أقبل الوظيفه اليديده ؟؟!!

[الجنيه]

السلام عليكم ورحمة الله وبركاته ,,

أشحالكم أخواني الأعزاء أعضاء واحتي الغاليه ..
صار لي فتره طويله ما فضفضت لكم واليوم حاسه أني بنفجر اذا ما قلت اللي فخاطري
معقوله الي يصير ويايه ؟؟؟!!
من سنتين وأنا أشتكي وأتحرطم على الوضع اللي أنا فيه في الشغل ،، ما تم مدير ولا مسؤل الا وكلمته عشان انتقل من القسم اللي أنا فيه بس الكل كان يسمع من أذن ويظهر الرمسه من الأذن الثانيه ,,
أييبون موظفين يدد وأنا اللي أدربهم وأتعب وياهم وفي الأخير يرقونهم وينقلونهم أقسام ثانيه وأنا ؟؟ ليش ما تنقلوني يا ناس ؟؟

ردهم يكون : " أنتي senior ومحتايينج عشان اتدربين الموظفين اليدد ما عندنا حد سينير غيرج في الـ Department " أوكي بصبر بتحمل ..

فعمركم شفتوا التلميذ يستوي مدير على استاذه ؟؟؟

لا و ألف لا الى هنا ويكفي الله يلعن الواسطه والي اتسويه ..
بذمتكم شفتوا مسؤل ما يفتهم في الشغل وأيي يسأل الموظفه عن ثلاث أرباع الشغل اللي المفروض يكون عنده علم به ؟؟؟ّ!!!! والله عجب عجاب ,, هذا مسؤلي الي كنت اسوي شغله من دون كلل أو ملل وطبعاً هذا متوظف بعدي لا يملك لا الكفاءه ولا الشهاده اللي أتأهله للمنصب اللي حطوه فيه بس يملك شي أهم واللي هو الواسطه
بس أعجبكم أنا أعتقد سكت كفايه عن حقي ولازم أتصرف ..
قدمت استقالتي وبعت الي باعني .. والحمدلله الله وفقني ولقيت وظيفه ثانيه في غضون اسبوعين كل شي صار بسرعه يعني سويت المقابله وبعدها بكمن يوم خبروني اني أنقبلت عندهم الحمدلله لك يا ربي صحيح أنه المكان يمكن أقل في المستوى من شغلي القبلي بس الراتب حلو والمنصب الي عرضوه عليه بعد أحسن من منصبي السابق وبدون تردد بديت في التحضير له يعني اخلص اوراقي عندهم

وسبحان الله ذكرت السالفه جدام وحده من زميلاتي في العمل السابق ,, ما بتصدقون اللي صار

ما مر يوم الا ومدير الموارد البشريه في المؤسسه اللي كنت أشتغل فيها متصل يطلبني للمقابله لأنه رافض يوقع على استقالتي ... طيب وينك أنت كل هالايام ؟؟ ما تذكرتوني الا يوم دريتوا اني لقيت وظيفه ثانيه ؟؟؟!!!
رحت المقابله وشرحت له كل اللي صار وعلى شو انا معترضه تدرون شو كان رده ؟؟؟
أنتي هربتي من مشكلتج وما واجهيتها " وطول السنتين كنت ألعب ما جني تشكيت لين عيزت " المهم خلاصه الحديث عرض علي عرض حلو يخليني اصير مسؤلة مسؤلي تتخيلون ؟؟؟
وراتب ضعف الراتب الأولي ومميزات توب " شو أبا غير جي ؟"
بس أنا رفضت وعطاني مهله أفكر وأرد عليه خبر مع أني ردي له كان واضح وصريح قلت له لو يصير ما يصير ما أرد هنه ... بس بعدين بيني وبين نفسي فكرت هل أنا تسرعت ؟؟؟
ما أعتقد ..

سامحوني اذا دوختكم وأنتوا تقرون بس فعلاً أنا محتاجه لوقفتكم ويايه ورايكم بهالموضوع ..
أنا مقتنعه أني أترك الوظيفه وبما أني عطيت كلمتي للشركه الثانيه ما بتراجع بس بعدني أفكر هل اللي بسويه صح ؟؟ وهل اللي يقول يود مينونك لا اييك اللي أين منه صح ؟؟؟

أفيدوني بارك الله فيكم

والسموحه

[سيدة الحب]

اختي ما بلومج على اللي مريتي فيه يخليج تطفشين من القهر

بس القرار قرارج انتي قارني بين الحالتين واي كفة ترجحين

ونصيحة ما خاب من استخار استخيري ربج هو عالم بمصلحتج

ومستقبلج

اسمحيلي لو ردي بسيط بس هذا اللي فكرت فيه حاليا

الله يوفقج لما فيه الخير لج يا رب

سيدة الحب

[نبراس الليل]

نفس حالتي

انا مقدم استقالة وللحين مش طايعين يقيلوني :sad:

لقيت وظيفة احسن بوايد عن الوظيفة اللي انا فيها

لكن مابقدر اسير للوظيفة الجديدة الا بموافقة من مديري الحالي:fa55:

ماعطوني اللي استحقه من منصب وراتب عسب يماشون شهادتي وخبرتي

انا أمري غير عن امرك بخصوص موافقة الاستقالة
.......................................

