كريسماس

[الجنيه]

السلام عليكم ورحمة الله وبركاته ,,,

هو الصراحه أنا قلت ما برمس في هالموضوع أكثر بس الي شفته يرفع الضغط ما عليه طولوا بالكم الحين بخبركم بالسالفه ,,
اليوم الله يسلمكم وأنا أفر القنوات في التي في جان أوقف عند قناة نجوم الخليج (طاح حظهم ) عاد شفت فيديو كليب يجمع راكان وفيصل الجاسم وطبعا اسمها كل عام ,,,

أستغفر الله الي يشوفها من دونهم بيقول هاي أغنيه أجنيه مسوايه خصوصا للكريسماس ,,,

عنبو لهاي الدرجه أستوى عادي عدنا أنشارك الأجانب أعيادهم ومناسباتهم لا وبكل فخر واعتزاز ...؟؟؟

الفيديو كليب مصور هني في دبي في المدينه الثلجيه الي في حديقة الخور وكل الزينه والي فيه يدل أنه في دول أوربيه في هالوقت من السنه بالضبط .. لا وراكان مستانس لاوي على بابا نويل يغني ؟؟؟


كيف يسمحون بمثل هالشي ؟؟ ما أحيد أنا نحن يهود عشان نحتفل بهاي الأعياد وأنزين لها في كل مكان محطايه هالزينه سواء في المحلات والأسواق أو بيوت الأجانب ... ضغطي مرتفع سمحولي ...

عجب عجاب ،،

الله يستر لوين ممكن يوصل بنا الحال ...

ما أقول غير الله المستعان ...

[بيور]

وانا وياااج ,,, والله الصراااحة اللي نشوووفه هالايااام شي عجييب ,,
ويين ما سرنا في أي مركز نشوووف أشيااء الكريسمس..
اللي يقوول عاايشيين في مكان أجنبي ,,

استخفوووا ,,

المتفيجة

[لمّــاح]

مــرحبا ..

والله فاتني الفيديو كليب ..

تبين الصراحه الي تزعل ياختيه؟؟

نحن مشكلتنا بــس رمسه، مب في هالشي بس ، في كل شــي !!

تسمعين قرارات بمنع زيادة الاسعار، قرار بإلغاء جميع الوكالات و السماح للجمعيات التعاونية بإستيراد السلع من المصنع و غيره الكثير الكثير، لكن شفنا شي تطبق ؟؟

الجــواب لأ، و النتيجه نشــوفها في الجريدة الحين، الكثير من موردي المواد الاستهلاكية و من ضمنها شركات الماي بترفع اسعارها، و وين الي بيوقفهم عند حدهم؟؟ محد !

نفس الشي هنيه، نرمس و نرمس و نكتب مقالات في المنتديات و الجرايد و نرمس في برنامج البث المــباشر لكن ويــن الي بيــحل هالمشاكل؟؟ محد . .

هـــالأشــكال الي سمحت بهالشي ابدن مب مفتكرهبــشي اسمه دين و عادات وتقاليد، شعارهم هو طــــــــز فــي النــاس و الدين و القيم و الأخلاق . .

شو تبوبه الإسلام، هذا دين تخلف ياعالم، شوفو التحضر . . !

ف ماشي فايده، اذا تبين كلامج يمشي قوليلهم بنسوي مهرجان الأغنية العربية ولا احلى فيديو كليب .. و شوفي جان ماتنفذت الفكرة ..

و سمعت انه مركز برجمان ما احتفل بكرسمس، اذا كانت الرمسه صحيحة فأهني صاحب المركز على هاذي الخطوة الجريئة منه عل و عسى ان باجي اصحاب المراكز يمشون وراه :)

السموحه ^_^

[راعي الزعـامه]

شو بنتريا دام ان اكبر شجرة كريسمس فدبي
لاحول ولا قوة الا بالله
وربي ان نص هذه المظاهر الاحتفالية حق الكريسمس مانشوفها حق عيد الفطر او الاضحى او حتى حق اليوم الوطتي
في النهاية غاية حكومتنا ارضاء الاجانب والسواح المسيحين واصحاب الديانات الاخرى
ولاعزاء للمسلمين !!

