صــدمــة

[الحساس]

السلام عليكم ورحمة الله

اليوم طال عمركم سرت الجامعه (نادر مااسير لها الحين لان دوامي بس بالمستشفى) سرت عسب شغله .. ويوم بغيت اظهر شفت شي !!
بنت السنه الي فاتت كانت محجبه (لابسه الشيله وعلى الخفيف مظهره كشتها من جدام) بس اليوم شفتها اول من بعد ماردت من السفر (خذت بريك نص سنه) شفتها بليا حجاب وصابغه شعرها وتمشي مع واحد هندي ضخم!!

انصدمت بالي شفته..

وبالطريج وانا راد البيت شفت وحده من البنات الي كانت هالبنت الي هب متحجبه ساكنه معاهم.. سالتها شفتي فلانه هب متحجبه !! ردت وقالت هيه.. عادي شو تتوقع من وحده عيميه!!

عندي انطباع بشكل عام وبنسبه 80 % ان العيم من الناس الي مثل مايقولون (الفكر التحرري) وايد اشياء عند العرب تعتبر محرمه او منبوذه او منقوده بس عند العيم عادي ولا كانه صاير شي..

ليش يا ترا هذا التفكير.. مااظن ان البيئه عامل مهم كبير بالسالفه .. احسها جينات منحوته فيهم وين ماتحطونهم يبقى العرق دساس!!

كلامي الي فوق هب تعليق فقط على الي شفته اليوم .. لا لا. من خبرتي واحتكاكي بالناس بدبي (الي اكثريتهم عيم)
ويوم يقولون اهل بوظبي او اي مكان ان اهل دبي منفتحين.. هم يرمسون عن العيم هب العرب.. جي ولا جي العرب محافظين (مابقول الكل بس الشريحه الكبرى من العرب )

ولا تفكر يالي تقرا هذا الموضوع ان ضد العيم!! هذا مجرد تسائل كيف هي طبيعة تفكير هالفئه من المجتمع!! مع العلم ان من انجح رجال الاعمال هم من العيم... لييييش؟ هل اسلوبهم مميز بالتعامل؟ ولا في اسباب اخرى!!

اووووه اقول شو واترك شو..

كلام في خاطري وماظهرته .. بس اليوم ظهر :look:

هي وعندي شكوى ضد المنتدى.. هالويهين :fa44: :woot: مادانيهم موول.. الاول احس انه كانه يشتم والثاني اهبل طايح على خشمه عسب جي ماله خشم... وهذا بعد كلام في خاطري ماظهر.. وظهرته!!

والي في خاطره رمسه ماظهرت ويبا يظهرها يظهرها..

وسلمت يا من تناظرت عيونك لهالنقطه ( . )

[عنود الريف]

آآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآ آآآآآآآآآآآآآآآآآآآآخ يا الحساس ..
اول شي في خاطري .. ان هاي ثاني مره اكتب فيها هذا الرد ,.. عقب هذاك الرد .. :sad:

على العموم ..
اللي كنت كاتبتنه كالتالي .. بس مختصر

انا معاك ان اغلب العيم ناس منفتحين .. وماخذين راحتهم .. وان عندنا عرب بعد منفتحين .. بس نسبه بسيطه بالنسبه للعيم ..
عندنا نحن بنات في الجامعه .. نفس الشي .. مب محجبات جنه الا الجامعه ما فيها رياييل موليه ..

اما عن :fa44: انا بعد ما احبه ولا احب احطه ... لان احس اني انتقص من احترام الشخص الثاني .. وانا ما يحق لي انتقص من احترام الطرف الثاني حتى لو شو سووا ..

الحين اللي كان في خاطري قبل ما ينمسح الرد القبلي ...
امووووووووووووووووووووووو وت من القهر يوم اشوف ريال ويا وحده اجنبيه لا محجبه ولا هي مرته .. مب عيب عليهم..
البارحه في اخبار الامارات مسوين لقاء ويا موجه اسري .. ان عدد العانسات وصل تقريبا لـــ 89000 عانس.. وين الرياييل عنهم ..
البارحه يطالبون الريال بالتعدد .. وغيره يسير ياخذ اجنبيات .. وين بتنحل المشكله ..
قهـــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـر
انا مب قصدي اني ابغي اعرس ولا شي .. مب اتطلعون عليه اشاعات ..
اغار على خواتي .. المطلوب بس هو الستر ..
واايد اشياء في خاطري وبوافيكم بالباقي عقب ان شاء الله ..
والسمووحه

[ا ل ز ع ي م]

للمشاركه في موضوعك:
بادئ ذي بدء هل أنت عجمي الأصل؟يهمني أعرف لكي أشارك في الموضوع

طرح الموضوع:
عزيزي بغيت أعرف أنت تتكلم عن المرأه وحجابها أم تتكلم عن قضية التمييز فبكلا الحالتين موضوع يستحق أن يكون في واحة المجتمع وليس بواحة الفضفضه؟

بالنسبه للشكل:
أنزين شورايك بهذا الشكل هل هو يعجبك :fa56:

[روح القمر]

وعليكم السلام ورحمه الله وبركاته
" تحــــيه طيـــبه" :)

بــصراحه هالشيء انا وايد ملاحظتنه..خاصه عندنا فـ عيمان
مره اربيعتي عزموها عيم ع عرسهم..اتخيل سارت العرس.. وكان مختلط!!!
انا لو شفت بعيني ماصدق ان شي اعراس عندنا تكون مختلطه..واربيعتي انصدمه وظهرت
وكانوا الحريم عادي يرقصون جدام الرياييل..عاد واللبس الله يخليك..:fa36:
بس للحق.. في عــيم ماشاءالله وايد ملتزمين..
كـــل شي فيه الشين والزين..
وايد اشياء فخاطري..بس مافيه حد يسويلي انقلاب هنيه:fa46:

[الغاليه]

وعليكم السلام والرحمه ..

ههههه ضحكتني سالفة الويوه الصراحه واتفق معاك في الراي بالنسبة لهالفيس :woot: مب حلو وصدق

جنه كوري ماعنده خشم او ياركم الله ( منغولي ) .. وهالشكل :vampire: يرفع لي الضغط واموووووت من القهر يوووم اشوفه هههه ..

