خذوا من المثل حكمه !!! (( أمثـــــال و مـــواقــــف الأعضاء))

[الشوق]

الســـــــــلام عليــــــــــكم ورحمـــــــــة الله وبركــــــــــاته ..
عدت اليكم وفي جعبتي بعض الافكار للواحه التراثيه ... ورديت لكم .. ومعاي هالفكره واتمنى انها تعجبكم .. طبعا .. نحن انعيش وفي وسطنا الكثير من الامثال ..
واكيد امثال وايده انطرحت عندنا في الواحه التراثيه .. لكن هل فكرتوا شو الحكمه اللي اتحصلون من ورى هالمثل ,,,
خلونا انعيش جو هالمثل .. وانعيش تجارب الاعضاء من خلال الامثال اللي راح نطرحها ..
طبعا راح نعرض كل مره مثـــل بشكل اسبوعي تقريبا ... وخلونا نقترب من افكار الاعضاء ومن حياتهم .. اللي عاشوها واللي مازالوا يعيشونها في حياتهم ..

إذا خد من المثل حكمه ..

الحكــــــمه الاولــــــــــى اتقول ...
كـــــــــــف صفعـــــــــــــني نفعــــــــــــــني ..
هل واجهت في يوم من الايام .. كفا في حياتك .. ، ومن من حصلت على هذا الكف ، ( الكف هنا ليس معناته فقط , الطراق فقط ، انما ايضا .. طعنة او خيانة في حياتك ) .. وهل استفدت من هذا الكف؟ .. كيف كان موقفك؟ .. وكيف عشت من بعد هذا الكف / الطعنه ؟


اتمنى ان ينال الموضوع استحسانكم .. وطبعا لا تنسون حقوق الطبع محفوظه فقط عند الشوق وفي واحات بن دبي :fa42: وفي انتظار مشاركة الاخوه والاخوات ..

[عنود الريف]

مرحبا الغاليه ..
واخيرا لقينا موضوع يديد في الواحه التراثيه .. :woot:
تسلمين الغاليه .. والفكره واايد حلوه .. وااايد عيبتني .. :laugh:
اما عن الموقف .. اللي يطابق هالمثل .. هو ..
انا بطبيعتي انسانه اجتماعيه .. واحب اختلط بالناس وااايد ..
يوم كنت في ثاني ثانوي .. تقريبا من سنتين ونص .. يتنا بنيه يديده في الصف .. واول ما حدرت الصف انا كنت اول وحده ترحب بها .. على انها خلاص استوت وحده من ربيعاتنا لان صفنا ما شاء الله كان متعاون .. فتوقعت ان هالبنت بعد شراتنا .. بس للاسف .. ونحن كنا اربع بنات واايد ويا بعض .. بعد فتره لاحظنا انها تكرهنا .. ولا تحب تختلط ويانا .. ودووم تشتكي علينا ...مع ان نحن ما كنا مشاغبات ولا كنا نشرد حتى من الحصص .. بس ساعات تيلس ترمس عنا وما اعرف شو .. ونحن في الصف مب متعودين نسمع كلمات سوقيه غير مهذبه ... فمره سمعتها تقول كلمه ما اقدر انطقها .. انا ما عيبني كلامها ومن حقي اني اقولها هالشي .. فيوم قلتلها .. احتشرت وبغت تتضارب .. قلت لها انا ما اتضارب .. مب لاني اخاف منج .. لا بس انا ما احب اتعامل ويا ناس كلماتهم سوقيه .. وانا ما انزل مستوايه لناس ما تعرف الادب .. مجرد انا تكلمت ما اتضاربت ولا استخدمت ايدي ..
عاد البنت ما رامت ترد علي .. وعقب ردينا البيت ..
اليوم الثاني .. الاخصائية طلبتني .. وهي قايله حق الاخصائيه ان انا قايله عنها رمسه ومن هالسوالف .. قلت انا حق الاخصائيه .. اذا انتي سمعتي هاي السالفه منها شو تبين تسمعين مني ... انا اللي عندي غير وعكس اللي قالته هي.. شو بتسوين بتصدقيني انا والا هي ... ؟؟؟ قالت لي انتي قولي اللي عندج وعقب انا بشوف منو الاصدق فيكم ... وبسال بنات الصف اللي كانوا وياكم ..
طبعا هي انسرط لسانها وما عرفت شو تقول .. وعرفت انها غلطانه .. ومن عقبها لا طاح لساني لسانها ..
اللي تعلمته .. اني ما اتعامل مع الناس من اول ما اشوفهم .. المفروض اعرف تصرفاته .. وكيفيه تعامله وبيئته .. عشان ما اطيح في هالورطه مره ثانيه ..
اسمحيلي اختي على الاطاله ..

[الدلووووعة]

تسلمين الشوق على الموضوع

وبرد اكتب موقف استوالي

والسموحة

[بنت الساحل]

مشكورة يا الشوق عالموضوع الرائع ..

[دمعة شوق]

وعليــكم الســلام والرحمه
...

بصراحه بصراحه أشكر فنج
ماشاءالله عليج عيني عليج بـاااارده
مبـــرده
:laugh:
....

بس موضوعج فنان الموهيم انا بقولج سالفه إستوت لي
بس طراق طراق ومن الخاطر بعد الســالفه تقول طولي بعماركم

يوم من الايام من قبل جي سنتين تقريباً كنت ياربي غلطانه غلطه بسيطه أو كبيرة
المووهيم إن السالفه وصلت لأخوي وعاااااااااد هيهات شو يفججني منه
المهم كنت بغرفتي قاعده ومااحس حد يخشع الباب بس الحمدالله
لقـــــــــــاه مســكر
:vampire:
الموهيم قمت وفجيت له الباب ووالله اول ماافجيت الباب مااحس بطراق على ويهي
بس عادي الحمدالله والله أشكره انه صفعني عسب أتعلم من غلطتي وأعرف الصح
من الغلط
وحليله تم يرمسني ويقولي السـالفه ـ،،، والحمدالله سوا خير فيني يوم عطاني ذاك
الكف المحترم
...........
وووبس والسموحه جاني طولت عليكم
ووسمحيلي يـ الشـوق
وشــكراً مره ثانيه على موضوعج الترتووب
...........

[الشوق]

عنود الريف ...
هلا الغاليه ..
تسلمين على المشاركه والحمدلله يوم ان الموضوع عيبج ..
بالنسبه لموقفج .. كل اللي اقدر اقولج اياه ..
في حياتنا انصادف شخصيات وايده .. وما انروم انقوول نحن راح نتوقف عن ااقامة صداقات .
لكن كل اللي نقدر انقوله ان الانسان يتعلم ويحاول ينقي الشخصيه .. مره ثانيه ..
ومثل ما تعرفين الانسان ما يعرف معدن الشخص الاخر الا من بعد ما يعاشره ...
والله يسعدج يالغاليه ..

الدلووووعه
اتاخرتي .. واتريناج .. بس مب مشكله نتريا مواقفج في الامثله اليايه ..

بنت الساحل ..
العفو الغاليه .. وخلينا انشوف مشاركاتج معانا ..