[تحفه]

اكبر شجرة بلوط - إشيرة كريسماس- في العالم كانت في دبي في بلد عربي مسلم حذال برج العرب
تم خفظ اسعار البظائع بشكل مش طبيعي في الفتره الاخيره ( من ضمنهم السوق الحره -صدق ولا تصدق-)

اقولج انا كنت سايره قطر يوم واحد لأن عندي تسليم جائزه ونا سايره مريت على السوق الحره في دبي عسب اشتري ميكب وعطور ( قلت بنتهز اسعار الاشيا من دون جمارك وبتشرى على كيفي )

اقولج سرت انصعقت ,, كلشي نازل بشكللللللللل فاااااااااضيييييييييييييي يع

عادي اتعصلين عطر بثلاثين درهم !! اقولج اشتريت الدنيا حتا ابويه يوم شافني فتح عيونه قالي جي اول مره نخليج تتشرين ؟!

وكانت التنزيلات ليوم واحد الي هو اول يوم بكرسيماس

واستغفر لله يعني حق اعيادنا نحن يرفعون الاسعار وحقهم ينزلونه !! ( يوم قلت حق ابويه قالي ترا كل الماركات الي نستخدمها اجنبيه وعندهم هناك اذا اصعاب المحلات والماركات ما نزلو ما يخصمون لهم من الضرايب ) بس ودي اعرف ليش السوق الحره امسوي حقهم ونحن ما يسويلنااااااااااااااااااا ااا !!!!!!!!!!!!!!!!!!!

الصراااااااااااحه

مــــــــــــــــــــــــ ــــــــب شــــــــــــــــــــــــ ــــــــــــــــــي !!

[حلم الطفوله]

وعليكم السلام ورحمة الله وبركاته

والله يالجنية نمشي في الشوارع والمراكز ونحس بنفسنا إنا نحن الأجانب في بلدنا:fa55:

أمشي بالمولات وما أشوف إلا الجاليات الوافده ....وين عيال بلادنا؟؟ انقرضوا:fa36:

بلادنا توفر للاجنبي كل التسهيلات والخصومات في عروض الفنادق والتسوق بالعطلات

بس من يشوفون المواطن زادوا بالأسعار ...يزيدون الراتب ويزيدون الأسعار ...:Oo: هل كيف يستوي

مع إنه هالتطور كله من خير بلادنا والواجب يكون لأهل بلادنا...

من كمن يوم كنت بلغرير ومريت آخذ للصغاريه سينابون:fa37:
الفبينيه لابسه لبس أبوهم نويل:unclesam: ولسانها عورها وهيه تقولي ميري كرسمس وانا امطنشتنها :tounge:

لو شفتو شكلها بس وهي منقهره مني:fa56: زين ما فرتني بلحيتها :fa38:


الله يهدي الجميع

[دموع قلم]

وعليـكم السـلام ورحمـة الله وبركـاته

فـي كريسمـاس ولا غيـره نحـس نفسنـا مو عايشيـن في بـلادهـا وكـأننـا عايـشـين عنـد الأجـانب
النـاس اللـي في الشـوارع, الفنـادق, المحـلات التجـاريـة, البحــر وغيـرهـا الكثيـر من الأمــاكن

نحـط فـي بـالنــا.. أي شي يرضـي الأجـانب يسـوونـه حتى ولو حـرام
وشعـار حيـاتهـم.. ( رضـى الأجـانب هـدفنــا.. انضمـوا إلينـا الآن.. !! )

:fa55:



أختـي الجنيــة..
أشكـرك على مشـاركـاتك الجميـلة دائمــا
وننتـظر المـزيد والمـزيد مما في جعبتــك

:) (http://oasis.bindubai.com/bin/misc.php?do=getsmilies&wysiwyg=1&forumid=privatemessage#)

[تحفه]

بل بل دموع القلم وايد امبالغه ,, نضرتج سوداويه وايد
حمدلله انا اشوف انا بعدنا بخير وبعدها في دنيا تحب الخير وتسعالها

[طرفشانه]

تسلمين اختي الجنيه على طرح مثل هالموضوع



وفعلا بلادنا هدفها الاول ولااخير ارضاء السواح والاجانب

يعني المواطن ما يسوله سالفه بس فالحين يرفعون علينا الاسعار



والمشكله في اعيادنا ما يسون شي

وتعال الحين الكريسميس

كل القنوات مسويه برنامج خاص عشانه

والمولات ممزوره من شجر الكريسميس

وكل سنه يديدة يطلعون اغنيه يديده

وتعالي يوم العيد نتريا اغاني عن العيد يحطولك اغاني سنتين قبل

لا حول ولا قوه شو بنقول غير هالرمسه



ياريت يرد الوعي لاصحاب المناصب ويفهمون ان هذا الشي مب من عاداتنا وتقاليدنا

[هشام بن إبراهيم]

السلام عليكم ورحمة الله وبركاته...

