ايام محد يروم ينساها

[الدلووووعة]

السلام عليكم ورحمة الله وبركات





أيام نتمنى إنها موجودة لين الحينه أيام من أحلا الأيام اللي مرت في حياتنا هب بس أنا يمكن كل الناس

أيام ياريت إنها ترد أيام ما كان فيها لا هموم ولا عوار راس ولا حقد كانت أيام كلها حب وتعاون هيه نعم

هاي أيام الكل يتمنها ( الحينه بتقولون شو هاي الأيام اللي ترمس عنها ):look: أيام الطفولة أيام الطفولة الكل يباها ويبا يرد لها:laugh:





أنا كتبت ها الموضوع عسب كل واحد يقول لنا شو كانت ايامة كان مستا نس ولا لاء شو كان يسوي في اليهال:fa46:

اللي وياه وهو كان هادي ولا شيطان ماخلا حد من اليهال اللي وياه ماظربة :fa38:

ولا شو:fa36:



المهم كل واحد يكتب عن طفولة





والسموحة

اختكم الدلوعة

[الدلووووعة]

خيبه 35 مشاهد ولا واحد عنده ذكريات :fa55: :fa36: :crazy: :sad:

[عنود الريف]

مرحبا اختي ...
السمووحه .. انا توني اشوف الموضوع ..
المهم ..
انا مثلج ابغي ارد لايام الطفولة .. ايام حلوه عشتها ..
اول شي .. انا اصغر وحده من البنات .. وانا دلوعه ابويه .. من انولدت لين الحين .. :fa46:
المهم من هذا كله .. اني يوم كنت صغيره كنت هوامه الفريج .. وابويه اللي كان يحوطني وياه ..
قبل ما يظهر تلقيني انا في السياره قبله .. :laugh: وهو مب من النوع اللي يشرد( الحمدلله) .. على هذيج الفتره الوالد كان متقاعد .. يعني ما عنده شغل .. بس يحوط بالسياره .. ويمر على اي حد
كنت اسير المسيد وياه:fa46: .. واسير عند اعمامي .. واهل ابويه .. وساعات اسير ميلس الرياييل وياه .. :fa46: اي مكان .. ولا تنسين الدكان ..بس اكثر شي كنت اسير سوبرماركت عندنا في جميرا الرابعه اسمه سوبرماركت مظفري .. لين الحين مفتوح .. دووم نسير له .. :fa56:
هاي ذكرى من الذكريات ويا ابويه ..

اما الشي الثاني ..
وقت العصر .. تقريبا حريم الفريج يتيمعن عند باب وحده .. يعني يفرشن الحصير .. وييلسن يسولفن وحاطين جدامهن الدلال والفواله .. ونحن نلعب عاده .. ويمر علينا واحد اسمه عليكو (( اسمه علي اصلا )) .. يسوي لنا سندويتشات بيض وداقوس وهالسوالف .. او ساعات سندويتشات جبس عمان .. وناكل من عنده ونحن نلعب برع ..
بس الحين ما اعرف وينه هذا عليكو :fa36: .. يقولون هو بعده هني .. بس ما ينشاف ..

هاي بعض الذكريات الجديمه وابغيها تتجدد ..
واذا تذكرت اشياء ثانيه ..
اكيد بكتبها ...
تسلمين الغلا
والسموووحه

[الدلووووعة]

تسلمين اختيه عنود الريف محد عبرنا غيرج

هيه انا بعد كنت اسير وياابويه ميالس ربعة وخاصة يوم العيد كنت اقوله ودني وياك
عسب احصل عيديه

ايام حلوة

والسموحة

[تحفه]

هيييييييييه يا دنيا ..

كبرنا والله


والله انا ذكرياتي كانت فضيعه ..

