سنة اولى امومة

[بحر الود]

مرحبا بكل أم ومرحبا الى جميع المشاركين في الواحات
موضوعي عرفتوه من العنوان:laugh: بصراااحة حبيت اتكلم عن الامومة وعن اهم المرااحل اللي صرت فيها والحين عايشتها
بصراااحة الامومة من اروع الادواار الي تقوم فيها المراة من هاللحظة تبدأ سعادتها الحقيقيةلما تحتضن طفلها لاول مرة وتستمع الى صرخاته اللي تنصب في أذنيها كالموسيقى تملأ حياتها حب وحنان وغالبا ما تسمع المرأة قبل امومتها الاولى كلام وااايد من الاهل والصديقات يصورون اليها مرحلة الامومة بانها ورطة وان ما ينتظرها هو معاناة لا نهاية لها.
والنصيحة اللي اقدمها الى كل أم جديدة ان تتجاهل كل ما تسمعه عن صعوبة تربية الطفل وان تعتمد فقط على غريزة الامومة وعلى ما تسمعه من نصائح اصحاب الخبرة.
وانا احب ان الجميع يشارك معاي في هذا الموضوع ويقول لي ويقول الى جميع عن الامومة وخاصة الامهات يا ليتهم يشاركون ويتكلمون عن هذي المرحلة وانا اول الامهات اللي بتكلم عن اول مولود لي لحد الحين
بعد معاناة في غرفة العمليات طلعت بسلامة:wacko: وما كنت ادري شو بنت او ولد وبعدها عطوني اياه كان ولد كانت فرحتي لا توصف فرحت واااايد وااايد واااايد:fa46: واول ما شفته ما عرفت شو اسوي احضنه والا ابوسه والا شو؟؟؟كنت اقول اشلون هذا الطفل كان بداخلي كيف كان يعيش كنت ابي اعرف كل شيء :laugh: حسيت بالخوف وما كنت امصدقه اني صرت ام وفي نفس الوقت كنت خايفة اني افقده او يصير فيه شيء صرت اخاف على شخص ومو اي شخص صرت اخاف على قطعة مني وما بستحمل اذا صار فيه شيء ابي اعتني فيه علشان لا يصير فيه شيء ابي اربيه احسن تربية واخليه يفرح لما يكبر وفي اول الايام ما استوعبت اني ام وان عندي طفل كنت اظنه لعبة وساعات كنت اظنه اخوي لاني للحين ما تعودت انه يكون طفلي لكن يوم بعد يوم احس بالامومة واحس اني ام حقيقية شعور لا يوصف ابدا مهما قلت ومهما وصفت ما بقدر اوصل الى اللي في قلبي اتمنى اتكون فرحتي مثل فرحة كل ام بولدها وبنتها وااااالله يخليهم:blush:

[الحساس]

موضوع فريد من نوعه في هذا المنتدى..

حضرت عدت عمليات ولاده وعمليات قيصريه..

كنت اشوف الولد يوم يظهر من بطن امه وياخذونه بسرعه لغرفه ثانيه عسب ينظفونه ويردونه بعدين للام الي بعدها تعاني في غرفه الولاده.. اييون ويقولون لها هذا طفلج ... كلهن (الامهات) ينسن المهن من يشوفن طفلهن.. ياحضنه ويبتسمن.. اراقب تعابير ويه الام والاب اذا كان موجود.. ماقد شفت تعابين نقيه تنسى الام كل مافيها وتلتفت لولدها وتحضنه.. ان قلت انها طايره من الفرح بيكون شويه!!

فكرت ان اكون في وضع الاب.. اكون مع حرمتي في غرفه الولاده .. يولد طفلي ويبونه لي ويقوللولي انت اب هذا طفلك زخه.. مارمت اتخيل الوضع بالتحديد لانه صعب عليه .. والواقع طبعا غير..

احب الاطفال بس الاطفال الي من سن اول يوم لي 6 شهور مزعجين دوووم يصيحون!! وشكلهم بعده هب مكتمل.. فاحساسي هب منجذب لهم وايد شرا مايكون الطفل عمره 6 شهور او اكبر احب اكون معاهم بكل لحظه

اختيه..

قريت سطورج.. وعيبني ماكتبتيه.. عيبني انج تاقلمتي مع الوضع اليديد بسرعه.. وتفهمج للوضع الي صرتي فيه..

كنت افكر كيف تشعر الام يوم يظهر ولدها وايبونه لها وهي بينها وبين نفسها تقول هذا كان بداخلي والحين بين احضاني.. سبحان الله .. كثر ماشافوا الاطباء ولادات بس بعد كل ولاده يبتسمون لانه روح يديده تظهر بهالحياة.. صوره تبعث بالنفس الامل..

الله يخليلج ولدج ويكون لكم سند بهالحياة ويتربى تربيه صالحه في كنفكم...

تحياتي

[بحر الود]

مشكووووور وااايد اخوي الحساس على ردك على موضوعي
انا كنت افكر من زمان اكتب هذا الموضوع لانه موضوع حلو ولان هذي المرحله عندي اهم المراحل من حياتي
مع تحياتي
اختك بحر الود

[الجنيه]

أولاً مبروك ما ياج والحمدلله على سلامتج ... (ولو أنها متأخره بس توني دريت )

الصراحه أحس أنه شعور جميييييييييييييييل صح ما جربت بس مجرد التفكير في الموضوع يخليج أتوهين فعالم ثاني ...
أنا أعتنيت بولد أختي شهر كامل تم عندي لأنه أخوانه كان فيهم الجدري فأضطرينا أنخليه فبيتنا عشان ما ينعدي
صدقيني يوم شلته أمه وياها البيت يومين ما ياني رقاد كنت أحس بوجوده وصياحه مع أنه في بيتهم واااااااااااااااااااااااا ااااااااااااااااااااااايد أحب اليهال فديتهم ...