لكن هذا :fa44: ساعات يعبر عن اللي في خاطري من غير ماقصد سب حد لاني مب من النوع اللي يسب ولا اقصد تقليل شان اللي اتحاور معاه .. ويوحيلي الشكل بالمشاكسه البريئة لا أكثر ...

نعووود الى صلب الموضوووع ..

العيم .. ناس عادي مثلنا مثلهم .. والشين والزين في كل مكان .. ومب بالعروق تتحدد الأخلاق ..

هالشي كلنا عارفينه .. لكن انا بعد عندي نفس نظرتك تقريبا .. انه العيم فري اكثر عن العرب ..

فاحس ان السالفه ترجع لأساس انه طريقة تربيتنا تختلف عن طريقة تربيتهم .. فبتكون بعض الاشياء اللي منقوده عندنا وعيب تختلف عن الأشياء اللي عيب وغلط عندهم .. ويمكن يكونون اقل تحفظ من العرب بحكم طريقة حياتهم وأعراف مجتمعهم ..

وعلى هالأساس يوم انشوف بنيه فري أو شاب مسوي حركات غريبه او قاص شعره بشكل ملفت

اول سؤال ينسئل .. من وين هذي ,, منو اهلها .. ونفس الشي بالنسبة للشاب ..

على أساس اذا عرف السبب بطل العجب .. وغالبية اللي يكونون فري خاصة عندنا في بوظبي

يا اتكون الام شي .. او عندهم تفكك اسري او .. او .. يعني شي لازم يكون في السالفه ..

ومابقولك انه ماشي بنات عرب عليهن نفس الحركات ,, بس بتكون بنسبة اقل و حركاتهن

ظاهره من كبت ومن ورى اهاليهن ..

وللانصاف بعد ,, واايد من بنات العيم ماينقصهن شي في الادب والحشمة والأخلاق والستر ,,

واي حد يتشرف بمرابعتهن ..

وهاي نظرتي يمكن تكون صح وقد تكون غلط ,, بحكم انه ماتوافرتلي الظروف اني احتك بالعيم وايد

والسموحه

[الحساس]

اختيه عنود الريف..

شركا لتواجدج..

بالنسبه للعوانس..

حكمه الله ان عدد الحريم اكثر عن الريايل ولاسباب كثيره..
العوانس كل ماياهم يزيدون ونحن الصراحه بعايلتنا تقريبا بكل بيت شي عانس!

هب السبب شكلهن او اصلهن او فكرهن... اقدر اقول ان هذا النصيب .. والشباب بدوا يفكرون بالمنطق الي هو ( باخذ وحده اقل مني او بمستاويه في التعليم) لانه مايبا تتحكم فيه او تفرض رايها عليه دوم!!

الله يسهل على الكل!!

تعدد الزوجات بالوقت الخاضر صار صعب لان يحتيا فلوس .. يعني اذا بتييب لهاي شي الثانيه بتغار.. وكل وحده اصلا بتطلب كل شوي شي.. والشباب بروحهم مدينون.. يعني اصلا تكفيهم وحده!!

=============================================

الزعيم... بفتخر ان كنت عيمي.. او اسباني او هندي....
هاي كانت فضفضه ويرني تفكيري على الكلام عن طبيعه العيم

==============================================

لمسه امل...


كل الي قلتيه صح وانا سمعت شوي اكثر عن جي..
لكن.. شي عيم ملتزمين بعادات معينه او حتى ملتزمين بالاسلام صح.. وهايل الواحد يفتخر فيهم الواحد..

=============================================

الغاليه...

بما انج مااحتكيتي فيهم وايد... يربي تحتكين بتشوفين العجب.. بس هم من النوع الي يربش!! مثل ماتقولين يحبون الفرفشه وايد !!
عنا واحد عيمي .. قبل لا يدخل الديسكو يقول... يـــارب لا توفقني مع اي بنت داخل الدسكو ويدخل... يرقص وياهن و..و... ويظهر... يصلي صلاة الفير في وقتها!! في خاطري ابا اعرف هذا ليش متناقض! يصلي الفير ومايبا بنات عيل ليش يسير الدسكو ويرقص وياهن!!

اكيد شي عيم الواحد يتشرف ويفتخر فيهم وخاصه عنا بدبي.. ماشاءالله عليهم وبدون ذكر اسماء شايلين دبي شيل.. لكن بالمقابل هم فري اكثر عن اللازم .. عاد كانوا فري بينهم وبين اهاليهم او بينهم وبين العالم!!

لنفترض ان عدد العرب كثر عدد العيم.. نسبة التحفظ عند العرب اكثر.. لكن هب معناته ان العيم فالينها!
كل الي مستغرب منه شو طبيعة التربيه او الجينات( عند العيم ذو الفئه الفري) الي تخليهم يفكرون بان الحياة فريي وكل شي عادي ومايهمهم كلام الناس.. مايفكرون بالقيامه ؟

الله يهديها هالبنت صدمه والله ان الواحد يشوف وحده لابسه شيلتها كامله وبعد 6 شهور يشوفها فاصخه!!

[ملانـة]

و عليكم السلام و رحمة الله و بركاته...

بصراحة.. صدق صدمة..!!! تعرف ليش..!! لأني ما توقعت إنه جي فكرتكم عنا..!!!

نحن فري صح.. الحرمة عادي تشتغل.. عادي تسوق.. مب كلنا متشددين في مسألة اللبس (ترا العيم قبايل بعد و العيم من كل منطقة تختلف عاداتهم عن عادات أهالي المناطق الثانية فـ شي المتشددين و اللي فري ).. بس أعتقد إنه السبب لأنه على أيام شاه إيران.. كانت إيران شرات لبنان.. كل شي فري... لين ما ياهم الخميني و شدد عليهم مثل اللي نشوفه الحين... فيمكن بعض العيم بعدهم متأثرين بالحرية اللي كانوا عليها... لو تشوف الإيرانيات (مب العيميات.. الإيرانيات اللي ساكنات في أمريكا والا أي دولة في أوروبا) ما بتقدر تفرق بينهم و بين اللبنانيات والا الأجنبيات... شرات هيفاء وهبي... هي مسلمة شيعية بس شوف لبسها و تصرفاتها.. و لا يخصها موول بالإسلام..!!!