الي احيده .. اني كنت احب اكسر البيض يوم كنت اسير وي ابويه الجمعيه :fa46:
وتدرون كيف اكسرهم ؟

اتعرفون يوم نلعب كيرم كيف نلعب بهال ( الاشياء الامدوره ؟؟ )
ايلس جيه اكسرهم وحده وحده


واحيد مره
( هالذكرى الي مستحيل انساها )

كنّـا سايرين الغرير .. نشتري فساتين ومن محل اذكره بالضبط نشتري منه هو مب غيره اسمه بالون

الموهيم

مره كنا نتشمى وجي .. ومرينا حذال محل يبيع ثياب بعد
شفت خيل عيبني ودش خاطري .. وعاد وين اتيودوني انا الدلوعه
عفست الدنيا و سويت قيامه
وانسدحت وفرشت و يلست اصيح
بس عشان اشتري الحصان الي العروسه راكبتنه ( العرايس اللي يلبسونهن الفساتين )

وألله ستر على قوم ابويه عاد هاذيج المره ان راعي المحل موجود ولا جان خليتهم يباتون في المركز هاذاجي اليوم لولز

ومعنه كان مال ديكور وجي .. بس عيبني وفعلا اشتراه بابا

وعلى فكره يومين ثلاث .. لعبت به ولاعت جبدي من الخيل و وفريته ولا جه موجود للوووولل

ولا موقف ثاني

ابويه هوّ الي كان الي يوصلني المدرسه يوم كنت صغيره جي صف اول وثاني
فـ من عادته طبعا هاذيج الايام يروح المكتب متاخر

وبما اني كنت من اليهال الي يفتحون اوبرا صياح .. كل يوم الصبح
كنت اداوم وي بابا الساعه عشر لولز
ولا بعد ما انزل .. ابويه يوقف ويقرا جرايد و يسمع رادو و يشرب جاي حليب وبعدين يوعيني انزل المدرسه

الموهيم

انا يوم كنت صغيره صح ان البشاكير يعطوني lunch box وجي
بس كان خاطري خاااااااطري اشتري من المدرسه
و كنت وايد اخاف من زحمة اليهال يدزوني و حاله وبعدين ايلس اصيح لأن البريك خلص وانا ما اشتريت لولز
واحيد كان في واحد اسمه سعيد ما ادري عتيج
و كل يوم ايني يقولي هاتي بشتري لج و يسير ولا يرد ..
( المصيبه كنت غبيه .. كل يوم طول السنه اعطيه و يسير ولا يرد )
وارد البيت مطنقره واليوم الثاني يعطوني عشر ولا عشرين وانا ع نفس الحاله

واحيد كان في واحد جذّااااااااب .. دوم يجذب علي انا وربيعتي
يسوي عمره ياكل التراب وما يموت ويقولنا انا سوبر مان .. وياكل اوراق الشير ومن هناك يقص علينا

عاد انا كنت خبله .. مره يابلي
( اتعرفون الشيره الي يوم اتقصون من اوراقها ويظهر شي ابيض اونه الدم مالها ؟؟ )
وقالي طعمه حلو و ما ادري شو .. واشربي وخذت وشربت وياليتني ما شربت
اقولكم شربته وانا يوم كنت صغيره كانت مناعتي ضعيفه وبسررررررررعه امرض
جان ارقد تسع شهور في المستشفى .. حاطين لي جلكوز وحاله وصدق يعني بغيت اموت :sad:


واحيد صديق طفولتي .. ولد ربيع بابا .. :fa55:
كنا صدق ربع .. بس الحين مووول محد له خص ..
ويوم اسمع انهم بيسافرون وهو بيسافر ويانا ما اسافر
ونفس الحاله ايام العيد يوم يسيرون المزرعه
ومره شفنناه وي امه في الجمعيه جان اشرد لوووول
احس قفطه
:vampire:


والله وايد سوالف ما تخلص ..

بس احلى الذكريات في دادا- باي > منو يحيده ؟؟
.. كان محل العاب شرات تويز ار اس بس جديم ( مال قوم جيلنا )
يا ربيييييه والله من كثر الالعاب الي نشتريها بالهبل ..
مرات كنا انسير .. ما نعرف شو نشتري لان كل شي اشترينا منه
حتا احيد هالاوراق البيض الي إدارة المحل مسوينهم ( اونه خصم ربع المبلغ ) حق الي وايد يشترون
المفترض اتكون حق كل عايله .. بس نحن من كثر الالعاب الي نشتريهم
كان عند كل حد من خواني وخواتي ورقه


والله ياني الحنين .. ودي ارد صغيره
الله يسامحكم حمستوني
:blush:

[الدلووووعة]