دمعة شوق
عزيزتي بغض النظر .. عن التصرف اللي اتصرفتيه .. المهم انج اتعلمتي من غلطلتج ..
لان الانسان يحاول ان ما يكرر غلطاته .. فالدنيا اتعلم الانسان .. وعلى الانسان ان يتعلم منها .. ويخوض فيها لكن ياخذ الصح ويترك الخطأ ..
والحمدلله يوم انج فهمتي صفعة اخوج وياج .. فهو دليل على خوفه عليج ..
والله يسهل امورج ..


تحياتي لكل من شارك معانا في الحكمه الاولى وانتظروني في الحكمه الثانيه

[الشوق]

تاريخ : 1- 5- 2005


عدنــــــــــــــا ...

الحكمة الثانيه اتقول : اللــــــــي في الجــــــــدر يطلـــــــعه المــــــــلاس

- هل اتظنون ان هناك اشياء سويتوها واثرتوا فيها الشكوك من ناحيتكم في انه ينكشف في يوم من الايام؟ او حتى اسرار قلتوها .. ومع الايام .. حصلتوا ان السر انكشف ..
( كيف كان شعوركم .. وشو سويتوا ) ؟

- هل أحد كان له وجهة نظر سلبيه من انك غير قادر على عمل شيء ... لكنك اردت اثبات الكل انك قادر على هذا العمل ونجحت في عمل هذا الشيء/ او في النهاية فشلت فيه ؟
( ما هو هذا العمل ، وكيف كان موقفهم ، وكيف كان شعورك سواء نجحت في هذا العمل او فشلت فيه)

واشوفكم ان شاء الله في الاسبوع الياي مع مثل اخر ..
وخلونا انشوف مشاركاتكم .. يا حلوين ؟؟

[عنود الريف]

مرحبا الغاليه .. تسلمين على ردج لي ..
وبالنسبه لمثل هالاسبوع .
انا عني ما استوالي موقف محدد يعني .. بس احيانا تكون عندي اسرار والوالده تبغي تعرفها ..
فتقول ما عليه الايام بينا .. واللي في الجدر بيطلعه الملاس ..
والحمدلله لين الحين ما طلع شي من الجدر ..
لان اسراري ما احب اشاركها حد ثاني .. تقدرين اتقولين فيه نوع من الغموض ..
والسمووحه الغاليه . وبانتظار المثل اليديد

[مخاوية الامل]

السلام عليكم ورحمة الله وبركاته ..

سحالكوو ربكوو بخيــر إن شــاء الله ..

حيالله الشوق .. فنـــــــــــان موضــوعج ..
إنتي خطيــرة وأفكــارج أخطـــر عنج ..

المهم ..

بالنسبة لمثــلج لهالأسبوع ..
صار ليه كذا موقف ..
بس الموقف الي جد يقــهر ..
هو إنــه بيني وبين وحدة من ربعيه دفتر .. كل وحدة تكتب اللي فخاطرها أوكي ..
بنات مدرستنا كلهن يموتن ويعرفن شو ف الدفتر هذاا ..
وفي وحدة دووم يوم تشوفنا تقول .. اللي ف الجدر يطلعه الملاس ..
حتى من كثر ماكنت أخاف إنها تقرا اللي فيه .. كان الدفتر دووم بين ثبانيه ..
عشان ماتشله ..
(خوف أنـــا .. أنـــا خـوف ) ..
بس الحمدلله .. محد رام يقرا اللي فيـــه .. < وناسة صح ..

ووبـس ..
وتسلمين مرة ثانيــة الشوق ع موضوعج الكوول ..

فمــان الله ..

مخاوية الامل ..

[دمعة شوق]

الله حيـــــــــــــه .. الله حيـــــــه
مرحبا بالشــوق وبأمثالها العجيبه
...
الله يسلمج عسب مثلج لـ هالاسبوع
غاوي وأنا بقولج موقف صارلي
...

أنا شرات سالفة عنــود بس أنا أبوي طولي بعمره
دوومه يقولي نفسي أعرف أسرارج أقوله أبوي ماعندي
عندي بس يعني مب ذاك الزود،،،
...
وفي بنت الله يستر عليها دومها تقولي هالمثل
مادل شفيها علي ،،، بس أوننننه اللي بالجدر
بيطلعه الملاس،،
...
أو أامايه يوم تبا تعرف شي ومااطيع أقولها تقولي جي
الله بالجدر بيطلعه الملاس
...
شـــــــــــــــــــــــك راً يـ الشـوق
..
مرحبـــــــــــابج

[الدلووووعة]

تسلمين الشوق
واسمحيلي وعدج بس مارمت كله من الامتحانات

وبخبرج موقف على ها المثل

انا دوم في البيت اجيك على مبايلات اخوانيه الاصغر
عني طبعا ماروم اجيك على مبايل اخويه العود:fa54:

المهم واحد منهم عادي اشله واجيك مبايله
لاكن اخويه الثاني ها العوق مايطيع اجيسة عاد انا
بموت ان ماعرفت ليش هب طايع اني اشله واجيك عليه
المهم دوم احاول وياه ايقولي انتي ميخصج اونه قلتله لا
والله عاد كم مرة حاولت وياه ماشي فايدة جان اقوله اوكي
اللي في الجدر بيطلعه الملاس طبعا الملاس طلع اللي في الجدر
يوم جيكت عليه مافي شي امباله شكيت في اخويه وحليله :blush:
وبس خلصت السالفة
والسموحة

[عنود الريف]

اختي مخاوية الأمل انا ابا اعرف شو في الدفتر ... اللي في الجدر بيطلعه الملاس ... ;)
سوالف الغاليه ..
والسمووحه

[خوي الواحات]

وعـلـيكم الـسلام ورحمة الله وبـركــاتــه.. .. . .

يا ســلاااام يالـشوق..
أفأ .. تأخــرت أسبوع.. :(

أكيد الموضـوع فـنـّــان ولا عيله زود..
وأحـلى ما فيه (التطبيق)..d:

أول مــثـل.. مممم كانت ... بذكّـر وبرجع أكـتـب.. (نسيت.... )

[الجنيه]

سلامي عليج يـ الشوق

الصراحه موضوع جميل ومثل ما عودتينا دوم ....

اللي في الجدر يطلعه الملاس

قصتي وياهالمثل قصه ... عمري ما بنساه
الله يسلمكم من فتره بسيطه جداً كنا أنسولف في الدوام عن الخيانات الزوجيه بحط اسامي وهميه عشان تفهمون السالفه ...
فاطمه: ما سمعتي ؟
الجنيه : شو بعد .!!!
فاطمه : أمس البنات شايفين ريل عليا ووياه وحده
الجنيه : وين وشو وكيف ؟؟ يمكن حد من أهله
فاطمه: حبيبتي عليا أمس ماداومت والبنت اللي ركبت وياه وحده من قسم المبيعات زلمه يعني مب من أهله ...
عليا : عن شو ترمسن ؟؟؟
الجنيه : سلامتج عادي خراريف
عليا : برايكن بس لعلمكن ترا اللي في الجدر يطلعه الملاس
الجنيه : ههههههههههههه

بعد يومين عرفنا أنه عليا عرفت بسالفة ريلها اللي كان يخونها مع وحده من الدوام جان تتصل فيني وأتقولي مشكوره ما قصرتي خليتني أعرف من الغرب ...قلت لج اللي في الجدر يطلعه الملاس ما صدقتيني ....
جان أقفط مالي ذنب بالي صار بس ما أحب أنقل الرمسه ....