و عن سالفة الجينات.. مادري شو أقولك.. ما أعتقد إنه يخصه.. كل بيئة و لها عاداتها و تقاليدها و ما أشوف إنه العيم فري لهالدرجة.. يمكن لأني من هالبيئة فما أشوف إنه اللي نسويه و اللي نعيشه شي خارج عن حدود عادات و تقاليد مجتمع الإمارات بشكل عام..!!

تصدق.. مب عارفة شو أرد عليك.. يمكن لأني بعدني تحت تأثير الصدمة..!!!


أختك

مــلانــة
:fa48:

[الحساس]

ملانه لا تاخذين السالفه بالحساسيه وتغدين شراتي حساس وبعدين ترا بقول عنج يا قلوووده,,,

المهم

كل انسان مهما كانت بيئته يشوف بيئته عاديه ونادرا مايكون في حد يشوف بيئته غير عن الناس ومختلفه وفيها غلط !! مثلا اليهود يشوفون انهم شعب الله المختار اونه!! رغم انهم هم غلط..

بالنسبه للسواقه والتسوق!! اكيد تعصب الي يمنع اهله ونرفض ها الشي بجميع فئات المجتمع.,,,

وذكرتيني بوحده شافها ربيعي بالعاصمه عنا بالتشيك.. حلةو والشعر الطويل واصل للخصر تقرب منها اونه بيتعرف عليها ظهرت من منطقه قم !!!!!!!!!!!!!!!!!!!!!!!!! كيف هالسفور من وحده من مدينه تعتبر اكثر المدن الايرانيه تعصبا او تمسكا!!

بسالج سؤال شو نظرتج على العرب.. اكيد لج ماخذ عليها من ناحيه معينه,, صح,, هالانطباع الي تاخذينه هو نفس الانطباع الي ناخذه على اي فئه من المجتمع,,

وانا قلت رأئي والي اسمعه من الناس عن العيم!
بالنسبه لفكرتي عن العيم فيها شي غلط؟ نبهيني عليها عسب اعرف الغلط او ابين لج ليش قلت النقطه الي تظنين انها غريبه مني!!

تحياتي

[أمواج]

اممممممممممممم بس ابا اقوووول شي مب يعني عيميه يعني متحرره
هم صح متحررين بس اذا ادينوا صدق صدق يكون تدينهم غير عن الباقين يعني في جانب زين وفي جانب شين
بس بغيت اقوول هالنقطه

[تحفه]

مب كل العيم فرييي

في ناس وايد متشددين .. مثل عايله معروفه اسمها العوضي

هاذيله وايد وايد مطاوعه ..

وفي عيم فري .. وهاذيله الي كانو يتاجرون في الهند وبعديين يو دبي ولا اوروبا بس يعني ما ردو ايران
وهاذيله اغلبيتهم بستكيه

وما يرمسون في البيت غير ايراني ولا هندي ولا فرنسي وانجليزي
وعادي مب شارطين التحجب على بناتهم ..

بس بيني وبينك ..

حاليا مافي شي في دبي اسمه هاي عيميه فري ولا هاي عربيه فري

كلهم عادي

بس على فكره .. لا تحزن وايد .. ترا جيلنا .. احسن ابوايد من جيل الجاهليه السابق صح ولا لا ؟

والله يهدي اليميع

[عنود الريف]

انا رجعت عشان ارد على اختي الملانه ..وارد على اختي ام خدود ..
اول شي اختي ملانه ..
نحن مب ماخذين فكره ان العيم كلهم كلهم فري .. لا الغاليه .. نحن نعرف ان في عيم متعصبين وفي عيم فري .. الغاليه المشكله مب مشكله الشغل والا السوق والا السواقه .. لا الغاليه .. انا عن نفسي اقصد حشمة اللباس .. انا في الجامعه واايد عندي ربع عيميات .. بس والله اللي ويايه .. ما في احسن منهن .. ومحتشمات .. ومحجبات .. نادرا ما تلقين شعره ظاهره ..
بالعكس .. انا ويا الاخوات اللي قالوا .. كل شي فيه الزين وفيه الشين ..

اما اختي ام خدود .. ابغي اقول لها ..
ان اغلب البستكيه .. متحجبين ومتعصبين .... انا ربيعاتي اللي اعرفهم .. بستكيات .. بس والله ساعات انا شعري شويه يظهر .. ربيعاتي ساعات ما يهتمون .. بس البسكتيه .. تنبهني .. لانها تعرفني انا اتحجب وما اظهر شعري .. وتغار عليه ..
واعرف بستكيات .. محجبات ومحتشمات .. بس في نفس الوقت كشيخات ..
مع انهن ما يحطن شي .. بس يوم تشوفينهن .. تحسين انها راقيه ..

هذا كان في خاطري ..
والسمووحه

[ا ل ز ع ي م]

عزيزي
سؤالي لم يكن بهل تفتخر أم لا وإنما سؤالي واضح وضوح الشمس فلما لا تجاوب على قدر السؤال ، فعلى ما أظن العضو يطرح هنا لكي يلقى الجواب وسيادتك لم تجاوب حتى أستطيع المشاركه وحتى أبين لك وجهة نظري فيما بحته من موضوعك!

[ملانـة]

بـــــــــــــــــاك,,


ملانه لا تاخذين السالفه بالحساسيه وتغدين شراتي حساس وبعدين ترا بقول عنج يا قلوووده,,,

لووووووول المشكلة ما تتخيل شكثر أنا حساسة.. تميت طول اليوم مكتئبة بسبة موضوع في الواحة المفتوحة لأنه زعلني وايد ههههه.. بس تراني ما زعلت من موضوعك بس فعلا ما توقعت انه هاي هي الفكرة العامة عنا و الشي الوحيد اللي استغربت منه سالفة الجينات.. حسيتها مبالغة شوي... :)

معاك حق اخويه بخصوص تأثير البيئة.. في أشيا لاحظت الاختلاف بينا و بين رباعتي اللي من اصول بدوية والا حضرية.. بس ما حطيت في بالي وايد ليش هم متشددين أو غير عنا...يعني وحدة من أعز رباعتي عندهم مستحييييييييييل البنت اتطلع ليسن لو على قص رقبتها.. و وحدة ثانية بعد أعرفها مول ما تطلع السوق.. حتى لبس العيد اييبونلها لين عندها...!!! في نفس الوقت.. اعرف بنات عيم.. منهم ما يشتغلون و لا يطلعون ليسن الا عقب ما يعرسون عسب يكون بكيف الريل اذا يبا حرمته تسوق والا تشتغل..!!!!! شفت كيف؟؟