تسلمين اختيه ام خدود على المرور
ايا الطفوله من احلا الايام اللي يمر فيها الشخص
تعرفين اني انا يوم كنت صغيرة كنت انا وبنت يرانا نحن الثنتين قد بعض
وحليلنا ماعدنا بنات قدنا شي اولاد قدنا وبنات واولاد اكبر عنا عاد دوم نلعب مع اولاد الفريج
كانو يلعبون سبرو وشرطي حرامي كنا نعلب ويا الاولاد اكثر من ما نحن نلعب ويا البنات حتى الاولاد
يوم كانو يلعبون يزقرونا عسب نلعب وياهم واخواني واخوانها ويانا عاد يوم يضاربون الاولاد مانهديهم
لا نحن بعد داخلين عرض وياهم وخواتنا البنات ماكانو يخلونا نلعب وياهم احيد كانت عدنا شيرة توت
ولوز عاد اول مايستوي التوت واللوز تلاقينا نحن الثنتين ويابعض نسير ناكل حتى ماكناا نغسلهم نسير ناكل ويوم نشبع خبر الباقي عسب ياكلون ويوم يخلص اللي في بيتنا نسير الثنائي المرح واحد من اخواني واخوانها
بيت يرانا لنه لوزتهم كانت وايد حلوة واللوز كبار من دون مايعرفون اهل البيت نشل لوز من لوزتهم وشرده
كنا حرامية هب بنات ملعوزين الكل كنا عاد تعالي يوم امي ولا امها بيسيرون مكان نحن وياهم مايستوي يسيرون ومايودونا مرات كانو يقصون علينا اونه بيسرون حق حد ميت ونحن نصدق وحليلنا

وايد سوالف استوت يوم كنا صغار بس كانت سوالف حلوة
والسموحة

[تحفه]

ههههههههه ..
كنتوا شياطين

[الدلووووعة]

كيف مابينا نكون شياطين ونحن 24 ساعة مع الاولاد :laugh:

[بنت الدلع]

مرحب

سلامي عليكن

طفولتكن مشااكل

هههه
عاد كله ولا الدلووعه
كل هالشطانه
وآخر شي تكونين دلووعه
لاحوول


انا اذكر اول يوم مدرسه
الصبح لبست ثيابي وتريقت وسرت المدرسه ويا بباتي
كنت في التمهيدي kg2
طبعا ابوي ما وداني الروضه
خلاني ارتاح سنه كامله في البيت بعدين دخلني تمهيدي
عاد الله لايراويكم في ذاكي اليوم شو استوى
ابوي وصلني وقالي يلسي هني
وبعدين بتي المس بتوديج الصف
ونهاية الدوام بيي وباخذج
عاد انا حليلي وين اعرف
تميت يالسه واترياه
يوم دق الجرس
كل اليهال دشو الصف وانا تميت بروحي في الساحه
عقب وحده يتني قالت لي يلا يا حلوة ادخلي الصف
وانا مادري شو يعني صف
ماعرف شو اتقول
يوم سرت
الصفوف كلها مفتوحه
بدال ما اجوف يهال اجوف كبار
اتاريهم الامهات يالسين ويا عيالهم
عاد انا خفت
وتميت اصيح واصيح
لين مايتني المس
وشلتني
تميت ارفسها
آخر شي يلستني عالركسي آخر درج
وعدالي واحد مصري
الله يخسه
كريه
بعد الحصه
قلت لها مابغي ايلس عداله
بعدين تعرفت على بنات اونه عاد ترابعنا
وشو السوالف اللي كانت تستوي
من تمهيدي لين ثالث
ونحن ظرابه ويا الاولاد
مايخلونا بروحنا
الا يتحشرون بنا

والله ايام حلوة

ام خدود ذكرتيني بالدادا باي
اسميه كان مكان الوناسه
كل ما امل من لعبه
اسير هناك
آخر شي ابوي طفر
وماقام يوديني >>>> لوول

[الدلووووعة]

تسلمين اختيه بنت الدلع على المشاركة
شفتي عاد من الشطانه لين الدلع الله والدلع


عاد كله ولا ايام الروضة
نحن كنا ماشي ويا نا زلمات في الروضة
وكان ولد جيانه وياي في نفس الصف كنت ماحبه
دوم اتضارب وياه وشي واحد ثاني ها دوم يداف عني
مايخلي حد من الاولاد يظربني ويوم ابا اشتري مايخليني
هو يشتريلي بعد بيزاته ويخلي بيزاتي عندي يقول اونه مخليهم
كل يوم جي وهاك اللي يظربني كنت اخبر عليه امي عسب تخبر
امه بس امي تقول اونه يلعب وياج جي لعب
ايام الروضة وايد حلوة
والسموحة

