صوتوا معنا لشراء مستلزمات المنزل عبر الإنترنت! رسالة إلى جمعية الاتحاد وسبينس وكارفور

[أم سعيد2005]

لمن يرغب في شراء مستلزمات المنزل من جميعة الاتحاد التعاونية أو سبينس أو كارفور عن طريق الإنترنت الرجاء الدخول للتصويت في الاستفتاء التالي:

http://www.petitionthem.com/?sect=detail&pet=1753

1. اذهب إلى أسفل الصفحة ثم انقر على "sign this petition"

2. سوف تنقل إلى صفحة جديدة لإدخال اسمك تحت خانة "Full Name" و بريدك الالكتروني تحت خانة "Email Address"..

3. خانة الـ"Postal Address" ليست ضرورية يمكنك تركها من دون إدخال تفاصيل عنوانك..
و إذا لم تكن ترغب في عرض اسمك في صفحة الاستفتاء انقر المربع المجاور لعبارة "Do not show name on website".. ثم انقر على "Sign it!"

نشكرك جزيل الشكر على مساعدتنا في إقناع جمعية الاتحاد التعاونية و سبينس و كارفور لتوفير موقع على الإنترنت لتسهيل مشترياتنا.. و جزاكم الله خيراً!!

ساهم في نشر هذه الوصلة حتى يتسنى لنا أن نصل إلى مبتغانا!

[الحساس]

ماشاءالله!!

بس جي يعني مابنسير الجمعيه وبنيلس بالبيت ناكل وناكل ونمتن وننتفخ وننفجر وبعدين نسير المستشفى وبالمستشفى يسون لنا تحاليل ويكتشفون فينا جلطه بسبب الاكل وبعدين يدخلونا العمليات وايdلنا دختور مايعرف شي يغلط بالعمليه وتسوء حالتنا وبعدين يسفرونا المانيا للعلاج وهناك يسون لنا مره ثانيه العمليه.. وتنجح وناخذ بعدها فتره نقاهه ونزور احلى معالم ميونخ وبعدين نرد البلاد بالطياره وفجاه بالطياره نصادف مطبات هوائيه ولكن للاسف نصادف مطب عنيف.. اطيح الطياره بالبحر.. ونحاول نسبح ونسبح للشاطئء ونشوف اعمارنا في تركيا نحاول نحدر تركيا تهريب قبل لا يزخونا الشرطه .. وهناك نسير اي مسيد نشحت حق كم فلسلزوك تذكرة سفر وبعدين ناخر تذكره باص من تركيا للبلاد ونرد البلاد بالباص بس بالطريج ينبط تاير الباص.. فنوقف بالشارع وناشر بيدينا وتوقف بك اب كبيييره نركب فيها ونرد البلاد بالبك اب واول مانوصل نسلم على الاهل والحبايب.. ونسير بعدين نغسل اسنانا وبعدين للراقد...

حلوه القصه :)

[الحساس]

نسيت اعلق على الموضوع..

تسلمين اختي على الموضوع .. واظن هذا نوع من انواع التطور بس اتمنى انه مايستغل بطريقه تضر الانسان نفسه ..

[الدلووووعة]

خيبة الحساس سويت قصة بس
عسب جي تنفع تكون كاتب

[بنت الساحل]

مشكورة الغالية على طرح الموضوع ..

وبانتظار يديدج ..

و كعكعكعكعككعكعكعكعكعكعكع ..
ظحكتني يا الحساس ..
سويت قصة طويلة .. عريضة واستخدمت كل وسائل النقل والمواصلات .. والسالفة ما يبالها ظهره من البيت ..

[أم سعيد2005]

سامحوني على الرد المتأخر.. مشكورين على الرد.. الحساس.. قصتك صراحة ضحكتني هي هي هي.. خيالك واسع.. يبالك تكتب مثل ما قالت الدلوعة :)