و عن السبب ليش العيم بشكل عام متحررين أكثر عن العرب.. يمكن عشان السبب اللي ذكرته قبل... و مادري إذا شي أسباب ثانية والا لا... (متحرقصة أبا أقرا رد الزعيم لأني أحسبه مثقف و يمكن يحطلنا الأسباب أحسن عني) :)



وذكرتيني بوحده شافها ربيعي بالعاصمه عنا بالتشيك.. حلةو والشعر الطويل واصل للخصر تقرب منها اونه بيتعرف عليها ظهرت من منطقه قم !!!!!!!!!!!!!!!!!!!!!!!!! كيف هالسفور من وحده من مدينه تعتبر اكثر المدن الايرانيه تعصبا او تمسكا!!

أخويه بقولك شغلة.. ترا الإيرانيين مب كلهم مسلمين.. فيهم يهود و فيهم مسيحيين و فيهم عبدة النار... فمب شرط انها من قم يعني هي مسلمة... و حتى بعض المسلمين.. الله يهديهم.. اسلامهم بس اسم بدون أي فعل.. :sad:


أختي عنود الريف :)

فديتج أنا ما زعلت و معاج حق.. شي عيم وايد فري و عيم متمسكين.. يعني تقريبا نحن وسط.. لا متشددين و لا فري ... و في نفس الوقت لنا معارف فري و معارف متشددين لأبعد الحدود... و البستكية مثل ما قالت أم خدود.. أغلبهم عيم عاشوا والا درسوا فترة في الهند و باكستان... و ناس فعلا محترمين و راقيين لأبعد الحدود...



شسالفة..!! جني العيمية الوحيدة اللي في الواحات..!!!!


يعطيكم ألف ألف عافية


أختكم


مــلانـــة
:fa48:

[تحفه]

عنود الريف ..
حبيبت قلبي انتييييييييي .. :blush:

قلت معظم البستكيه .. وخصصت بالذكر الي كانو يتاجرون بالهند .. وبصراحه قلت هالشي عن معرفه .. انا خالي ماخذ من هالبستكيات الفري وايد .. واشوف بناتهم واشوف كيف استايلهم وتفكيرهم ..

بس هم ما سوو مثل هالبنت ..

كانو لابسينها و فصخوها !!

[غرشوب]

السلام عليكم


تاج راسك شئت ام ابيت . .

.
.

[بدون اسم]

السلام عليكم

:fa55: مادري شو القصد من ورا الموضوع هذا

من فترة وانا ابا اكتب الكلام الي بقوله الحين فالسطور القادمة

العيم مسويلهم راس فالبلاد احنا الي بنينا دبي .. واحنا اهل العلم وانتوا يالعرب متخلفين وما تعرفون شي .. قال شو يوم يقولون اهل دبي منفتحين اونه يقصدون العيم ..

هل دبي ( الوصل) معروفين قبل ما تطبون علينا معروفين بتجارتهم ومعروفين بأنهم حلقة وصل بين الشرق والغرب علشان جذي سموها الوصل! يعني شله العيم التجار ما كانوا موجودين

انا كشخص اصولي عربية اصيلة عمري ما فرقت ولا سبيت حد وقلت هذا عيمي ولى عربي! بس مادري ليش العيم الي بدو هالعنصرية ....!

ويوم انقبضت البلاد محد حررها غير عيالها ومب بس بلادنا ساعدنا فتحرير عمان .. والي يقول انه عربي يسأل عن الحرب الي كانت نتيجتها هدية فوسط الاراضي العمانية وهي حتى

فالحرب هاي ماتوا ناس كانوا توهم رادين من الغوض .. لدرجة ا نه مرزاب المركب كان يصب دم!

انتوا يتوا هل البلاد فالسلم ما تعرفون شي ولو صار على بلادنا لا سمح الله .. مااظني واحد منكم بيخلي الطير على جوازة .. الرسول قالها من زمان انه ما بيحن قلب اعجمي على عربي

عارفين شو اقصد ....

ويوم تقول العيم احسن التجار .. وين سار---> الغرير والفطيم وين سارو قوم الحبتور والطاير وغيرهم .. ولى هذييلة عيم وانا مادري ................................!!!!!

والحين نازلة موضه عند العيم طايحين سب فالبدوان ... .. ما اقول غير اتق شر الحليم اذا غضب

وانت الحين اونك مستغرب من الموضوع هذا .. تبا تدخل موضوع العيم والعرب ..

الفجور والفسوق ما يباله عيمي ولا عربي ... بس اذا انت فتحت موضوع العرب والعيم فتحمل العواقب!

[غرشوب]

اقول بدون اسم ( ماعرف جان ولد ولا بنت ) . . بنرد على اساس ولد

اول شي تناقض كبير فـ كلامك . . قلت " انا كشخص اصولي عربية اصيلة عمري ما فرقت ولا سبيت حد وقلت هذا عيمي ولى عربي! "

و بعد ما قلت هـ العبارة اشوف العكس تحتها حتى المقدمة توحي بالعكس . .

ثانيا ً . . نصيحة لا تجعل نفسك بدون اخلاق ولا تكبر وتسويلك راس فـ الواحات فقط

ثالثا ً . . اشوفك رمست عن العنصرية لكن من الواضح انك انته من بدء فيها من خلال تعقيبك

رابعا ً . . شكلك ناسي قول الرسول صلى الله عليه وسلم " لا فرق بين عربي وأعجمي إلا بالتقوى "

خامسا ً . . اقرا توقيعي وافهمه . . واللبيب من الاشارة يفهم

[الحساس]

ملانه..

عيبني اسلوبج في المشاركه بهالموضوع.. وتقبلج للاراء.. واتمنى نشوف هالاخلاق العاليه دوم..

وربي يحفظكم

[الحساس]

عنود الريف وام خدود..