[عنود الريف]

تذكرت سالفه بعد .. على ايام الروضه ..
كان يوم اجازه يوم الخميس .. اميه قالت بشربج حلول ..
عاد انا ما احب الحلول .. واميه تحايلني الا اشرب .. اميه شوي شديده اكثر من ابويه ..
بس ما طعت .. قالت لي اميه اشرب استكانه بس مب لازم قلاص .. بعد ما طعت .. عقب جان يقول ابويه بسير اييب لج اسكريم ..
سار فديته ياب لي اسكريم ورد .. ويوم شفت الاسكريم شربت الحلول ..
وعقب كلت الاسكريم ..
كل ما اتذكر سالفه بيي وبخبركم عنها ..
والسمووحه

[الغاليه]

ياااسلاااااام ذكرتوني بايااام الرووضه والشطانه والسوالف الحلوة ...

من السوالف الحلوة اللي مانساها ... اني يوم كنت اصغيره دخلت الروضه عقب شهرين من الدوام

الدراسي .. وطبعا اتعرفوون كيف الطالب اليديد ايكوون بالنسبة للصف .. فكــــــــــــل البنات والاولاد بس يطالعوني ويمشون حواليه ويبوني امشي وياهم والعب وياهم في الفسحه ومن هالسوالف .. احيد كنت امشي وكل الكلاس امسوين دويره عليه ( ههه قايمين بالواجب ) .. واكثر اثنينه اذكرهم سيف وشمه .. سيف كان وااايد ويايه وشمه تكرهنا وكل يووووم كل يوووم تشتري سانتوب ( عصير) وتصوبه صوب ويهي ولا شعري وترشـــــــــه .. وارد البيت كل يوم شعري متلصق .. شوو السالفه ؟ شماااااااني جبت عليا عصيـــــــــــر :fa43: ,, كان تقريبا يوميا هالشي يستوي .. وانا بس عندي سلاحي الوحيد .. لساني :blush: سباله وانتي سباله ودمووع .. بس هالكلمه ..

انا عندي قووول وهي عندهاا فعل :laugh: ... ..

والسالفة الثانيه انه كان عندنا بنيه سودانيه في الكلاس .. فجأة هاي البنت تمت اتبااااغم واتقوول

( دايره قلــــــــم ) .. محد يدري شوو سالفتها ,, وكنت يالسه عدالها .. وهي مستمره دااايره قلم ودااايره قلم .. والابله بعد ماتعرف شوو تقصد هي .. وانا اقوولها ببراءه الله ماخلق قلم شكله دويري بس الله خلق قلم شكله جي ( اراويها قلم رصاص عادي ) .. والابله بعد نفس الشي اتقولها ياماما ماشي قلم

دائره .. بس قلم طويل .. ههههههه اخر شي ظهرت السالفه انه ( دايره قلم ) بالسوداني يعني ابغي قلم .. واحينه يوم ابا قلم اقوول دااااااااااايره قلم !!

وشي غبي بعد سويته انا يووم كنت في الروضه .. داومت شهرين وغبت عن الروضه 3 شهور
فجأة من غير سبب .. يحاولون فيني ارووح ماشي فايده .. امايه ابويه الابله الوكيله وماعرف منوو
ماااااااااااااشي فايده .. يحاولون يقنعوني بكل الاغراءات والطرق ماشي فايده .. ومحد يعرف ليش وكيف وشو السبب غيري .. واللي هو انه شي هندي كان يشتغل في الروضه وكنت اخاف منه انا لانه شكله لص ويشبه اللصوووص .. وكنت يوم اسيير الروضه يوم اشووفه اطالع اعيونه واشوفه كيف يحركها فووق وتحت ويميين ويسااار ويسويبهن حركااات .. عقب مارووم اتحمل واغمض عيوني واششششششششششرد ويتم قلبي يرقع الين اخر اليوم ..