وبخصوص سالفتك

خلي المميزات فصوب اذا تحبين شغلك الحالي فخليك عليه

لاتطلعين منه وتندمين بعدين

او شوفي اذا الوظيفة اليديدة اريح نفسياً عليك بالوظيفة اليديدة

اما اذا عرض مديركم الحالي كان زين واقنعك

وتشوفين ان بعد الترقيه لمسؤول المسؤولين بيكون الشغل راحة

فانصحك ماتظهرين واتمين على شغلك

واعتذري من اصحا الوظيفة اليديدة

وقوليلهم ان الادارة عندكم ماعطتك استقالة ورافضة

ولاتنسين تصلين استخارة لان هذا شغل يعني مش لعبة

هذا اللي قدرت اقولك اياه

والسموحه على قصوري

طارق

[شوق القلوب]

الســــلام عليــــكم...

..

هلا عزيزتي...

أمبين من كلامج الموقف المحيـــر هذا..

بس اذا تبين رايي..

أول شي عليج بالاستخاره...

ثاني شي.. من كلامج عرفت انه شغلج الاولي انت اصلا عايبنج.. بس وضعج هو اللي ما كنت مرتاحه له... يعني دام الحين الوضع اتحســــن.. و المميزات صارت أحسن بوايد... من غير انج عارفه طبيعه العمل و متعوده عليه.. من غير انه المكان أحسن من المكان اليديد.. فشو المانع انج ترجعين له..؟؟؟

اما بالنسبه للمكان اليديد..
انت للحين مب عارفه شو أجواء بيئه العمل اليديده .. ولو اترومين اداومين عندهم كمن يوم.. بس جيه استطلاع للمكان بيكون شي طيب.. ع الاقل بتقدرين اتقارنين بين المكانين و هل انت بترتاحين ولا لا..؟!!

راحتج أولى من كل شي.. أتذكريها في اتخاذ قرارج..
وربي ان شاء الله يكتبلج الخير.. وين ما يكون.. :)

[شاطئ المحبة]

انا من راي شوق القلوب..

استخيري ربج

وانشالله مايصير الا الخير..

واللي ربج كاتبنه لج بيصير..

ووفقج الرحمن..

[شمه]

انا من راي البنات ..استخيري..

و شوفي المميزات و العلاوات مب كل شي.. اهم شي الراحـــه النفسيــــــه..
واللي تشتغلين وياهم.. اذا ما كنتي مرتاحه نفسيا عمرها العلاوات و الزيادات ما بتغطي ع التوتر النفسي اللي عايشتنـــه

انزين شاوري اهلج و شوفي رايهم.. و استخيري..
بس تدرين حلو اتكونين مسؤوله ع مسؤولج.. و عقب اتنقعين خيانه فيهم و اتسيرين الوظيفه الثانيــــه..


:)
شمــــــه

[الجنيه]

سيدة الحب ,,

تسلمين حبوبه على النصيحه ,, أنا متخذه قراري ومقتنعه فيه اللي هو اني ما ارجع مهما صار
بس الي مستغربه منه هو تصرفهم يعني ما حليت فعينهم الا يوم أختاروني فمكان ثاني ؟؟!!
أنا خلاص بتوكل على الله وبداوم في الشغله اليديده وان شاء الله خير..

أنا ما أستخرت لأني مالي نيه ارجع ,,

مشكوره حبوبه على المرور ,,,


نبــــــــــ الليل طارق ــــــراس

الله يعينك واذا تبا بساعدك بعطيك الطرق الي أتخليهم يوافقون على استقالتك غصبن عنهم
خططي شيطانيه ,,,

الله يسلمك أنا ما حطيت سالفه العلاوات في بالي أبد وكل اللي يهمني راحتي النفسيه
صحيح شغلي القديم حلو وأحبه بس هذا ما يمنع أني أغير وأجرب شي يديد ,,

الله المستعان

[بيور]

انا كنت مثلج ..
بس حسيييت نفسي في الفيزيااء والريااضياات أوكييه .. فدخلت هندسه ..

وانتي شوووفي شوو ميووولج ... وادخلي التخصص اللي تبييينه ..

