طلعت البنت ويا ربيعاتها... [الأرشيف]

انسان عادي

15-05-05 ||, 10:36 AM

مشكورة الغالية على هاي المبادرة الرائعة منج في طرح مثل هذه المواضيع

بصراحه ... البنت سمعه ... اذا تعرضت لأي كلمة او اي موقف بتكون محاسبه عليه

ومن غير .. الكل يعرف ان البنبه مثل الجوهرة ... الجوهرة تثمن بالملايين .. بس اذا انخدشت محد يباها وتثمن برخص التراب ...

بالنسبة لي انا ... مستحيل أرضى بهذا الشيء لعدة اسباب ...

في البداية شو هو السبب الوجيه عشان تفضل الطلعة مع ربيعاتها على الطلعه مع اهلها ...

هل الضحك والسوالف مثلا ... هذا ممكن يكون في البيت .. وبالعكس في البيت ياخذن راحتن اكثر ...

أم ... الترفيه وتغيير جو ...؟ وجود الأخ او الأم معهم لا يعكر صفو المتعة في التسوق وخلافها ...

وفي نقطة احب اوضحها بخصوص هذا الموضوع ... للأسف البنت لما تطلع مع صديقاتها تكون فرحانه لدرجة انها تنسى نفسها .. تضحك وتسولف امام عامة الناس وهذا الشي يشجع اصحاب النفوس الضعيفة بجرأة التحرش ظنا منهم بأنها تصتنع الضحك لشد انتباههم مع انها -في بعض الأحيان- لا تكترث بمن حولها ولا تقصد شيء

بنات ...

مهما البنت راحت ورجعت ودارت ولفت ... خيرتها بترجع بيت ريلها .. أما الأخريات فانهن يلجأن لمسار دائري يلف ويدور تحت مجهر التسلية وتضييع الوقت الى ان تسبب بمصيبة او غلطة تندم عليها طوال عمرها ...

أشكر الأخت "متفيزرة عالعرقوب" على اختيارها لهذا الموضوع الرائع وانتهز الفرصة لأرسل رسالة لكل بنت صغيرة كانت او كبيرة ... شوفوا خطايا غيركن وتعلموا ... " ما ينفع الندم لين طاح الفاس بالراس"

والسموحة

نور السنا

15-05-05 ||, 12:29 PM

انا بالنسبة لي و بالرغم من اني عايشة في البحرين و الي الطلعة ويا الربع شي عادي مثل الماي و الهوا,, في بيتنا هالطلعات مممنووووووووعه منعا باتا... و الكل مستغرب من هالشي... الصراحة انا أحب اطلع ويا ربيعاتي لكن هالشي مو مسموح لي,, و يا ريييييبت أقدر لأن الطلعة ويا الاهل ساعات تكون معقدة, كل شي عندهم عيب و كل شي غلط, حتى الاشيا العادية جدا يقولون لك لا هاذي غلط,, خنننننننننننننقه,, و لا سمح الله واحد تحرش أو غازل, تعالو بيتعكر مزاج الأخو و الا الوالد و بيقعد مكششر و بيحن يلا نرجع و يلا نرجع,, يعني بالعربي ملل و مصاخة,, انا برايي الاهل لازم يوثقون في بناتهم أكثر و يخلونهم يطلعون ويا ربيعاتهم لأن دار الزمن و الا قصر ماردهم بيطلعون يعني بيطلعون ويا ربيعاتهم....

و آسفة اذا ضايقت أحد برايي لكنها وجهة نظر...

تحفه

15-05-05 ||, 12:50 PM

عليج السلام والرحمه ..

بصراحه يا الغاليه ..

هالموضوع بالذات .. يختلف عليه كل الناس ..

في ناس توافق .. وفي ناس مشددين .. مب لانهم مش واثقين بعيالهم .. بس خايفين عليهم من كلام الناس

بيني وبينج ..

انا اهلي يوافقون اني اظهر وي ربعي ( بشرط يكونون واثقين فيهم ) والحمدلله انا ربعي كلهم عيال ناس محترمين و عوايل ما عليها خلاف ..

اما الاماكن .. فحمدلله ولا مره رفضو لي طلعه لمكان .. لأن نحن نعرف مثلا هذا المكان بيكون مناسب والمكان الفلاني مش مناسب !! .. فيعني الاختيار الراجع لي انا .. ولا مره حصلت عليه اعتراض ..

اما بالنسبه ل سؤالج ..

انا احب اظهر وي ربعي و وي اهلي .. يعني مافي مانع اطلع وياهم ..

اطلع وي ربعي عشان نغير جو و نفرفش .. واطلع وي اهلي عشان اتفادى المخاسير >.<" لول

وهيه حمدلله يوافقون .. لأنهم عارفين ربعي واهلهم .. وتقريبا ابويه وماما ايعرفون كل ابهات ربعي .. يعني يا يعرفونهم من زمان اول .. ولا دارسين وياهم ولا يقربولنا ولا اي سبب من الاسباب المقنعه ..

ملك

15-05-05 ||, 01:08 PM

دلوعة دبي

15-05-05 ||, 04:06 PM

تسلمين اختي ع الموضوع...الصراحة الأهل ما يخلوني أطلع ويا ربعي...بس إذا أسير بيتهم عادي

اختكم:دلوعة دبي

عنود الريف

15-05-05 ||, 05:03 PM

مرحبا الغاليه .. اختي المتفيزره عالعرقوب ...
انا اهلي من النوع المتحفظ وااااايد .. يعني مستحيل اسير ويا ربيعاتي لمركز من المراكز ..
اما اذا كانت حديقه وكلها حريم .. ما عندهم مانع ان نتيمع كلنا هناك ..
وساعات اطلع ويا بنات يرانا لان اهلي يعرفوونهن .. وما نظهر اصلا رواحنا .. اذا انا سرت وياهم .. امهم تكون موجوده .. واذا هم ويايه .. اميه تكون ويانا .. يعني جذي والا جذي حد عود ويانا ...
بس كطلعات ... الطلعه ويا الربع مثل الطلعه ويا الاهل ..
بالعكس انا احبذ وجود ريال ويايه يوم اسير السوق ... خصوصا مركز وفيه واايد شباب ..
تسلمين الغلا على الموضوع ..
والسمووحه

أمواج

15-05-05 ||, 08:24 PM

انا راح اتكلم عن نفسي

اهليه مايرضووون ولا وحده من خواتي انا نطلع ويا ربيعاتنا السوق او اي مكان ترفيهي ... حتى لو كانوا واثقين منا بس مايثقووون بالشباب ....
و بعدين اهليه يفكرووون بنظره الناس لنا يعني لو اهلنا يعرفووون انا نحن محترمااات اللي بيشووف شله بنااات بيقووول اي شي مب زين عنا بس لانا بنات بروووحنا

انا سويييتها بس مره لاني كنت مظطره اسير ويا ربيعاتي بروحنا واهليه رضوووا لانهم يعرفووون ااني سايره امتحن امتحااان مب سايره السوق ولا مكان ترفيهي

والسموووحه

أمواج

15-05-05 ||, 08:30 PM

شكرا لكل من:

عنود الريف

دلوعة دبي

انسان عادي

ملك

نور السنا

أم خدود

ملانـة

15-05-05 ||, 11:29 PM

و عليكم السلام و رحمة الله و بركاته

تفضلين تطلعين ويا ربيعاتج ولا ويا الأهل و ليش؟؟

well,, على حسب المود.. الطلعة ويا رباعتي لها طعم غير و الطلعة ويا أهلي نفس الشي.. أحب طلع ويا رباعتي أكثر لأنهم مثلي.. لهم بارض يتشرون و يدورون وياي في أغلب المحلات.. و ذوقنا في اللبس و المكياج نفس الشي.. بس أمي ماروم أحوطها المكان كله لأني أدور ع شي معين و شي أكيد أنها بتتحرطم و بتتعب من الدوارة ... و لو كنت ويا خواتي بقول أوكي.. غير عن جي.. ساعات نبا نكون رواحنا عشان ناخذ راحتنا في الحش والا نفضفض عن مشاكلنا و همومنا.. و حتى المطاعم اللي نفضلها تكون غير عن اللي تفضلها ماماتي فديتها و الا خواتي.. فمن جي أفضل أطلع ويا رباعتي...

هل يوافق أهلج على طلعتج ويا ربيعاتج.؟؟؟ واذا مايوافقوون شو السبب؟؟

طبعا يوافقون... طول ما انهم يعرفون أنا ويا منو طالعة وواثقين من البنت و أهلها و إني ما أتأخر و أرد البيت في وقت معين عيل no problem.. !!

بس أنا مستغربة من اللي ماخذين فكرة غلط عن البنات اللي يطلعون ويا رباعتهم.. ماظنتي أي وحدة ويا ربيعتها تكون بنت مب محترمة والامب مرباية.. و بنت الناس المتربية تربية سنعة لو تحطونها بين ألف ريال ما بتغلط.. و نحن ترا أوادم بعد.. نمل من يلسة البيت و نبا نغير جو.. ما أقول البنت لازم تطلع ويا ربيعتها في أي وقت و طول الإسبوع.. طلعاتها لازم تكون في أوقات معينة و مع بنات ناس واثقين منهم و لأماكن الأهل لازم يعرفونها..

و السموحة ع الإطالة

إختج

مــلانــة
:fa48:

بسمه حزن

16-05-05 ||, 12:35 PM

تفضلين تطلعين ويا ربيعاتج ولا ويا الأهل و ليش؟؟

اكيد ويا الاهل ، ما احب اطلع ويا ربيعاتي .. ما ارتاح اذا طلعت ويا ربعي ويا الاهل احسن واريح

هل يوافق أهلج على طلعتج ويا ربيعاتج.؟؟؟ واذا مايوافقوون شو السبب؟؟

يوافقون ، بس انا ما ابغي .. اله اذا كانت ويانا حرمه كبيره يعني ام وحده منا ..

والسموحه .وتسلمين ع هالموضوع

تحفه

16-05-05 ||, 01:10 PM

لفت انتباهي رد ملانه !!

ومن بعض ردود الاخوات الكريمات صراحه ..!!

في عضوات ردن على السؤال وكانه الي تظهر وي ربيعاتها بنت مب زينه ؟؟!!

لا بالعكس .. ما يخصّـه؟!!

موضوع البنت تظهر وي ربيعاتها .. عمره ما كان مقياس لـ اخلاق البنت ؟!

إلا اذا كانت تصرفاتهن ملفته و المكان الي رايحين له إييب الشبهه صح ولا انا غلطانه ؟!

ليش الاهل ما يعطون البنت الاذن بالخروج ؟؟
لأن الاهل في ضني دايما يتحرون بنتهم صغيره .. وبالتالي يخافون عليها !!

.. معقوله في ناس تقيس اخلاق البنت بـ ظهرتها وي ربعها؟!

يا جماعه السالفه مب سالفة اخلاق .. السالفه سالفة تفكير رجعي !!

شو يعني اذا البنت ظهرت وي ربيعاتها وكانو محترمات بيتصرفاتهم و في مكان عام !!

أســتــغرب من هالناس الي يفكرون بهالطريقه

تحياتي للجميع

:vampire:

أمواج

16-05-05 ||, 01:40 PM

الكل قال رايه في هالموضووع

واختلفت الآراء .. البعض فسر هذا الموضوووع انه تهجم على البنت اللي تطلع ويا ربيعاتها:fa55: :fa55: :fa55: انه مب زينه وانا ما اقصد هذا الشي:fa36: :fa36:
انا قصدت من هذا الموضووع اعرف وجهات نظركم لاغير

بس حبيت استفسرعن كلمه قلتيها يا ام اخدوود تفكير رجعي .... هل تعتقدين خوف الاهل على بناتهم من الكلام اللي بينقال عليهم تفكير رجعي؟؟؟ .. انا مب وياج في هالنقطه كون الاهل خايفين على بناتهم من كلام الناس مع انهم يعرفوون بناتهم و واثقين منهم بس الناس ماتعرف هالشي عشان جذيه البنت اول ماتطلب من اهلها انها بتطلع وياربيعاتها يقابلوونها بالرفض لان البنت حتى لو ماسوت شي مابتسلم من كلام الناس .. عاد كل واحد و نمط تفكييير ونحن مايخصنا فيهم
:fa45: :fa45: :fa45: :fa45:

والسموووحه

أمواج

16-05-05 ||, 01:44 PM

شكرا لكل من

مــــلانـــه

بســـــمه حزن

أم خدود

المتفيزره على العرقوووب:fa56: :fa56: :fa56:

الجديدة

16-05-05 ||, 02:21 PM

السلام عليكم و رحمة الله و بركاته
الصراحة إنه هذا الموضوع يختلف فيه الجميع من حيث العادات و التقاليد و نوعية الأهل و تفهم للموضوع
بالنسبة لي فأنا أفضل أن تذهب الفتاة مع عائلتها إلى الأسواق أو الأماكن الترفيهية لإنه ماحد يعرف شو يصير و تكزن البنت مطمنة و اهلها مطمنين عليها مع إخوتها
و إذا حابت تكون مع صديقاتها تتصل إلهن و تقابلهن في المحل و يققعدن مع بعض
و السموحة

تحفه

16-05-05 ||, 04:15 PM

الغاليه الله ايهداج ..

اي عقل بيقول ان خوف الاهل على البنت بيكون تفكير رجعي ؟!

ما كنت اقصد خوف الاهل هو التفكير الرجعي !!

.. إنما قياس أخلاق البنت على ظهرتها وي ربيعاتها .. هو تفكير سيء جدا جدا ..

يعني محد له الحق يحكم على البنت .. لأنها والله تطلع وي ربيعاتها !!!

من نظرتي الخاصه .. اشوف ان خروج البنت مع ربيعاتها .. شي عادي ..
إلا اذا كانت تصرفاتهم مش حلوه و المكان اييب الشبهه !! < فـ هذا يعتبر شي ثاني !!

ملك

16-05-05 ||, 08:56 PM

حبيبتي ام خدود

دا كاان زماااااااااان

احين لو بس يت عين البنت بالغلط في عين وااحد بيقوووول

هيييييييييييييه هاااي تباني و هاي و هاي .. و الله كانت تطالعنيه

:fa36:

و بعدين .. الشر يعم !!

المعروف دوم من اللي يشوفنه الناس في المولات و غيرة

انه اللي تظهر بروحها مع ربيعاتها

( ...... )

انا شفت واايد ..

حتى يوم تكون وحده محترمه ... خلاااااص انطبع في ذهنهم انه كل البنات اللي يظهرن رواحن

جييه

يوم اسمع سوالف اخويه و عيال عمومي و اعرف شو تفكيرهم من اللي يشوفونه

يقولون لنا حتى لو عنا جرانتي انج ما بتسوين شي .. ما نضمن غيرج شو يسوي

و شو يفكر

؟!؟

بس خلصت

السموحه

:blush:

تحفه

17-05-05 ||, 08:51 AM

معقوله كـلامج ؟!؟

:look:

كل الشباب تفكيرهم جيه ؟ .. او بالمعنى الادق .. معظم الشباب !!!!

اعذريني الغاليه ..

لكن الحمدلله ( ما بقول هالشي عن خقه او شي )

بس لو كل الشباب ينظرون للبنت بهالشكل .. ما كان انخطبت هالكثر :fa56:

وبصراحه اسمحي لي .. بس اذا كانت نضرة كل الشباب للبنت الي ما تظهر إلا وي اهلها جي

فـ اقدر اقولج ان عقول شبابنا وصلت لمرحله عاليه من الـ سطحيه ( هذا واحد)

( اثنين ) .. مب قصدي احرضكم على اخوانكم و شباب اهلكم .. لكن

الانسان متى يهتم بالكلام الي يتوجه له ؟ ..

لمّـا يكون هذا الكلام صادر من انسان له وزنه و اهميته واعماله الي الكل يفتخر بها ومشهود له بالحكمه و الفكر , صح ولا لا اختيه الغاليه ؟!

فـ بما انج قلتي الشباب بيقولون هالرمسه ..

انا بقولج معظم شباب هالايام تفكيرهم سيارات في بنات في طلعات و سفرات وفي اجازات ووين و متا بتخلص الجامعه .. لاعت جبدي ملييييييت .. !!

تعالي .. شفتي فيديو انتشر في الاونه الاخيره .. لشباب تقنية دبي ؟؟ .. يرقصون ويغنون و ايهزون وي مدرسينهم ومدرساتهم ؟!

بـ صراحه انا بخبرج .. مثل ما في شباب يقولون بنات التقنيه فيهم وفيهم .. ( انا ) صرت اقولج شباب التقنيه فيهم وفيهم !! ( وانا بدرايه كامله ان هاذي النضره غير سليمه )

بس جي بدون شعور .. نفسي عافت شيفتهم .. ما احب الناس الي ما يحترمون عمارهم

يعني بـ صراحه .. انا ما اتخيل واحد حامل جنسيه امراتيه .. يرقص ويغني وي المس والاستاذ يتمنظر وضحك في ضحك جنهم سبلان يالسين في حديقة حيوان ؟! .. شو هاذيله ما عندهم حد يصلبهم ؟؟

هاذيله حد يسميهم ريايييل ؟!!!!