بس عقب مارمت اتحمل والتخيلات كل يووم اتزيد عندي ومن الخووف كل يووم شكله ايي فبالي قبل لا ارقد وانه بيجتلني وماروم اخبر اهليه عليه لانه بيجتلني بسجينه اكبر لو خبرت عليه :tounge: ههههه اخ مني كيف كنت غبيــــه .. حرمت عمري من اللعب والوناسه في الروضه كمن شهر بسبته ,,

ومشكووره يالدلووووعه عالموضوووع واجمل تحياتي لج :fa35:

[الدلووووعة]

تسلمين اختيه الغالية على المرور

نحن حتى الهنود ماسلمو منا يوم لنشوف هنود دق سوالف وياهم
جنه واحد من الاهل ولاشي هنود يكون عدهم سياكل كنا نحن الثنتين نركب وياه
يحوطنا ويردنا

[ذنـيـنـي]

احم

مب جنه محد من الشباب شارك في الموضوع :rock:

المهم انا يوم دخلت الروضة كان عمري 4 سنين

داومت يوم واحد في KG1 و عقبها نقلوني الى KG2
ههههههههههه

كنت اصغر واحد في الصف
احيد يوم نقلوني الصف اليديد يابولي بنت عمي عسب تسكتني

هي كانت في صف خامس او سادس

و كل شوي يزقرونها يقولون لها الحقي على ولد عمج يالس يعض المس :vampire:

======

و في شي هالسنة الوالدة خبرتني عنه :fa46:

احيد اني ما كنت شاطر في دراستي

فعشان استوي شاطر شو كانوا يسوون

كانوا دووم يكرموني و يعطوني هدايا عسب ترتفع معنوياتي و استوي شاطر, و نجحت هذه الحركة

المهم اخر شي طلعت الوالدة هي الي تشتري الهدايا و تغلفها و توديها الادارة و هم يعطوني على اساس اني استويت شاطر

خخخخخخخخخ

عاد حليلها الوالدة كانت تاخذ الهدايا حق كل الكسلانين

عسب يستوون شطار :fa46:
===========

يوم خلصت صف اول ابتدائي سجلوني لأول مرة في نادي الفروسية و كنت كالعادة اصغر واحد في النادي

المهم انا وايد حبيت النادي و خاصة اني كنت الدلوع هناك لأني اصغر واحد
و الي وياي كلهم ربع اخوي العوود

يعني محد يروم يرمسني :fa38:

المهم
كنت عسب اسير النادي لازم اخلص واجباتي
و يوم يسالوني حليت واجباتك, اقولهم هييه خلصت و انا ما فتحت شنطتي

و يوم المس تسالني ليش ما حليت الواجب اقولها كنت في النادي

اخر شي زقروا ابوي و قالوله ترا ولدك ما يحل واجباته بسبب النادي

و طبعا حصلتلي هزبه محترمه

و حرمان من النادي لمدة اسبوعين :fa36:

[لبن مثلج]

ممكن اشارككم الموضوع :laugh:

انا احلى ايامي كانت ايام الكلية (البكالوريوس) .. كنت مستمتعه وااايد بالدراسه والصحبه الحلوة والطلعات الاحلى ... واحن لها وايد .. واتمنى لوانها ترد .....


والايام الي ماتمناها ولا ابا اتذكرها ... هي ايام المدارس :wacko: اعوذ بالله كاااااابوس .. وللحين احلم بالامتحانات :look:

[الدلووووعة]

نصور
تسلم اخويه على المرور
شفت عاد شكلهم الاولاد مايبون يظهرون الفضايح اللي سوها وهم
صغار عسب جي ماتشوفهم حادرين الموضوع كشخة يوم انك تكون اصغر واحد
الكل يعبرك وسويلك سالفة لنك صغير وحليلها امك تششترليك كل مرة هدايا عسب تتشطر
عيل خلاص ابا بستوي كسلانه عسب يسولي ها الحركة انا لا كنت شاطرة كنت اظهر من ثلاث
الاوائل بس بعدين رجعت لين ورا يعني هب ورا وايد لا عاد انتو يا الشباب يوم يخلونكم في نادي
تهدون كل شي واهم شي عدكم النادي انا مرات ماخلي خوانيه الصغار يسيرون لنهم مذاكرون عدل
زين يسوي فيك ابوك
والسموحة



لبن مثلج
تسلمين اختيه على المرور
صح ايام المدرسة حلوة ايام دراسة وحشرة من الابلات وجي
لاكن تم ايام الطفولة احلااااااا بواااااااايد ايام البرائة
والسموحة

[هزاايم]

