حوارات بين الطالبة والمعلمة

[أمرين]

السلام عليكم ورحمة الله وبركاته ،،،



كل الحوارات التالية تحدث بالحصة وبين الطالبة والمعلمة :


ـ أستاذة ما فهمت الدرس
ـ أكيد ما فهمتيه..هذا من الهذرة والسوالف والسرحان و الضحك بالحصة


ـ أستاذة ممكن تعيدين اللي قلتيه ما سمعته
ـ أكيد ما بتسمعيني ..إنتي وصديقاتك بس تسولفون ..شلون بتسمعون؟


ـ أستاذة .. ممكن أروح الحمام؟
ـ يعني ما افتكرتي الروحة إلا الحين...بعد الحصة روحي،انتو زي الأطفال رايحين يايين على الحمام


ـ أستاذة ..ممكن اشرب ماي؟
ـ يعني ما صرتي عطشانة إلا ألحين..أحسن خلك عطشانة عشان ما تسولفين وتتكلمين


المشهد :الأبله شغلت شريط (كاسيت) للطالبات ...واحدة من الطالبات قامت وقالت:
ـ أستاذة .. الشريط اللي سمعتينا إياه من شوي ما كان صوته واضح
ـ لو انتم توقفون الإزعاج والكلام اللي صاير بينكم في الفصل كان سمعتوا


أستاذة منهجنا صعب...خططيلنا على الكتاب-
من قبل المعلمة فيه 3 ردود لهذا الطلب:
الرد الأول:شووو؟؟؟اخطط لكم؟؟أطفال انتو.؟؟
الرد الثاني:إنتي وحدة كبيرة..صرتي بصف (...) لازم تخططين بروحج
الرد الثالث:ما في تخطيط ..كل شيء معاكم احفظوه


ـ أستاذة..دفتري ضايع..وش أسوي؟؟
في هالحالة الأبله ترد بإحدى هالثلاث ردود:

الرد الأول:هاه..نعم؟؟! وش تسوين؟؟شو رايج اروح بيتكم وادور عليه؟؟لا انتي دوري عليه وانا شذنبي ان كان ضايع؟؟أنا اللي ضيعته؟
الرد الثاني: لا لا,,الحمد لله..ما عندي دفاتر بمكتبي انا طرشتها لكم يوم الأحد اللي فات..
الرد الثالث:ترى ان مالقيتي دفترك..راح تعيدينه لي كامل


المشهد/ بنت تمسح السبورة ومشتطة ..بعد ماخلصت من التسميح:
ـ أستاذة..ممكن أغسل يدي(البت اللي تسأل كانت تمسح السبورة)
ـ أنا أعرفكن يا بنات ..إذا تبغون تطلعون تسمحون السبورة..لا ياحبيبتي مافي طلعة..خذيلج كلينكس


ـ أستاذة..الفصل حار ما نقدر نستوعب
ـ شايفيني أنا المصلح اللي يصلحلكم المكيف؟؟روحوا الادراة وقولولهم ..يلا لا تضيع حصتنا


ـ أستاذة..فيه نملة تحت الدرج!
ـ أصلا النملة تخاف منكم..يلا بلا تضييع وقت..خلونا نكمل شرحنا..بس عشان نملة صغيرة مسويين قضية..


ـ أستاذة الجو حلو..ممكن نفتح الدرايش؟
-انتم ما تبغون تفتحون الشبابيك إلا عشان تتفرجون على الرايح والياي..لا ماراح نفتح

ـ أستاذة بس الجو فظيع..لا نضيع هالفرصة
ـ عندكم فرصتين (الفسحة) للطلعة..بعدين..يلا نكمل الدرس


ـ أستاذة..الشمس على عيوننا ممكن نسكر الستاير؟
ـ لا خلوها احسنلكم ,,الشمس مفيدة لكم


ـ أستاذة..صراحة..الإمتحان كان واايد صعب ..!!
ـ اسكتوا .. ماحد طلب رايكم


ـ(هذا في حصة الفراغ) ـ أستاذة..الله يخليج ..طلعينا برع
ـ مينونة أنا أطلعكم ؟؟! عشان تسوون إزعاج وتزعجون الإدارة..بعدين المديرة ماترضى


ـ أستاذة..انتي دخلتي اي جامعة؟؟(البنت اللي تسأل الغرض من سؤالها الاستفادة من تجارب الآخرين)
ـ انتن ملاقيف بس تبغون تعرفون أسرارنا..اشرايج بعد تساليني متى تزوجت؟هذا اللي ناقص!!