اوكي قلنا يرقصون .. وايد شباب يرقصون ... بس وين .. في الكلاس جدام المس وتعال برقص حذالها

يعني انا استغرب من هالشباب الي جي !! .. لهالدرجه مستهزئين بالمكان و مستهترين ؟؟

يوم الواحد بيي يتكلم .. او حاب يوجه انتقاد او راي في موضوع معين .. لا يفر الناس بحجر وهو بيته من زجاج < عاشت الفيلسوفه عاشت :fa46:

يعني ما ادري ليش معظم الشباب جي ؟! ..

الحمدلله انا بابا وماما ناس واعيين .. يعرفوني عدل وواثقين فيني الحمدلله

وصح ان ماما ما توافق اني اظهر ... الا بعد ما تطمن منو بيكون ويانا

بس عمرهم ما فكرو بنظرة معظم شباب الامارات

وللعلم .. انا ارجع سبب هالشي لشي واحد معروف ..

تدرين شو هو ؟؟

يوم يقولون .. الريال يحب يربع وحده جريئه ..لكنه يرفض يتزوجها .. لأنه يخاف منها !!

ولو تلاحظين معظم قادتنا و شيوخنا البارزين ما يهمهم نظرة البعض للمراه الي تظهر و تدرس و تشتغل .. وبالعكس جشعوهم ..

الشيخ زايد الله يرحمه كان يدعم بقوه الفتاه الاماراتيه .. واكبر دليل قريب منه هي اعمال الشيخه فاطمه الله يحفظها

الشيخ محمد في دعم مستمر لـ الفتيات الاماراتيات ..

و لو تلاحظين انه دعم وبقوه الحريم الي يشتغلون بالتجاره .. ورعى فكرة تكوين مجلس حقهم

شيخ الشارجه .. ما شاء الله على الشيخه جواهر نشيطه في اعمالها

تعالي شوفي الشيخه لبنى القاسمي .. لما تخرجت وقالت حق اهلها انها تبا تدري آي تيه .. ضحكو وقالو لها ما بتحصلين شغل ووين نحنا ووين الاين تيه

والحين شوفي وين وصلت !!!!

لما يت القت محاضرة في جامعتنا .. يا كثر ما مدحت في بنات جامعتنا .. و ووجهت نصيحه هي دوم تنصح بها ..

قالت يوم بتسوون شي .. وانتو مؤمنين و واثقين فيه .. لا تخلون حد يخرب عليكم

و اذا بتسوون شي .. يا انكم تسوونه و تبدعون فيه .. يا انكم ما تسوونه

يعني اعمل افضل ما لديك في هالعمل

بس تعالي انتي لو يبتي شباب هالزمن .. لورى ( تحديدا في السبعينات ) .. بيلسون يقولون ( اذا وحده سافرت تدرس اي تي ) .. هيه والله .. فلانه بنت فلان ودوها تدرس برع و ما ادري ايش من التفكير الي عندهم !! ( انتي ادرى شو احتمال ينقال في حق اي بنت )

خاصه ان في السبعينات او الثمانينات ما كانو بعدهم عارفين شو سالفة الكمبيوتر والاي تي وهالسوالف

( طاعي الحين دخلنا في سالفه .. وشبكتها في سالفه لول .. )

على العموم لكل حد وجهة نظر .. وانا اتفهم كلامكم .. ومب كل الناس شرات بعض ..

تحياتي لكم

والسموحه طولت .. كنت متفيجه :vampire:

أمواج

17-05-05 ||, 09:42 AM

مشكوووره اختي ملك على ردج

أمواج

17-05-05 ||, 10:01 AM

هلا اختي ام خدووود

اعتقد كان موضوووعنا عن طلعت البنت ويا ربيعاتها مب عن الشباااب

و الكلام اللي قالته اختي مللك مجرد راااي لاكثر >>>> مادري ليش من قريتي كلامها تهجمتي على الشباااب ؟؟؟
مع انه البلاااوي الحين تطلع من البنات...........

انا بقووول راي ومابا اي تهجم منج يا ام خدوود

الصراااحه البنت لما تكووون ويا ربيعاتها و بروووحهم تحس انها جريئه و تنسى عمرها و كرامتها و اهلها و تسوي اي شي (عاد مب شي عووود:woot: :woot: )يعني بتتجرأ تشوف ، تضحك ، حركه ,,,,,,,,,
والشباب لما يشوووفون هالحركاااات طبعا توقعوا منهم اي شي

انا ما احط اللوم على البنات بس ولكن مب الغلط كله من الشباب
الكل يغلط ,,,, في حد يحس بغلطه وفي حد مفتخر بغلطه ولا جنه مسوي شي ((مثل مايقولون الحياه كوول:fa56: :fa56: ))

وبالنسبه لفيديو اللي شفتيه عن شباب التقنيه .... ترا البلاوي في كل مكاااان حتى جامعة العين فيها بلااااوي ,,,,,,,,,,,,, اذا الرياييل مسويين جيه شو بتقوولين عن البنااات اللي يسيروون القهاوي و يشيشوووون هذي بنت هاذي تستاهل الذبح ,,, اول شي فضحت عمرها والاهم فضحت اهلها اللي تعبوا عليها

واختي ام خدووود انتي ركزتي على جانب واحد للشباب و ماشفتي الجانب الزين فيهم و ليش ماتكلمتي عن البنات و البلاوي اللي تطلع منهم ,,, تبيني اقووولج الفضااايح اللي تستوي في جامعة الامارات:fa55: ، كليات التقنيه بنات:fa55: و جامعة زايد:fa55: و جامعة عيمان:fa55: و جامعة الشارجه :fa55: ,, والله مستعده اقوووولج و ماعندي ماااانع بس عشااان تعرفين انه البلاوي من صوب البنات الحين اكثر عن الشباااب وهذي الاشياء ان طلعت من الشباب مثل ماتكرمتي و قلتي مهما سواها >>>>>. الريال مايعيبه الشي ,,,, الخطر على البنات تراهن سمعه لنفسها و لهلها يعني اي حركه اي شي بيقولون بنت فلان الفلاني تراا جذيه و واهلها شو ذنبهم انهم ربوها و تعبوا عليها و كانت هذي النتجه .. انا مااقول النت من نفسها تسوي الغلط ولكن يمكن البيئه اللي عايشه فيها خلتها تسوي البلاوي ام ربيعاتها (الصاحب ســـاحب:fa46: )

من كلامي الطويل حبيت بس اوضح لج انه الكل يغلط مب بس الشباب اللي هاجمتيهم بكلامج

والسموووحه لازم اطلع ورااااي كلاااااس عادي يحطني السير absent

نسيت اقووول اختي ام خدوود جشعوووهم >>>>> شجعوووهم (طااااااااخ:fa56: :fa56: :fa56: :fa56: )

ملك

17-05-05 ||, 10:03 AM

صباح الحب و الاشواق

:blush:

شحاالج ام خدود

فديتج .. مب شرط يكونون كلهم تفكيرهم سطحي

بس في شباب ما يرضون انه حد يطالع خواتهم او بنات عمهم بهالنظرة

شووووووووووووو رايكم نتريا الشباب

يردون عالموضوع و نشوف رأيهم بهالشي

المتفيرزة عالعرقوب

صباحج فل و مشموم و كادي

العفو غناتيه .. احنا في الخدمة يا بيه :fa56:

.....

ختكم اللي تحبكم

ملك

:blush:

أمواج

17-05-05 ||, 10:55 AM

http://arb123.com/pic/523.gif

صباح النووور و السرووور اختي ملك

انا معـــاج ياختيه .... مافي حد يرضى حد يشوووف خواااته بهالنظره علشان جذيه يرفضووون طلعاااتهم ويا ربيعاتهم:fa55: :fa55: :fa55:

ونترياااااااا ردووود الاعضاااااء:woot: :woot: :woot:

تحفه

17-05-05 ||, 01:48 PM

ملك ..

شو تقصدين بكلامج .. ان ابويه يسمح ان حد يطالعني بهالنضره يعني ؟! :woot:

اكيد ما يرضى واصلا محد يحب يسمع شي شين ع عياله وناسه
.. لأنه يعرف ان اذااااااااا في كلام بيظهر .. بيكون من ناس فاضيه .. هوايتها القيل والقال لأنه واثق من انا نحن ما سوينا شي غلط .. وهو فعلا يعني وحليلي يوم اطلع وي ربعي ما اسوي شي :fa54:

وتريه الاراء وياج .. :fa45:
الموهيم
تسملين حبيبتي مره ثانيه بحط تفكيركم وانا اتكلم بالحسبان ..

المتفيزره على العرقوب

اعتقد كان موضوووعنا عن طلعت البنت ويا ربيعاتها مب عن الشباااب

و الكلام اللي قالته اختي مللك مجرد راااي لاكثر >>>> مادري ليش من قريتي كلامها تهجمتي على الشباااب ؟؟؟
مع انه البلاااوي الحين تطلع من البنات...........

ربطت الكلام في ردي على رد اختي ملك لأنها ذكرت تفكير الشباب في البنت الي تظهر وي ربيعاتها
يعني ردي الاولاني كان يعبر عن رايي في الموضوع بحد ذاته ..
اما الرد الثاني كان كـ تعقيب على الرد الي انذكر فيه تفكير الشباب اتجاه البنت الي ما تظهر وي اهلها !

الصراااحه البنت لما تكووون ويا ربيعاتها و بروووحهم تحس انها جريئه و تنسى عمرها و كرامتها و اهلها و تسوي اي شي (عاد مب شي عووود:woot: :woot: )يعني بتتجرأ تشوف ، تضحك ، حركه ,,,,,,,,,
والشباب لما يشوووفون هالحركاااات طبعا توقعوا منهم اي شي

عـــــــــــــــــــــــف ـــــواً!!!!!!

فالنفترض قلت فالنفترض .. ان احساسج صادق .. وان كل البنات على قولتج يستوون جريئات وينسون عمارهم يوم يظهرون وي ربيعاتهم ( وما يستوي عندهم كرااااااااااااااااامه )

الشباب يوم بيشوفون هالاشكال من البنات بيتحلون حيوانات ؟!

سييييده بيسير لهم ( الحين بفتح محاضره دينيه ) .. قاصد فيهم .. يشبع رغباته ؟؟؟!!!!

شو ماشي عقل ؟؟ .. ولا ماشي فايده من الدين والتربيه ؟!!

انا مااقول النت من نفسها تسوي الغلط ولكن يمكن البيئه اللي عايشه فيها خلتها تسوي البلاوي ام ربيعاتها (الصاحب ســـاحب:fa46: )

:shocked:
والله انا اؤؤمن ان البنت اذا كانت مربايه و حطوها وسط امية ريال .. ما بيستوي بها شي إلا اذا الله راد
وبعدين من متا طلعت البنت وي ربيعاتها استوت ( بلاوي) وحتا لو الربع ياثرون على شخصيات بعض
شو هي سيده بتفر عمرها وين ربيعتها فرت عمرها ؟! .. ماشي عقل ؟

واختي ام خدووود انتي ركزتي على جانب واحد للشباب و ماشفتي الجانب الزين فيهم و ليش ماتكلمتي عن البنات و البلاوي اللي تطلع منهم
هيه طال الله بعمرج .. حطيت عليهم ( لأني ضربت فيهم مثال )

وبصراحه الجانب الزين فيهم بيظهر من الزين فيهم والزين هالزمن نادر .. خاصه ان الشباب اكثر عرضه للتاثر من البنات .. بحكم حريتهم

من كلامي الطويل حبيت بس اوضح لج انه الكل يغلط مب بس الشباب اللي هاجمتيهم بكلامج

ادري الكل يغلط .. مافي حد كامل .. بس في شي اسمه مثاليه
بس البنت تآخذ على تصرفاتها في مجتمعنا اكثر من الولد
وام خدود انسانه تحب اتحط على الشباب :devil: عشان جي اقولج .. منو قالج اني اقول ان الريال الحين ما يعيبه شي؟

بالعكس .. لو كان ما يعيبه شي .. جان ما استوت عنوسه في الامارات !!

بس تعالي الغاليه .. انا ما عممت على كل الشباب
بالعكس في من الشباب تفكيرهم حلو

بس انا يوم رمست .. رمست عن الشباب الي يقولون عن كل بنت تظهر وي ربعها انها خايسه وجي

على العموم حصل خير .. لو مهما رحنا ويينا .. ما بتغير شي .. بس حبيت اوضح رايي ..

مع السلامه

ملانـة

17-05-05 ||, 05:41 PM

عــدنـــــــا..

بصراحة أختي أم خدود كفت و وفت.. و فعلا الريال اللي يحط في باله انه البنت اللي تطلع ويا ربيعتها بتكون وحدة صايعة و تغلط,, بصراحة,, أعتبره إنسان تافه و سطحي.. مع احترامي يعني... شرات اللي يغازل بنات الناس و عقب يقول ما بتزوج اللي أكلمها يمكن ترمس غيري..!!! عنبو يعني لو أهلك اختارولك وحدة شو يظمنلك إنها ما رمست ويا مليون واحد قبلك..!!! عبط..!!

و البنت اللي بتاخذ راحتها ويا رباعتها و بتضحك.. جيه بتم امبوزة و امويمة يوم تطلع ويا أهلها والا خواتها!!! ترا نفس الشي... إذا هي مرباية تربية سنعة.. بتعرف إنه الضحك بصوت عالي عيب سواء كانت ويا أهلها والا ويا رباعتها.. و نفس الكلام ينطبق ع الحركات و التبصبيص ع الشباب..!!!

في خاطري أعرف ليش الوحدة تخاف من رمسة الناس دام إنها ما تسوي شي غلط؟؟؟ أوكي بيرمسون و بيقولون بس الناس لو تبا ترمس بترمس لين باجر وحتى لو البنت بتكون حابسة عمرها في حجرتها... مب اللي تجابل حجرتها و ما تطلع إلا ويا أهلها يعني أحسن بمليون مرة عن اللي تطلع ويا رباعتها.. عادي ترا .. يمكن تكون صايعة ع النت.. تغازل و ترمس الشباب ع الموبايل.. والحين الفنتك اليدييد بعد,, تطرش مسجات حق القنوات ..!!! و من هناك جدام الناس ماكو أحسن عنها..!!!!

دام كلنا نخاف من رمسة الناس,, عيل ما بنشتغل أحسن لنا...!!! بنقر في بيوتنا ولا بنسوي شي...ترا الرمسة تصير حتى في الدوام و المدارس مب بس يوم تطلع البنت ويا رباعتها...

الحمدالله... أهلي و أبوي بالذات انسان متشدد و ما يرضى إنه الواحد يفكر فينا تفكير غلط... و هالشي ما يمنعه إنه يثق فينا و يعطينا الحرية بحدود نعرفها و ما نتجاوزها... ترا ياما بنات شدوا عليهم أهاليهم و طلعوا فلتانات من وراهم.. ياما شفت بعيني بنات كانوا وياي في الكلية و يطلعون المولز من ورا أهاليهم ويا البنات لأنهم ببساطة محرومات من هالشي.. لو كانوا يعاملونهم كبنات كبار و بيتحملون باجر المسؤولية يوم بيشتغلون و يعرسون,, كان من المفروض من البداية يوضحونلهم و يقولونلهم شو حدودهم اللي المفروض ما يتجاوزونها... و ربي البنت حزتها لو فكرت تغلط,,, بتحس بجيمة المسؤولية و بتتراجع لو شو ما صار و مستحيل تخون ثقة أهلها فيها...

ع العموم.. كل واحد و له رايه بس آخر شي أبا أقوله.. يوم نحن بنقول كلام الناس.. لا تنسون إنه الناس هم أنا.. و انتوا.. و غيرنا.. يعني المفروض نحن نغير هالفكرة الخاطئة عن طلعة البنت و لا نسئ الظن بالناس...

أختكم

مــلانـــة
:fa48:

عليوي

17-05-05 ||, 08:13 PM

السلام عليكم ,,
مشكورة اختي المتفيرزة على العرقوب على الموضوع القيم ,, وبالحقيقة عيبني رايج فالموضوع ..
انا عن نفسي كأخ , ماسمح لخواتي انهم يظهرن للاسواق ولا اي مكان بروحهم وبدون محرم .. لان حاليا بما اني شاب , واعرف كيف نظرة الشباب للبنات اللي ما يكون معاهم ريّال (لانها في كل الاحيان نظرة سلبية)بأنها بنت متفتّحة وغيرها ..(لا اقصد الاهانة للاخوات اللي يطلعون بروحهم ) .. فا مثل ما قلت الصراحة مارضا ان حد يشوف خواتي بالنظرة السلبية ....

اختي ام خدود ,,
كيف البنت ما عليها من كلام الناس ونظرة الشباب لها ؟؟ لانها اذا كانت سلبية وذلك بسبب تفكيرهم الرجعي كما قلتي فهي راح تكون محتقرة اذا حد شافها بهالنظرة السلبية .. ومثل قيل ان الشر يعم .. وان اغلبية البنات اللي يظهرن رواحهم (لا اعمّم) تكون متبرجة وفاصخه الحياة .. والشباب تعودوا ان اي بنت تطلع بدون ريال تكون مال مغازل او حركات .. فا عشان جي النظرة تعممت حتى على الزينات والبنات المحتشمات اللي يظهرن روحهن ..