خخخخخخخخخخخخخخخخخخخخخخخخخ

هيه والله بخاطري ترجع ذيج الأيام
كل الخميس و هاي العاده لين ألحين موجوده الكل يتيمع عندنا
الله يسلمكم كنا ماشاء الله وااايدين يعني حوالي نوصل 25 ياهل
احلى لعبه كنا نلعبها المعسكر التدريبي
ماخلينه عمود إلا ونتسلقه وكنا نيمع قواطي البيبسي و ناخذ النشابه اونه ندرب و بعد كم ساعه أونه الحرب (طاعاو الذكااا العدوين يدربون ويا بعض بس يوم الحرب ما يعرفون بعض)و دومي كنت ورى أخوي العود اسمع كلامه بالحرب
اغلبية الحروب تسمى عندنا باسم القياد حرب حمود بوجسووم وعواااس ولد العروس(تسميات تصدر من خويي العود)
ودومنا نحن جيش حمود بوجسووم الفايز طبعا هذا الفوز يعوود لفضل توافر الأدوات الحريبه يعني عندنا شلالق و حفارات (شله مسؤوله تحفر حفر للغير) و بلوونات الماي موب مقصره معانا وبعد الفوزه الغنايم تكون عزيمه على دكان و هزبه من الأهل والنعم والله
أحلى ذكرى ما انسااها و غيرها من الذكريات إلي ماتنسي كنت مطلعه قرون والديني عليهم خخخخخخخخ
سلمت يمناج يا راعية الموضوع

[الدلووووعة]

تسلمين اختيه على المرور
عاد غير يوم الاخوان يلعبون ويانا
مشي يتخققون علينا ويسيطرون علينا نحن ماعلينا الا الطاعة
نحن كنا نتسلق اللوز بس مكنا نتسلق الاعمدة
والسموحة

[بنت الدلع]

لووووووووووووووووول


ايامكم حلوة

[العجيبة]

هييييييييه أيامهم حلــوة والله

كانــوا أطفـــال .. وخخخ سبحان الله

هيهيهي احيـد يوم كنت صـف أول كنت يوم ايلس ع الكرسي والابله اتحـاوط في الصـف امــد ريووولي من تحـت عشان اتطيــح وخخخ بس ولا مـرة طاحــت .. وايـــد كانت تشتكــي منــي .. ودومها حاشرة امي بالاتصالات

هالمــس بعــد .. اسمها أبله سعــاد .. المهم دومها ما تظهـرني يوم تكـون الاذاعـة على صفـنــا ..
في يـوم من الأيـام .. اشوفهم يتجهــزون حق الاذاعة وما ادري شو .. وانا ولا على بالي ..
آخـر شي رزيت بويهي وياهم ووافقت بالغصب اني أقـرا الحـديث ..
بس اسميني سودت ويها ذاك اليــوم .. قـرييييت الحــديث جنه حد يلاحقنــي .. بسسرررعه
حتى قالولي عيـدي مـرة ثانيــة .. وعـدته بعــد ســريييع > حليلي أنا مستحية من بنت عمتي وربيعاتها وخخخ <
المس كانت تعطي البنات حلاوة وأقلام رصاص يوم يقدمون الاذاعه بشكل حلو
يوم انا قـدمت قالت لاااااااااااا .. وحسيييت البنــات بياكلنـــي وخخخخ ومن يومها ما قدمت اذاعه في صف أول ابتدائي

بس من عقبهـــا ولاني انتقلت من هذيج المدرسة صــرت مشهــووورة من كثـر ما أقـدم اذاعات وخخخخ

بس صـدق المس كرهتنــي .. حتى ما كانت تبا تطلعنــي الاولى .. بس غصبا عنها وبشطارتي طلعت الاولى مكرر !

هذااااااا بسس أول ابتــدائي ..

بايــوو

[دلوعة دبي]

ذكرتيني بأيام الطفولة... يوم كنت صغيرة أتذكر سوولي في البيت حفلة عشان عيد ميلادي وأنا الوحيدة من بين اخواني سوولي الحفلة والحين اوني اقهرهم لأن سوولي عيد ميلاد وهم لا هههههه...واتذكر ايام الروضة كنا ناكل في الصف وما نسير المقصف لانهم يكتبون في الورقة شو نبا نشتري وييبولنا لين الصف ( اونه عاد)... وعمي كان كل يوم ييبلنا مصاص وكل ما يي بيتنا هجوم عليه .. والله حاله... وهذي ذكرياتي .. واذا اتذكرت شي بقولكم..