هذا الكلام مب موجه لك شخصياً.. بس أنا صراحة صابني إحباط من النتيجة اللي شفتها.. ليش الناس ما تتقبل التغيير؟ نحنا نقترح هاذي الفكرة للناس اللي أصلاً مشغولين و ما عندهم وقت حق الجمعية.. مب حق الناس اللي ما عندهم شي يسوونه و بعد يتكاسلون عن سيرة الجمعية! يمكن نقدر نستغل هالنوع من الناس عشان نطرشهم الجمعية بدال يلستهم اللي ما فيها فايدة.. ما فينا تيهم جلطة من الكسل و تستوي لهم أحداث قصتك :) نرجع للموضوع.. في أمريكا و بريطانيا (مع العلم أني ما آخذ منهم غير اللي أعتقد أنه ممكن أنه ينفعنا بس) نفذوا الفكرة و قامت الناس تشتري من المواقع.. www.tesco.com و www.saisburys.co.uk و www.asda.com و www.peopod.com و www.netgrocer.com و مواقع أكثر مما تتصور.. شركة تيسكو اشترت خدمات الموقع بـ10000000 دولار أمريكي من سنة 2002 و الين ألحينه هم شغالين.. نحنا وايد نتهوب من أي شي يديد علينا.. عشان جيه نتم آخر الناس في أي شي يديد.. أنا أقترح أنه الناس تصوت.. و اللي ما عنده وقت يسير الجمعية يشتري من الموقع.. و اللي يبغي يتفسح يسير الجمعية :)

[الحساس]

اختي عندي سؤال..

نحن عنا تيسكو.. وبضاعتهم ممتازه الصراحه..
مع العلم صاحبة تسكو وحده بريطانيه من اصل يهودي.. بس ماعلينا منها المهم نفسنا..

الحين انتي تفضلتي وقلتي ان الواحد يروم يشتري من تسكو صح!!
هل خدمات تسكو بكل مكان يوصلون؟

اقصد نحن عنا تسكو بس ماسمعنا ان نروم نشتري بالنت من ها المتجر وييبونه لنا البيت !! لان لو يصير جان بتنحل مشكله كبيره في حياتنا نحن الطلاب..


طبعا سالت ها السؤال على خلفيه كلامج الي حسيت منه ان لج خلفيه بالمواضيع والسوالف هاي..

تحياتي

[أم سعيد2005]

سؤالك مهم.. ما أدري إذا لاحظت ولا.. بس تيسكو اللي عندنا تحوّل إلى جيسكو.. عشان المهندة اللي عندنا في البلاد ما يحترمون العلامات المسجلة.. و تيسكو.. بغضّ النظر عن أنه صاحبته يهودية.. شركة ذات علامة مسجلة.. الله يسلّمك.. هذي السالفة استوت من كمّن سنة.. صاحب تيسكو اللي عندنا.. مع احترامي.. هندي.. و مع احترامي مرة ثانية.. غبي.. سمّى السوبرماركت تيسكو مع أنه ما له علاقة بتيسكو الأصلي.. اللي في بريطانيا و أمريكا.. عقب.. إدارة تيسكو الأصلية اكتشفوا.. فتهزّأ الريال على السالفة.. منها تغير اسم السوبرماركت من تيسكو إلى جيسكو.. و المفروض يحمد ربه أنه ما طلبوا عليه تعويض :wacko:

لذلك.. سوبرماركت جيسكو يحلمون يكون عندهم موقع على الانترنت.. أنا اللي أطمح له.. أنه الناس يكون لهم رأي في البلاد.. إذا نحنا ما طالبنا باللي نباه.. عمرنا ما بنحصله.. يكفّي الهنود و الزلمات سادّين علينا الشوارع.. بعد يزاحمونا في كل مكان نسير له.. اللي يدعم.. و اللي يبحلق بليّا سالفة.. و من هالأماكن الجمعية.. اللي نضطر أنّا نسير لها على الأقل في الأسبوع مرة.. أنا صراحة وحدة تبغي تستغل وقتها في أشياء أهم من تدعّيم خلق الله في الجمعية.. إذا الله بيفرجها علينا.. ليش نصرّ على طريقتنا؟ حتى لو كانت شي وسائل أحسن منها؟

و السموحة :)

[الحساس]

بس انا هب في البلاد ..

وتيسكو موجود عنا بالتشيك..

شكلج تشتغلين في مجال الانترنت او الخدمات بالانترنت صح...

[أم سعيد2005]

إذا انته في أمريكا ولا في بريطانيا.. شوه تتريا ما تشتري من الانترنت؟! أنا لو منك جان فججت راسي كمن مرة و عقب بفكر أسير السوبرماركت أشتري :) بس جنك قلت التشيك؟