ومثل ما قالت الاخت المتفيرزة على العرقوب ان عيب الرجل فجيبه .. وعيب الحرمه يرد عليها وعلى اهلها .. وللأسف ما نقدر نغير "التفكير الرجعي" مثل ما تسمينه .. وانما يجب ان نأقلم عمارنا معاه .

واللي قلته مجرّد رأي لا اكثر .. وكما قلتي اختي العزيزة ان هالموضوع ما بيغير شي .. وانما فقط لتبادل الاراء ..

شكرا مرة اخرى اختي المتفيرزة على العرقوب ..

ملك

17-05-05 ||, 09:16 PM

عليوي

نعم نعم .. كلام جميل و مقنع

:laugh:

أمواج

17-05-05 ||, 09:19 PM

مشكووورين :

ملك
عليوي

ملانه
ام خدوود

على ردوودهم

واتمنى محد يزعل ترا كل واحد وراي

وام خدوود لاتزعليييين من كلامي :laugh: :laugh: :laugh:

كبيرة بعيوني

17-05-05 ||, 10:34 PM

حلـو سؤالج

وفي اختــلاف كثير عليه

بالنسبــة لي .. أحب اظهر ويا ربيعاتي و ويا خواتي > فـ الطلعات جنهم ربعي:fa56:

وبالنسـبة لاهلي .. عادي الطلعات ويا ربيعاتي بس بشـرط

يكونون عارفين ان هم من عايلة محترمه .. وماعليهم كلام

واللي اطلــع وياهم .. اهلي ويا اهلهم وايد .. أو سمعتهم طيبه

او يستوولي من بعيــد ..

وبـ صراحه الطلعات ويا الربــع .. وناسه .. تفكيرهم شراتج واهتماماتهم شراتج

بالنسبـة إلي

أنا اصغر وحدة واللي قبلي اكبر عني بـ10 سنوات .. متخيله كيف في فرق فـ الاهتمامات والتفكير؟!

عشان جي أنا أفضلها ويا ربيعاتي .. لان اهتماماتنا و تفكيرنا واذواقنا .. شرات بعض

بس عادي .. حتى ويا خواتي اطلع .. و وايد بعد

واذا عن كلام الناس .. ترى لو وحدة داخل البيت بيرمسون عنها !!
> تصير والله

يعني .. المحترمه اتم محترمه .. لو بين ستمية ألف ريال

وها مب معناته . ان هلي واثقين فيني عشان جي يخلوني .. واهل فلانه مب واثقين فيها
عشان جي مايخلوها تطلع ويا ربعها

لأ .. اهنه فـرق في الراي .. لانه في فرق في البيئه .. والتفكير .. والتحرر

اممم هاللي عندي .. لو في تعقيب ثاني ..

وكنت متفيجه نفس الحينه

برجـع وبرد

وبس
.
.
،؛،

نور السنا

17-05-05 ||, 11:44 PM

ختيه أم خدوود... أأيد موقفج مية بالمية انتي و ملانة و أشكركم على هالآراء المدعّمة و المنطقية...

الباقي.... سؤال صريح.. انتو فأي عصر عايشين؟؟؟؟!!!!!

عليوي

18-05-05 ||, 12:19 AM

نور السنا ..

نحن عايشين فعصر ضعف الايمان والمغازل والخراب والفتن .. في عصر يترقّب كل خبيث من الشباب ظهور اي بنت بدون محرم يحميها ,,لكي يتحرش بها بدون ما يخاف لا من اخوها ولا من ابوها ولا من امها ولا من شخص يردعه ..

هذا العصر اللي عايشين فيه .

وبالنسبة للاخوات اللي يقولون ان المحترمه بتّم محترمه حتى لو كانت بين الف ريّال .. لانني لاحظت بأن هذه الجملة تكررت من اكثر من شخص .. وجميعهم من البنات .. اقولهم ان الوحده اول ما تدخل بين الف ريَال , تبدا تفقد احترامها في عيون الكل .. بسببها لانها تجرّأت ودخلت بين الف رجل .. وبسبب المجتمع لان عاداته وتقاليده تمنع وتعارض وجود امرأة بين الف رجل .. ولا تنسوا ايضا ان وجود امرأة بين الف رجل بأنه موضع فتنة ..

لا اظن ان هناك رجل يخاف على اهله ممكن ان يقولها كما قلتوها انتن وان نظرتكن لهاذا الموضوع تختلف عن نظرة الرجل والمجتمع ......
ولا اظن ايضا ان هناك رجل يرضى بأن تكون اخته او امه او بنته بين الف رجل حتى لو كان مربّنها احسن تربية وواثق فيها اعظم وثوق .. فالموضوع لا يخص الثقة او الاخلاق , ولكنه يخص الموقف بعينه وهو وجود حد من اهله بين الف رجل ..

فقط للرد على من قالها..

تحياتي ملك ..

ملانـة

18-05-05 ||, 01:06 AM

لا اظن ان هناك رجل يخاف على اهله ممكن ان يقولها كما قلتوها انتن وان نظرتكن لهاذا الموضوع تختلف عن نظرة الرجل والمجتمع ......
ولا اظن ايضا ان هناك رجل يرضى بأن تكون اخته او امه او بنته بين الف رجل حتى لو كان مربّنها احسن تربية وواثق فيها اعظم وثوق .. فالموضوع لا يخص الثقة او الاخلاق , ولكنه يخص الموقف بعينه وهو وجود حد من اهله بين الف رجل ..

فقط للرد على من قالها..

تحياتي ملك ..

اخويه عليوي او أختي ملك ( ماعرف منو المهم)...

يعني ابويه ما يخاف علي؟؟؟ لأنه مخلني أسير و أطلع ويا رباعتي و أمشي بين ألف ريال؟؟ حلوة والله..!!:fa55:

ع العموم.. اللي ما يخاف من ربه ليش بعد يخاف كلام الناس.. فبعق كلام الناس ورا ظهري لأني واثقة من نفسي و من تربيتي و هالكلام لا بيودي و لا بيأخر شي و الحساب في النهاية بإيد رب العالمين مب بإيد الناس ...

مادري كيف برقد.. تنرفزت بصراحة...

مــلانـــة
:fa48:

أمواج

18-05-05 ||, 01:41 AM

افا عليج يا الملااانه لاتخلين موضوووع ينرفزج
:fa38: :fa38: :fa38: :fa38:

طير الغرام

18-05-05 ||, 02:20 AM

http://oasis.bindubai.com/download/6eer/nnnn1.gif

ماشاءالله الاقبال ع الموضوع كبير

تفضلين تطلعين ويا ربيعاتج ولا ويا الأهل و ليش؟؟

هل يوافق أهلج على طلعتج ويا ربيعاتج.؟؟؟ وليش مايوافقوون شو السبب؟؟

- أفضل أظهر مع أهليه لني ما اتعودت أطلع مع ربعيه

- لا مايوافقون >> أمايه اتقول منقود ما عندنا بنات يظهرن مع ربيعاتهن >> جيه تفكيرها وأنا عادي عندي
أو لو مناسبه هذا شي ثاني ويعتمد ع موود الوالده :fa46:

جاوبتج بالمختصر المفيد :woot:

تسلمين ع الموضوع الحلووو

http://oasis.bindubai.com/download/6eer/6eerline.gif

تحفه

18-05-05 ||, 08:38 AM

صباح الخير

كل حد له وجهة نظر ..

والمشكله اني وضحت كلامي ...

( دافعت عن البنات الي يظهرون وي ربعهم ومحترمين .. مب الي يسوون حركات )

ولا الظاهر انتوا ما تفرقون بين الاسود والابيض .. كله بالنسبه الكم الوان !!

واسلوب تربيه عن تربيه تختلف ..

في ناس تسمح لـ بناتها تسافر وتدرس ..

وفي ناس ما توافق و تشوف فيها ( قبايل )

على العموم المفترض محد يزعل .. بغض النظر ان بعض الردود المعارضه

صارت بـ مثابة كلام غير مباشر للـ عادي يطلعون :fa44:

بس بعدني اقول .. واندد واعارض

مب كل بنت تظهر وي ربيعاتها خايسه .. ولا كل بنت تيلس في البيت وما تظهر الا وي اهلها نظيفه !!

وانا ما قلت يا اخ عليوي اني ما اهتم لكلام الناس ..

بالعكس .. الدليل هو ان الواحد يوم بيلبس شي ..

يلبس شي هو يحبه وبنفس الوقت .. يراعي فيه اذواق الناس !!

يا ريت لو انتبهت لكلامي عدل يوم رمست عن الاخذ بآراء الناس

على العموم

شكلنا ما بنييب نتيجه .. فـ اسمحو لي انسحب من النقاش ..

ما احب اعور راسي على الفاضي وينتقدون اسلوب ماما وبابا ..

انا من النوع الي يتضايج .. حتى لو كان مجرد نقاش ع النت

والي يبي ينتقد ينتقد والي بيوقف في سايدي .. حياه الله

:vampire:

ألله يحفظكم

الهيثــم

18-05-05 ||, 12:34 PM

تعيبـــــني عليــــوي

ولي عودة للتعقيــب والتقطيـــع

...

تحفه

18-05-05 ||, 01:47 PM

بو لحيه انته ما عندك ثنويه عامه ؟!

شو ميلسنك ع النت !!

بريد ألكتروني

18-05-05 ||, 02:06 PM

كالعاده المتفيرزه عالعرقووب مستويه ( لاري كينج ) وتحط للاعضاء اسألة تمس مواضيع حساسه وتسوي شووووووووووط في عقوول البعض :fa56:

لنا تعقيــب انشالله

فطمطم

18-05-05 ||, 02:38 PM

مشكورة اختي عالموضوع

و أنا من وجهة نظري انه البنت يفضل انها تطلع مع اهلها مب مع ربيعاتها بروحهم محد معاهم
لان مثل ما نحن عارفين ان البنات لما يكونو بروحهم يكونون اكثر عرضة للتحرش من قبل الجنس الآخر و اما اذا البنت حبت تطلع مع ربيعاتها فيفضل وجود مرافق كبير معهم و اذا البنات يبغون يتمشون بروحهم فبامكان الشخص الكبير المرافق انه يجلس في كوفي شوب او مطصم و بعدين يتلاقون مع بعض.

اما بالنسبة للبنت المتزوجة فالأمر مختلف, لأنها على ذمة ريلها و ما اعتقد انه الوحدة المتزوجة تتعرض للمضايقت من فبل اشخاص آخرين لأنها متزوجة و محد يقدر يتحرش فيها

اهم شي الثقة.

يعني اذا الوحدة واثقة من نفسها و عارفه انها شريفة و مترباية على الشرف و الكرامة فأنا ما أعتقد انها بتعرض سمعتها للتشوه لأن كرامتها و سمعتها فوق كل شي و اكيد بتكون حريصة عليهم.

و دمتم سالمين

:):):):):):):):)

نور السنا

18-05-05 ||, 03:09 PM

عليوي,, هالعصر الي انت عايش فيه و على قولتك فيه ضعف ايمان, لو البنت تبا تسوي فيه شي بتسويه غصبا عن أهلها و الكل, و ما بيهمها حد,, لكن كون الطلعة ويا الربع تسمونها شبهه و يتعرض شرفها للخطر و السبة طلعة لاهي جريمة ولا حرام, فهذا العصر يسمونه عصر التخلف....

و أرد اقول, انتو يالعرب ماعطين أهمية كبيييييرة حق هالسوالف التافهه وماهمكم الا القيل و القال بينما في مصايب تسوونها و لا احد ماعطها اهمية... يا بي شهالعصر؟؟ شي مو طبيعي الدنيا عفيييسة الصراحة...

ولا حد يزعل من رايي تراها بسسس " وجهة نظر"

احلى حلوه

18-05-05 ||, 03:18 PM

و عليكم السلام و الرحمه

تفضلين تطلعين ويا ربيعاتج ولا ويا الأهل و ليش

لا .. طعا مع هليه

لانه ما ناخذ راحتنا .. و نظرة الناس لنا يوم تشوف شلت بنات رواحهن هب حلوة

ما ارضاها لنفسي .. انا بوم اشوف بنات بروحن .. اطالعهن بنظرة ( ....... )

و آخذ عنهن فكرة غلط .. لو حتى كانن محترمات ..

المحترمه تعرف نفسها .. بس غيرها ما يعرف

حتى لو كانت واثقه من عمرها

و هل كيف انتي ترضينها على عمرج .. يوم يشوفونج الشباب بروحج مع شلت بنات

و يرقمونج .. شافوج لحالج و ماعندج حد يوقفهم عند حدهم

او انه يردعهم من هالشي ..

هل يوافق أهلج على طلعتج ويا ربيعاتج والا مايافقون شو السبب

لو الموووت ما يخلوني

لانه عيب و منقوود .. و لانه لازم يوم بتروحين اي مكان يكون معاي محرم

و اذا تعذر انه يكون معايه محرم .. يكون حد كبير ..

عمتيه .. خالتيه .. اميه .. يدتيه

اما اذا كانت رحله مع الجامعه فهاذا شي ثاني ..

"

"

السلام عليكم ....

انا اظهر مع ربيعاتيه .. عمري ما جفت ان الناس يجوفوني بنظره هب حلوه ... وكل وحده ماترضى طبعا على عمرها أي شي او رمسه ... فعسب جيه تمشي باحترام واحتشام لو كانت مع اهلها او ربيعاتها .. وكلن يرى الناس ترى بعين طبعه ..

المحترمه تعرف نفسها .. بس غيرها ما يعرف ... سبحان الله .. يعني شوو اذا هالحكمه او الراي اعتقد .. اذا الكل جيه يفكر جان ما جفنا بنت الامارات تدرس في المدرسه والجامعه وتشتغل .. ولا جان تموا الاهل على تفكيرهم الاولاني ومكان البنت في البيت .. انا بمشي في مكان عام مع ربيعاتيه .. اذا انا امشي باحترام وحاشمه عمري كيف ما بيعرفون اني محترمه .. كيف غيرها ما يعرفها انا احيد ان البنت المب محترمه تنعرف صح من حركاتها واسلوبها والمحترمه بعد تنعرف ..

وبعدين الشباب يوم بيجوفوني مع شلة بنات مب اولاد ... ليش يرقموني انا ما شيه ومحترمه عمري والمكان اللي انا فيه .. الا اذا جافوه علي شي يشجعهم انهم يرقموني ... انا احيد ان البنت يوم اتسافر لازم يكون معاها محرم مب يوم تظهر من البيت .. عيل كيف يوم اتداومون في المدرسه ولا كيف يوم تشتغلون حتى مكان الشغل يكون فيه رياييل .. انا ما اقارن الشغل بالسوق .. بس كل مكان وله غرضه وفايدته يعني وكل انسان ونيته ..

انا ما اجوف انه شي فرق يوم البنت تظهر مع الجامعه او ربيعاتها ترى في كلتا الحالتين بتكون ما شيه مع شلة بنات مثل ما قلتوا .. بس الفرق اهنه انه اتروحون واتردون بالباص واهناك يوم تظهر مع ربيعاتها من البيت يعني .. والشباب يوم بيجوفونج ما شيه في مركز ترى المس او السير ما بيمشون معاج .. منو بيردعهم عاد في هالحاله اذا رقموج او تحرشوه فيج هل يا ترى ترضين على عمرج ..

انا بقووول راي ومابا اي تهجم منج يا ام خدوود

الصراااحه البنت لما تكووون ويا ربيعاتها و بروووحهم تحس انها جريئه و تنسى عمرها و كرامتها و اهلها و تسوي اي شي (عاد مب شي عووود )يعني بتتجرأ تشوف ، تضحك ، حركه ,,,,,,,,,
والشباب لما يشوووفون هالحركاااات طبعا توقعوا منهم اي شي

انا ما احط اللوم على البنات بس ولكن مب الغلط كله من الشباب
الكل يغلط ,,,, في حد يحس بغلطه وفي حد مفتخر بغلطه ولا جنه مسوي شي ((مثل مايقولون الحياه كوول ))

وبالنسبه لفيديو اللي شفتيه عن شباب التقنيه .... ترا البلاوي في كل مكاااان حتى جامعة العين فيها بلااااوي ,,,,,,,,,,,,, اذا الرياييل مسويين جيه شو بتقوولين عن البنااات اللي يسيروون القهاوي و يشيشوووون هذي بنت هاذي تستاهل الذبح ,,, اول شي فضحت عمرها والاهم فضحت اهلها اللي تعبوا عليها

واختي ام خدووود انتي ركزتي على جانب واحد للشباب و ماشفتي الجانب الزين فيهم و ليش ماتكلمتي عن البنات و البلاوي اللي تطلع منهم ,,, تبيني اقووولج الفضااايح اللي تستوي في جامعة الامارات ، كليات التقنيه بنات و جامعة زايد و جامعة عيمان و جامعة الشارجه ,, والله مستعده اقوووولج و ماعندي ماااانع بس عشااان تعرفين انه البلاوي من صوب البنات الحين اكثر عن الشباااب وهذي الاشياء ان طلعت من الشباب مثل ماتكرمتي و قلتي مهما سواها >>>>>. الريال مايعيبه الشي ,,,, الخطر على البنات تراهن سمعه لنفسها و لهلها يعني اي حركه اي شي بيقولون بنت فلان الفلاني تراا جذيه و واهلها شو ذنبهم انهم ربوها و تعبوا عليها و كانت هذي النتجه .. انا مااقول النت من نفسها تسوي الغلط ولكن يمكن البيئه اللي عايشه فيها خلتها تسوي البلاوي ام ربيعاتها (الصاحب ســـاحب )

من كلامي الطويل حبيت بس اوضح لج انه الكل يغلط مب بس الشباب اللي هاجمتيهم بكلامج

السلام عليكم مره ثانيه كيفي ابى اجر مرتين ^_^

وليش التهجم .. ترى هذا منتدى وفي المواضيع نحن نتبادل الاراء والافكار شي جميل الصراحه ...