والسمووحة..


اختكم: دلـــوعــــة دبـــــي

[الدلووووعة]

ينت الدلع
تسلمين ها من ذوقج
والسموحة



العجيبة
تسلمين اختيه على المرور
انا كنت صف اول وثاني وثالث
دوو الابلة تظهرني في الاذاعة
ومرة يوم كنت صف ثالث الابلة
قالت انتي اقري قران وانا ماكنت ابا بس
الابلة بما اني من ثلاث الاوائل لازم تظهرني
ويووم ظهرت وانا اقرا قران عدت الاية
بمكن ثلاث مرات جان انسى الباقي
ومن هاك اليوم ماقمت اظهر في الاذاعه
بس السنه يوم سوينا حق بابا زايد الله يرحمة
وبس
والسموحة




دلوعة دبي

تسلمين اختيه على المرور
عاد عن المصاص لاتتخبرين
واححلى شي هيل اللي يلونون اللسان
كنا منصدق انه لسان تلون ونفرح
جن مسوين انجاز هههههههههه
والسموحة

[دموع قلم]

الســلام عليـكم ورحمـة الله وبركـاته,,

مرحبـــا بــكم فــي عـالــــم الأطفــــال ..
الصــراحـة سـوالفـــكم ومـواقفــكم جـد حلــوة وطريفـــة
وفعـلا ضحكـت واستـانسـت كثيـر يـوم قـريت ذكـريـاتـكم
عسـى البسمـة مـا تفـارقـكم يــااارب

..
..


أشكـركِ أختـي الغاليـة الـدلــوووعـة على الموضوع الرائـع
وأنـا لاحظـت من خـلال حـديثـي معـكِ إنـكِ ( شيطـانـة ),
عسـى ربي يحفظكِ من كـل شـر يـا غنـاتـي

:)

[الدلووووعة]

دموع قلم

تسلمين اختيه على المرور

نتريا منج تكتبين عن ايام طفولتج



انا شيطانه انا الشطنه مادل طريجها :fa44:

انا انسانه هاديه وميخصني في الشطانه :fa46:

والسموحة

[تحفه]

على طاري سالفة العجيبه ..

انا يوم كنت صغييره كنت كسلاااااااااااااااااااانه .. لأبعد ما تتصورون
اتخيلو يوم كنت قريد 2

كان ترتيبي في نص السنه ( الاخيره مع مرتبة الشرف )
والغياباااااات كالعاده ( حدث ولا حرج ) << لاني كنت امرض وايد

وفي اخر السنه ييت حق ماما فرحااااانه ومتشققه من الفرحه
شاقه الحلج من الاذن لين الاذن الثانيه

لأني طلعت الـ 13 ..
يعني تقدمت في الترتيب ( قبل 14 ) والحين 13
وماما يحليلها طيبه ما قالت لي شي كنت ياهل .. اشترتلي العاب
كان شي بالنسبالي شي بالقو

جان اسير اليوم الي بعده .. والمس اتوزع هدايا من المرتبه الاولى للاخيره .. وانا عطوني اخر شي
جان اقولها مس انا الـ 13 مب( الاخيره 14 ) .. جان اتقولي ايوه يا حبيبتي اصلو البنت الي ابليكي انتألت

ورديت البيت مغيضه .. اقول حق ماما هالمدرسه جذّابه لول .. >.>

[الدلووووعة]

تسلمين يا ام خدود عالمشاركة

عاد انا عكسج كنت شاطره ومايحتاي ولين الحينه
الحمدالله شاطره
والسموحة

[تحفه]

هههيهيهيهي

لا انا من يومي كسلانه وحليلي

حتا مره ظهرت الـ 11 ( مكرر ) جان تشتري لي ماما من فرحتها ساعه كلها الماس لووول

وعلى فكره ..

كل ما البسها في امتحان اييب علامه عاليه

صرت اتفائل فيها !!