*
*
*
عجبني كلام كذا مشارك هنا في هذا الموضوع ... ولكن شفت من المبالغة ما هو موجود ..
انا معاكم ان دبي بالذات تحتفل بمثل هذي الأعياد اللي لا هي من الدين الإسلامي ولا هي مخلفة علينا ... لكن انكم تقولون ان الدولة موفرة كل شي للأجنبي أو السايح فأنا هوب معاكم ...
الحمدلله حنا عايشين في خير كبير يمكن حنا هوب حاسيين فيه ... ولكن دبي بالذات مدينة سياحية على سمعة كبيرة في العالم لذلك نجدهم يفرون كل سبل الراحة للسايح ... ولكن هل سألنا عمارنا في يوم ليش يسوون جذا؟؟
حنا نظرتنا دايما نظرة منتقدة ... وأحيانا كثيرة نشوف النقط السودة فقط ونجهل أو نتجاهل الأشيا الخيرة اللي يسوونها ...
دبي تسوي جذا عشان ترفع من مستوى المعيشة عندنا ... والحمدلله اليوم حنا في خير نحسد عليه ... هو قاصرنا شي ... نملك أشيا من اللي غيرنا ما يملكها ... بتقولون لكن ما نملك الراحة النفسية لأن الأجانب ماخذين مكانا .. فأنا أقولكم فكروا عدل وعينوا من الله خير ... وترا كل شي وله فايدة لنا ... وفي أمور سياسية انا ما أقدر أدخل في تفاصيلها ولكن اقدر أقول ان نحن ما نقدر نتخلى عن الأجانب خصوصا من دول الغرب وأمريكا ...
شكرا

[حلم الطفوله]

معاكم ان دبي بالذات تحتفل بمثل هذي الأعياد اللي لا هي من الدين الإسلامي ولا هي مخلفة علينا ... لكن انكم تقولون ان الدولة موفرة كل شي للأجنبي أو السايح فأنا هوب معاكم ...

أخوي هشاااام بن إبراهيم

وعليكم السلام ورحمة الله وبركاته

بما إني ذكرت شيء من هذا القبيل في ردي حبيت أخبرك ليش كتبته لأنه ما كان من فراغ

بلادنا الحمد لله مب امقصره علينا .... ونحن استهجنا تصرف الاحتفال المبالغ فيه لأعياد الغرب

مب بس ببلادنا ولكن بالخليج بشكل عام ... برامج وإهداءات وبالمدارس الخاصه اييبولهم بابا نويل :unclesam:

ونقطة إنه الدوله موفره كل شيء للأجنبي أو السايح....فهاي نقطه ما أقدر أنكرها


عندي مثال:
من فتره ذكر كاتب معروف بجريدة الاتحاد عن أسعار الفنادق والخصومات إلي يحصلونها الزوار
في حين نحن عيال لبلاد لو بغينا ناخذ حجز أول كلمه نسمعها الغرف فل ومحجوزه
ولو بغينا انصيف ببلدنا فاحسب مصاريف الفنادق في أسبوع واحد بس وتخيل المبلغ
ولكن سعر التذكره مع الخصومات إلي يحصلها الزاير من شركات الطيران
بعروض مغريه شيء ملموس
في حين لو بغينا نحن المواطنين نسافر برع مثلا ما بنحصل هالعروض المغريه ببلدهم:glare:

هذا مب كلامي طبعا هذا كلام الصحافه
والكاتب نفسه حط إحصائيه بقيمة المبالغ بالنسبه للزاير والمواطن وكان فيها تفاوت عجيب بين سعر غرفه حجزها مواطن وسعر نفس الغرفه حجزها زاير بفندق بدولتنا:Oo:

صحيح إنه بلادنا واجهه سياحيه وخصوصا بأيام المهرجانات والصيف ...
وأغلب الأنشطة والفعاليات موجهه للوافدين للتعرف على ثقافة بلادنا والاستمتاع بإجازاتهم بإماراتنا
كإماراتيين نرحب بالضيف ونحب تبادل الثقافات بين الشعوب بس هالشيء تحديدا يمكن يأثر على عيالنا