الصراااحه البنت لما تكووون ويا ربيعاتها و بروووحهم تحس انها جريئه و تنسى عمرها و كرامتها و اهلها و تسوي اي شي (عاد مب شي عووود )يعني بتتجرأ تشوف ، تضحك ، حركه ,,,,,,,,,

تنسى كرامتها مره وحده .. تنسى عمرها واهلها واتسوي أي شي .. ليش ما خذه مخدر ولا شو .. ليش وين راحت تربية الاهل وهالسنين بس عسب جمن ساعه اتضيع كل شي .. ليش في هالساعات كل شي يروح الوازع الديني تربية اهلها ..

والبنت لازم ما تظهر مع أي حد الا اذا واثقه وعارفه عدل ربيعاتها طبعا .. الا اذا كانوه ربيعاتها يجوفون ويضحكون وحركات هاي غلطتها يوم انها ما عرفت تختار الصديقه الاوكيه

انا الصرحه جفت الشريط وما بزيد على رمسة ام خدود ...

بس حبيت اعقب على هالردين ...

اما بالنسبه لراي انا يعني الشخصي ..

انا الصراحه عادي اظهر مع ربيعاتيه .. واكيد امي تعرف ربيعاتيه وانا الحمد الله ما اظهر مع أي حد يعني بس ربيعاتيه اللي وايد معاهم ويوم اني وايد معاهم اكيد امي تعرفهم وواثقه منهم ... البنت يوم تمشي مع ربيعاتها بكل احترام ومحتشمه عمرها منو بيتجرأ يرقمها او يلحقها .. كل بنت وتربية اهلها وضميرها لو اهلها كانوا معاها او ما كانوا معاهم .. ومب كل الناس جيه نظرتهم ... بس اللي هم جيه مثل ما قلت كلن يرى الناس بعين طبعه .. ما فيها شي حتى لو راحت البنت بروحها المهم تاخذ اللي تباه وتظهر .. ترى حتى الشغل اتكون بروحها ما فرقت ... انا اهلي يخافون علي اكيد امي وابوي محد يرضى على بناته .. بس شي واايد ناس في المجتمع تفكيرهم سطحي وما عندهم غير الرمسه ... فنحن مب ملزمين نمشي على رايهم .. \

والسموووحه

تحياتي وودي

احلى حلوه

العيناويه

18-05-05 ||, 03:40 PM

السلااااااااااااااااااااا ام عليكم والرحمة
شحالهم الحلوين
ربهم بخير
عنبوووووووووووو بلاااااااكم مشتطيـــــــــــــــــن ... منووووووو الي جب دقوووووووووس
يعترف بسرعه
:fa56:
المهم
دخلنا في الجد والجد اسم الله عليه
وخخخخخخخ
عيبتني بعض الردووووووود ... وردودهم بالنسبة لعيناويوووو طويلة العمر
جدا مقنعه .... مع احترامي للطرف الاخر المعارض
انا برمس عن العين دار الزين ...
منقوووووووووووووووووووووو د يطولي بعماركم اي وحده تظهر ويا ربايعها ...
اي وحده تظهر ويا ربايعها يعني هالبنيه ................ استغفر الله
وهالنظره عامة عندنا
مافي بنية تظهر ويا ربايعها روحهن الا صايعات ويدورون حد يغازلهن
ومسترغدات ولا عندهن حد يردهن ...
يوم يجوفون شلة بنات مثلا ف المول ... شرات ماقال اخويه يوم كنت سايره وياه
عنبوووهن ما عندهن اهل يردونهن ...
فـــــــــــــ الي تظهر ويا ربايعها
يــــــــــــــــا انه ما عندها اهل
يعني خوانها معرسين ولاهين ولا يدرون عنها ... وامها وابوها كبار ف السن
او انه ما عندها خوان اصلا ...
اووووووووووووووو اووووووووووو اووووووووووو
......................

بس بعد عنديه سؤال
شوووو الي يخلي الوحده تستانس ف ظهرتها ويا ربايعها اكثر من اهلها
الا انها بتسوي شي ما تروم تسويه جدام اهلها وبيواجعونها عليه ...

والسموووووووحه
مجرد راي
:fa56:
عيناويوووووووو طويلة العمر

أحلى منصوري

18-05-05 ||, 03:58 PM

بس بعد عنديه سؤال
شوووو الي يخلي الوحده تستانس ف ظهرتها ويا ربايعها اكثر من اهلها
الا انها بتسوي شي ما تروم تسويه جدام اهلها وبيواجعونها عليه ...

بنــت فري ليش انتوا معصبيــن .. حريــة :laugh:
مالت ..
وما اعرف ليش يوم البنت تبى اتعرس اتم يالسة في البيــت .. مسكيـنـة تتريا سعيــد الحـظ واتقلل روحاتها مع ربعهــا .. شو السبب بنات الفري ؟؟ :fa55:

والسموحه

وما ليه عودة لأني اعرف الإجابات :fa44:

المصنــوري

تحفه

18-05-05 ||, 04:10 PM

بس بعد عنديه سؤال
شوووو الي يخلي الوحده تستانس ف ظهرتها ويا ربايعها اكثر من اهلها
الا انها بتسوي شي ما تروم تسويه جدام اهلها وبيواجعونها عليه ...

هذا تفكيرج انتي حبيبتي

بالعكس .. انا استانس وي اثنينتهم ..

بس استانس اكثر يوم اظهر وي ماما وبابا .. لان البجت مالي يكون مب محدد
يعني في سكيور في الشوبنغ لول

تحفه

18-05-05 ||, 04:15 PM

والله انتو اتضحكون ..

يعني لو بطلع وي ماما وبابا بكون غير عن يوم اطلع وي ربعي

جي شو اهلي مسوين لي رعب ولا فيني انفصام شخصيه عشان اتغير ؟!

وبعدين تعال انته
الــ
المصنــوري

على قولتك ..

ارمس عدل .. ما يازت لي الـ

بنــت فري ليش انتوا معصبيــن .. حريــة :laugh:
مالت ..

زلة لسان سقطت سهواً يلي ترمس عن الاسلوب في الكلام و الاخذ بالراي .. ولا شي ثاني ؟!!

العيناويه

18-05-05 ||, 04:15 PM

فديـــــــــــــــــت خشمج يا ام خدوووووووود ...
حبيبتي ليش حاسه انه الكلام موجه حقج انتي ...
فديتج حق كل وحده تستانس في ظهرتها ويا ربايعها اكثر من اهلها ...
( الي ع راسه بطحه يحسس عليها ) ...

السموووووووووووووحه ونطلب رضاكم
عيناويووو طويلة العمر

بريد ألكتروني

18-05-05 ||, 04:42 PM

انا وصلـــت

باختصــار وبدوووون بهارات وكلام منمق وخرابيط ما نفهمها :laugh:

في نقطة انتو نسيتوها ..

لاحظهو انه طلــعة البــنات مع ربيعاتها تعتمد على بيئتها واهلها واصلها .. انا ما اقول انه اصلها مش طيب ولا انه بيئتها خايسه ولا انه اهلها ناس مش زينين .. لكــن كــل حد وله اسلوبه وعاداته وتقاليده في الحيــاه ..

انا ماريد احدد الناس على هوياتهم .. لكــن فكــرو في الفئات اللي موجوده عندنا في بالبلاد مثل البدو والحضر والعرب والعيم .. بتلقوون انه كل واحد يتعامل حسب عوايده .. وخاصه في هالموضوع (ملاحظه : انا ما قلت انه في حد احسن عن الثاني )

بتلقوون الأب ال free اللي كل شي عنده مسمووح .. وبتلقون الاب المتشدد اللي مسكر على عياله من كل الجهات .. وبتلقون الأب اللي يقف بين الاثنينه بعقلانيه وينظر للصواب والخطأ ..

يعني احيانا البنيه تكون لازم تقضي مشوار مع ربيعاتها لحاجه ملحه .. تجد انه الأب ال free يقولها عادي باباتي ووقت ما تبين :fa46: والأب المتشدد يقــولها مافي مافي مافي وكف وسطـار وانتهى الموضوع :fa54: اما الشخص العقلاني بيفهم ليش بنته تبى تظهر ووين سايره ومتى بترد ومنو معاها وبيقول رايه ..

في النهايه انا ضد موضوع طلعة البنت مع ربيعاتها بدون شخص كبيـر .. (( عيوزتهم مثلا ))

وآخر شي عندي سـؤال للنــاس ال cool :laugh: اللي يشوفون الموضوع عادي جدا وانه البنيه ما فيها شي لو ظهرت تتمشى مع ربيعاتها ..

_شو الشي المميز جدا اللي بتسويه البنيه وهي طالعه مع ربيعاتها وما بتروم تسويه مع هلها ..

في النهايه هالشي حريه شخصيه فياللي تحبون الطلعات كيفكم اطلعو ..
وياللي معارضين الطلــعات تمو على سنعكم ولا تبدلونه بسنع 2005 :laugh: ( الله يستر تونا في نص سنة 2005 عيل يوم بتيي سنة 2006 شو بيستوي ) .. يا مصيبه :fa56:

ثانكس يالمتفيــرزه عالعرقووب عطيتينا مساحه في موضوعج عشان نتفلسف .. واتمنى اني ما تفلفست وايد وايد

e-mail :p

تحفه

18-05-05 ||, 04:42 PM

العيناويه حرام عليج ليش اتحبين النكد .. خلي الناس تستانس .. يمكن انتي قلتي كلامج ( عن الي ما يستانسون كثر ما يستانسون وهم وي ربعهم ) من حاله حصلت جدام عيونج ..

يمكن الحاله الي انتي بنيتي عليها وجهة نظرج .. ابوها وامها شي بلاهم مطلقين ولا فيهم عله ما تخليهم يكملون وناستهم في ظهرتهم وياهم ( ع قولتهم يا فرحه ما كملت ) .. عشان جي يحبون يظهرون وي ربعهم
ردة فعلج ( فديتج) يت جنها مب من قلبج .. ( و ع قولت يدوتي الله يحفظها ويعافيها لا تتفدون اي حد )

وان شاء الله كل حد وكل انسان يكون مستانس في حياته .. مب شرط وي ربعه بس .. واهله وناسه ..

ليش في ناس جيه ؟! .. يحبون ينتقدون وبس ؟!
محد يعرف ظرف الثاني .. على اي اساس تتكلمون عنهم ؟! ..

والله ماحب جي ..

يله باي ..

ما برد اكتب رد .. بس اكيد باخذ لفه على التعليقات ..
ما حب اتعب عمري على شي ما اييب نتيجه .. يالله باي

أحلى منصوري

18-05-05 ||, 04:52 PM

أوووب أووووب أم خدود راده عليــه ..

بخبــرج بســر ..
وصلتني رمســة بإن أم خدود حاطــه إهــداء في واحــة الإهداءات وكاتبــه إسميــه هنــاك ..
يعني الإهــداء حقــي بعــد .. واللي خبرني أقول له متأكد ولا متأكد ..
مستحيــل أصلاً .. أم خدود تهديني أنا إهــداء :laugh:
ورددت عليــه الجملــة كذا مــرة .. مستحيــل وقال ليــه إحــدر وشــوف ..
يوم حدرت ما لقيــت اسميــه قلت يمــكن ذاك الريال يحبني وعشان جيــه يشــوف اسميــه في كل مكــان واتوقع إنج هادتني مع الجميــع :fa56:

..

أم خدود ,,
ما يحتــاي اتعلميــني الذرابـة في الإسلوب .. وما يحتــاي اعيد الرسمـة اللي قلتهـا لج في " واحـة قروب الطلاســم "
وكل واحــد يلزم حدوده .. ويوم أحط إسمــج واقول الكلام موجه لج تعالي ناقشيني :fa55:

وعلى قولت العيناويـه .. اللي على راســه بطحــه يتحسسهــا .. والكلام لج يا جاره :laugh:

يالله .. درب السلامـة أحلى منصــوري .. ورايــه طريق الإمـارات ..
دعواتكم ( أكيــد كلهــا عليـّـه .. الله لا يوصلك بالسلامــة :laugh: )

تحياتي

خويــكم
المنصــوري

ملانـة

18-05-05 ||, 05:00 PM

مالت؟؟ واللي ع راسه بطحة؟؟؟

ماشاالله.. فعلا اسلوب جدا راقي في الحوار...

و عزيزتي العيناوية.. البنت مب لازم تطلع ويا رباعتها لأنها تبا تسوي شي من ورا أهلها.. من وين يايبه هالفكرة هاي؟؟؟.. البنت لو تبا تغلط بتغلط من ورا أهلها والا جدامهم... عادي ترا... تراها ما تخاف ربها شو اللي بيخليها تخاف رمسة الناس...

بس بعد عنديه سؤال
شوووو الي يخلي الوحده تستانس ف ظهرتها ويا ربايعها اكثر من اهلها
الا انها بتسوي شي ما تروم تسويه جدام اهلها وبيواجعونها عليه ...

بما اني من الناس اللي ع راسهم بطحة ع قولتج... فبجاوب على سؤالج و بقولج اني رديت عليه من قبل.. بس ماعليه بعيدلج إياه..
(((well,, على حسب المود.. الطلعة ويا رباعتي لها طعم غير و الطلعة ويا أهلي نفس الشي.. أحب طلع ويا رباعتي أكثر لأنهم مثلي.. لهم بارض يتشرون و يدورون وياي في أغلب المحلات.. و ذوقنا في اللبس و المكياج نفس الشي.. بس أمي ماروم أحوطها المكان كله لأني أدور ع شي معين و شي أكيد أنها بتتحرطم و بتتعب من الدوارة ... و لو كنت ويا خواتي بقول أوكي.. غير عن جي.. ساعات نبا نكون رواحنا عشان ناخذ راحتنا في الحش والا نفضفض عن مشاكلنا و همومنا.. و حتى المطاعم اللي نفضلها تكون غير عن اللي تفضلها ماماتي فديتها و الا خواتي.. فمن جي أفضل أطلع ويا رباعتي...)))

أحلى منصوري..

شو يخصه العرس في السالفة.. ما بنلقى ريل يعني..؟؟؟ شو يعني.. علَي ما أعرس إذا الريل اللي بييني بيكون سطحي و بيحكم علي بسبة طلعة !!! أستغفر الله هو مب رب العالمين و الجنة بإيديه عشان يهمني رايه.. دام من البداية هو بيكون جي أنا اللي بفره برع البيت و بقوله ماباك..!!!! عشنا و جفنا والله رياييل آخر زمن...!!! اللي يقول شرفاء مكة و العيب كله من الرياييل أصلا..!!! هم اللي يتحرشون بالبنت اذا طلعت و من هناك يحكمون عليها بانها بنية (*****)...!!!

ع العموم.. الموضوع الظاهر حاطينه حق الحوار و كل واحد يبدي رايه... مب حق التهجم و المصخرة و كل واحد يتطنز ع الثاني.. قلتوا رايكم و قلنا راينا خلاص عيل.. ماله داعي لهالإسلوب لأنكم تغلطون على بنات ناس و هالشي انتوا ما ترضونه على أهلكم فلا تحللونه على بنات الناس...

مــلانـــة
:fa48:

العيناويه

18-05-05 ||, 05:04 PM

ختيه ملاااااااااااااانة
الغاليه ليش زعلااااااااااااااانه ...
انا سألت سؤال وبغيت الي تحب تظهر ويا ربايعها اكثر تقنعنا بالشي الي يخليها هالكثر مستانسه ...
هدي اعصابج .... عزيزتي
ما يسوى عليج ...
كل حد وعاداته وتقاليده اذا اهلج راضين هب نحن الي بنيي على آخر الزمن وبنخليهم يغيرون طريقتهم وياج ...

والسموووووووووووووووووووو حه
عيناويووووو طويلة العمر

ملانـة

18-05-05 ||, 05:14 PM

إختي العيناوية..

حبوبة ما زعلت كثر ما كنت صدق متنرفزة من ردود بعض الأعضاء اللي كانت فعلا مب شي... و كأنه ماورانا أهل و لا ولي... و هالشي ترا يزعل... الموضوع للنقاش مب للتجريح و كل واحد يستعرض عضلاته و يقول إلا ارد عليهم والا اقول فيهم جي و جي .. ليش؟؟؟ شو مستفيدين من ها كله؟؟؟ شو فايدة المنتديات اذا الواحد يفرض رايه و بس و ما يهمه يسمع راي غيره؟؟

ع العموم بسير احط راسي و ارقد عقب ما ألعب شوي في قسم الألعاب (!!!) و حصل خير سيسو ..!!

بايو...

مــلانـــة

عليوي

18-05-05 ||, 06:20 PM

اختي ملانه ..

قال الله -تعالى- " الرجال قوّامون على النساء " ..