..المتفيجة ..

[حبوبه دبي]

دااام انج عطيتــي كلمه للريال ومــابترديــن للوظيفه
جربــي الوظيــفه اليديده :fa51:

يعنـــي لــو ماقدمتــي استقــالتج مــابيصيـــر كل هذاااا !!! :fa55: والله دنيــــاااا وينه من زمـــــــان :glare:

يبــالج اتأدبيـــنهم :fa32:

بــس انتــي شــوفي ويــن راحتــج اول شــي !!
في اي وظيــفه !!

حســب التعــود ويمكــن ما تتأقلميــن للجــو اليديد :look:

لــو تروميــن داومي كمــن يووم عندهم وشــوفي الوضع كيــف !!
اذا ارتحـتي داااومــي عندهم :fa42:

واللي ربــج كــاتبنه بيصيــر ..

والسمــوحه
:blush:

[الجنيه]

شوق القلوب

هو صح أنا كنت مرتاحه في شغلي القبلي والمكان وايد يلائمني بس بعد الظلم الشفته عندهم مب اشوي
بس بعد مب هاين علي أودرهم ... أما بالنسبه لفكرتج كنت أفكر فيها يعني لو في مجال اجرب كمن يوم في المكان اليديد بيكون أحسن بحاول وان شاء الله يصير مع أني ما ودي أرد ..


شاطئ المحبة

تسلمين حبوبه ،، ما أبي أستخير لأني أخاف يطلع لي أني أرجع شغلي القبلي وأنا ما أبي
الله كريم ان شا ءالله


شمه
أكيد الراحه النفسيه قبل كل شي ،، شاورت أهلي قالولي أنتي شوفي اللي يريحج وسويه مب أنتي تتحرطمين من الشغل القبلاني يعني الحين من دون تفكير أوافق "وهالي بسويه " بس تدرين شو الكشخه لو أنقع الخيانه فيهم بس أخاف الشغله الثانيه ما تترياني لين أسوي الي فبالي ...

[نبراس الليل]

ان شاءالله صولتي للحل الانسب ‍‍‍‍!!!!

وعن استقالتي لو شو اسوي مابحصلها:sad:

لو شو من طرق اجرب

الله كريم

موفقة يااخت

طارق

[شوق القلوب]

هلا عزيزتي..

بالنسبه لصـــلاة الاستخاره... أنا ما أأيد فكـــرتج..!!

صلاة الاستـــخاره هي طلب من رب العالمين عشـــان يوحيلج في أي الأمرين يكون لج فيه خــــير... حتى لو ما كنت ناويه اتردين لشغلج الاولاني... يمكن بعد هالمكان اليديد ما يكون فيه الخيـــر لج..

ونظرتنا احنا البشر وايد قصيره و معتمده على الامور الظاهره.. أما رب العالمين هو القادر على كل شي...

صلاة الاستخاره شي وايد مهم في حياة الانســـان... فلا تتركينها..

وان شاء الله .. بعد الصلاه.. قرري و اتوكلي على الله.. فاذا رب العباد كاتبلج في هالقرار الخير بيسرلج اياه... اما اذا ما كان فيه الخير لج... بيوجهج للشي الصح..

و الله يوفقج..

وطمنينا عليج.. :)

[نبراس الليل]

أضيف على كلام اختنا شوق القلوب

الرسول عليه الصلاة والسلام وصانا ..بصلاة الاستخارة مع استشارة الناس كما ورد في الحديث

ومثل ماقال الرسول عليه الصلاة والسلام بالمعنى مابيندم عبد استخار ربه

يجب ان تقومي بصلاتها مرارا وتكرارا

وليس الصحيح كما يظن بعض الناس

انه عندما نصلي الاستخارة يأتينا حلم ويقطع حيرتنا

هذا ليس صحيح إنما عندما نقوم بالصلاة ودعاء الاستخارة

إما ان تتعرقل الأمور إن كان شرا لك
إما ان تتيسر الأمور إن كان خيرا لك

أو ينزل الله السكينة على قلب العبد المستخير

إما أن يحس براحة تجاه ذلك إن كان خيرا لك
إما أن يحس بعدم الراحة تجاهه إن كان شرا لك


وكما قيل

شاور سواك إذا نابتك نائبة
يوما واذا كنت من اهل المشورات

فالعين تنظر مانأى ودنى
ولاتنظر نفسها إلا بمرآة


المرآة هنا هي أعين الناس ومشاورتهم

موفقة يارب

طارق

[شوق القلوب]

اضافه رائعه.. أخوي طارق.. :)

[الحساس]

الله يسهل امورج كنتي في شغلج الاولى او اليديد..