كلامي كان من واقع قريته بصحافتنا .... وعل وعسى يكون هالكلام تغير بهالأيام

[الجنيه]

المتفيجة

شو أقولج بيقولون أنه نحن الي أستخيفينا يوم وقفنا بويه التطور وسمعة البلاد ,,,

لمّــاح

لا يا خوي ما فاتك شي أبد القنوات الخليجيه عابدين هالأغنيه عباده فر التلفزون على أي قناة هز بتلاقيها من الصبح فوق المليون مره عارضتنها قناة نجوم الخليج ,,, وبالأخص باجر بيكون عرضها بشكل فضييع يعني تقدر تلحق على المهزله ,,,

وصدقت بالنسبه للي قلته بالفعل كل يومين نسمع خبر يديد وبلوه يديده وننتظر من أصحاب الشأن البت فيها وأتخاذ القرارات اللازمه من أجل الحفاظ على المواطن ومصالحه بس كل الي نسمعه ونقراه
كلام X كلام بنرمس من اليوم لين عشرين سنه ولا شي بيتغير
الله كريم يا خوي ,,,

عاشق القلم
صدقت والله وأكبر دليل أنه ذكرى الاتحاد مرت ولا كأنه لها وجود من دون حس لولا الاجازه جان ما درينا عنها ,,
الله يصلحهم ويهديهم بس ...

[بيور]

طرفشااااااااانه :fa54:

الله يهديييييج ,,

كاااااااتبه الموضوووووووع الجنيه:fa32:

وليس المتفيجة


:fa35:

,, المتفيجة ,,

[الـيـاه]

سلام

لا التصوير مش في المدينه الثلجيه .. مب مسوين فيها جي .. ها في بوظبي
وبخصوص انخفاض الاسعار في هاليوم بالذات !! .. هي مجرد مصالح تجارية لا اكثر ولا اقل

والصراحه الصراحه يعني انا ماجوف ان سوالف الزينه وجي وااااااايد منتشره :huh:
وبشكل فضييع .. هي موجوده في كمن مركز

وبعدين مب شي غريب :look: .. الدوله فيها مليون جاليه عادي يكون عددهم اكثر عنا
ترا نحن عددنا مول ما ايي شي صوبهم .. فـ يعني شي اكيد بتشوفون شي من عاداتهم وغيره


ماعلينا

بس ها كله والمصالح وغيرها بعد مايخصها فالفيديو كليب
مادري ليش مسوينه جي :glare: ؟




.
.
.

[الجنيه]

ام خدود

عاد شفتي كيف !!! يعني منو له ويه يرمس ويقول شي دام أكبر شجره عندنا يعلها الكسر ,,
وبالنسبه لتخفيض الأسعار فها الشي معروف وملحوظ يعني يوم أعيادنا تلاقين الأسواق شابه ضو وكل من يفكر ينهب الخلق بحجه أنه عيد والكل محتاي وبيشتري سواء عيبه السعر والا لا لو نحن عندنا جميعيات حمايه المستهلك ويتأكدون من التجار أنهم ملتزمين بأسعار معقوله مع فرض نسبه تخفيضات إجباريه عليهم في مواسم الأعياد جان نحن بألف خير ,,
شو بنقول أنقلد الغرب في كل شي تافه أما شي فيه خير ما أنهوب صوبه ,,
الله المستعان ....

حلم الطفوله ..

صدقتي عاد الأجانب غازينا غزو الله لا يراويج ,, حشا بدينا أنحس عمارنا أغراب فبلادنا ...
هههه هاي الفلبينه مالت الغرير من أسبوع وهي على هالحاله يقولج كنا سايرين ماذر كير الي في الغرير ومرينا صوبها عاد بدت الأخت حلجها طاح وهي أتقول ميري كريسماس وأنا مطنشه ما جني أسمع ... بنت أختي الصغيرونه أتقولي خاول هاذي شو تبا ؟؟؟ طلابه ؟؟
جان أقول لها هي قالت لي أنزين عطيها بيزات ههههههههه
الله يستر علينا ...

دموع قلم

( رضـى الأجـانب هـدفنــا.. انضمـوا إلينـا الآن.. !! )
فهاي صدقتي وبالفعل الي أنشوفه يثبت هالشي ... شو نقدر أنقول غير الله يرحمنا برحمته ...