الله يهدي الجميع ...

تحياتي .

بريد ألكتروني

18-05-05 ||, 07:32 PM

شو يخصه العرس في السالفة.. ما بنلقى ريل يعني..؟؟؟ شو يعني.. علَي ما أعرس إذا الريل اللي بييني بيكون سطحي و بيحكم علي بسبة طلعة !!! أستغفر الله هو مب رب العالمين و الجنة بإيديه عشان يهمني رايه.. دام من البداية هو بيكون جي أنا اللي بفره برع البيت و بقوله ماباك..!!!! عشنا و جفنا والله رياييل آخر زمن...!!! اللي يقول شرفاء مكة و العيب كله من الرياييل أصلا..!!! هم اللي يتحرشون بالبنت اذا طلعت و من هناك يحكمون عليها بانها بنية (*****)...!!!

مــلانـــة
:fa48:

فعلا ضحكتينيه ملانه ..خاصه هالجمله ((انا اللي بفره برع البيت وبقوله ماباك..!!!! عشنا وجفنا والله رياييل آخر زمن...!!!)) .. بس لا تنسين تفرين عليه قشاره ولحاف ومخده .. عن يبرد برع البيت

انا عندي سؤال .. بالله عليج باول الزمــن بو جهــل كــان يخلي حرمته تطلع ويا ربيعاتها عشان تسوي shoping :fa56: .. اذا كــان يخليها تظهر .. انشالله ترقدين وتنشين تلقين عمرج في زمنهم .. عشان تفتكين من رياييل آخر الزمن .. ( اتخيلج لو كنتي معرسه في الثمانينات .. بشوف منوه بيروغ الثاني من البيت loool )

وبالنسبه لسالفة العــرس صدقينيه يخصه ووايد بعـد .. واللي تزيد طلعاتها عن حدها صدقينيه بتم تسوي shoping وتهيــت الروحها في السناتر لين ما تغدي عيوز جميله جدا جدا جدا ..

e-mail ولنا عودة اخرى

عليوي

18-05-05 ||, 09:21 PM

ضحّكتني اخي بريد الكتروني ..
فعلاً ان كثرة طلعات البنت تأثر سلباً على فرصة زواج البنت ..
ولكن ماذا تقول لبنت تتصرف كأنها رجل وكأن زمام الامور الزوجية بيدها بقولها " بفرّه برع البيت "..
( شر البلية ما يضحك ) ..

الله يهدي الجميع ..

كبيرة بعيوني

18-05-05 ||, 09:26 PM

مع احترامي للي ما يأيدون هالطلعه
انا فاهمه اللي تبون تقولونــه (=

بالنسبـة لرد اخوي عليوي
لا اظن ان هناك رجل يخاف على اهله ممكن ان يقولها كما قلتوها انتن وان نظرتكن لهاذا الموضوع تختلف عن نظرة الرجل والمجتمع ......
ويـت .. اخوي لو مايخـاف علي جان اشيا وايد ما سواها !!
يعني بنسـى كل موقف .. ومن هالموقف بحكم عليه انه مايخاف علي؟
انزين لحظـة .. لو مايخاف علي جان خلااني اطلع منه والدرب
ما سألني ويا منو بتطلعـين ؟؟ و من بنته ؟؟ ووين سايره؟؟
جان قال لي عادي وبس
!!

وبالنسبة للي علــق .. على هالمقـولة [ البنية محترمه لو بين ألف ريال]

اعتقد عليوي؟

ان البنية تفقـد احترامها يوم تتواجد بين هالرياييل

انزين .. الي تدرس فـ جامعه مكس .. واللي شغلها
بتقولون يجبرها شغلها ولا دراستها
انزين تقـدر تدرس فـ جامعه مب مكس .. وتشتغل فـ مدرسة مثلا ؟؟
اخبرك .. البنية اللي تمشي وحاشمه نفسها محد يتجرأ يصد صوبها
بس اللي اتييب الشبهه حق عمرها لازم بيلاحقونها وماعرف شو !

وبعدين من قال ماشي شباب يقولونها ؟ سمعتها من شباب العايله انا عادي!؟

العيناويه
http://oasis.bindubai.com/bin/images/misc/quotes/quot-top-right-10.gifبس بعد عنديه سؤال
شوووو الي يخلي الوحده تستانس ف ظهرتها ويا ربايعها اكثر من اهلها
الا انها بتسوي شي ما تروم تسويه جدام اهلها وبيواجعونها عليه ... http://oasis.bindubai.com/bin/images/misc/quotes/quot-bot-left.gif

شوفي .. البنية بالذات لو تبا تسوي شي بتسويه
لو تبا تاخذ رقم واحد بتاخذه لو وياها اخوها !
وحتى لو قاعده داخل البيت ماتطلع او تطلع ويا هلها
صدقيني بتسوي سوايا لو تبـا

والله اعرف بنية هلها مصكرين عليها صكه
ماتطلع الا ويا ابوها وامها وخواتها
بس والله انها ترمس وتطلع وتواعـد بعد !

فـ النهايه
انا يوم اهلي بيخلوني اطلع بروحي .. لازم بقدر هالشي وبكون قـد هالمسؤولية
اللي عطوني اياها .. عشان ما يحرموني منه
أدري ان مب الكل يفكرون بهالنظره
وفاهمه اللي تبون تقولونه

ها رايي وها رايكم
وان شالله ما تظايقون ومايصير سوء تفاهم بينا
والسموحة
:vampire:

كبيرة بعيوني

18-05-05 ||, 09:31 PM

هيه صح بريد الكتروني

_شو الشي المميز جدا اللي بتسويه البنيه وهي طالعه مع ربيعاتها وما بتروم تسويه مع هلها ..

مافي شي مميز .. كل اللي اسويه جدام اهلي اسويه ويا ربيعاتي .. بس الفرق
اني يوم بكون ويا ربيعاتي .. بتكون لنا نفس الاذواق والاهتمامات ..
واممم .. تغيير .. اممم .. سوالف .. بس بصراحه يوم اطلع ويا ربيعاتي
لازم بتكون لنا لمتس [حدود] .. لازم ما نتعداها .. عشان جي اقول لك مافي غلط
بس وناسه وتغييــر .. يعني ماعرف كيف اوصل لك اللي ابي اقوله (=

والسموحة جان ظايقتك (=

ملانـة

18-05-05 ||, 10:08 PM

أولا..

فهموا الكلام اللي قلته بعدين لو سمحتوا و تكرمتوا فسروه ع راحتكم..

يوم قصدت (بفره برع البيت) ما كنت أقصد ريلي,, كنت أقصد اللي بيي يتقدملي.. لأنه أول شي ما استخار ربه إذا أنا بصلحله والا لا but instead مشى ع رمسة الناس.. واذا من البداية هامنه راي الناس عيل خل الناس ينفعونه لأنه من البداية هو ماله شخصيه و إيمانه ضعيف.. و أخويه بريد الكتروني تراك روحك قلت (البنت اللي تزيد طلعاتها عن حدها)... في رد من ردودي قلت فيه و بالحرف الواحد عادي البنت تطلع ع راحتها؟؟؟؟ مو جني قلت بحدود و ترد في وقت معين؟؟؟

ثانيا

أخويه عليوي.. و سمحت .. بلا تجريح و استهزاء.. أنا بنية غصبن عن اللي ما يرضى و ما أتصرف كأني ريال... و الحمدالله الله ما بلاني بشي أوكي ف عن الطنازة يا أخ يا محترم...

ثالثا

ياللي مسوين عماركم متدينين و اونكم تراعون العادات و التقاليد.. ترا الدين النصيحة.. و اذا هالشي اذا انتوا تشوفونه غلط انصحونا (بالموعظة الحسنة) مب بطنازة.. عنبو انتوا في كل موضوع هذا اسلوبكم؟؟ كيف تبون الواحد يسمعلكم و انتوا تعايرون و تحقرون الواحد؟؟ ماحيد الرسول صلى الله عليه و سلم كان يدعي و ينصح الناس بهالطريقة.. ترانا كلنا بنات البلاد مب بنات غرب والا يهوديات عشان تعاملونا بهالطريقة... اشرحولنا ليش هالشي غلط.. امسكوا معانا الموضوع نقطة نقطة.. مب تهاجمونا بهالطريقة... عفانا الله...

رابعا

يكفي انه النغزات يت كلها على أهالينا .. و الحين يت علي أنا شخصيا.. و مب مستعدة أكمل الموضوع ويا ناس ماعندهم أبسط آداب الحوار و يغلطون على أهلي و أتم ساكتة..

خامسا

الله يسامحكم

مــلانـــة

الهيثــم

18-05-05 ||, 11:22 PM

. ؛ بسم الله الرحمن الرحيم ؛ .

وعليكم السلام ورحمة الله وبركاته

/!× .^. ×!/

في البدايـة أحب أشكر طـارحة الموضوع على هذا الموضوع المهم

ومن خـلال قرائتي لـ أكثر ردود الأعضـاء والعضــوات
شفـــت العجـــب العجـــاب ، وشفت الشهــامة والمروءة ، وشفت التربيــة والأخـلاق
ولكـــن إللي محيـــرني ليـــن الحيـــن شي واحــــــد
أكثر العضــوات إللي ردن على الموضــــوع

قـــالوا هالكلمـــة :

إن مستحيـــل أهلنـــا يرضـــون إنه نظهــر ويه ربيــعاتنــــا
أنــا وأعتقــد كــل شبــاب الواحــات وكثيــر من العضـــوات كنــا نتمنــى إنه نسمــع هالكلمـة من العضوات :
( نحن مستحيــل إنفكــر نظهر ويه ربيــعاتنـا لأنه منقــود ومخـالف لديننــا وعاداتنـا وتقاليـدنا )

ليـــش أكثر العضــوات إللي عــارضوا خروج البنيــة ما ذكروا السبب إلا مقتــرن برفض الأهل ؟!

وللأخـــوات إللي أجـــازوا خـروج البنـــت برووحهــا مـع ربــاعتهــا

انــا ما بقـول إنتوا مب محتــرمـات ( لا سمح الله ) ولا أهلــكم ما مربيــنكم ولا ولا ولا .. الخ

لكــن بـ صرااحــة : هل إنتــوا إتشــوفون إن إللي إنتوا تسوونــه منه فـــايده ؟!

أوكي .. عرفنــا الإجــابة بتقــولون نبــا نستــانس
بقــولكم يــا أخــواتي وأحبــائي في الله

استـــانســوا لكن مب على حســـاب سمعتكـــم ، مب على حساب مستقبلـــكم ، مب على حســاب ديــنكم ( تعمــدت أذكره آخر شي ) .

إنـــتوا ما اتعــرفون كيــف نظــرة النــاس لكــم وإنتــوا تظهرون شلــة بنــات رواااحكــم من غير محرم
أو بالأخــص نظـــرة الشبـــاب ، إنـــتوا بتقــولون نحن ما يخصنــا في النـــاس ومالنـا شغـل فـ كلامهم
وبتقــولون نحن نعــرف تربيــتنا وأخــلاقنــا .. أوكي لكــن إنتــوا بتروحون وبتردون وبتمــون بشــر
معرضيـــن للخطــأ والنسيــان ، فـ ليــش إتخلــون هالخطــأ على حسـاب مستقبلـــكم ..

نحن ما بنقــول إنتــوا هب محتــرمــات ولا شي من هالقبيــل ، كلــن أدرى بـ نفسه بس ممكـن أعرف ليش اتفضلـون الطلعــه ويا ربــاعتكم ؟!
رغــم إنه هالشي حرام في الديــن ومــا يجـــوز إلا مع محـــرم

إنــزين ممكــن اسألــــكم ســـؤال

أيـــام العيـــد ، شو تســـوون في المراكــز ( أول يوم وثاني وثالث يـوم ) ؟

هل هالأيـــام منـــاسبــة إنه البنيــة تمســك ثــلاث ولا أربــع ويتحوطــن في المولات
بـ صراحـــة نظـــرتيــه أنـــا هالبنـــت مالت عليــــها لأنهــا في هالحـــاله صدق ما تستــــحي

أولا ً : يوم العيـــد مكـــان البنـــات ويه الأهـــل ..
ثانيـــا ً : عنــدكم شي تبــون تتشروونه يوم العيـــد ؟!
ثــالثـــا ً : إذا بغيـــتوا إتروحون المراكز للتسوق فأعتقـد أفضــل الأوقــات وقت الصبـاح ...

والبنــت المحتــرمة المتـربيــة إللي اتخـــاف ربـــها ما بتعــرض عمرهـا للكــلام وللشبهات

وفي المعهـــد عندنــا بنــات أشكــال وألوان ... شي واضـــح ومعــروف إن المعهــد مكــان للتووقيــة ومراجعــة الدروس
ممكـــن أعرف ليش البنيــة دخــل وهي حاطـه ميك أب على الآخر جنه يوم عررسهـا
الصرااحــة أنــا ها إللي استغرربــت منه اليــوم شفــت بنتيــن تقريبــا يايات المعهد بهالحـاله
إنتوا ياييــن تتعلمــن .. لا والأدهى من ها كله إنه استاذ يدرسهــم ، وبعد كل بنيــة برووحهــا
يعني البنية ويا الأستاذ فيس تو فيس .. أو بنتين ويه استاذ جيه يعني

يعني في هالحــاله المفروض البنيــة هي إللي تخااف على عمررهـــا
والمفرووض تلتــزم بتعــاليم وقواعــد خروج المرأة المسلمــة ، محتشمة وغير متعطرة
وما اتكـون ملفتــة للنظـــر ... الخ ...

وبالنسبــة لـ أم خـــدود ( شو الرجيـم وياج هالأيــام )

أنــا أشوفــج من البنــات إللي اتحبذيـن الطلعــة ويا ربــاعتـج
هل طلعتكــم إتكـــون بإحتــرام وتربيــة وأخــلاق ( السمووحــة عالكلمــة بس افهمي قصدي )
يعني من المعروف إنه طلعة البنات روااحهم لازم يكونون صابغيــن الويه صبغ ما يحتاي عااد
وضحكــاتهم وهم يتمشون ويا بعض وسوالفهم وينسون اعمارهم إنهم فـ مركز ؟!

وها كله طبعــا ما يوز ، وفي الأخير أقولكم

طلعــــة البنت من غير محـــرم غلــــط

وإللي يقــول نحن وين عــايشيـــن أقــــولها حاسبــي على الكلمــة لأنهــا أوامر ربــج ب من عندنا
ولا اتحطيـــن عمرج في شبهــات إنتي في غنى عنهــــا

وهذا إللي طلــع وياي حاليــــا ً
ونتريـــه ردود البقيـــــة

..

/!× .^. ×!/

وربي يحفظكــم ويرعـــاكم

:fa54:

ملك

18-05-05 ||, 11:30 PM

عدنا اليكم من جديد

يا جماعة الخير :fa38:

انا ما قلت الطلعه من غير محرم حراااااام

قلت لازم عشان تبعد عنها الشبهات .. او انه حد يتحرش بهن

نطلع مع محرم .. يعني رياااال كبير فاهم و عاقل .. ( هب ياهل ) يكوون معانا ..

او حد كبير

:rock:

كبيرة بعيوني

19-05-05 ||, 12:54 AM

اخوي خطاب
عني أنا .. يوم بظهـر ويا ربيعاتي لازم في سبب مب هياته وبس
صح مرات نظهـر تغيير جو .. بس الاغلب تكون عدنا شغله !!
و والله مابنهيت لين انصاف الليالي .. لازم في وقت محدد نرجــع فيه
وكيف بنييب الرمسه حق اعمارنا اذا نحن طالعين ويا بعـض
ومايخصنا فـ اللي ساير واللي راد .. مانطاع حـد واذا حـد اتحرش ولا جنه شفناه
واغلب الاوقات نقضي شغلتنا ونتعـشى احيانا .. ونرجـع ؟!
ومب شـرط كل بنية طالعه لازم تصبـــغ ويهها ؟!
الحين نحن نرمس عن اعمارنا .. وقلنا طلعتنا مانعرض فيها اعمارنا حق الغلط
ما قلنا ان نحن نطلع ونسوي حركات ونصبغ ويوهنا !!

هاللي قـدرت اقوله الحين ..
لاني بروح أنخمــد وراي امتحان باجر ..

تحفه

19-05-05 ||, 12:59 AM

يا ربيه .. ليش كل الكلام يطيح على راسي

والله خلاص مره ثانيه ما بقولكم الصدق .. انتوا تبون واحد يسايسكم ويقص عليكم علشان تستانسون

الحين يعني خليتو كل الردود الي فيها غلط و طحتو على هالسالفه ( سالفة ان نحن راضين نطلع مجموعات ) ؟!

يعني خطاب انته الحين مستوي داعيه.. اسمحلي .. بقولك شي ..

مب انته ادبي بعد ؟؟ .. هاذاكي اليوم تسالني ( اتحيد يوم رمستني عن الدب الي قد الباب ) ؟؟ في واحة المدارس؟!!

الموهيم .. هي يقولون اسوي عنّـا وايد اعراس :vampire: .. بس اليوم ماخذه اجازه .. طالبه شيليز :blush:

الموهيم

اول شي ..

اسمحي لي العيناويه .. انتي الوحيده في بالي كلامها الحين ..