ـ أستاذة ..أنا تعبانة..وديني عند المشرفة
ـ ماعليه ..لا تشاركين معانا.. يلسي استمعي

أو تقولها:ـ حطي راسك على الدرج ونامي .


المشهد /دق الجرس وبدأت فسحة الصلاة والأبله باقية تشرح الدرس

البنات يقولون :ـ أستاذة..نبغا نطلع..بنروح نصلي
تبتسم المعلمة ابتسامة خبث وتقول:تصلون؟؟ولاّ تلعبون؟؟..وتدورون بالممرات ؟؟


المشهد:المعلمة تملي البنات الدرس..
ـ أستاذة..شو ؟عيدي
ـ اسكتوا وبتسمعون


أستاذة..نذاكر من الدفتر ولاّ من الكتاب؟؟
تتحول ملامحها الى ملامح شر وتقول: ـ من الأثنين..


المشهد/المعلمة داخلة الفصل..والبنات بتأفف يسالونها
ـ أستاذة,,اليوم بتعطينا درس؟؟
ـ عيل ليش يايتكم؟؟


ـ أستاذة..مايبت الدفتر
في هالحالة المعلمة تختار احد هذه الردود:
(1) ليش؟؟ شو قاعد يسوي في البيت؟؟نايم؟؟
(2) عيل ليش ياية المدرسة؟؟؟
(3) شلون نسيتي الدفتر؟؟انحبكت من كل المواد مانسيتي الا دفتر مادتي؟؟
(4) ليه نسيتي الدفتر انتي ناسية الفسحة مثلا؟؟

ـ أستاذة..ماأستلمت كتاب
ـ ليش ؟؟؟ كنتي نايمة لما وزعوا عليكم الكتب؟؟
او تقول:
ـ انا شو ذنبي؟؟روحي المكتبة‍
او تقولها:ـ صوريلج كتاب من اي بنت (رغم امتلاء المكتبة المدرسية بمثل هذه الكتب)


ـ أستاذة..لا تمتحنينا بالدرس السابق..كان علينا اليوم امتحان وماامدانا نذاكر الدرس السابق
ـ اصلاً الدرس هذا سهل وبسيط...ومايباله شيء...لو انكم امس منتبهين معاي كان عرفتوا تحلون الاسئلة حتى لو ماذاكرتوا


ـ استاذة..ممكن نتفتح الباب؟
ـ لا..عشان تشوفون على صديقاتكم..خليه مسكر..عشان تنتبهون للدرس


المشهد/بنت تتعنى وتطلع من فصلها ،وتروح لفصل صديقتها عشان تاخذ منها شيء..تدق الباب :
ـ أستاذة..ممكن اكلم (فلانة)
ـ لأ..بعد الحصة‍‍
ـ استاذة..بعطيها شيء وأروح
ـ لأ..أطلعي برع..قلتلج بعد الحصة


المشهد/الأبلة تفتش على الواجب..بنت توقف وتقول
ـ استاذة..انا كنت غايبة..ماحليت الواجب
الغياب عندي ماينفع عذر..ليش ماكلمتي وحدة من صديقاتك ولا ماعندكم تلفون؟؟؟_
ـ استاذة..ماكنت اقدر اكلمهم..لاني كنت تعبانة
ـ تعبانة؟؟(تقولها باستخفاف)عيل ليش ييتي المدرسة اليوم ..كان قعدتي في البيت




**الامثلة كثيرة..لا تعد ولا تحصى..لكن لاحظوا كيف المعاملة والرد من قبل المدرسات واكرر واقول ليس الجميع




::+: أمـــــــريـــــــــن :+::

[صدى جوفي]

وعليكم السلام ورحمة الله وبركاته

أختي.. أمرين

بالنسبة لمثل هالعلاقة بين المعلمات وطالباتهم فأنا من رايي أن كلاهما غلطان ولو أني ألوم الطالبة أكثر من المعلمة. أنا معك أسلوب المعلمة لازم يكون أرقى من جذي في معاملة استخفاف بعض الطالبات.. ولكن معها الحق أحيانا في الرد بمثل هذه الردود.. وبيني وبينج في بنات كثيرات يستخفن فالحصة من دون داعي وما أظن ردود المعلمة للطالبات الجادات بيكون بمستوى الطالبات الأخريات .. يعني الطالبة المحترمة نفسها المعلمة تحترمها.. (ولكل قاعدة شواذ) ولو نفكر بغمق شوي ببعض الأمثلة:

ـأستاذة ما فهمت الدرس
شو تقصد الطالبة بها السؤال تبا المدرسة تعيد الدرس من أول ويديد، وينها من أول نقطة ما فهمتها ما كان المفروض تتكلم من بداية الدرس.. وهذا دليل أنها كانت سرحانة خلال الحصة عسب جي ما فهمت الدرس.

ـ أستاذة..دفتري ضايع..وش أسوي؟؟
الطالبة تبا حل سريع لها المشكلة فشو المتوقع من المعلمة ترد عليها .. كان ممكن من المعلمة أن تتحاشى السؤال وما يهمها إذا كان الدفتر ضايع ولا لأ بس في مواد الدفتر أهم وأسهل من الكتاب ما كان لازم الطالبة تهتم فيه

ـأستاذة..فيه نملة تحت الدرج!



مو موضوع سخيف ينقطع فيه شرح المدرسة وانتباه الطالبات .. يعني لو شالت النملة من الدرج وعجته في الزباله ما كان أحسن .. والا لازم بريك تغيير فالحصة؟؟!

ـ أستاذة..الفصل حار ما نقدر نستوعب

ـ أستاذة الجو حلو..ممكننفتح الدرايش؟

ـ استاذة..ممكن نتفتح الباب؟
صحيح أن الصف مب حبس ما نقدر نتنفس فيه بس الطالبة لما تقول للمعلمة الفصل حار شو بإمكان المعلمة تسوي؟؟! وهذا يمكن راي وحدة وراي الأغلبية.. وصدقوني المعلمة تحاول قدر الامكان تلفت انتباه الطالبات وقضية فتح الدرايش والبيبان تزيد الطين بله.

ـ أستاذة..الله يخليج ..طلعينا برع

المدرسة تحكمها أنظمة وادارة.. وللعلم أريح للمعلمة تطلع البنات برع وتتفرغ لشغلها وتحضيراتها اللي ما له نهاية بس حصص الاحتياط محسوبة عالمعلمة كالحصص العادية ولو كل حصة احتياط طلعو الطالبات فيها راح تعم الفوضى فالمدرسة
ـ أستاذة..انتيدخلتي اي جامعة؟؟(البنت اللي تسأل الغرض من سؤالها الاستفادة من تجاربالآخرين)
الأسئلة الشخصية يفضل بين المدرسة ومعلمتها فغير الحصة..

ـ أستاذة,,اليوم بتعطينا درس؟؟
يعني اللي تسأل تقصد الاستخفاف بالمدرسة شو غير الدرس بتعطيهم؟؟! امتحان من دون سابق انذار (وعقب بيستوي انفجار ضدها)
ـأستاذة..ممكن اكلم (فلانة)

يعني لو كان الأمر في غاية الأهمية كانت الطالبة تخبر المعلمة السالفة وهي ذيج الساعة تقرر تسمح لها أو لا

أما المعلمة من واجبها تساعد بطيئات الفهم وتعيد النقطة مرة وأثنين اذا أمكن فالحصة وتراعي ظروف الطالبات في كل الحالات.. وتعامل الطالبات بكل ود واحترام

ولو بنرمس بالموضوع ما نخلص

والسموحة.. عالاطالة

صدى جوفي

[بيور]

والله كل حرف كتبتيييه كاااااااان يستوي عدنا في المدرسه ...
كااانت حاالتنااا صعبه .. معاااااناااااااه ..
..
بس..
الحمدلله ..أيااااااام المدرسة ولت .. ويااافرحتناااااا في الجااامعه..

تسلمييين الغاااااااااااليه ع الموضوووووووووووع الفناااان ..

المتفيجة...

[أمرين]

صدى جوفي

يمكن في بعض الاحيان المدرسات يتفهمووووون الامر ويجاااوبووون الطالبااات

ومراااااات تكووووووون ردودهم جيه


يعني الكل عنده ضغوووطات وحالات خاصة
اليووووم عسل واسبوووع محرجاااااات


تسلمين غناااتي على مداخلتج