الحساس

هو صح في هالسن الياهل يكون حشره وحنان وايد بس بعد الياهل حلوووووووووووووووووووين ....


بحر الود ... كل الشكر عزيزتي لمشاركتنا هالمشاعر الجميله ... الله يوفقج ويهنيج ويخليلج اياه ... شو سميتيه؟؟؟

[عذبة الروح]

السلام عليكم
احب اشكرج غناتي ع الموضوع الفنتك
وابارك لج ... وان شا الله يكون من الذريه الصالحه
موضوع حساس .. ولكن من أروع ما قرأت
اقدر اقول .. الأمومه أعظم المشاعر في تاريخ البشريه
ومهما قلت .. ومهما قلتوا .. بنتم مقصرين بحقها
عن نفسي ما مريت بهــ التجربه
لكن .. كل بنت فينا تحلم بهــ الشي بفكرها وخيالها
ومتى يتحقق .. إلين تصير أم وتعيشه بالواقع
والصغار بحد ذاتهم حلوين .. ويخبلوبي
لو كان ولد اليوم او انه ولد الـ خمس سنين
تعيبني حركاتهم .. ضحكاتهم .. لعبهم .. حتى حشرتهم
كله ولا اني اشوف ياهل يصيح .. ما اروم عليه
يمكن طلعت اشويه عن الموضوع :fa46:
لكن .. صدق الياهل .. عصافير الجنه
وان شا الله ...
الله لا يحرم حد من هالنعمه
ويرزق الجميع الذريه الصالحه للدين والوطن
مشكوره ع الموضوع غناتي
وربي يعطيج الصحه والعافيه
وتفرحين بولدج الفرحه الكبيره .. قولي آمين
ويسلمووونيشن بحرنا

اختج
عـذ الـروح بـة

[بحر الود]

مشكوره اختي الجنية على ردج
وانا بعد يوم قعدت بيت امي في الفترة اللي كانت امي اتساعدني على ولدي ليش اني ما كنت اعرف واايد عن اليهال من بعد ما رحت عنهم كل اشوي امي تتصل لي واتقولي تعالي نبي انشوف ولدج ولهانين عليه
لازم الواحد لما يكون متعود على طفل ومتعود على صراخه وعلى شوفته ما يقدر تمر ايام عليه وما يشوفه ويلاعبه

سميت ولدي ميرزا على اسم ابو زوجي
اهو كان يبي هذا الاسم في اول حفيد له والله استجاب لدعوته ويبت لهم ولد وسماه على اسمه ولا الاهل كلهم عارضوني وقالوا لي سميه اسم حلو ليش انه اسم ميرزا مو حلو وما يتدلع الاسم بالعكس انا كنت مستانسه وفرحانه ليش ان ابو زوجي مستانس بولدي وهذا اللي يكفيني
ااااااالله يعطيج العافية واتمنى اتمريين بهالمرحلة واتخبرينا عنها

[بحر الود]

مرحبا اختي عذبة الروح
مشكوره عمري على ردج الصريح وحلو وااايد انج تعرفين عن هالمرحلة وعن اليهال وعن اهميتهم وعن الفرحة اللي تغمر الواحد فيهم وانا اتمنى انج اتمريين في هذي المرحلة علشان اتحسيين بطعمها عدل لانها شيء واااايد حلو واحلى مرحلة اتمر فيها البنت

[الجديدة]

السلام عليكم و رحمة الله و بركاته

الاخت بحر المودة
أشكرك على موضوعك الجميل الذي يتحدث عن أسمى المعاني و أروعها و هي الأمومة.
الأمومة احساس جميل، فقد احسست بهذا الاحساس من فترة طويلة:laugh:
لقد كانت تجربة صعبة بالنسبة لي و أحسست بالخوف و الحزن في نفس الوقت.:look:

لقد كانت ولادتي صعبة و أجريت عملية قيصرية لأحافظ على الجنين و لكن الألم ذهب بعد رؤيتي لابني
و لا أنسى الفترة التي تلت الولادة، حيث أنني أصبت باكتئاب شديد عانيت منه لفترة طويلة أثرت علي
و على صحتي، مما أدى إلى كرهي على إعادة فكرة الحمل و الولادة مرة أخرى.:blush:
لا أنسى أن الأطفال حلوين و لكن تربيتهم ورعايتهم صعبة و لكني أحبهم و أحن إلى طفل صغير أحمله بين يدي و ليكن أخ أو أخت لابني، و لكن الظروف لا تسمح بذلك الآن.
أعيش حاليا لتربية ابني و تعليمه و جعله ابن بار بوالديه و وطنه.

مع تحياتي
أختك الجديدة

[مــهــابه]

.
مــاحسيت بالأمومـــه.. لكـــن كنت اشوف اختيه يوم تحتضن بنتها وهي المولوده الاولى ..
كنت احس فيهــا .. ماادري ..وانا اطالعها شعور غريب ..بس حلو..
حــتى شعور الخالـــه بعد حلـــو..