شكرا لمشاركاتكم الي اثرت الموضوع واستفدنا منكم..
اظن مثل ماقالت ام خدود العوضيه ملتزمين اكثر من البستكيه... وكلهم فيهم الخير .. هم اخوانا ومافي فرق بينا وبينهم وكل انسان حر بنفسه والله وحده الي يحاسب عبده..

[الحساس]

السلام عليكم



تاج راسك شئت ام ابيت . .

.
.



اخوي غرشوب..

ممكن اعرف هالجمله موجه لمنو؟

[غرشوب]

لك يـ الحساس

.
.

[الحساس]

بدون اسم..

شكرا للاضافه..

في هذا الموضوع.. انا بديت فيه بشي شفته بعيني كفضفضه وبعدين كملت الموضوع بمنعطف هب بعيد عن النقطه الاولى.. وماكتبت الموضوع تنقيصا من شأن العيم .. لاني احترمهم حيــل.. لكن رمست عن جانب معين اشوفه فيهم واستغرب منه واستفسرت منه..

اضافتك لهذا الموضوع ماشوف لها علاقه بالموضوع الي انا كتبته!! وماعرف ليش انت معصب..

لكن راح ارد عليك..

اول شي منطقه الوصل هب المنطقه الرئيسيه بدبي.. المنظقه الرئيسيه بدبي هي منطقه الشندغه وفريج البستكيه وشطي الخور... تعالي باخذ من يديك.. وباخذلك لهاي المناطق الي اجدادنا سكنوها وشيوخنا بعد سكنواها.. ومنطقه الوصل منطقه يديده وجدت من بداية ايام الـ ثمانينات.. واتمنى انك ترجع وتشوف الفرق بين بيوت الوصل وبيوت شطي الخور!!



بالنسبه لاصولك العربيه.. والنعم فيك اخوي.. لكن ... والنعم العيم ... ;)

بالنسبه للحروب الي صارت في دبي.. اخوي .. الموضوع هب مال حروب ولا تاريخ دبي!!! شو ياب وحده لابسه الشيله وفصخته بحروب دبي.. انت شكلك كنت تبا ترد في موضوع في واحة التراث بس خانك الماوس وحدرك اهنه..
اخوي لا تكون ظالم على العيم!! قد حد سوالك شي عسب ترمس عنهم جي على اساس انهم مابيحمون البلاد؟ ليش هالتجريح والتهزئ؟ هم اماراتيين.. خلاص ااذا انت ماقبلت بها الشي شي راجع لك.. وياليتك ماذكرت اسماء العوايل عسب ماتضطرني اذكر اسماء العوايل الاماراتيه العيميه الي لها دور كبير في بناء الامارات..

عمري ماسمعت عيمي يسب بدوي او حضري!! اتمنى انك ماتخلق نوع من الحساسيات في موضوعي لان لين الحين كل شخص ابدا برايه الشخصي بليا تجريح لاي جههواتمنى اشوف ها الشي فيك بدون ماتجرح لا عيمي ولا غيرهم..

بالاخير احب اشكرك ... او بالاصح اشكرج;) على المشاركه... واتمنى انج تتبعين المقوله الي انا ماكنت حافظها وانتي كتبتيها (اتق شر الحليم اذا غضب) ولا تنسين سرج محفوظ لين الحين ;)

[الحساس]

.......... :laugh:

[الحساس]

تسلم يا غرشوب من طيب اصلك اخوي .. عيمي او حضري او اي مسلم على راسي كلهم اخواني..

[بدون اسم]

الظاهر بعدك ما استوعبت .. انا قلت

الفجور والفسوق ما يباله عيمي ولا عربي ... بس اذا انت فتحت موضوع العرب والعيم فتحمل العواقب!

لا تيلس تقول العيم والعيم .. لو احنا عنصريين جان لا انت ولا غيرك عشتوا فبلادنا :fa44: وكلتوا من خيرها.. الحين انا لو اسير ايران تتوقع اني بقدر اعيش هناك! هل الايرانيين راح يرحبون فينا مثل ما سوينا فيكم

قال عنصريين قال .. وبعدين مب انا الي بديت موضوع العيم والعرب


بالنسبه للحروب الي صارت في دبي.. اخوي .. الموضوع هب مال حروب ولا تاريخ دبي!!! شو ياب وحده لابسه الشيله وفصخته بحروب دبي.. انت شكلك كنت تبا ترد في موضوع في واحة التراث بس خانك الماوس وحدرك اهنه..
اخوي لا تكون ظالم على العيم!! قد حد سوالك شي عسب ترمس عنهم جي على اساس انهم مابيحمون البلاد؟ ليش هالتجريح والتهزئ؟ هم اماراتيين.. خلاص ااذا انت ماقبلت بها الشي شي راجع لك.. وياليتك ماذكرت اسماء العوايل عسب ماتضطرني اذكر اسماء العوايل الاماراتيه العيميه الي لها دور كبير في بناء الامارات..


انا تكلمت عن تاريخنا الي انتوا ما تعرفون عنه شي تقول العيم الي بنوا البلاد .. وانا اقولك احنا العرب دافعنا عن الارض واحنا بنينا دبي .. وذكرت اسامي ناس مشهورين .. تقول العيم بعد لهم دور .. صح ما انكر لهم دور بس مب شرات الغرير والفطيم وغيرهم من العرب ... وارجع واقول لو صار شي فالبلاد العيم التجار والناجحين على قولتك اول ناس بيظهرون وبيتجارون فمكان ثاني :) يعني العيم ما يونا الا لانه دبي فرصة ذهبيه لاي تاجر ..

وخلني ازيدك من الشعر بين .. مب كل العيم كانوا يتجارون اغلبهم حماميل ... حمالي المفرد الشخص الي يشل اغراض على ظهره مقابل مبلغ مالي معين .. والعرب كان لهم الغوض والتجار منهم هم الي يتاجرون فاللولو "القماش"


انت تبا تدخل هالموضوع بين العرب والعيم غصب فسالفة البنت ...

[الحساس]

بدون.. اسم..

اتمنى ترمسين معايه .. باسلوب احسن عن جي..
وعلى فكره انتي مابتين تعلميني شو اكتب بموضوعي وشو اترك.. اونه شو (انت تبا تدخل هالموضوع بين العرب والعيم غصب فسالفة البنت ...)
كيفي ادخل ولا ماادخل انتي شو الي حارنج ها فيج عوق من شي معين تعالي بعالجج ببلاش والله..