بس صدق قلبي عورني عليها

[الدلووووعة]

وينج يالشوق نترياج ونتريا امثالج
عاد تحيرتي علينا عسى المانع خير
والسموحة

[خوي الواحات]

(( . : . اللــــــــي في الجــــــــدر يطلـــــــعه المــــــــلاس . : . ))

عـوذ بالله.. من الظـن..

الـصراحـه مـا قـد // .. استخــدمت هالمــثـل.. ولا حـد قالـيـه..
بـس سـمـعـتـه مـن يدتـيـه يـوم تـكـلـم "حـد" (!؟).. عـلى الـخـط.. وتـقـول اللي فـي الـجـدر يـظـهره الــمـلااااس.. وهـيه مـغـيّـضـه.. //
لاحــظـت أن فـيـه شـيء مـغـبـيـنـه عـنـها.. وهـيـه تـركـت الـمـوضـوع "لـيـومـه"..

" الـيـوم بـفـلـوس / بــاكــر ببـلاش " :)

كــف ٍ صـفـعـنـي نـفـعـنـي..

كــفٍ = الــدنــيــا.
صـفـعـنـي= بـلاويـهـا.
نفعنـي=الـحـذر، والـحـرص منها.
..

[عنود الريف]

مرحبا ..
اشياء عجيبه تطلع والله ,, واشياء حلوه نقدر نتعلم منها ...
واخويه خوي الواحات .. من طول الغيبات ياب الغنايم ..
وهذا اقتباس من كلامك وواااااااااااااااااايد عيبني ..
كــفٍ = الــدنــيــا.
صـفـعـنـي= بـلاويـهـا.
نفعنـي=الـحـذر، والـحـرص منها.

والسموحه

[خوي الواحات]

الـسـلام علـيــكـم ورحمة الله وبركاته

ختيه الـشـوق..
ممكن أشــارك بــمــثــل؟؟

والـلـي يـقول..

" اِلْمِسْتَعْجِل مَاكْل قِرْصَهْ نَيْ "

طبعاً ابن آدم خلق على الأرض عجول ما يحب التأني.. وانتوا هل عيلتوا على فعل أو قول؟؟

اذكروا الموقـف اللي صار وقالولكم فيه هالمثل..؟ وأيضاً اذكروا موقف استخدمتوا فيه هالمثل لفلان أو لفلان.. ؟؟

[الدلووووعة]

ماحيد اني قلت ها المثل حق حد او حد قالي
ومشكور اخويه على ها المثل
والسموحة

[الشوق]

اممم
الدلوووعه ، عنود الريف ، مخاوية امل ، دمعة شوق ،الجنيه ، خوي الواحات ..
اشكر كل من ساهم في المثال الثاني .. واسمحولي على عدم تواجدي في الفترة السابقه .. ظروف عيتني ..
على العموم مهما غبت فترة سأظل موجوده بينكم .. قلبا وقالبا ..

عنود الريف ..
يفضل تحتفضين باسرارج .. لان ( الســــــــر اذا انتشــــر بين اثنين شـــــاع )

مخاوية امل ..
مذكرات في دفتري .. الله يستر .. شي حلو ان الواحد يحتفظ بمواقف ويكتب اسرار حلوه في دفتره .. لان الذكرى الطيبه تبقى ومااتزول من ع هالدفتر ..

الدلوووعه ..
اعرفي اذا اخوج ما يباج اتشلين موبايله فلانه يحتفظ اب اشياء اكبر عن سنج ما يباج تقرينهم .. قودري عنج الفضول وخلى الملاس في الجدر مكانه ..

الجنيه ..
الله يعين هالزوجه على ريلها ... ( والانسان عادة لو شاف شي غلط .. ما يحب يخرب بيت ناس قريبين له او يحبهم رغم انها خربانه خربانه .. لكن في مثل هالحالات قد تهدم بيوووت ))

دمعة شوق ..
تسلمين على المشاركه .. وخلي انشووف ردودج في المشاركات اليايه

خوي الواحات ..
تسلم على المشاركه ... ومثل ما يقوول المثل اليوم بفلوس وبكره اب بلاش ..

في نهاية حواري اغلب هالامثله يستخدمونه الاشخاص الفضوليين ... يعني خاطرهم يعرفون اسرار الناس او مما يدور من حولهم ..

على العموم قبل المضي لمثل اخونا خوي الواحات .. ولي الشرف في المشاركه فيه اقول للجميع اعذروني على التأخير

خويتكم / الشوق

[الشوق]

اِلْمِسْتَعْجِل مَاكْل قِرْصَهْ نَيْ "

بالنسبه لمثلك ياخوي الواحات ..... ما اتزكرنيش ... كلت هالقرص الني وانا خويتك ..
احيد ايام امتحانات االثانويه الفصل الدراسي الاول ..
كان عنا امتحان التربيه الاسلاميه وعاد .. ياحبي لهالماده ...
اتخيل حليت الامتحان وكل شي وخلصت وتميت اراجع يمكن اكثر عن المرتين .. وعاد من استعيالي ..
ما راجعت عدد اوراق الامتحان .. وجان اطلع الا اتفاجا بالمصيبه الكبرى .. بعد ما ظهرت .. اسئله ايديده تتبادر على السنه البنات بالنسبه لي اول مره اسمعها من بعظ ما ظهرت من الامتحان ..
وطبعا هات يا مناحه ... ماشي فايده طلعت ومااترييت المدرسه اتيينا ..
ومثل ما يقوول المثل ..(( لافـــــــــات الفوت ما ينفع الصـــــــوت ))
الحمدلله نجحت في النهايه وطبعا حاله كل الاوراق باستثناء ورقة وحده ...
وطبعا هالقرص الني اللي كلته نتيجة استعيالي . لاني بغيت اطلع من وقت بدل ضيياع وقت وباعتقادي ان ماشي فايده من جلوسي في انتظار المدرسه ..

لكن اقولكم في التاني السلامه وفي العجلة الندامه
بالرغم من اني لم اقله لاحد هالمثل لكني ... استخدمته في حياتي كثيرا وكثيرا ..

والسموحه
الشـــــــــــوق

[الدلووووعة]

هيه تذكرت سالفة استوتلي هي صح انه ماقلته او قالولي اياه
بس انه عن سالفة العيله المهم يقولك مرة كان علينا كميا واحب حصة الكميا لنه فيها تجارب
والدلووعة تموت في شي اسمه تجارب كميا فقط المهم وانا ماشوف من البنات اللي وافين جدامي
جان يب كرسى الدائري ما مختبرات واوقف فوه ويلست اشوف الابلة شو تسوي انزين وخلصت هاي التجربة تبا تسير تسوي التجربة الثانية عاد انا مايستوي اسير واساعد الابلة همي اني امسك شي واسويها بروحي عاد من كثر استعيالي ابا انزل ممن الكرسي بسرعة والكندورة تشير في الكرسي عاد ماحصل عمري غير وحدة طاحت على الارض عاد البنات ياين صوبي شو فيج ماتعورتي أي ماعورت الله يداكم ريولي قامت تعورني عاد انا ميته من الضحك على عمري وبعد ماستوى فيني ها الشي الناس اتوب عاد انا ابد ماتبت بعد رديت اركب فوق الكرسي
والسموحة

[عنود الريف]

مرحبا ..
اختي الشوق .. ما عليج .. اسراري محد يشاركني فيها غير البحر .. وتعرفين انتي البحر .. محد يكتم السر شراته .. :laugh:
اختي الدلووووووعه
:fa56: :fa56: :fa56: :fa56: مت من الضحك عليج واتخيلتج وانتي على الكرسي وشقايل اتطيحين ..