العيناويه يوم قالت اخوها يقول عن كل البنات انهم خايسات وعممت هالشي عليهم لان ما عندهم محرم

انزين اذا البنات ما عندهم حد متفيج يطلعهم شو يسوون ؟؟

ييلسون يصيحون جدام كبتاتهم ليلة العيد مثلا ؟؟ .. ولا يوم العزيمه ولا الحفله ولا ولا ولااا ؟؟

وبعدين .. مب حرام الواحد يتكلم في اعرض الناس ؟؟

يوم الواحد يقول عن بنات خايسات ( بمجرد انهم مجموعة بنات تتسوق ) هذا ما يسمونه قذف؟

وفي علم النفس .. تفكير مسبق ما ادري الاراء المسبقه ؟!

ولا الرمسه في عروض الناس لعبه ؟!

وبعدين ... ليش الشباب يسيرون المراكز ؟؟ .. يعني انا ما جد شفت شباب يتمشون وماسكين خرايط محلات ولا شي

مب الحواطه بدون هدف و الوقوف في الطريق والنميمه ( حتى للشباب .. تعتبر حرام ) ؟؟

مع السلامه .. فيه رقاد .. سهرانه اليوم .. فإذا في اخطاء مطبعيه سامحوني

وما برد اعلق على الردود الثانيه

لاني مابي اعيد كلامي !

الله يسامحكم ع قولت اختي ملانه !

العيناويه

19-05-05 ||, 01:10 AM

يا ام خدووووووووود يا عيوني ...
انا رمست عن نظرة هل العيـــــــــــــــــــــ ـــن ف البنيه الي جي .. ردي وجوفي رمستيه عدل
يعني ما بتيين انتي على آخر الزمن وبتغيرين اي شي من الي ينقال عن هالبنيه ...
وبعدين منو قالج انه ما يظهرون بناتهم ...
انا عن نفسيه احلى ظهراتي ويا اهليه ...
وعمريه ما فكرت مجرد تفكير انيه اظهر ويا وحده من ربايعيه ...

والسموووووووووحه ونطلب رضاكم
عيناويووو طويلة العمر

تحفه

19-05-05 ||, 01:14 AM

بس انتي قلتي اخوج قال ؟!

تحفه

19-05-05 ||, 01:17 AM

بعدين انا قلت مب ان اهاليهم ما يظهرونهم ..
انا قلت اذا ما عندهم محرم شو يسوون ؟؟ ما يطلعون ؟!

حرام نضرة هل العين وايد ظالمه

العيناويه

19-05-05 ||, 01:19 AM

نحن راضين ومقتنعين ...
ليش انتي معصبة ؟؟؟؟

الحساس

19-05-05 ||, 03:49 AM

السلام عليكم ورحمة الله..

تظهر البنت لحالها برائي مافيها شي.. بشرط.. انها تظهر من البيت محتشمه.. ويكون سنها فوق ال 18 على الاقل يعني انسانه على قدر المسؤوليه وتعرف واجباتها وحقوق غيره .. (طبعا شي بنات 20 سنه بس مايعتمد عليهن بس هايل استثناءات)..

اسلوب الضغط يولد الانفجار.. ان ضغط الاهل على البنت لا تظهر لا ترمس بالتلفون .. وغيره .. راح يولد في نفسها حب الفضول للاشياء المحرمه (هب شرط طبعا).. لكن اذا خلينا البنت تسوي الي تباه في الحدود ماتتعدى الاخلاق ولا القيم الاسلاميه .. فماله داعي ان الواحد يضغط عليها..

اكيد الانسان كان زوج او اب او اخ .. من داخله يبغي البنت تكون بالبيت لانه يدري انها بامان .. لكن هذا هب مانع ان مايخليها بحريتها الي لها حدود مهما كان..

بالنسبه بعض العوائل تمنع البنت من الظهره.. والبنت تعودت على هذا الجو بالعائله.. وهي راضيه .. وماله حق اي شخص انه يت\خل ليش ماتظهر او ليش تيلس بالبيت .. دام البنت راضه فخلاص.. اذا هب راضيه عليها انها تحاور الاهل وتسايسهم .. يمكن يلين عقلهم ويخلونها تظهر او على الاقل تسير بيت ربيعتها بحد ادنى..

ولا ننسى ان البنت لها ولي امر واي شي يقوله ولي الامر لازم يتنفذ.. وهذا منصوص في شريعتنا الاسلامي وطاعة ولي الامر واجبه..

...................

اتمنى ان الردود ماتظهر في نطاق ابداء الرأي عن الموضوع هذا .. لان نحن هب في جبهات قتال كل واحد يصارع الثاني بالكلمات والي يفوز له الناموس .. لا.. نحن هنه كلن يبدي رايه ونستفيد من بعض..
وصدقوني التعصب والسب وحرق الاعصاب ماتفيدكم.. حلاة الانسان يكون ذكي.. يظهر من هالدنيه باقل خساير.. يستانس ويفرفش ويعبد ربه.. ويبتعد عن كل الي يكدره!! لكن ايي واحد ويحرق اعصابه بمنتدى لناس مايعرفهم الا من خلال اسم مستعار مايرزى الصراحه.. استهدوا بالله ..

ودمتم بالف عافيه

العجيبة

19-05-05 ||, 12:36 PM

الســـلام عليــكم ورحمـة الله وبـركـاته

اممم بقـول رايي وبشـرد .. لا توقفوا وايـد على كـلامي .. لأنه مجـرد رأي لا اكثر ..

أول شـي .. شكــرا المتفيــزرة عـالعرقووب .. ما شاء الله موضوعج عليه اقبال جماهيـري شبه رائـع ..

المهــم

أنا الصـراحـة ما اهتـم بـربيعـاتي أو انـي احتـك فيهـن لدرجـة اني استـوي حـرمـة من بيـت فلانه لبيـت عـلانه
يعنـي ربيعـاتـي في المـدرسـة بـــس .. لا نطـلـع مـع بعـض ولا نـزور بعض في البيـوت .. بس اللي تبـا تتواصل وياي ع الماسنجـر بس .. وفي وحــدة لأنها من فتـرة ويـاي بالمسجـات ونادر أكلمها تلفـون ..
امم ما أدري عن وجـهـة نظـر أهلـي اذا يوافقـون انـي أطلع ويا ربيعـاتـي ولا لا .. لأني ما جـربـت أطلب طلعة من هالنوع ..
وأفضـل الطلعـة ويـا أمـي .. واصلا خلاص تعـودت عليـهـا ..

بخصــوص اللـي قـالــوا ان هالشــي ينـدرج تحـت العـادات والتقـاليــد ..
انــزيــن الانتــرنت وتواجــدنـا كشبـاب وبنـات في منتـدى واحـد هذا شـي منه في العادات والتقاليد ؟!!

بس في الأخيـر .. كـل واحــد ونظــرته في هالحيــاة ..
وأكيــد الشـبـاب لهـم نظــرة في هالبنــات .. ومع احتــرامــي للجميــع
أغلبية مب كـل اللي يطلعـن ويا ربيعاتهن يفصخــن الحيــا ويكفــي السفــور اللي تظهـر به البنـيــه ..

الله يهــدي الجميــع

وشكـرا

أمواج

21-05-05 ||, 12:57 PM

http://arb123.com/pic/523.gif

السلام عليكم ورحمه الله و بركاته

شحالكم اخواااني و خواااتي

السموووحه علشااان مادخلت المنتدى في الويك اند و ماعقبت على الموضووووع لاني مقبله على امتحانات الفاينل ولازم ادرس:wacko: :wacko: :wacko: :wacko: :wacko:

نرجع لموضوووع حديثنا انا لاحضت انه معظم اللي عقبوا على موضوووع كانوا متنرفززيين و معصبين وكل واحد يبا يقنع الثاني بوجهة نظره ..... وفي منكم خذ الموضوووع بحساسيه زااايده .. ليش انزين ؟؟ مجرد موضوووع ياناس و بغيت كل واااحد يقووول رايه في هالشي .. انا اللي لاحظته انكم ظهرتووا عن الموضوووع نفسه .. ماعرف ليش

المهم اشكر كل من رد على موضوووعي
ماشالله وايدين مااقدر اكتب اساميييكم:fa56: :fa56: :fa56:

و السموووحه مره ثانيه

تحفه

22-05-05 ||, 01:58 PM

صحيح كلامج اختيه المتفيزره على العرقوب ..

الموضوع كان عن طلعت البنت وي ربيعاتها
و دشو في موضوع البنات الي يتمكيجن وتكور تصرفاتهم مب مناسبه و المغازلجيات وما ادري شو ؟! و قالو بالاجماع ان البنت الي تظهر يعني مب زينه ؟!! بدون حساب لـ تصرفاتها سواء كانت خايسه ولا نضيفه
سووه كله واحد ؟!

شو نظرة الاسلام لـ للي ينظر لكافة البنات الي تظهر وي ربيعاتها على انها خايسه ؟؟ ( سواء كانن صايعات ولا عاديات ولا مدينات ) ويحكمون عليهم من دون درايه ؟؟

ألله يهيدكم بس

عليوي

22-05-05 ||, 05:59 PM

ام خدود..
الله يهديج ..

الجنيه

22-05-05 ||, 09:21 PM

السلام عليكم ورحمه الله وبركاته ....

المتفيزره عالعرقوب أسميج فجرتي قنبله موقوته في المنتدى الصراحه ردي يا واااااااااااايد متأخر والسبب الي أشوفه الحين وشي ثاني يوم كتبت الرد وتعبت عليه طااااااااااااااااااااار فأنقهرت وطلعت ولا رديت مره ثانيه ......

... عن نفسي أحب أطلع ويا ربيعاتي وويا أهلي ...
طبعا الطلعه ويا ربيعاتي يبالها إذن من السلطات العليا وهالشي يتم بعد معرفه مع منو ؟؟ ليش ؟؟؟ وين ؟؟؟ ولين متى؟؟؟

أغلب الطلبات مرفوضه بس في أحياناً استثناءات وموافقه بعد الحنه والرنه ....
من وجهة نظري ما أشوف طلعت البنت ويا ربيعاتها عيب أو نقدر نسمح للأنفسنا أنسميهن صايعات والا خايسات ... طول ما البنت حاشمه عمرها ومحترمه نفسها واللي حولها ما تأثر فيها الرمسات ...
وعلى فكره كثره الدق أتفج اللحام يعني ما فيها شي اذا البنت طلعت ويا ربيعاتها لمكان محدد لفتره محدوده مش عيب ... العيب أنه أنصك عليها صكه لين يصير اللي ما تحمد عقباه ...
ولا ننسى أنه كل ممنوع مرغوب ...
شخصيا وايد أتعيبني الطلعه ويا ربيعاتي يعني كلنا من نفس السن وأفكارنا وأذواقنا تقريباً متشابهه ...

أم خدود ...
حليلج أنتي ليش مزعله عمرج ومتضايجه أنتي واثقه فنفسج وأخلاقج وأنه الي أتسوينه هب غلط ليش رافعه ضغطج بمناقشات وردود ما لها لزمه ... ماعليج من حد أهم شي عقلج فراسج وأتعرفين خلاصج ...

تحياتي الجناويه

تحفه

23-05-05 ||, 09:59 AM

الجنيه : ادري انه إلا منتدى شو يعني ؟!

بس بمجرد اني اعرف ان في حد يفكر جي .. هذا شي مزعج !!

عليوي : طبعا الله يهديني .. ودعيت حق عمري قبلكم بعد خخخهههعع

على فكره برد عليك على رمسة البنت وسط الرياييل .. بس بعد شويه !!

الهيثــم

23-05-05 ||, 11:39 AM

الله يهديـــج أم خـــدود ..

تحفه

23-05-05 ||, 12:32 PM

خطاب : ان شاء الله .. بس انتوا بعد الله يهديكم

-------

الموهيم

عليوي .. اعذرني ما قدرت اختصر في الكلام
حاولت اختصر بس هذا الي طلع لولز

الموهيم
انته قلت

كيف البنت ما عليها من كلام الناس ونظرة الشباب لها ؟؟ لانها اذا كانت سلبية وذلك بسبب تفكيرهم الرجعي كما قلتي فهي راح تكون محتقرة اذا حد شافها بهالنظرة السلبية .. ومثل قيل ان الشر يعم ..

انا ما قلت ان البنت ما عليها من كلام كل الناس
في ناس زينين .. الواحد يسمع رمستهم وفي ناس ما ناخذ رمستهم بالحسبان
وهاذيله الي انا اقصدهم

وبعدين مب كل الناس ينظرون بالنظره هاذي والشباب خل يصلبون عمارهم وبعدين ينفضلون يعطونا رايهم وعلى فكره اغلب الشباب الي يرمسون في عروض الناس مغازلجيه وبطاليه فـ على اي اساس نهتم برايهم .. لا من حكمتهم ولا من فلاحتهم في الحياه

وان اغلبية البنات اللي يظهرن رواحهم (لا اعمّم) تكون متبرجة وفاصخه الحياة ..

موضوع المتبرجات و الـ over كشخه شي وموضوعنا ( شو رايكم في ظهرة البنات وي ربيعاتها ) شي
وليش اترمسني عن هالفئه من البنات ؟!
لا انا امهم ولا ابوهم عشان ادخل في خصوصياتهم
وبعدين انا دافعت عن الي تظهر وي ربعها ومحترمه عمرها و محترمه المكان الي هيه فيه
واعتقد ان هاي هي مب المره الاولى الي اقول فيها هالشي :vampire:

والشباب تعودوا ان اي بنت تطلع بدون ريال تكون مال مغازل او حركات .. فا عشان جي النظرة تعممت حتى على الزينات والبنات المحتشمات اللي يظهرن روحهن ..

:crosseyed
عيل الحمدلله والشكر على شباب عايلتنا .. طلعو شي ماشاء الله عليهم تف تف عن الحسد

وبالنسبة للاخوات اللي يقولون ان المحترمه بتّم محترمه حتى لو كانت بين الف ريّال .. لانني لاحظت بأن هذه الجملة تكررت من اكثر من شخص .. وجميعهم من البنات .. اقولهم ان الوحده اول ما تدخل بين الف ريَال , تبدا تفقد احترامها في عيون الكل .. بسببها لانها تجرّأت ودخلت بين الف رجل .. وبسبب المجتمع لان عاداته وتقاليده تمنع وتعارض وجود امرأة بين الف رجل .. ولا تنسوا ايضا ان وجود امرأة بين الف رجل بأنه موضع فتنة ..

لا تاخذ الجمله بكل حذافيرها .. بس المهم .. احب اعلق على هال بوينت

سلمك الله .. انا من خلال كتابتي لهالجمله .. حبيت اوضح بس ان التربيه والاخلاق تلعب دور قوي سواء البنت انوضعت بين الف ريال ولا خشوها في البيت

وعن الموقف فـ مثل ما قلت هذا رايك الشخصي ومن ناحيتي .. انا كلي احترام للبنت المجتهده في مجالها وثابته وجودها و قوتها و متميزه .. فأنا اصفق لها .. وما انزل من مكانتها !!

بس ممكن اسالك سؤال ؟؟

ليش تحكمون على الانسانه بانها انسانه مب محترمه وعلى اي اساس ؟؟!! مادام هي محترمه عمرها وعارفه حدودها في التعامل ؟! .. عشان خاطر تفكيركم المب محترم فيها بتخلونها هيه مب محترمه ؟!

وعلى اي اساس رمست عن الموقف ؟

ليش مب في صحابيات كانو يجاهدون وسط مئااات المشركين ( بعد مب اميه وحده بعد ) في معارك و غزوات ؟؟

هل هاذيله فقدو احترام استغفر الله لأنهم ظهرو يحاربون ولا شو ؟!

جنون امرأة

23-05-05 ||, 05:43 PM

.. السلام عليكم ..

ماشاءالله عليكم مسوين حشرة و يوله ..

أم خدود يحليلج والله ربي يعينج .. ... . . .. .

الصراحة في فرق بين مجموعة بنات فررري و فرق بين البنات المحترمات ..

أنا بقولكم شي أنا أخواني من النوع اللي يعارضون هالفكرة تماما بس بعد لما يشوفون مجموعة بنات في مول يفرقون بينهم ,, لأن فعلا في بنات محترمات و ما عليهن شي ... .. .

أنا مثلا مستحيل يخلوني أظهر مع ربيعاتي نروح نتمشى و يوم نشبع و نستانس نرجع البيت ...

لكن في وحده مسموح لي هالشي ..

اذا كانت ربيعتي اللي بظهر وياها بنت ناس و أهلي يعرفون أهلها عدل و ما بنظهر رواحنا في حد كبير ويانا بتكون ردة الفعل عادية .... .. . . .. و طبعا مب كل ما يخطر ع بالي اظهر وياها على طول ابوي بيقولي روحي فديتج .. لاااااا
ليش ؟ وين ؟ ومتى ؟ و كيف ....والخ و غير ان التيلفون ما يسكت طول ما انا برع ... هذا يعني ان في حرص حتى لو انا برع و لا ويا أهلي ما راح انسى مبادئي اللي تربيت عليها ...
) (و أنا ربيعتي وحده بس اللي يخلوني اظهر وياها و مب دوووم في السنه حسنه ) (

و بعدين نحن ما نفضل ان نظهر ويا ربيعاتنا عسب ان بنسوي شي غلط ما نقدر نسوي ونحن مع اهلنا .. لاااااا يعني نوع من التغيير .. . . ... .. و بعدين يعتمد ع المكان اللي سايرينه ...

