و Open mind مب تنك ..

وبس

[دموع قلم]

الحمــدلله والشكـــرلله..

لا يتــردد أخـوانـي أبـدا بالمـوافقـة عنـد طلبـي للخـروج معــه, ولكـن بشــروط وهــي الاحتشـام والهـدف
من هـذا الخـروج, وإن ألتقـى أخي بأحـد أصـدقاءه, اتنحى جانبـا ويسلـم هـو على صـديقـه, وينتهـى الأمر

هـل حـدثـت فضيحـة أو كـارثــة؟!! لا أظـن ذلك.. إذا لمـاذا يخجـل الشـاب أحيـانا عنـدما يخـرج مع أهلـه
إلى أحـد المـراكـز التجـارية, ويفتخـر عنـدما يخـرج مع رفقـاء السـوء.. أو يـواعـد صـديقتـه.. ؟!!

:glare:


تسلميـن حلمــي على الموضوع الـرائع,
ومـا شاء الله نشـاطـك يـزداد يـوما بعـد يـوم

:)

[طفلة من هذا الزمان]

حلــم الطفولـــة ...

استمتعت جـــدا لمــروري .. و استمتعت أكثر لقراءتي ردود اخواني و خواتي ،،

صدق موضوع ياي ع العـوق ،، بس طلع عوقي بسيط مقارنــة بالمظلومــات من حولي //
الحمدلله ان ربي خلاني اكبر اخواني و الحمدلله ان اخواني اونهم مسوين قدر طشونه للعمـر و يسمعون الكلام "بس موب دوووم" .. اثنينه هم اللي يعتمد عليهم و الباجي لولا صغر سنهم جان كرفتهم بمشاويري "أحلى شي الصراحـــة"

أكبرهم هو الطيب الحــبوب اللي ما يردلنا طلب "لكن حسدوه ربعه عفانا الله " و هو صاحب الطلعات الحلوة "رغم شرطه الوحيد تكون داخل امارتنا و لو تموتون ما تسيرون دبي بالذات .. ماعرف ليش ما يدانيها" .. اما الثاني المأساوي .. رغم انه ما يقصر بس ما يصلح إلا للمشاوير السريعة و هي كالتالي:
- خمس دقايق اذا ما خلصتي و الله اروح " عــــــــــادي يسويهــــا"
- الساعة 8 تكونين مخلصه كل شي " مع انه يكون مطلعني 7 و نص"

الحمــــــــدلله على كـــل شي ... صـــــــامدون مع ان اي خطــة مدبرة تنكشف بأسرع وقت و يروح مفعولهــــا ،،

متابعين بإذن الله ... و لنا عودة لا قدر الله :)

[دانة حتا]

حلم الحين من الصبح تمدحينهم عشان هالسؤال

بس معاج حق ليش يزعلون يوم انقولهم طلعونا
انا شخصيا اخواني يفضلون انهم يطلعون مع ربعهم
واذا محد من ربعه موجودين بيفكر ايطلعني حزتها بس

بـــــــــــس صيحي شويه وتمسكني وبيطلعونج تنجح هالطريقه عندي جربيها

تسلمين على الموضوع

[حلم الطفوله]

[
COLOR="Sienna"]إختي وعد[/COLOR]

شكلهم امغصصين فيج من الخاطر:fa55: ...ادعيلهم الله يحنن قلبهم وماشيء صعب على ربنا:laugh: :fa39:

يحبج الخاطر:blush:
والله مالومج ...مشاغل الدنيا تلهي الأب والأخ عن عيالهم .. وأكيد هذا مب عذر مقنع ...
وإلي يزيد الطين بله ...حرمة الأخو يوم تكون :fa55: الله يهدي الجميع
اصبري عزيزتي ...وأكيد بيي اليوم إلي بيدخل عليج وبيقول لج قومي فديتج بوديج وين ما تبين:fa51:
شاكره لج مرورج عزيزتي


خيال الروح
الله يحفظ لج إخوانج ويوفقهم بدنيتهم ...كم تسوى فرحة الإخت بوجود مثل هالإخوان بواقعها
الإخت ما تطلب الطلعات كل يوم ... مره من الخاطر على الأقل بالشهر ما بتضر بشيء :fa42:
مشكوره على المرور

[حلم الطفوله]

عزيزتي الياه

فعلا عقليات :fa32: ؟؟ الله يهدي الجميع
وإن شاء الله ما تضطرين تردينه بيت اهله بقشاره ...ويوفقج بحياتج:inlove:

حبوبتي دموووووع قلم

شفتي عاد ؟؟ الله يبعد هالنوعيه من الإخوان عن حياتج ...
والله يكمل إخوانج بعقلهم ...
تمنياتي لج بالتوفيق:laugh:

[حلم الطفوله]

عزيزتي طفله

احمدي ربج واشكريه :fa42:
وعليج بخطط وطريقة أخوي عايش وهم ..عنده أساليب جهنميه في الإقناع ...طبقيها وانتي والخير رباعه...وأهم من كل هذا ادعيلهم بالهدايه :fa35:
تدرين أسعدني وجودج وايد

دانة حتا
كبرنا على سالفة لصياح والحشره:blush: كل شيء يصير بالهداوه والمسايسه:fa32:
شاكره لج مرورج عزيزتي

[صدى جوفي]

صراحــــة .. موضوعج حلم الطفولة فنـــــّان ،، استغرب ليش ما مر علي قبل :kkk: اجازة نص السنة

الأخ .. شخص عزيز علي ومهما سويت له ما أوفيه حقه

وعن الطلعــات ..) على حسب الطلعات الضرورية أكيد ما يمانع يوديني ولكن الطلعات الخاصة، السوق والجشتات على حسب المزاج .. وقبل طالع لنا بسالفة المواعيد .. ما أدري عنده بزنس والا شو لازم أخبره قبل بوقت...!. بس الحينة متفيج أكــثر، والجملة اللي على لسانه ..كلما أطلب منه يوديني مكان .. خذي سيارتي ، جي ما تسوقين جير عادي؟؟ (غصب :boxed: )
الحمدلله أعمـــامي وخوالي بعد ما يقصــرون لو طلبت منهم يودوني مكان :kcl:

مع محبتي .. صدى جوفي

[حلم الطفوله]

السلام عليكم

وجودج الأحلى إختيه صدى جوفي

الله يخليلج إخوانج وعمامج وخوالج إختيه ...

والحين موضه شبابيه يديده نازله بالصيف ....

يقولج يمدحونها الشرده من البيت عشان ما نشوفهم ونقولهم طلعونا وسفروناbrgll:

شاكره لج مرورج عزيزتي

[جنون امرأة]

حلم الطفولة ..


موضوعج وااايد حلو .. أشكرج على هالطرح ..

أنا عن نفسي (( أخواني )) كل واحد مختلف عن الثاني ..

في منهم : اللي يخبرني قبل .. > يعني منظبط في مواعيده ..

و في : اللي اطلب منه ؛ يتردد فالبداية ؛ تعرفون حركات دلع البنات و الزعل ..
طبعا > يحس بتأنيب الضمير و يطلعني ..

و في اللي لو ترمسين من اليوم لين باجر ما بيسوي لج سالفة .. لانه هالشي يعتمد ع مزاجه ..
و أكثر طلعاتي وياه > مفاجأة ..

و في اللي ايلس فوق راسه لين يطلعني .. > يعني مافي مجال انه يقول لا ..

فديتهم .. الله يحفظهم ..