اما عن المثل اللي طرحه اخويه خوي الواحات ..
واايد استوتلي مواقف استعيل فيها .. ويا ما كليت قرص ني
في المدرسه وايام الامتحانات مثل اختي الشوق .. نفس المشكله .. ولا اتوب ..
وفي سالفه ثانيه ..
نحن كل يوم نسير البحر نمشي .. والبحر قريب منا وهو مجابلنا بس لازم نعبر الشارع العام ..
وانا دوووم استعيل ..
هذاك اليوم زين ما دعمتني سياره وطيرتني ..
الحمدلله الله ستر ..
ومره من العيله بعد .. دعمت طاولة وضرب الحد في خاصرتي .. تتخيلون كيف العوار صح ؟؟

ووااااااااااايد اشياء ثانيه .. بس هذا اللي في بالي الحين...
والسموحه

[الشوق]

في انتظار عودة خوي الواحات للتعليق على مثله الذي طرحه ..

عدنا بتاريخ .. 31-5-2005
يقولكم المثل ... انطر يا حمار .. الين ما اييك الربيع ..
هل وعدك شخص ما بعمل شيء ما ولم يفعله .. او انه ارد انجاز شيئا ما وانت في انتظار هذا الانجاز وقد طال انتظاره ...
فدار في نفسك هذا المثل وقد قلته على لسانك ، او انك واجهته بهذا المثل ..؟؟
متى كان هذا ؟؟ وكيف صار ..؟؟ اقترب معنا لنسمع حكايتك؟؟

تحياتي للجميع:blush:

[عنود الريف]

مرحبا اختي الشوق ..
اسمحيلي عاد .. بتلوع جبدج من كثر ما تشوفيني في هالموضوع .. :fa46:
اما عن المثل .. يا كثر ما قلته حق اخواني ..
كل ما نبغي شي منهم ... عقب ما تلوع جبدج بيتذكرون .. بيتذكرون بعد مب بييبونه ...
حتى ربيعاتي .. ساعات نطلب من وحده فيهن شي .. نترياها لين ما نخيس .. فاذكر لهم هالمثل ...
وانا وااايد يعيبني هالمثل ... احس وايد استخدمه في يومياتي ...

تسلمين الغاليه
والسموحه

[الدلووووعة]

ها المثل دوم استخدمة
في المدرسة في البيت دوم وخاصة يوم اطلب شي
من اخويه الصغير ولا اختيه اقوللهم هاتولي شي
ويتمون سنه واخر شي مرا ايبونه ومرات لاء
عاد االقهر انهم يتاخرون ومايبونه شو تبين تسوين بهم ماتعرفين
والسموحة

[هزاايم]

تسلمين يالشيخه على الموضوع والله توني اشوفهم وأنا تعجبنيه الأمثال

عن المثل المطرووح
انطر يا حمار .. الين ما اييك الربيع
كنا بالمدرسه وكان على قولتهم يوم مفتوح على قولتهم لكن بالنسبه لنا يوم كرف و تعب
عندنا أمينة مختبر ما أدري تابع اي ماده من الأهل
تمن البنات يحنن ويزنن على راسيه أونه خلها تطلب لنا من االدكان وأنا اقول مستحييل هي صج بتسوي لكن اليوم ماظنتي قالوا لي جربي وش خسراانه ..قلت أوكيك ولا ترمسن عنها لو ماطلبت و تحطن عليها ما ارضى (أونيه أصلا من ذاك الصوب هي شراات ربيعتنا )قصدت صوبها وأوني عاد اناديها ام سلطان طلبتج لا ترديني وهي تقولي بدت الشطاانه قولي اشتبين أقولها قولي تم تقولي ما بقول تبغوون من البقاله أقولها عليج نوور جان ترد على انطر يا حمار .. الين ما اييك الربيع
جاان ألقط ويهي و رديت عندهن و البنات تمن يضحكن علي(إلا أتاريهم قاصدين يقفطوني)
سلمت يالشيخه وانا خلاص سجليني حضوور معاكم

[الشوق]

ردينا للتعقيب..

عنود الريف .. خذي راحتج يالغاليه .. الموضوع ما يحلو الا بوجود اضافاتكم ..
حلو ان نستخدم الامثال في حياتنا اليومي ه.. لكن لما نستخدم الفاظ مثل ( الحمار او الثور او الجلب ) ولو قارناها بالمواقف اللي اتصير من خلالها .. راح نضحك لما انقارن ناس ثانين او انقارن عمارنا من خلال هالالفاظ .. والله حاله ... ( يعني كان لازم يكون حمار)

الدلووووعه .. حياج الغاليه .. دوووم تعالينا ..
هيه والله يالدلوووعه مواقف وايده اتصير .. وراح اذكرلكم موقف دووم يصيرلي .. عندنا في الدوام ( الاوفيس بوي ) هذا اللي يبعث الرسايل وينقلهم من مكتب الين مكتب .. عاد تيلسين تزقرينه .. ويسمعج من هناك يطنش .. او انه يرد عليج واييج بعد ساعه ...
كيف راح تتفاهمين وياه ... اتخبرين عليه اتخافين على رزقه ,, روحه وهالمعاش اللي على قد حاله .. وفو ق هذا يتبطر عليج .. شو راح يكون موقفج منه ..

هزايم
موقف .. حلو منج وحياج معانا يالغاليه اي وقت البيت بيتج والواحه التراثيه دومها اترحب بضيوفها .. ومادمتي حدرتي صرتي من اهل البيت منا وفينا .. يالغاليه ..
خذيها حكمه مني لج .. الثقه الزايده اتولد الغرور ...
لا اتراهنين على شي دوم انج مب متأكده فيه . واتخلين نفسج في موقف محرج مع الغير ...
وموقف جميل وان شاء الله خيرها في غيرها يالغاليه

[الشوق]

عدنـــــا بتاريخ6- 6-2005
مثلنا هالاسبوع يقول ...
لا اتكثر الدوس عن الخلان يملونك ...
كيف يكون شعورك عندما يكون هناك تقارب بينك وبين احد ما ، وتكثر زيارتك لهذا الشخص ( الاهل )
وتكثر بياتك ( رقادك ) / زيارتك عندهم ، عندما تبات بيت احد من الاهل واتطول في المده حتى لو هم يحبون زياراتك ووجودك عندهم ، هل تشعر ان مدة إقامتك قد طالت ... واتقول بينك وبين نفسك .. " جني مصختها وايد طولت في يلستي اروح البيت احسن لي " ، او هل وجه لك احد او علق عن كثر يلستك في بيتهم ؟ او زياراتك عندهم بين الحين والأخر ؟؟

اذا شو رايك بهالمثل .. !!!
هل تعتقد ان كثر الدوس عند الاهل او الاحبه .. قد يجلب الملل في يوم من الايام..
هل تكثر من بياتك عندهم ، كيف يكون شعورك لما حد يقولك مب جنك طولت وايد من قعدتك ؟؟
حتى لو مب كان بيات .. بنقول اممم سوالفك وياه على التيلفون .. كل يوم .. تعتقد ان يخلي الواحد يملك او شي .. شو يكون شعورك ، وكيف اتواجه الموقف ؟؟ وخلونا نستفسد من تجاربكم ؟؟

في انتظار مشاركتكم هالاسبوع .. بس ها لا تنسون المثل .. "لا اتكثر الدوس عن الخلان يملونك "...