ليتج تأجرين شخص يفسرلج موضوعي عسب تفهمينه.. ولا اقولج.. هب لازم هب لازم تفهمينه شو ابا برايج اصلا!!

صدقيني انتي فيج شي .. هب صاحيه والله!! طالعي العالم كيف راده بين مؤيد ومحايد ورافض للي انا كتبته ووطالعي انتي شو كاتبه !!! بالله عليج انتي فاهمه اصلا انتي شو كاتبه!!!

حـــجيــه .. اتمنى تاخذين نفس عميـــق.. وبعدين زفيــر شوفيلج تكسي.. ياخذج لاقرب شاطئ بحر.. وسيري انتحري لو .. انا مكانج جان انتحرت ولا افضح عمري وابين لخلق الله اني ماافهم شو اقرا واكتب..

سيري لعبي بعيد.. وودري موضوعي عنج لانه اييب لج الضغط والسكري .. يالله يا شطوره ..

[بدون اسم]

:fa38: انا وصلت


اتمنى ترمسين معايه .. باسلوب احسن عن جي..

ليش انت خليت فيها اسلوب (سيري انتحري وسيري مادري الشو ومرة ترمسني على اني ريال ومرة على اني حرمه .. انت الي تحتاج حد يعالجك) لكن حاظرين بنعدل الاسلوب وبفهمك حبه حبه

انت قلت وجهه نظرك وانا قلت وجهه نظري.. قول الي تبا تقوله ما يودتك .. لكن لا تتوقع اني بسكت لو شفت شي ما عيبني

الواحد يوم بيرمس يكون قد رمسته وانا قد رمستي :fa38: ومب انت الي بتي تعلمني عن تاريخ بلادي ورمستها واهلها ... :rock:

هذا المختصر المفيد

هذي ثالث مرة اقولك الفسوق ما يباله عيمي ولى عربي .. ( هذا كان ردي على موضوعك) وبعدها ناقشتك فالكلام الي عقبت فيه تحت (انه العيم احسن التجار) و و و .. الخ الردود

:woot: :woot: :woot: :woot: :woot: :woot:

[عنود الريف]

يا اخويه .. هد اعصابك ..
يمكن الاخت بدون اسم متعصبه شوي ..
بس يا اخويه .. هذا مثل ما تعرف انه راي .. صح تقريبا كان تعصب كبير منها .. بس يا اخويه المسامح كريم ..
انا برايي كان المفروض منك ما ترد عليها بهالطريقه ..
يمكن هي كلامها جارح .. بس يا اخويه المفروض تقابله بالاحسان ولك الاجر من الله ..
هذا مجرد راي .. ولا تجلبون الفضفضه لضرابه ..
كلنا اخوان والكل عالراس والعين .. سواء العيم والا العرب ..
اختي بدون اسم .. كنتي تقدرين اتردين بطريقه احسن من هاي ... وانا واثقه انج تقدرين ..
هو كان يتكلم عن لبس البنت .. ولا ياب طاري التاريخ ولا شي ..




اخر شي .. هدوا اعصابكم ..
وبغيت اقولك اخويه الحساس.. ان منطقة الوصل الحاليه .. مب نفسها اللي تقصدها الاخت بدون اسم ...
هي تقصد اسم دبي الجديم .. (( الوصل )) من ضمنها بر دبي وبر ديره ..

والسمووحه على المداخله ..

[الحساس]

الله يحفظج يا ختيه عنود الريف..

انا صبرت عليها بردي الاول ولا تعصبت بردي .. لكن ردت بردها الثاني بتعصب اكثر ويلست تجرح بفئه العيم وزياده انها صنفتني بكيفها اني منهم واخر شي تقولي غصب اني ادخل موضوع العيم والعرب بالموضوعي كانها ماتبغيني اكتب الي كتبته ..

انا احترت من تصرف الغريب هذا .. حتى وان كان راي فهو هب في محله ان كان مؤيد لموضوعي او رافض .. والي بيقرى الموضوع بيعرف اني مستغرب من تصرف بعض فئه العيم لكن بدون اسم شكلها قبلت شاشه الكومبيوتر وقرت العكس الي هو هب موضوعي

الله يهدينا ويهديها!!

[تحفه]

بدون اسم

ليش حارقه اعصابج وغلطتي على عمرج وعلى الثانين .. على شي ما صار ؟!

محد سب العرب ولا حد سب العيم .. بس كانو يتناقشون سالفة البنت الي جي استوا بها

[ملانـة]

أنــا ييـــــت!!!

الغالية بدون اسم

شفت ردودج اللي مول ما كانت خالية من التجريح بفئة العيم... و قلت بقولج كلمتين و بس ( و من هناك كتبت موضوع ههههه)..


الرسول قالها من زمان انه ما بيحن قلب اعجمي على عربي
حبيبتي... ممكن تعطيني هالحديث و اللي مستخسره حتى تصلين فيه ع الرسول (صلى الله عليه و سلم) واللي يقول فيه اللي قلتيه؟؟؟

و بعدين أختي منو اللي رمس عن التجار و الحروب؟؟ كنا نتكلم عن اللبس... و محد قال إنه التجار العيم هم اللي بنوا البلاد بس... بما إنه الموضوع عن العيم فيبنا طاري تجار العيم بس لأنه ما كان فيه داعي نقارن بين الفئتين.. و إذا كانوا تجار العيم حماميل و كولية.. فديتج الشغل مب عيب.. لو أسمع قصة واحد من هالتجار و كيف وصل و هو كان مجرد حمالي صدقيني يكبر في عيني.. ع الأقل حبوبة ما تنكر لأصله و لماضيه.. و مادري شو اللي خلاج اتييبينها و كأنه شي يفشَل..!!! ترا ما قلت الحزة اللي كانت عندنا حضارة الفرس انتوا كنتوا تهومون في الصحرا و تتضاربون ع الماي..!!