و احنا اكثر طلعاتنا تكون الصبح ويا أهلي لأن الرجال المحترمين في عز رقادهم ... . . .. و أنا كل طلعاتي تقريبا ويا اهلي ...

بس ردودكم كانت وااااااايد قاسية على ام خدود و انا ما ألومها لأني فهمت قصدها ... لأنها من الصبح تعيد و تزيد في كلامها بس محد راضي يفهم ....

دانة حتا

23-05-05 ||, 06:14 PM

السلام عليكم
وااايد حلو الموضووع شكرا
بصراحة انا احب اظهر مع ربيعاتي بس ما سويتها قبل
لكن قبل لا اطلع لازم اكون واثقة من الى باطلع معهن
واهلي مستحيل يوافقوا اني اطلع مع ربيعاتي مكان بعيد بروحنا لازم حد كبير
الدنـــــــــــــــــــــ ـــــــــــــــــــــيا ما لها امـــــــــــــــــــــــ ـــــان
والسمــــــــــــــــــــ ــوحة

عليوي

23-05-05 ||, 06:16 PM

أم خدود ..
اولاً, خير الكلام ما قل ودل ..
ثانياً, هاي النظرة السلبية مب بس نظرتي ونظرة 1 او 2 او 10 من الشباب ..
هاي نظرة المجتمع بكبره تقريبا .. ما بتين انتي الحين وبتغيريينها .
ثالثاً, الله يهديج بس..

تحفه

24-05-05 ||, 12:17 PM

صدق اني مستانسه على دعواتكم ..

زيدوها الله يخليكم

كبيرة بعيوني

24-05-05 ||, 03:24 PM

عليوي
تقول ان هاي نظرة المجتمع كله !!
انزيـن اللي يخلون خواتهن يطلعن مع ربيعاتهن
مثلا اهل ام خدود اهلي اهل ملانه اهل واهل واهل... الخ
هاذييلا بعــد تفكيرهم جي ؟؟
لو كان تفكيرهم جي جان ما خلوا خواتهن يطلعن !!
على اي اساس تعمم ؟!

تحفه

24-05-05 ||, 03:57 PM

كبيره بعيوني
لا تعورين راسج ..
خلاص الولد عايش طول عمره بهالتفكير .. بتين انتي ك وحده من النت في منتدى بتغيرين تفكيره !! ما اعتقد انه بيتقبل بهالسهوله

على العموم انا داشه عشان اقولج في شي اسمه ( اذا ما خانتني ذاكرتي) في علم النفس ( الاسقاط )

وهو ( مثلا ) يوم الواحد يغش في الامتحان ويوم يسؤلونه بيقول .. مب انا الوحيد الي جي يغش .. كلهم يغشون !!

يعني يوم الواحد يسقط الفكره ولا التهمه على الكل ما يرجعها لنفسه

والسموحه

هيه صح .. نسيتي تدعين لي بالهدايه وخخخخخخخ

عليوي

24-05-05 ||, 04:32 PM

ام خدود,
شكرا :)

تحفه

24-05-05 ||, 04:42 PM

يو ولجم

الهيثــم

24-05-05 ||, 11:26 PM

هيــهـ ـ ـ ـ ـــي .. قلبــي متـــروســـه

كــل مـــا أقــرا ردود البنــات إللي يأيــدون الطلعــه برووحهـــم للترفيــه
V
V
( أتـذكـر عادل إمام ) === > وأنـــا أعيــــــط

بس يـــوم أشــوف البنيـــة من نفســـها تنتــقد هالشي وتعتبــره غلـــط وعيب
إلا مع وجـــود محرم أو شخص كبيـــر .. استــــانس ...

أم خـــدود
الله يـهــــديـــــج ..

أهـــلاويـــة للأبـــد
بــارك الله فيـــج إختــي ، والله يكثر من أمثــالج ..

بريد ألكتروني

25-05-05 ||, 01:49 AM

اخويه خطـاب .. انته نصحت وتكلمت وسويت اللي عليك .. وجزاك الله خيــر :)

في نوعية من النــاس ما تحس بويع الضربـه الا يوم تيي على راسها ..

اعتقد الموضوع خذا مافي الكفايه من النقاااش .. و كـل وحده من خواتي البنات تحكم عقلها وتاخذ اللي عيبها من الكلام وتخلي اللي ما عيبها .

e-mail

كبيرة بعيوني

25-05-05 ||, 11:23 PM

أم خـدود
حلوة سالفة الاسقاط هاي .. (=
زين . معلومة يديده ..
ولا تزعلين .. الله يهديج .. ويهديني .. ويهدي اليميع (=

تحفه

28-05-05 ||, 11:15 AM

اهم شي اليميع لولز

بن دبي

28-05-05 ||, 04:03 PM

السلام

تم تمييز الموضوع لأعطاء أكبر فرصة للمشاركة

أمواج

28-05-05 ||, 09:45 PM

السلام

تم تمييز الموضوع لأعطاء أكبر فرصة للمشاركة

مشكووور اخويه بن دبي على مرووورك

جـــــن استاانس:fa56: :fa56:

الــــوردة الحمــــرة

30-05-05 ||, 11:36 AM

انا اييد هالشي بس مب في اي سن. يعني مب بنت في سن المراهقة تروح وتطلع ويا صديقاتها المراهقات مثلا

بس لو البنت كبيرة وعدت سن المراهقة بسلام بدون مشاكل يقدرون اهلها يسمحولها بالطلعة ويا صديقاتها لانها بتكون بنت راشدة وصديقاتها كذلك واكيد يعرفون الصح من الغلط. ويكونون الاهل يعرفون الصديقات اللي بتطلع وياهم وواثقين منهم
. وما يطلعون اي مكان بعد يعني اماكن معينة يعرفونها الاهل
. واكيد كثر الدق يفج اللحام
:laugh:

أمواج

30-05-05 ||, 02:41 PM

مشكوووره اختي على مرووورج على موضوووعي
بس شي من كلاااامج دش راسي إنه البنت الصغيره ماتطلع خصوصا اذا كانت في فتره المراهقة
بس بعد حتى لو كبرت انتي ماتعرفييين
الحين الببنات الكبار يسون بلااااوي اكثر من الصغاااار >>>> يظل وجهة نظر

و السموووحه

الــــوردة الحمــــرة

30-05-05 ||, 03:33 PM

المتفيزره عالعرقووب مشكورة عالتعقيب بس لو تلاحظين انا كتبت لو مرت فترة المراهقة مالها بسلام ومدام الوحدة ماغلطت بسن المراهقة وهي الفترة الحرجة والخطرة للبنت وكانت فيها واعية اكيد ما بتغلط وهي فتاة راشدة عقليا وفكريا.

بس لو البنت اغلطت فترة المراهقة هذا يشكل شوي خطر لانه ما عدت هالفترة بسلام بما معناه انها في احتمال تغلط بعد في المراهقة بس مب الكل يصير وياه جي لان في حد يتعلم من غلطه...

وتظل وجهة نظر

كبيرة بعيوني

30-05-05 ||, 04:35 PM

الــوردة الحمــرة
مـب شرط اللي ماغلــطت فـ المراهقه مابتغلـط وهي عدتها ..
وايديـــن غلطوا عقب هالمـرحله .. وغلطات شنيــعه !!
وبس بغيت أعقــب على هالنقــطه
مع احترامي لـ رايج (=

ورديّـه

30-05-05 ||, 05:36 PM

شو الاسباب اللي تخلي طلعت البنت ويا ربيعتها غلط وممنوعة .. غير نظرة الشباب اللي ما تهم وايدين خصه انهم هب وليين على البنت .. في شي محدد؟

ثانيا البنت اللي تظهر ويا خواتها لهن مأخذ ما ..

.
.

مجرد أسئلة صريحة هب مصخرة

هزاايم

30-05-05 ||, 05:39 PM

المتفيزره عالعرقووب

اشكرج يالشيخه على السؤال ومناقشة هالموضوع المنتشر

الغاليه انا بطبعي ما أحب اظهر ويا ربعاتي بريحاتنا يعني لازم آخذ خواتي وعيالهم ولا مره طلعت بدونهم موب لن الأهل ما يرضون بالعكس كل ربيعاتي يا الله سبحانه يكونون من الأهل لكن انا ما أحب أخاف اصلا
وأحلى طلعه تكووون ويا الأهل أو طلعتنا نحن سته أنا وخواني وبنت خالي وإختي الأكبر... الله يعيد ذيج الأيام الحلوه و يجمع شملنا بعد الفراق
وربي يهدي البنات إلي يظهرن بدون محارم و يفضل تطلع ويا محرم أو تكون مع جماعه و نعرف شو صفات هالجماعه
والسموحه على الإطاله ولج مني جزيل الشكر على طرحج هالموضوع

هزااايم

تحفه

30-05-05 ||, 08:16 PM

من فترة .. ودو بنات من جامعتنا .. بوظبي .. رحله .. واساس الرحله عن السيكولجست
المهم
واكيد ودوهم مركز عشان يتغدون ..

تخيلي .. ربيعتي شو قالت لي ..

اتقول يوم نزلو المول .. سمعو شباب يتصلون بربعهم .. يقولون لهم ( إلحقوووو بناااااات دبي هني .. *والسير عربي فغيض بس شو بيده يعني * وبعد شوي .. جان يقول واحد ويرمسون عنجليزي وي ربعضهم * هني ضحك الاستاذ وجان يقول لهم : اكتبو تقرير عنهم !! * )

هني .. منو الي يباله تربيه ؟؟

البنات ؟؟ لأنهم سايرين رحله وي الجامعه ؟!!

ولا الشباب .. الي قامو يعزمون ربعهم على بنات دبي عندنا في بوظبي ويرمسون انجليزي على قولتهم ؟!!!

والله صدق دنيا

ورديّـه

30-05-05 ||, 10:40 PM

أم خدود

السبب رقم واحد

الــــوردة الحمــــرة

31-05-05 ||, 08:25 AM

صح كلامج كبيرة بعيوني بس انا قلت البعض.

المتربية متربية حتى لو اطلعت بروحها وكانت وسط الف ريال. وايد بنات نشوفهن طالعين وسط اهلهم وبعد عليهن حركات او يغافلون اهلهم ويسوون مصايب والسبب كل شي ممنوع مرغوب وكثر الدق يفج اللحام
انا صح افضل طلعة البنت ويا محرم او ويا اهلها وعفكرة انا ما احب اطلع ويا صديقاتي وما اطلع وياهم بعد دوم الا فترة الدوام عشان الغداء او اشياء ضرورية خاصة مع انه لو ابا اطلع اقدر اطلع بس بعد ما امانع طلعت البنت ويا ربيعاتها لاني اعرف وايد بنات يطلعن ويا صديقاتهم وما شاء الله عليهم ما تتطلع منهم العيبة ومحترمات. فما اشوفه شي عيب. بس ما اييد طلعات البنات عشان يتمشون بس او يغيرون جو.

هذا راي ووجهة نظري مع احترامي لوجهات نظركم اللي اشوفه بعد صح لان بصراحة الدنيا هالايام وايد تخوف خصوصا من المصايب اللي نسمعها كل يوم

تحفه

31-05-05 ||, 08:51 AM

ورديـه : 0.o

أمواج

31-05-05 ||, 02:14 PM

مشكووورات خواتي على التعقيب

بس غناتي ام خدود

اوكي انزين في هالحاله البنات مالهم دخل و الشباب هم اللي غلطاااانين
بس انتي مالاحظتي شكل البنات يعني متبرجاااااااات وايد و في هالحاله لاتلومين الشباب
لانه اللي يشووفونه يشجعهم على الترقيييم انا ما احط بس على البنات وادري بتقوولين حاطه دوبي بدوووب البنات بس هذا الواقع ليش نلوووم الشباااب و الغلط يبدا من البنااات
و السموووووحه

الثعلب الرمادي

31-05-05 ||, 10:45 PM

الحد الاقصى و الشي الوحيد اللي ممكن اسمح فيه انها تطلع مع ربيعاتها حديقة نسائية لا اكثر و لا اقل و بعدين احب اوضح شي للاخوان و هو ان البنت المحترمة ما تنقاس بهاي الطريقة حتى لو طلعت بروحها بتم محترمة اذا قدرت تحافظ على نفسها و اذا كانت منحرفة و حتى لو طلعت مع اهلها بدور حد يغازلها و ساعات ثقة الاهل الزايدة ورا ضياع اكثر البنات و شكرا:laugh:

تحفه

01-06-05 ||, 08:20 AM

that's what i was saying mn el9be7 !!

و الغاليه ( متفيزره على العرقوب ) ..
صح ان الشباب غلطانين في حالة ( رحله بوظبي)

لكن في حالة المتبرجات وظاهرات وي اهاليهن .. اللوم (في رأيي) ما يقع على البنات بس ..
الشباب ( لازم يتماسكون عمارهم ) < وهالي يقولون ( والله البنت متكشخه وبناءا على كشختها وتبرجها انا بغازلها) << شو هالكلام .. انا والله منصدمه من الاولاد الي جي يفكرون .. يعني لهالدرجه مستوى تفكيرهم نزل!!

والله .. الله يهدينا ان شاء الله

إسهر معي ليله

01-06-05 ||, 09:09 AM

السلام عليكم http://planets.uaeplanet.net/images/smiles/original.gif (http://javascript:emoticon('<img%20src="images/smilies/smile.gif"%20border="0"%20alt=""%20title="Smilie"% 20smilieid="1"%20class="inlineimg"%20/>'))

مشكورة إختي عالموضوع المميز.. وأنا واحد لا مؤيد ولا معارض.. لأن هالشي له حالات كثيره وتعتمد عالبنت

* * * * *

فالبداية فيه ناس يؤيدون هالشي http://planets.uaeplanet.net/images/smiles/thumbup.gif (http://javascript:emoticon(':020:')) من باب اعطاء الثقة للبنت او كثر الضغط يولد الإنفجار!.. ومعروفه طلعت الربع كيف حلوة والكل يتمناها

وفيه ناس يعارضون هالشي http://planets.uaeplanet.net/images/smiles/thumbdown.gif (http://javascript:emoticon(':040:')) ومب معنى هذا شك فالبنت.. بالعكس هذا خوف عليها.. لما تطلع ممكن تتعرض للتحرش من شخص وهالشي مب بيدها أكيد.. لكن لو معاها واحد من أهلها أكيد بتتحنب هالشي

وفالاخير هالسوالف ترجع للبنت .. أول شي من ناحية مظهرها.. لأن المحترمة بتفرض احترامها عالكل http://planets.uaeplanet.net/images/smiles/unsure.gif (http://javascript:emoticon(':015:'))

ثاني شي طلعتها ويا شلة بنات بتخليهم يضحكون ويتمصخرون وياخذون راحتهم.. وفيه من الشباب اذا شاف بنت جيه تسوي قال هاااي هيه.. يبالها ترقيم.. حركات http://planets.uaeplanet.net/images/smiles/brows.gif (http://javascript:emoticon(':004:')) وبالتالي بتتعرض للتحرش.. فعشان يتجنبون هالشي مافي داعي للضحك والمصخره.. باختصار" يعقلن" http://planets.uaeplanet.net/images/smiles/biggrin.gif (http://javascript:emoticon(':003:'))

ثالث شي المكياج والتبرج.. لاتحطينه فأماكن عامه.. جمالج خليه لج ولأهلج.. ولزوج المستقبل.. http://planets.uaeplanet.net/images/smiles/unsure.gif (http://javascript:emoticon(':015:')) شو تستفيدين يوم فيه فئة حاطه فبالها "تتمكيج يعني مغازلجية".. ابتعدي عن الشبهات أحسن http://planets.uaeplanet.net/images/smiles/wink.gif (http://javascript:emoticon(':026:'))

وانا من رايي البنت تطلع ويا اهلها وايد أحسن لها.. لكن مب معنى هذا اقول لا http://planets.uaeplanet.net/images/smiles/excl.gif (http://javascript:emoticon(':145:')) لطلعة البنت ويا ربيعاتها... اوكيه تطلع لكن كل شي له حدود.. والطلعة مب شرط تكون للسناتر.. تكون فأماكن للحريم أو تحت رقابة الأهل

* * * * *

واسمحولي طولت عليكم.. الله يحفظكم http://planets.uaeplanet.net/images/smiles/blushing.gif (http://javascript:emoticon(':023:'))

ذنـيـنـي

01-06-05 ||, 11:14 AM

أمواج

01-06-05 ||, 03:10 PM

مشكووور

(اسهر معي ليله)

(نصوور)

على رايكم بس حبيت اعرف رايك يا نصووور من دوون ماتسوي اقتباس بس يالله قبلنا رايك بالواسطه

والسموووحه

أمواج

01-06-05 ||, 03:11 PM

دموع قلم

05-06-05 ||, 01:38 PM

وعليــكم السـلام ورحمـة الله وبركـاته,,

الحمــد لله أخيــرا انتهـيت من قـراءة معـظم آراء الأعضـاء الكـرام,

لكـن للأسـف تأخــرت كثيـرا علـى هـذا الموضـوع الحسـاس والمتميـز

في البـدايـة لـن اتحـدث عـن نفـسي لكنـي سـاتحـدث عـن الفتيـات بشكـل عـام,

أولا.. خـطأ للفتـاة إن خرجت لأي مكان دون محــرم, ثانيـا.. خـطأ للفتـاة إن خرجت لأي مكـان دون هـدف

أي أن معظـم الفتيـات هـذه الأيـام تخـرج للسـوق والمراكز فقـط لتغييـر الجـو والجلـوس بيـن الشبـاب,

وقبـل أن تعـود البيـت تشتـري لها أي تنـورة فقـط لتثبـت أهلهـا أنهـا خرجت بغـرض شـراء ثوب مثلا,

فالمقصـود من حـديثـي أن الفتاة يمكنهـا أن تخـرج مع صديقاتهـا إن كـان هنـاك غـرض ما, كـ الذهـاب

للمـركز لشـراء حاجـة مـا, وبعـد أن تنتهـي ترجـع لبيـت فـورا, ويمكنهـا أن تخـرج للحـدائق النسـائيـة,

وحتـى بيـت صديقتهـا ممنـوع إلا لغـرض مهـم كـ زيارة المـريض أو عـزيمة, لكـن للأسـف هنـاك آبـاء

وأمهـات لا يبـالون ببناتـهم !!