تحياتي لكم
الشوق
:blush: :blush:

[الدلووووعة]

تسلمين اختيه الشوق عالمثل

انا عن نفسي نحن دوم يوم انسير بيت عمي لازم
نبات بيتهم وهم بعد شراتنا يوم يون بيتنا لازم يباتون عدنا
يعني عمرنا ماحسيناهم ملل علينا او شي من ها القبيل
بالعكس نحس بالوناسة يوم يونا وهم بعد ماظن انهم بيحسون بالملل
اذا نحن سرنالهم لنه مانسيرلهم دوم يعني صح اذا كل يوم كل يوم سرنالهم بيملون
بس بعد حلوه السيرة للاهل

والسموحة

[هزاايم]

تسلمين خويتي على النصييحه والله اشتااق لحد ينصحني
اما عن المثل المطرووح
عنيه نحن عايله مادري وش أوصفها لكن ماتحب البنت تبيت حتى لو عند الأهل بدون محرم وعمري مابييت خارج البيت
لكن بطريج المثل الثانيه ....عن طريج السوالف

الله يسلمج ويسلم غاليج
أنا وبنت الخال شراات الخوااات لكن إلي بعدنا إن كل وحده ساكن بداار فتكثر من بينا التلفوونات والسوالف يعني مايصير شي إلي نحن الثنتين عندنا العلووم
ذاك اليوم كنت ظاهره ويا خويي العود ورن تلفونيه و شفت رقمها لكن مارديت لأن الشيخ كان عنده خط فحطيته على السايلنت ..خلاصت مكالمته بدت مكالمتي خبرتها طبعـــــا إن طالعه ويا خويي وبرد اتصل بها يوم برد البيت
أشوفه أول مابندت يقولي شورايج أوديج عندها بداال طلعتنا (عااد أنا منشقه من الفرح)أقول والله صج تسلم يالشيخ والله يعلني أفداك إلي اسمعه يقولي لا اتكثر الدوس عن الخلان يملونك
فهمت قصده وتميت ساكته وقالي اعتدلي ترى العدل في الميل شي طيب موب مذموم

و صاار هالموقف من قبل يومين
وتسلمين يالشيخه على المثل وأنا معااكم

هزاايم

[دمعة شوق]

الله حيبــــه والله
عدنــا لكم بعد غيبه عن أمثالكم الحلوه
..
ومثلنا اليوم اممممم حلو
بس محد قاله لي بس انا دوومي حاطه هالمثل ببالي
( لا تكثر الدوس .. عن الخلان يملونك )
:woot:
...

شـكراً يـ
شوقي
:blush:

[فركوشه]

لا اتكثر الدوس عن الخلان يملونك

هيه كثرة الدوس والزيارات تملل

بالنسبه لي ما اظهر واااايد عسب جيه ما احس اني املل حد
بس فيه ناس متعرفين عليه من كمن سنه
يوم ايووون بيتنا نقعد ويااااهم ونسولف وعقب ما قمت استحلي القعده ويااااهم
مره يو واتغدوا ويانا وتموا لين العصر
واليوم اللي عقبه اتعشوا ويااااانا
وواللي عقبه يو لنا زياره
وما قمت اقعد وياهم
لاعت جبديه
سوالفهم اوكيه بس يوم اييون ثلاث ايام ورا بعض هب شي بتكون القعده
حلات القعده ويانا ناس يدد وماتشوفينهم دووم

وتسلمين عالموضوع..

[ا ل ز ع ي م]

موضوعج مميز أختي الطارحه ويفيدني ويفيد غيري في معرفة معاني وتفسير الأمثال ويزاج الله خير

قد أعود

[الشوق]

الدلووعه ...
هلا الغاليه .. تسلمين على المشاهمه في طرح ارائج ومواقفج عن تلك الامثال ..
وانا معاج ان حلو الواحد يسير عند الاهل لان اللمه حلوه .. لكن كثر الدوس يصيب الملل خذيها قاعده مني لج ومثل ما يقولون .. اتغلي اشويه .. وراح اتشوفين غلاتج عندهم..

هزايم ..
الله يحفظها لج يالغاليه ويخليكم لبعض .. دووم ان شاء الله ..
وخذيها نصيحه اخوج .. ترى الحساد من بينج كثار ..
واتحصلين في ناس راح اتغار من هذا التقارب ..

دمعة شووق ..
تسلمين الغاليه على التواجد .. ولو شفتي اي موقف من المواقف
لا تنسين مثل خويتج الشوق تراه يساعد احيانا في بعض المواقف ...
وخليه مزروع في الذاكره ..

يحليلي ياهل ..
تسلمين على الموقف .. عاد زياره وغدا وعشى .. الله يعينج يالغاليه
من حبهم لكم .. ما يرومون عليكم ..
يالا حلو الواحد يجدد ... بس لا اتفكرين اتجددين صديقاتج .. وتخسرين هذيلاك
لكن فكري في التعرف على صديقات جدد ..

الزعيم .. .
حظورك في موضوعي شي كبير بالنسبه لي .. وتسلم يااخوي ومااتقصر ..
وفي انتظار عودتك ان شاء الله في الامثال المقبله

خويتكم / الشوق

[الشوق]

عدنـــــــــا بتاريخ 12-6-2005

مثلنا هالاسبوع يقول : يــــا يكحـــلهـــا عمـــــاهــــا ..
لو اتعمقنا في هالمثل .. يالا ابي الكل من اللي راح يشارك يتعمق انزين ..

لو كانت في بالك انت فكره او موضوع وتبي اتسويه .. وهالشي انت امخططه له عدل .. في نهايه المطاف .. طاح كل شي على راسك .. واختربت مخططاتك .. شو راح يكون موقفك ..
يا ترى هل قمت بعمل شي كان في بالك انك ممكن يكون في مصلحة حد معين ..
لكن يوم سويت هالعمل اخترب كل شي عليك وانقلبت عليه السالفه ..
جد قلت هالمثل او وجهته لحد .. متى ّ!!! وشو السالفه!!! وكيف اتصرفتوا!!! ..