[الدلووووعة]

زين عيل جان اشترتلج اياها من زمان

[أمواج]

هلا ختيه الدلوووعه
موضووعج وااايد حلووو وادري تأخرت وايد في الرد عليه
بس الحين بقوولج عني لما كنت صغيييره ... الصراحه لما كنت صغيييره كنت احب يلسة الاولاد اكثر من البنات يعني بمعنى ثاني ماعندي ربع غير الاولاد و كانت سوالفهم تعيبني والعابهم تعيبني

و كنت ما افوت اي طلعه معاهم حتى البر اسير معاهم و اما عن دراستي كنت وايد مهتمه و احب اذاكر و اراجع الضهر اول ما ارجع من المدرسه عشان اقضي باقي وقتي في اللعب

وهذا مايعني انهه مستوااي مب حلو بالعكس كنت من العشر الاوائل كنت دايما اتنافس ويا كذا بنيه بس في النهايه انا اللي اغلبهم:fa38: :fa38: :fa38: (( ليش ضرابه:fa56: :fa56: )) ... ووووو بس .....


والسموحه

[الدلووووعة]

تسلمين اختيه عالمرور
عاد انتي شراتي انا دومي العب ويا الاولاد
ويا اعيال الفريج كلهم من اكبرهم لين اصغرهم
وككنت حتى اسوق سيكل اخويه واوني عاد مايحتاي
بس هم يقهرون بي اونه يشوحون ويلات في السيكل
وانا ماعرف اسوي شراتهم اونه يعلموني لاكن ماتعلم
بس يله ايام كانت حلوه
والسموحة

[شمعة أمل]

طفولتي همممم كانت غيــــــــر
كنت دلوعة ابويه وامي بس ابويه اكثر
مااااااكنت اجتماعيه ابد ابد ماخلي حد يدقني غير يمكن عشر اشخاص
مايرومون يودوني السوبرماركت لاني ازيغ من الناس:fa46:
يوم امي حملت واستوتلها مشاكل وترقدت في المستشفى لشهور ماكنت أكل ولا شي اتحرا حد خطف امي:wacko: بس الفليل يوم يودوني عندها كنت اكل هارديز وايلس على طرف الشبريه واجوف فلم dumbo مال فيل وكنت امثل مثلهم حوالي الحجره:laugh:
يوم يودوني الحضانه كنت اسير ويا بطتي سميته stinky وكانو ييلسوني في طرف الحجره مجابل الباب عشان اجوف منو يدش ويطلع وايلس في طاوله بروحي وعندي الواني الخاصه وياويلهم اليهال لو يتقربون مني :fa44:
بس احلى شي ايام العيد
كنت اسير البر ويا ابويه وربعه واحصل اكثر عيديه من اي حد ويوم يسير يسلم على ناس انا وياه ويوم اجوف عيايز ادور عليهم مرتين عشان احصل دبل عيديه:fa56:

[الدلووووعة]

ههههههههههههههههههههههههه هههههههههه


عيبتني سالفت العيدية اونج عاد تدورين عليهم مرتين عسب يعطونج دبل
لا انا الصراحة طفولتي كانت عجيبة كلها مغامرات ولعب xلعب
وبعد انا كنت وايد اسير ويا ابويه يوم يسير عند ربعة

وتسلمين اختيه عالمرور

[ذنـيـنـي]

من يومين كنت ساير المدرسه عسب اشل ولد عمي الصغير منها

المهم, المدرسه الي تعلمه هي نفسها كانت تعلمني في الـKG و يوم شافتني قامت تذكرني بايام الطفوله
:woot:

ذكرتني بموقف عجيب و غريب, انا ما اتذكره لكن هي تتذكره من غرابته

احيد في اول يوم لي في الروضة سألتني المس عن اسمي و جاوبتها

في ثاني يوم بعد سألتني و جان اقولها:

"مث" انتي غبية, انا "أمث" قلتلج "اثمي" بعد اليوم تبغيني اقولج :fa46:

[الدلووووعة]

ههههههههههههههههههههههههه هههههههههه


والله انك حله يا نصور

انا احيد يوم كنت في الkg كان ولد يرانا وياي في نفس الكلاس

ودوم كنت اتضارب وياه ماكنت اطيجة والمس تقول بس لاتظربها كانت دوم دافع عني
يوم نرد البيت يتوعد يبا يظربي انا كنت اخبر اخويه واعيال الفريج وتبدأ الضرابة

بس عجيبة هذيك الايام

[ديج الفريج]

أم خدود

ماشاالله عليج تم شي وما كتبتيه