ثـالثـا.. لا اتفـق مـع مـن يقـول أن ( الفتـاة المحتـرمـة تـظل محتـرمـة ولو كـانت بيـن ألـف رجـال!! ),

لأننـا نـرى عـدد من الفتيـات تـربيـن تربيـة حسنـة ولكـنهم ينحـرفن لعـوامل عـديدة كـ النفـس الإمارة

بالسـوء, وسوسـة الشيطـان, الهـوى والصــاحب السـاحب فـ بكل سهـولة الفتـاة المحترمـة تنحـرف

نحـو الشــر

اللهــم احفـظ جميـع الفتيـات والشبـاب من شـرور هذه الدنيـا

واحفـظنـا يـارب من فتنـة هـذا الزمــن ســالميـــن

:sad: :sad: :sad:

أشكـركِ أختـي المتفيـزرة عـالعرقــوووب على الموضوع الجميـل

وننتـظر كـل جـديـد من مواضيـعكِ المفيـدة والمهمـة في حيـاتنـا

تحفه

05-06-05 ||, 04:05 PM

ثـالثـا.. لا اتفـق مـع مـن يقـول أن ( الفتـاة المحتـرمـة تـظل محتـرمـة ولو كـانت بيـن ألـف رجـال!! ),

لأننـا نـرى عـدد من الفتيـات تـربيـن تربيـة حسنـة ولكـنهم ينحـرفن لعـوامل عـديدة كـ النفـس الإمارة
بالسـوء, وسوسـة الشيطـان, الهـوى والصــاحب السـاحب فـ بكل سهـولة الفتـاة المحترمـة تنحـرف
نحـو الشــر

يوم رمست .. رمست عن رايي و عن نفسي ومب عن كل البنات
.. الحمدلله انا مب من النوع الي ينسحب بسهوله
و اقدر اسيطر ( بالقو ) على نفسي !

وهالكلام .. يوجه لضعافات السيطره ع قولتهم !! والي بسرعه ينجرفون ورا الشيء!

بالعكس .. البنت تقدر تستحمل اكثر من الولد وتقدر اتسيطر على اهواءها و تصرفاتها

والدليل

ان نادرا ما تشوفين ريّال ماله سوابق وحركات وسوالف بنات !!

بريد ألكتروني

05-06-05 ||, 05:00 PM

أمواج

05-06-05 ||, 07:18 PM

I agree with you e-mail

دموع قلم

05-06-05 ||, 07:29 PM

عــــدنـــا,,

مرحبــا بكِ أختـي أم خـدود ..
يمـكن أنتـي مش من النـوع اللـي تنسحبيـن بسـرعة وتنحرفيـن نحـو هـواج,
لكـن أظـن أن معـظم الفتيـات نفـوسهن ضعيفـة, والفتـاة بسـرعة تتـأثـر من
الكـلام الحلـو وحتى النظرة البسيطة, فـ تسقط في الهاويـة بسـرعة وبسهـولة,
وبعـد معـروف أن الفتيـات ضعيفـات

ومن خـلال تجـاربـي ومعـاملتـي مع الكثيـر من الفتيـات في مختلـف الأعمـار,
لاحظـت أن المحتـرمات تـأثـرن بالرفيـقات السـوء وانحـرفن نحـو الخـطأ والشـر
وبعـضهن وصلـن إلى أبشـع صـورة من المعـاصي والرذائـل

:sad: :sad: :sad:

ربـي يحفظنـا من شـرور هـذه الدنيـا
ويحفـظنـا من كـل مـاهـو يغضـبـه

أمواج

05-06-05 ||, 07:54 PM

وايضا المعروووف عن البنات يفكرن بقلبهن و يتأثرن بالكلام بسرعه ...

تحفه

05-06-05 ||, 09:24 PM

ما ادري بكم بصراحه .. الموهيم احترامي لكل ارائكم .. ما بي حد يزعل وياخذ بخاطره وادش النار بسبة موضوع هيهيهي

أمواج

05-06-05 ||, 09:37 PM

خليييييييييييج كوووول
ام اخدود

تحفه

06-06-05 ||, 10:39 AM

لا تخافين .. انا بدون احاسيس ومشاعر
انا كول على طول

أمواج

06-06-05 ||, 05:37 PM

لا تخافين .. انا بدون احاسيس ومشاعر
انا كول على طول

عاد اتصدقيين ام خدوود من كلااام مبين انج معصبه

على قوولتج كوول على طوول:laugh: :laugh:

إسهر معي ليله

06-06-05 ||, 05:45 PM

مجرد رأي

أنا اتفق مع (( الفتـاة المحتـرمـة تـظل محتـرمـة ولو كـانت بيـن ألـف رجـال!! ))

لأنه بالفعل اذا وحده قويه ونفسها مب ضعيفه مستحيل تقع فهالأشياء لو شو كان حال هالدنيا

المؤمن رغم كل اللي يصير يظل ايمانه قوي.. وكل ما زاد الفسق فالدنيا زاد ايمانه لأنه متأكد انه نفسه قويه وما بتخصغ لأشياء هوه عارف انها غلط

وأنا معاكم ان النفس أمارة بالسوء والشيطان موجود.. لكن هل هاي الأشياء أثرت فالمؤمن القوي؟؟

يمكن تتسغربون اني اقارن المحترمة بالمؤمن.. لكن كلهم يمرون بنفس المشاكل ويواجهونها بنفس الطريقة

الله يحفظكم

أمواج

06-06-05 ||, 05:57 PM

أنا اتفق مع (( الفتـاة المحتـرمـة تـظل محتـرمـة ولو كـانت بيـن ألـف رجـال!! ))

تظل وجه نظر:crosseyed :crosseyed :crosseyed :crosseyed :crosseyed :crosseyed

دموع قلم

06-06-05 ||, 06:42 PM

مرحبـــا بـكم من جـديد,,

أخـي الكـريم/ اسهـر معـي الليـلة ..
صحيـح أن الفتـاة المحتـرمـة من الصعـب أن تقـع في الهاويـة ولكـن هـذه الفئـة نادرة جـدا,
فـ إن كانت هنـاك فتـاة محترمـة تصـاحب فتـاة سيئـة, ألـن تنـحـرف بسهـولة نحـو الفسـق؟!!
فأنـا اتحـدث عن ما أراه خـلال معرفتي وتعـاملي مع الفتيـات, وأحيـانا تصـارحني فتـاة محترمة
بأنهـا فعـلت كـذا وكـذا, حينهـا لم آخـذ فكـرة سيئـة عنهـا لأنـي أعـلـم بـأن الفتيـات ضعيفـات
بكـل سهـولة تقـع في المعصيـة, ولكـن لا يمنـع أن الفتـاة المحترمـة تتغيـر وتعـود لربهـا فور
صحـوهـا من غفلتهـا .. وهـذا مجـرد رأي استنتـجه من بعـض التجـارب

:) (http://oasis.bindubai.com/bin/misc.php?do=getsmilies&wysiwyg=1&forumid=0#)

الاختـلاف في الرأي لا يفسـد في الود قضيـة

أمواج

07-06-05 ||, 05:39 PM

ماشالله الكل قال رايه .......... و كل واحد حاول يقنع الثاني بوجه نظره و ارد واقووول الراي يحتمل الصواب و الخطا ........... بس اللي لاحظه ردوود بعض الاعضاء حيث كانت تبين عصبيتهم .......... طيب ليش ؟؟؟ مجرد موضوووع و حبينا نناقشكم فيه بس لاغير ...... ياريت تخلووون العصبيه على صوووب لانها مابتنفع

و مشكووور خويه على ردك

شمعة أمل

10-06-05 ||, 12:13 PM

تفضلين تطلعين ويا ربيعاتج ولا ويا الأهل و ليش؟؟

أحب اطلع ويا الاثنين بس كل واحد بشروط
من ناحية الربع يعتمد على اي ربيعه وبديت افج عيني اكثر قبل لاطلع مع اي حد .. بما اني في مدرسه خاصه يعني مب كل بنت في مدرستنا مسلمه ف مره كنت طالعه ولا وحده لابسه مني سكرت ووحده ويها يقولون مهرج والى عليها حركات وفي هاللحظه عرفت شي اسمه two faced من الخاطر .. في المدرسه ماشي احسن منهم برع المدرسه شي ثاني
ف استويت نادرا اطلع ويا ربعي بس اكثر ويا ربع خواتي لاني متأكده منهم بس الى وياي في صفي لا لانه 90% منهم two faced وافضل البعاد

ومن ناحية الأهل
ماحب اظهر ك "عايله" كامله احب اظهر يا بس ويا امي وبدون حد يا بس ويا ابويه وبدون حد وبس

هل يوافق أهلج على طلعتج ويا ربيعاتج.؟؟؟ واذا مايوافقوون شو السبب؟؟
أهلي يوافقون بس ابويه استوى شوي strict وياي بعد ماجافني راده من عزيمه وكرهت الدنيا وقلتله البنات مب وايد اوكيه ومب من النوعيه الى انا احبها وجي
بس انا اعتبر ربع خواتي بعد ربعي وهذيل عادي نطلع معاهم اي وقت لانه نعرفهم ونعرف اهلهم
بس مع طلعاتنا شي شروط
ممنوع برع البيت الساعه 10 بس لو معانا حد عود عادي
وفي اماكن ممنوع نسيرلها بدون امي او ابويه مثلا وافي هالمكان ممنوع علينا بدون امي ولا ابويه وجي ولو سرنالهم ويا ربعنا أول تأخرنا في الطلعه لاي مكان يعاقبونا في البيت ممنوع نطلع لاسبوع بس مدرسه وبيت

ندى

12-06-05 ||, 05:13 PM

اختي.
الام والاب لما يمنعوك من الخروج مع ربيعاتك ما يعني تفكير رجعي لان العادات والتقاليد تحتم عليهم منع كل ما يعارضها وأنا متفقة معهم.
وكونهم اباء يعرفون تمام المعرفة السلبيات التي تنتج عن الطلعات.لان مجتمعنا عبارة عن فئاة وكل فئة منه لها فكرة معينة.

ورديّـه

14-06-05 ||, 11:59 PM

صحيـح أن الفتـاة المحتـرمـة من الصعـب أن تقـع في الهاويـة ولكـن هـذه الفئـة نادرة جـدا,
فـ إن كانت هنـاك فتـاة محترمـة تصـاحب فتـاة سيئـة, ألـن تنـحـرف بسهـولة نحـو الفسـق؟!!
فأنـا اتحـدث عن ما أراه خـلال معرفتي وتعـاملي مع الفتيـات, وأحيـانا تصـارحني فتـاة محترمة
بأنهـا فعـلت كـذا وكـذا, حينهـا لم آخـذ فكـرة سيئـة عنهـا لأنـي أعـلـم بـأن الفتيـات ضعيفـات
بكـل سهـولة تقـع في المعصيـة, ولكـن لا يمنـع أن الفتـاة المحترمـة تتغيـر وتعـود لربهـا فور
صحـوهـا من غفلتهـا

شي آراء عجب عجاب لأنها تعميمية وجنها أمر مسلم به و حقيقة

البنات ينجرفن بسرعه ويتأثرن برفقاء السوء أوكيه ممكن بس هب الكل

انا طول عمري مرابعة فئاااات من الزين والشين والفالت ومن سن المراهقة وكل شي الحمدالله تحت ايدي من يوم يومي , سيارة موبايل الخ , وغيري يتمنى نص الحرية اللي عندي / وحياتي ما غلطت لا من ورااا حد ولا جدامه

عيل ليش يقولون لا تخاف غير من بنات المطوع شي جيه

الانحراف إختيـار ترا!

أموت فيكم انا P:

بنت ناس و عرب

17-06-05 ||, 11:11 AM

الصراحه .. انا لا جيه و لا جيه ..

انا اظهر مع الاهل و ربيعتي معايه .. احسنه اخير لانه مافيه اي شبهات تصير .. و حتى لو بنسير السينما مع خواتي و ربعي و لا اكون انا و ربيعتي بس لانه يكون الظن و الكلام و الاشيا هاي كثيره و خاصه لو كانت السياره معروفه و متردده على مكان اكثر من مره الخ ..

مزون

17-06-05 ||, 04:19 PM

انا اقول البنت المحترمة محترمة حتى لو طلعت بروحها لا حسيب ولا رقيب

أمواج

18-06-05 ||, 08:39 AM

اوكي يا اختي مزون هذا الكلام صح بس مايصلح لها الزمن يعني الحين كل شي تغير الحين النت بكل شي تتأثر
وووووو....بس

وردة الحب

18-06-05 ||, 04:06 PM

مرحبا اختــي ..

رد الاعضاء اممم كل حد له وجهة النظر بالنبسة لي انا
ممنوعا منعا باااااتا .. عندنا عيب منقوود .. اصلا مااتخيل عمري يوم من الايام ظاهره ويه شلة بنات .. من اربيعاتي .. احس غلط .. اشكالنا تحفه .. لازم يكون ف محرم .. حتى لو اربيعاتي بنات ناس وعرب واخلاقهم عاليه .. ممنوع اظهر وياااهم .. وبالاساس مااخذ راحتي الا ويه اهليه من كل جانب ..ولو مثلا هو مستحيل هالشي ان اظهر ويه اربيعاتي عادي .. انا اعارض هالفكــره .. اخاااف .. فظهره ويه اهليه تجنن ولااروع الصراحه ..

رد انسان عادي وايد مثالي ..

السموحه

أمواج

18-06-05 ||, 04:13 PM

مشكووووره على مرووورج اختي وانا نفس حالج

ألم عابر

21-06-05 ||, 04:35 AM

مرحبا اول شي.....
الصراحه تعبتوني لين قريت كل الآراء.......
أنا أقول البنت تقر فبيتهم احسن لها...... وتفك عمرها من الصدعه وعوار الراس......
تراها ان طلع تويا أهلها والا ربيعاتها...... اللي ربها كاتبنا بيصير...... في كل الحالتين ممكن تتعرض لأي شي......

أدري ان ردي عبيط شوي....... بس والله من متى وانا أقرا لين كملت كل الردووود......
ييت على آخر شي سطلت ما عرفت شو اكتب

أختكم اليديده عالمنتدى .....(ألــــــ عابر ــــــــم)

المقاتل

06-07-05 ||, 02:45 AM

:woot: أوب أوب المتفيزره على العرقوووب سلام عليـــج .. شحالـــج .. ؟؟

:wacko: إعذريني ياي متأخر .. والصراحـــه في ردود حلوه وفي ردود كح كح ( غبار )

:fa54: طلعةالبنيه و يا ربيعاتها (يعني شلة بنات) .. سواء كانت للسوق ؛ او للأماكن الترفيهية... هل تأيد أم ما

كح كح .. نعم نعم ؟؟!!! .. الجواب ( لا أؤيــــد مررررره .. إذا كانت في المراكز المعروفه بإزدحامها الشديد أو أماكن يتردد عليها الشباب .. أو أماكن ألعاب مختلطه) فهي بالطبـــع ( منقــود عند العرب ) إن البنت إتسير عنـــد هاي الأمـــاكن .. أو بالأحرى دينيا .. أختصر ( لا ديننا يسمــح ولا عاداتنا تسمـــح ) إلا .. إلا .. إلا إذا كانـــت في أماكن محترمه تليـق بمكانتهم كفتيات مع رفيقات محترمات وفي أوقات غير مزدحمــه وخصوصا إنها تكــون عوده وعاقلـــه .. أما إذا لا فلا إذا لم تفقه الواقـــع والدنيا والدين ..

وإذا كانت صغيره ويا ربيعاتها خلها تطلع وتاخذ راحتها مع أهلها وشو خانتهن يطلعون رواحهن ؟؟

هل تأيد حرمتك تطلع و يا ربيعاتها السوق أو الاماكن الترفيهيه .؟؟ إذا كنت لاتأيد فليش؟؟

والله على حســـب :crosseyed نحن ما بنحبسها ولا بنهيتها .. على حسب الظروووف .

والسموحه على الإطالـــه .. وتراه موضوعج غاوي .. سلمت يمينج