في انتظار مشاركاتكم ..
الشوق

[الشوق]

شو السالفه محد عنده موقف لهالمثل ... رغم اني اتحريت بحصل العكس ..
على العموم ما بقى غير يومين . واللي عنده موقف يطرحه ..
راح احط موقف صارلي وامري لله .. ما يستوي انمرر مثل من دون اي موقف ..
اممم الله يسلمكم .. مره كنت زعلانه من اربيعتي .. وكان زعلنا كبير لدرجة اني ما كنت ابي اسامحها .. لانها جرحتني .. ومااتوقعت منها ايي هالشي .. ولاحظن بعض الصديقات على زعلنا .. وكل ما يسالوني الشوق ليش زعلانين .. اقولهم ما في شي ..ودايما ردي لهم يكون ماشي ... رغم انا كنا سمن على عسل ..
فمره يت وحده من اربيعاتنا ذابحنها الفضول الا تعرف سبب الزعل .. وتمت سوالف .. الين ما دشت في موضوع اربعتي هذيج .. فقالت انا عارفه شو سالفتج وياها .. ويلست اتخمن اشياء .. تقريبا كانت صحيحه .. بس علشان تعرف السالفه .. ( يعني اتحاول اتيرني في السالفه .. عسب تعرف الموضوع . ويلست اتقولي ترى فلانه خبرتني عن السالفه وانا ابي اسمعها منج ) وانا على نياتي .. رغم اني ما كنت ابي اجرح هاي الصديقه . علشان اتكون بالنسبه لهم عاليه في نظرهم .. من تخميناتها حسيتها تعرف في السالفه .. قمت ويلست افضفض ..
في النهايه .. بدال ما اكحلها عميتها عرفت مني السالفه وانا ما كنت ادري اصلا ان هذيل كانن متزاعلات ويا بعض .. وحبت تستغل الموقف لصالحها .. للاسف حسيت بالانزعاج من تصرف صديقتي الثانيه .. والانزعاج من عجلي في الفضفضه ..
بس ماادري لين يومكم هذا هل استحقت المسامحه ام لا ..!!!! او هل استحق الموضوع اني ازعل او لا .. لاني في النهايه اكتشفت اجناس الاشخاص اللي رابعتهن .. وطريقة تفكيرهن ..
وسلامتكم ,,,
الشوق

[عنود الريف]

مرحبا اختي الشوق ..
السموحه الغاليه على التاخير .. لاني انا اصلا من فترة ما حدرت الواحات ..
اما عن المثل
جد صاير معاي ..
نحن تستوي ويانا يوم نبا نقنع ابويه في شي ..
مثلا كنا نقنعه انه نشتري دراجة .. ويالله يالله اقتنع ..
وعقب يومين اايي اخويه ( حتى هو يبا دراجه) يقول سالفة واحد انجلب بالدراجه وانيرح وما يت السالفه الا جدام ابويه .. يكنسل ابويه السالفه .. فاخويه بدال ما يجحل السالفه عمااها ..
وهاي هي سالفتنا..
ولا خذولنا دراجه .. راس الشيبه يابس .. مستحيل يلين ..
والسموحه

[الشوق]

عنود الريف ..
تسلمين يالغاليه على المتابعه .. وين باقي الربع ما يندرى عنهم ..
على العموم الله يوفجهم ونترياهم في الامثله اليايه ... والله يعين الشيبه ..
وودري عنج سوالف الدرجات وخليج رقيقه تراج انثى ..

[الشوق]

عدنــــــا بتاريخ 20-6-2005

مثلنا هالاسبوع يقول : أنا واخويه على ولد عمي ، وأنا وولد عمي على الغريب.
شو رايكم لو حد يا وقالكم والله الاقربون هم اولى واجدر انك اتساعده واتعينه ...
يعني لو قلنا انك اتساعد اخوك اولى من انك اتساعد ولد عمك ..
هل واجهت موقف في حياتك .. وشفت اقرب الناس لك يساعد غيرك وانت في امس الحاجه لوجوده ..
هل انتظرت يوما وجود شخص يقف معك .. لكنك شفته ان دايم الوقوف مع غيرك وانت نادرا او قليلا ما وقف معاك ... هل احسست بالغيره من الوقوف بجانب الغريب .. سواء كان هالشي مادي او معنوي ..
وفي النهايه عاتبته بذكر هذا المثل ..؟؟
هل صادفت مثل هذا الموقف ؟؟ او تعرضت لهذا المثل ؟؟ كيف كان شعورك لحظتها ..؟؟

تابعونا دوما في امثال اسبوعيه من امثال ومواقف !!!
الشوق

[الدلووووعة]

السموحة عالتاخير عاد شو نسوي

ان شاء الله يوم اتذكر موقف عن المثل يبا يجحلها عماها وبخبرج

والمثل الثاني ماحيد اني قلت حق حد او حد قالي اياهه ولا احيد استوى شي من ها القبيل
والسموحة

[صدى جوفي]

جزاج الله خير على هالموضوع ياالشوق ..
عاد أنا ولا هلي .. ما أرضى عليهم أي شي..
لو دريت بأي شي يمسهم ما أروم أكتم غضبي .
وطبعا لكل قاعدة شواذ..
لو أهلي يا منهم الغلط .. فأنا مع الحق ..
والحق لا يعلى عليه

[عنود الريف]

مرحبا اختي الشوق
على ما اعتقد مثل الاسبوع من الامثال اللي ما تنقال واايد ..
عني انا ما اسمع هالمثل وااايد ..
يمكن يكون بين الشباب أكثر من البنات
على العموم ..
كلنا اهل .. وصح ان الواحد يبدي اخويه على ولد عمه ..
بس اذا السالفه على واحد غريب انت بتكون ويا القريب منك على الغريب
والسمووحه الغاليه

[الشوق]

الدلوووعه ..
كفايه مرورج بين وبين في جميع الامثال اللي تمت طرحها .. تسلمين الغاليه
ونتظرج في مثالنا الاتي ..

صدى جوفي..
تسلمين الغاليه ... هناك مواقف كثيره تحصل ..
صدقيني ساعات الصديق يحتاج لمساعدتج او وقفتج معاه
اكثر عن الاهل نفسهم...
والساكت عن الحق شيطان اخرس ..

عنود الريف..
ساعات الغريب .. يكون مثل الجار ، الصديق ، لكن في النهايه ..
اتكون وقفاته معاج احسن عن وقفة الاهل في ازماتج ..
والله يبعدكم جميعا من المشاكل والازمات ..
وتسلمين على التواجد الاسبوعي ..

ترقبوا .. قريبا ..

[الدلووووعة]

تسلمين يالشوق:blush:

ويلله نحن نتريا المثل:laugh:

[الشوق]

عدنـــــــــــا بتاريخ 3-7-2005
مثلنا هالاسبوع يقووول :- اللي ما يدانيك يخرب معانيك ...
هل حصل بينك وبين شخص اخر موقف معين .. وشفت انه يكرهك ..
لدرجة ان كرهه لك الكره يصل الى الحقد، وقد يشوه من سمعتك ...
( يعني تؤمن انه ممكن هالشخص قد يضرك في شيء في يوم من الايام ) فقط لانه يعاديك ..
اذا اضرك شخص بسبب موقف حصل بينك وبين احدا ما .. هل هذا الضرر جعلك تقف بينك وبين نفسك لتراجع حياتك معه .. هل اثر هذا الموقف معك ..

شاركنا في مثلنا الاسبوعي .. واطرح موقفك .. كي نجد حلا له .. او نكتسب منك نصيحة ..