شي ثاني.. حبوبة... لا تحطين شي في ذمتج و انتي مب متأكدة منه.. حتى لو متأكدة و تبصمين بالعشر... ترا خليج متحملة مسؤولية كلامج و بحاسبج على هالشي يوم القيامة... منو قالج العيم حزة الحزة (الله لا يقول يا رب) بينسون الصقر و بينسون البلاد؟؟؟ ماظنتي لج الحق تشككين في وطنيتنا و لا انج تصدرين حكم مادري من وين يايبتنه... في حرب الكويت... العيم اللي فيها حاربوا العراقيين ويا بدو الكويت و ويا حضرها.. ما جد سمعنا عن عيم شردوا و ردوا إيران... و هالرمسة ما يبتها من عندي.. يبتها من كويتيين عاشوا الأزمة هاي.. فما أدري من وين يبتي هالنقطة العجيبة و اللي صدق مبين كيف انج موول ما سبيتي العيم...

كلتوا من خيرها .. عشتوا في بلادنا..مسوين لهم راس..!!! شو تبيني أرد بالله عليج أختي ...!! و ليش مسويلنا راس.. ماظنتي أختي نحن ناسين إنه كلنا من عيم و عرب و بلوش و هنود و أجانب كلنا عيال آدم و حوا و كلنا أصلنا من تراب... و ماظنتي رب العالمين بيحاسبنا على أصولنا والا طوايفنا... الحديث يقول بما معناه إنه رب العالمين بيحاسبنا على عملنا و عمرنا أفنيناه في شو.. و لنا الفخر نحن العيم إنا أفنينا عمرنا في رد الجميل للبلاد اللي حضنتنا و اللي استقبلتنا واللي شيوخها الله يطول في عمارهم ما احتشروا و لا عقوا رمسة شرات رمستج..!!

و الغالية.. آخر كلمة... تقولين العيم بدوا هالعنصرية؟؟ حبيبتي خذي لفة في الموضوع و شوفي منو اللي بدا العنصرية.. أوكي ماما؟؟؟


يله بسير أهلي مسوينلي عزيمة عشان تخرجي... و مب مكس بعد عن يسير بالكم بعيد...!!


الله يحفظكم


أختكم


مــلانـــة
:fa48:

[عنود الريف]

اختي ملانه ..
مبروك على التخرج ..
وخلاص انسوا هالموضوع ..
واتمنى انه ينقفل ..
والسمووحه

[ملانـة]

الله يبارك فيج حبوبة عقبالج ..

و أنا أتمنى هالشي بعد عشان ما تزيد الحساسيات بين الأعضاء...


يله يتريوني... باي :)

[الحساس]

الموضوع ... مابينقفل..

كلن ابدا رايه ومحد ظهر عن نطاق ابداء الراي الا بدون اسم..

هب عسب وحده يبتند الموضوع..

وهب كل ماتصير خلافات نطالب بالاقفال.. لان بهالطريقه اي شخص يروم يسوي مشاكل باي موضوع وبعدين يطالبون بقفله وهب حاله هاي!!

[روح القمر]

الموضوع كـان مجرد فضفضه..
اشوفكم جلبتوه.. ظرابه!!

مـــــــلانه:
اول شــــي مبروك ع التخــرج... :)
ثـــاني شيء محد بيقول ان عزيمتكم مكس..
انا استغربت من اللي سمعته عن الاعراس وحبيت اقول اللي فخاطري..وماكان ف قصدي ..نغزه او شي
بس الواحد يوم بيستغرب من شي اكيد بيرمس..صح والا؟!!..
بعــدين انا قلت في ناس ملتزمـــين.. وكل شي فيه الشين والزين..ومحد كـــامل
حـــبوبه..اتمنى انج ماتــاخذين بخــاطرج..
والسمـــوحه منج.. :)

[بدون اسم]

ايواااا بدوا يتبلون عليه ...

:crazy:

ام خدود .. ماشاء الله خلصتي حواطتج على المواقع .. ها ان شاء الله كانت "الحصيلة" تستاهل النشر

ملانه ... انا اكثر

للمرة @#$$ مب انا الي سبيت العيم ومب انا الي كتبت عن البنت المتحجبة والي خلعت الحجاب يوم سافرت للخارج ..

اعتراضي كان واضح على كلام الحساس ..
لا تقولين انا الي بديت العنصرية .. وصاحب الموضوع هو الي بداها :rock: وبالعكس انا قلت انه الواحد يوم بيسوي شي غلط بيسويه لانه ماعنده وازع ديني مب لانه عيمي او عربي! كلامي اظن واضح

طيب فسريلي هالتصرف .. قريت هالخبر من زمان فالواحات .. انه في مباراة كرة قدم بين الامارات وايران على ما اعتقد .. فصفوف التشجيع الايرانيه كانوا في ناس لابسين كنادير ويالسين يشجعون ايران!

الشي الثاني في شخص اعرفه معرفة شخصية ... كانوا يتكلمون عن عشاهم البارحه وكيف كان لذيذ .. الخ .. ويوم انسألوا شو المناسبة .. لانه المنتخب الايراني .. فاز .. (على منتخب الامارات يمكن)

وفي وايد مواقف لو ايلس اعددها ما بخلص انا ماكتبت رايي من فراغ كتبته من الي اشوفه!

يوم قلت انه مب كل العيم تجار ما كنت اقصد اهين حد .. كان قصدي اقول انه مب كل العيم تجار .. يعني في ناس الله كتبلهم الرزق اهني يعني يوا عشان يدورون لقمه العيش مب علشان يتكرمون ويبنون بنايات لاهل البلاد .. ان شاء الله تكون وضحت الصورة

ايوا انتي قلتيها ويمكن هذا الي كنت ابا اوصله .. عرب هنود عيم بلوش .. الكل متعايش بسلام .. بس في فئة الحينه تقول احنا الي بانين هالبلاد .. والله العظيم سمعتها من اكثر من شخص .. وانه العيم بكل فخر هم الي بنوا البلاد .. وين ساروا الباقين .. اظني العيمي الي درس في عربي شراته بعد درس .. ومثل ما العيمي اشتغل في بلوشي وعربي اشتغلوا بعد ..

وفي ناس ماتوا يدافعون عن ارضهم وعن شعبهم علشان يقدرون يعيشون بسلام مع غيرهم

قوليلي لو كنتي مكاني شو بتسوين وانتي تسمعين كلام يسم بدن الواحد .. هذي القشة التي قصمت ظهر البعير في هالموضوع ..