اهم ما على الانسان راحته..

الاهم من كل الي صار وبيصير.. انج اذا اخترتي احد المكانين .. لازم تتاكدين انه على اقتناع تام .. عسب لا ايي يوم وتندمين على شي.. ووكلي امورج للرحمن .. الله سبحانه ماينسى عباده الصالحين..

[الجنيه]

المتفيجة

تسلمين حبوبه

حبوبه دبي

شورج وهداية الله ,,,
بتوكل على الله وبقبل بالوظيفه اليديده

نبراس الليل ,,

الحمدلله أتخذت قراري وصليت استخاره
والحمدلله الأمور تيسرت وقريب بداوم
أدعولي ,,
بالنسبه لاستقالتك ,, الله يعينك ويسهل أمورك ان شاء الله ,,


الشوق ,,
تسلمين حبوبه على المعلومه الطيبه
الصراحه أنا كانت عندي فكره خاطئه عن صلاة الاستخاره الي هي دارجه عند الأغلبيه
أن الرويا تكون مثل حلم يعني ,, بس بعد ما سألت وعرفت متى المفروض أصليها توكلت على الله
وكملت أمور الوظيفه اليديده ,,

الحساس

أكيد الراحه في مقدمه كل شي
الحمدلله عن القناعه فأنا مقتنعه على الآخر وأطلب التوفيق من الله ..

تسلمون على مروركم وأبداء آراءكم
لاخلا ولا عدم

[شوق القلوب]

أخبـــار طيبه ماشاء الله ... :)

ربي يسعدج..

[نبراس الليل]

مبروك اختي الجنية

وان شاءالله تتوفقين في الوظيفة اليديدة

فرحتينا عن جد دعواتنا معاك وين ماكنتي

طارق

[الجنيه]

شوق القلوب ،،

تسلمين حبوبه..


نبراس الليل ،،

الله يبارك في حياتك وتسلم يمناك

[خيال الحب]

بالبركــه:)

[الجنيه]

خيال الحب ,,,


الله يبارك فحياتك وتسلم على المرور

[العجيبة]

نصيحه مجرّب .. لا اتطلعي مواهبج واتقوليلهم انا اعرف واعرف ، لان بيعتمدون عليج بشكل كبير وعقب بتتوهقين مثل ما صار لج في الشغل الاولي وبتحسين ان كل الشغل عليج وانهم ظالمينج ..
اللي يعطوج اياه من شغل سويه وبسسس مب كل شي تقوليلهم هاتوه انا اعـرف وانا بسويه !!

والله يوفقج ..

< قمت انصح بعـد خخ

[الجنيه]

العجيبه ,,
أفا عليج لا أتوصين حريص يقولج لا يلدغ المؤمن من نفس الجحر مرتين ...

وخلاص تعلمت درسي في الحياه أسوي المطلوب مني بلا زياده او نقصان أما شغلات الضمير ومساعدة الغير هاي مخلتنها على ينب ما يخصني بهم ...

[الاسطوري]

السلام عليكم ..

زين سويتي فيهم ، اللي مايقدرج لا تعبرينه ومثل ماطنشوج طول هالمدة
عامليهم بالمثل وخليهم يدورون حد يغطي مكانج والشغل اللي
كنتي تسوينه وإذا ماعيبتج الوظيفة اليديدة
ترا يقولون مكان الحرمه
بيتها ريحي
عمرج وخلي عنج التعب ترا ماتسوى على الواحد يتعب نفسيته وعمره على
شي مايرزى وفي الأخير اييج مدير مايخصه ويتأمر عليج
والمثل يقول لو وصلت البنت المريخ
مردها للطبيخ
:vampire:

الاســـطـــوري
أخوكم

[الجنيه]

وعليكم السلام ورحمة الله وبركاته ..

الأسطوري ...

وأنا أقول شو بلاه الموضوع منور ..
الطيب عند ذكره توني حادره واحة الألعاب تذكرت لعبة السجن :fa56:

صدقني من يومين مكلمه وحده من البنات الي ويايه في الدوام الجديم أتقولي المسؤل يصيح دم مب عارف شو يسوي بعمره ... ودوم يطريني .. قلت لها الحين بس عرفوا قدري ؟؟؟!!!

الصراحه مثلك عجييييييييييييييييييييب حلوه هاي لو وصلت البنت المريخ
مردها للطبيخ عاد أنا أحب الطبيخ ومن عقب رمضان ما حدرت المطبخ خير شر ... جني باخذ بشورك وبريح في البيت مليت من الشغل :fa55: بس تعودت على الكراف شو اسوي ...
الحمدلله مرتاحه في شغلتي اليديده

ادعيلي بالتوفيق