في انتظار مشاركتكم/ الشوق
:blush: :blush:

[الدلووووعة]

تسلمين اختيه عالمثل القوي

عاد اذا مايدانيني ايسوي جي
والله انا لو كنت ماداني حد بس مابسوي شي يظره
حشى شو من قلب عنده ها الانسان اللي بيسوي فيك جي

والسموحة

[عنود الريف]

الغاليه الشوق
مثل حلو ويحصل بدرجه كبيرة للنفوس الضعيفة
وانا معاج صار هذا الموقف من صديقة كنت معاها من صف رابع لين اول ثانوي .. وفي اول ثانوي استوت سالفه
وبدت اتطلع عليه رمسه .. ترا عنود الريف عليها سوالف .. لا يغركم شكلها بريئة .. الخ هالرمسه
لكن منو يقول انا بسكت عن السالفه
وانتي تدرين ان البنت مالها الا سمعتها .. وسرت رمستها وتمت اول شي تحولف وتولف ان مب هي اللي قايله الرمسه .. ووصلت السالفه للادارة .. يبت امها المدرسه ..
يعني بهدلتها .. مع هذا عقب سامحتها .. الله يهديها ..
تسلمين الشيخه
والسمووحه

[الشوق]

هل اقف عند هذا الحد ؟؟ والا تبوني اكمل
بلاهم خفوا الاعضاء ما قاموا يطرحون مواقفهم ؟؟

[الدلووووعة]

لا وانا اختج كملي

[مــهــابه]

هالمثل الله يسلمكم قلتــه لبنت عمــي..
دوم تحط دوبها بدوبي، وفي مره جــان ترمس برمسه وعقب قالت هي ماقالت هالرمسه
وان الرمسه من عندي أنا يعني طلعتني خراطه ، عاااد أنا ماسكتت عنهاا ، خليتها تعترف بغلطتهاا
وفوق كل شي خليتها تتـأسف منيه ، واحيدني يوم كنت معصبه من هالسالفه كنت أقول هالمثل..
بس الحين عااادي ، يعني اصطلبت الأخت وتابت

بانتظار المثل الياي

[عنود الريف]

كملي يا اختي ..
ليش توقفين .؟؟؟

[الشوق]

الدلوووعه ..
بعدها الحياه جدامج .. وما تدرين يمكن اتحصلين في هالدنيا من هالفئة ..
بس كل اللي اتمناه انج اتواجهين الموقف ... و تختارين اصدقائج صح ..

عنود الريف ..
تسلمين يالغاليه على المشاركه .. المشكله يوم اتحصلين ان السالفه يايه من اقرب انسانه لج .
وما تتوقعين منها هالتصرف ... فتنصدمين اب هالشخص ..
لكن ساعات المواقف او الازمات اللي يمر بيها الانسان اتعلم البني ادم .. واتخليه يراجع في اختياراته المستقبيله ..

هموم الحب ..
تسلمين يالغاليه على المشاركه والمساهمه .. من الصعب يوم انحصل ان ناس ينكلمون من ورانا .. وخاصة لو انعزهم وانقدرهم ... لان احيانا قد تكون تلك المشكله الصغيره سبب لاحداث وتوالد ثغرة بينك وبين الشخص الاخر .. فتنولد الحساسيه وعدم الثقه ...
واهم ما في الصداقه الحقيقيه هي الثقه ..

تسلمون عزيزاتي على التواجد .. وعشان خاطر عين تكرم مدينه .. لي عوده للموضوع ..

[الشوق]

عدنـــــــــــا بتاريخ 17-7-2005
وعلشان خاطر الاخوات اللي يبونا نستمر من خلال طرح هالامثال والمواقف ..
مثلنا لهالاسبوع يقول :-
السمجة الخايسة تخيس السمك كله...
قد تكون صادقت الكثيرين في حياتك .. فمنهم من تاثر بهم .. ومنهم من اخذ ولو بشيء قليل من اسلوبهم .. ومنهم من ابتعد عنهم ..
اذ كنت من اصحاب الذين يهتمون بإقامة الصداقات ..
هل انت على يقين تام بهذه المقوله ...
هل صادقت يوما ... انسان سيء السمعه .. وخفت من ان تخالطه كي لا تتأثر به ...
هل رايت او صادفت انسانا تاثروا بغيرهم .. وذلك بسبب سمعتهم ...
هل انت تؤمن بالمثل اللي يقول ان السمجه الخايسه .. اتخيس باقي السمجات ...
عطونا ولو القليل من مواقفكم او مواقف غيركم
ودعونا نقترب منكم .. لنستفيد معا ...
وتحياتي لكم
الشوق
:blush: :blush:

[الدلووووعة]

تسلمين اختيه على استمرارج في طرح الامثال

والله ها المثل دوم الوادلة واخونهي يقولنه حقنا

يعني مرات نحن في المدرسة نصادف هيل البنات
اللي عليهن حركات فيوم اخبر امي واخوينه عنهم وجي
عاد هم يقولون لي ترا تحملي لاتمشين وياهن وجي ولا تتأقلمين وياهم وايد
وقالت لي ها المثل ترا السمجة الخايسة تخرب باقي السمج

وانا هب مؤيدة ها المثل دوم لنه الوحدة لو ماسكة عمرها لاها الاشكال بتأثر فيها ولاغيرها
بس اذا كانت البنت جي ها بعدها عالبر اذا يت وحدة من ها الخايسات بتخربها عطول

والله يبعدنا من هيل الاشكال
والسموحة

[المقاتل]

وعليكم السلام ورحمــــة الله

:oh: ناس تشتغـــل من ورانا بالأمثـــال ونحــــن نايميـــن

:fa42: يـ ـا الشـوق صراحــه .. أبدعتــي وسلمت إيدج إلي كتبت الموضوع

===

السمجة الخايسة تخيس السمك كله...

:fa52: .. كح كح .. صادف إني شفــت واحـــد من الربع الطيبين .. رابع راعي مخدرات وعقــب فتره سمعنا بأن إلي إنعرفــه زاخينـــه بتهمــة إنه يتعاطى مخدرات .. !!

الله يحفظنا وياكم من المخدرات

===

ودائمــا نحن بإنتظارج :fa51: وبالتأكيــد مثـلج اليديد

[دمعة شوق]

الســــــــلام عليـــــــــكم ورحمة الله وبركاته


بصراحه هالمثــل وايد نقوله في المدرسه خاصة يوم
نشـوف بنت يبالهــا
:fa32:

وبنات حبوبات طيبات مالهن خص في هالسوالف يروحن عندها
وتبدا الخبصه ويختربن البنات
ونقـــــــــــــول
السمجه الخايسه تخيس السمج كلــــــــــه
..

وهـــــــذا مواقفنـــا
وأرجو من شــوقي أنها ما توقف أمثالها
وتسمحليه لاني غبت فتــره
بس كانت ظروفي ما تسمح
الســــــــموحه
:woot:

الله حييييييييييييه

[عنود الريف]

مرحبا اختي الشوق
عدت من جديد ..

مثل هالاسبوع ..
واااااااااااااااايد ينقال ..
وااايد اسمعه من القريبين مني بحيث انهم يحذروني من مرابعة هالبنات ..
وانا آمن بهالمثل تقريبا 80%
لانه يعتمد على البنت وشخصيتها .. هل هي من اللي تتأثر بالناس أو تؤثر بهم ..
بس مب شرط انها تتأثر بهم ..
تسلمين اختيه والسموحة ..

[مخاوية الامل]

الــسلام عليكم ورحمــة الله ..