بخصوص الحديث "ما حن اعجمي علئ عربي قط ورب الكعبة" سويت بحث على النت وظهر انه في خلافات بعضهم يقول صحيح والبعض الاخر يقول لا .. وبما انه مب موجود فصحيح صحيح البخاري ومسلم والنسائي والامام احمد والترمذي .. فهو حديث غير صحيح بالنسبه لي حاليا وبعد بتحرى عن الموضوع اكثر :fa44: اي كان قائل هالعبارة فأنا استعنت فيها كمقولة

[عفاريتووو]

السلام عليكم

البستكية فري !!!! من متى !!!!!
والعوضية متشددين اكثر !!!!

اخاف عقلي بلاه شي اليوم ولا انا مخرفة ولا شي !!!
امس اقول حق بابا ابا اروح نادي السيدات في الصيف ويا بنات خالي وربعي
قال لا.. ماتروحين من غير حد كبير !!!! وتقولون بعد فري !!!

شو قصدكم ب فري ؟؟
السواقة .. الطلعات ... اللباس ولا شو ؟؟
لو قصدكم عن الاحتشام .. نلبس شيلة و عباه .. شو بعد ؟؟
بالعكس اكثر البنات العيميات اللي اعرفهم متحجبات بس شي واييد عرب مب متحجبات
ها اللي اجوفه .. !!!

بعدين شو اللي خلاكم تقولون ان البستكية فري
شو اللي سووه ؟؟؟

بدون اسم .. لو العيم مالهم يد في تراث دبي
عيل البراجيل منو اللي سواها !!!؟؟؟

واعراس العيم مختلطة .. من متى !!! لا لا انا شكلي مب عايشة بالعالم دام جي السالفة :fa54:

وبعدين في شي واييد يقهرني كل ما شفتوا بنت او ولد يسوي شي غلط قلتوا عنه عيمي
ليش !!!؟؟؟

عمري ما جفت من العيم غير كل خير .. بس جفت بنات عرب الله يستر عليهم ومن كثر ما صاكين عليهم يسوون بلاوي :fa54:

وبعدين الاخلاق و الدين هم اللي يححددون سلوك الشخص
مب اصله و فصله

والدليل في العايله الوحدة تلقوون الاخوان اللي هم اخوان تفكيرهم كل واحد شكل
ترى الربع هم ساس البلا !!!

حمدالله اني نص عيمية و بستكية بعد :fa38:

والسموحة على اسلوب بس عصبتووني

[ا ل ز ع ي م]

عجباً لأمرك أخ 00 الحساس 00
موضوع غيرك فيه شيء طبيعي أنك تطالب فيه الغلق أو القفل شرات يوم طلبت غلق موضوع في واحة الشكاوي من الأخت الإداريه 00 الشوق 00 وعنوانه على ما أظن "خوف وجبن" مع أن الموضوع كان خاص وفيه مشكله بين الأعضاء والإداره يبحثون عن حل لمشكلتهم وأنت سيادتك داش عليهم دون أحم أو دستور تطلب فيه الغلق وممثل لدى الجميع أنك من مهتمين بسلوك الأعضاء والواحات

والآن وما أنا مستغرب منه أني أراك ترفض وبشده غلق موضوعك أو أنك سمعت نصح غيرك بغلقه معللاً المشاكل في موضوعك والفتن الحاصله فيه مع أني أراه يستحق ليس الغلق وإنما الحذف والسبب كالتالي:
1) موضوع فيه تناقض
2) موضوع فيه تمييز بين العجمي والعربي
3) موضوع غير مناسب بوجوده في الواحه الفضفضيه
4) فيه سوء آداب من أحد المشاركين



للـ علم:
أنا كنت ناوي أستمر بالمشاركه لهذا الموضوع ولكن هناك سببين أمتنعت عنه وهو كالتالي:
1) هروبك من الإجابه عن سؤالي السابق
2) العضو 00 بدون اسم 00 أزعجني وذلك بأرسال عدة رسائل خاصه لي ، محاولاً فيه أن يفتن بيني وبينكم أضف أنه أمرني بالرد على المشاركه هجوماً لصالحه ودخولاً لسالفة العيمي والعربي الأصل


ولكن ما جعلني أرد ليس من أجل العضو 00 بدون اسم 00 والذي يهدف لشيء عالماً أنا بما يريده وهي غير طيبه ؛ ولكن موضوعك بما أنه يتكلم عن المرأه ولكن لا أعرف لم أدخلته بموضوع العجم والعرب والغريب أن لو كل أنسان مسلم عنده أيمان كبير بربه الكريم ومتخذ الرسول صلى الله عليه وسلم له كأرشاد وتوجيه بأن لافرق بين العجمي ولا العربي كما لا فرق بين الأسود ولا الأبيض إلا بالتقوى
لما أختص بعضكم العجمي عن العربي أو العربي عن العجمي كما يفعله بعضكم هنا

لا أعرف كيف متعلم مثلك ولا يعرف هذه الأمور

قال ما بيغلقه قال أليست بها أنانيه من شخصك؟

،
،
،
ا ل ز ع ي م

[الحساس]

اخوي زعيم ولكن..
بغض النظر على ماكتبته في موضوعي..
احب اشكرك على نقلك لحقيقه بدون اسم..
تحياتي ..

[أتمنى]

انتهينا من موضوع شيعة و سنه

و جينا لموضوع عربي و اعجمي

و بكرة ايش عنوان الموضوع الجديد !


إلى متى !؟؟!؟!


سؤال: ايش الفايدة المرجية من الصراع هذا !؟

سؤال: إلى متى نحكم على جمع من فعل فرد !؟

سؤال: .......

يـــــــا كثر الأسئلة اللي ما لها جواب ....


عذراً أخي الحساس ... يغلق الموضوع

و الأسباب:

انه يسبب حساسية كبيرة بين الاعضاء

الموضوع أخذ كفايته من التهجم

و اذا عندك رأي آخر عن الموضوع أخي الفاضل أتمنى يكون النقاش

عبر الرسائل الخاصة .. لأانه صعب نعدل في الردود ! كلها تجريح و كلام ماله داعي


:: بدون اسم :: أتمنى انك تتأكد من صحة الاحاديث في المرات الجاية قبل الاستشهاد بها !!