طرفشانه
الله يسلمج من الشر عزيزتي ..
ههه والله أمس أرمس عن هاي السالفه للحين أيحطون أغنيه العيد فرحه ,,, مال أول ,,

[الجديدة]

السلام عليكم و رحمه الله و بركاته
الموضوع مثير حقا لأنه يثير النفس
أنا شفت الأغنية لما كنت أفر على احدى القنوات فجلست أطالع من هؤلاء الناس
فلم أعرفهم و لكن أخواتي أخبروني عنهم فأنا لا أشاهد الأغاني بشكل عام
و لكن لما كل هذه الاحتفالات و الفرحة؟
نعم نفرح لغيرنا و لكن من يفرح لنا في أعيادنا خاصة في البلاد الأجنبية طبعا لا أحد.
ما أغاظني أكثر الاعلانات في المراكز و التلفاز و كل شي بها العيد.
و لكي أن تتصروا ما قاله ابني لي ماما لماذا لا يحضر بابا نويل لنا لاعطائنا الهدايا مثل الآخرين من الأطفال، و هل تعرفون كم عمر ابني تقريبا تسع سنوات فبماذا أرد عليه؟
خطأ كبير نرتكبه بترك هذه الأمور تمر مرور الكرام دون التفكر بما تحمله لنا من أمور جديدة علينا
و السموحه منكم

[الجنيه]

هشام بن إبراهيم

أخوي كلامك سليم وصحيح 100% نحن ما أنكرنا فضل البلاد علينا ولا جهودها المبذوله للرقي بالدوله والمواطنين بس ياخوي الظاهر يأثر أكثر من الباطن ,,
يعني نحن أنشوف الدوله شو موفره للأجنبي ومب متوفر للمواطن بشكل ظاهر ؟؟ وهني تبدأ المقارنات .. نحن مب معترضين على سياستهم والي يسوونه نحن معترضين على اللي يسونه من دون لزمه يعني ما أعتقد بعطيك مثال على الأغنيه الي رمست عنها يعني الي يغنون مواطنين ويمثلون البلاد لو هي أغنيه تراها أتمثل الامارات محد بيقول والله هاييل روحهم سايرين بلاد برع ومغنين لا الكل بيقول عن الي يشوفه يعني أنت مواطن ومسلم قبل كل شي ليش أتحط نفسك فموقف من هالنوع ؟؟؟
بيقولون نحن ما كان قصدنا بس المكان مزين بهاي الزينه ... حجه لا أكثر ليش خلصت الأماكن على يصورون ؟؟؟


حلم الطفوله

ما عليج زود كفيتي ووفيتي


الياه ,,
ما عليه سمحيلي انا تراوت لي المدينه الثلجيه ,,
صح أنها مصالح تجاريه لكن بيدنا الخيط والمخيط يعني اذا ما قدرنا أنخليهم يخفضون الاسعار في مناسباتنا أقل شي نضبطهم عن رفعة الاسعار المبالغ فيها ...
صحيح أنه اذا الدوله وفرت سبل الراحه والتسليه للأجانب تكسبهم بس هذا ما يعني أنه نحن كمسلمين أنشارك وياهم يعني أصحاب المراكز التجاريه هاييل مسلمين أغلبهم مب يهود عشان يزينون المراكز ويخلون كل محل على هواه اذا يبا يزين لكن أنهم يزينون المركز هاي مب حلوه


وكل عام وأنتوا بخير ..

[هشام بن إبراهيم]

كلامكم صحيح 100%

انا البارحة رحت ميركاتو ومن زمان ما رحت مراكز ولكن شفت العجب ... شفت المواكبة العجيبة لمثل هذي الأعياد ... واللي والشاهد الله ما شفناها في أعيادنا (الفطر والأضحى) ,,, بس ما نقول غير الله يسلمنا من غضبه والله يسترنا من المهزلة ... شكرا لكم والسموحة على المداخلة

[الجنيه]

الجديده ,,

وعليكم السلام والرحمه ..
أأسف لحالنا اليوم ,, وما أقول غير الله المستعان ...


هشام بن إبراهيم
لما الشخص يشوف بعينه يتأكد ويتقين من مصداقية الي أنقال ,,

شاكره لك تواجدك ..