السمجـة الخايســة تخيس السمـج كلــه ..

هذا الله يسلمج المــديرة قالتلــنا إيــاه ..
والسبب ..
إنه وحدة من بنات قروبنا .. ابتدت تختلط ويا بنات عووذ بالله منهن ..
المهم بدت المشاكل امبيـنا نحن القروبين .. ووصلنا للمـديرة ..
قلنالها إنه ربيعتنا راحت قروب غيــرنا .. وبدت تضــارب .
جان تقول أي قروب .. عاد نحن قلنــالها القــروب ومعروف ف المدرسـة عن سمعتــه الخايســة ..
جان تقــول لنــا
السمجة الخايسة تخيس السمج كلـــه .. !!
:fa51:
ووبس ..
تسلمين الشوق ..
وسمحيلي ع القصــور ..

فمان الله ..

مخاوية الامل ..

[الشوق]

مثل مااتعودنا من الاخوات المتواجدات ..
الدلووووعه ..
تواجدج رائع واستمرارج اروع .. عزيزتي لك خالص الامنياتي
لج مني نصيحه اخويه يالغاليه ...
قد لا تتبع البنت الرزينه اسلوب او سلوك غير سوي تجده عند رفيقاتها ..
لكن قد تتأثر ببعض من اطباعهن فاحذري منهن .. وحاولي ان تبتعدي عنهن شيئا فشيئا ..

المقاتل ..
اول ضيف اتواجد معانا هالمره ونتمنى ما يكون اخر مره ..واتكون من اصحاب اهل البيت في هالموضوع ..
الله يحفظنا ويحفظكم ان شاء الله من هالفئه الدامره ...
ويقولك المثل .. من عاشر قوما اربعين يوما صار منهم ... وهالفئه اتحصلهم ما ايوون الا عن
طريق اصدقاء السوء .. فالانسان ما ياخذ منهم اي شي ما يعرف مصدره ...
وتسلم يااخوي ..

دمعة شوق ...
تسلمين يالغاليه ... مسموحه .. عاد نتمنى انج ما اتغطين ...
والله الواحد قام يسمع اشياء واشياء من عيال المدارس .. سواء البنات او الاولاد ..
تبون الصراحه هذيل يحتاجون متابعه من قبل اولياء الامور والمدرسات .. علشان كل واحد يعرف عياله يرابع من ؟؟؟

عنود الريف ..
انا معاج مب شرط انها تاخذ منهم . لكن قد تتاثر بطباعهن او مواقفهن ..
وهالشي مع الايام ... الواحد ما يحسه .. والشيطان في هالمواقف شاطر ..
والله يبعده عنطك من وساوسه .. ويحفظكم من الشر

مخاوية الامل ..
تسلمين الغاليه ع التواجد ... والله يحفظج يالغاليه من هالسمجات ..

في نهاية المطاف .. حابو اوجه هالكلمه للجميع .. ان الاختلاط مع فئه غير سويه ..
ما راح ايي من وراهم غير المشاكل .. عندكم واحد من الحلين .. اذا استطعتوا ان تغيروهم للافضل ..
فهذا الشي يكون احسن لكم .. واذا لم تستطيعوا . فالاحرى بكم ان تقاطعوعنهم .. لان قد لا تتاثروا يهم ولكن .. سوف تتأثر سمعتكم .. بين بقية الناس ..

ولي عوده مع مثل يديد .
ترقبوني اليوم .. ان شاء الله

[دمعة شوق]

بنتــظـــــــــــارج شـوقـي
:fa51:

[الشوق]

في البدايه حبيت اقولكم .. عظم الله اجركم في الملك فد بن عبدالعزيز ..
رحمة الله عليه .....

عدنا اليوم بتارخ 4-8-2005
مع مثل جديد . ويقولكم المثل :- شو حدك يا المسمار قال المطرقة.
مثلنا هالاسبوع يقول:-
كلنا انسوي اشياء معينه ونتخذ قرارات معينه . قد تكون تلك القرارات نابعه من انفسنا او من الغير ...
لن لو كان ذاك القرار لم تتخذه انت .. وانما الزمك احدا ما ان تقوم بذاك العمل او تتخذ ذاك القرار ... على الرغم من انه ضد رغبتك ...فهل ستعمل به ؟؟ وان قمت به ماذا سيكون شعورك .. وكيف ستقوم بذاك العمل بالرغم عدم رضاك عنه..؟؟
هل مريت بموقف معين ، او احد في حياتك مر بهالموقف .. خلونا نعرف شو هالموقف .. وشو سويتوا حياله ؟؟؟
ولا تنسون ( شو حدك يالمسمار؟؟ قال المطرقه ) ما ينقال الا في هالمواقف الصعبه ؟

في انتظار تفاعلكم ..
خويتكم/ الشوق

[الدلووووعة]

تسلمين اختيه عالمثل اليديد

وانا ها المثل ابويه مرات يقوله يوم ابا اسوي شي وبعدين ماكمله
اتعايز وا اقولهم ماروم وجي يقولي شو حادك ياالمسمار قال المطرقة

والسموحة

[دمعة شوق]

:fa56:

شو حادك يالمسمار قال المطرقة

يـ بوووج خلينا بلا مطارق أبرك لنا
دوووم هالمطارق على روسنا

هالمثل شيبتنا دوومه يقولنا أياه
يوم يقولنا سوا هالشي وبخاطريه ما اسويه
بس شو حدنيه قلت المطرقه

الله يطول بعمره ياربيه ولا يحرمنيه منه
...

السموحووووووووووووووووه

[الشوق]

اخواني الاعزاء اشكركم على روحكم المرحه
بس اللي ابي منكم انكم تتعمقون في الموقف ..
يعني ما تعطوني .. معنى الموقف نفسه لاني انا تراني اشرحلكم اياه في البدايه
ابيكم اتقولولي الموقف .. كيف كان وشو اللي صار

وتسلمون
خويتكم / الشوق

[هزاايم]

شواقي رجعت هزاايم عادي تردينها للسته الحلوه لمتابعين الموضوع

شو حدك يالمسمار قال المطرقه
الله يسلمج يالشيخه يوم رجعتنا للبلاد تعرفون الإجراءات بالمطار من تاكس فري وغيره دووم كنا نقعد وخويي العود يقوف بالطابوور لكن هالمره طاح الدور عليه حليل حالي ابويه سلمني الأوراق وقالي كملي الإجراءات وأنا رايح أكد الحجز وأدخل العفش قلت بخاطري ياهي وهقه وطاحت براسي روحي خواافه وأوقف وسط هالناس وهم محتشرين ولا عاد شكلي مادري وش فيه الكل يطالع(لابسه عباتي وشيلتي)والكل مستغرب
أونيه اتعلث أقوله هم يتأكدوون من البضايع يقولي يا بووج دومنا نوقف عادي لو سألوج شوفي إلي وراج وحسسيهم إنهم معاج وهم يدزوون القواري و أنا أطالعه شو هالرمسه
وقفت والله صبرني زااد خوفي يوم هالأفرقاان تيمعووا قلت لا ماعليه أنا بنت أبويه وماعليه منهم إلي أشوف إختي اقبلت علي قالت لي خواافه غريبه وااقفه قلت لها شو حدك يالمسمار قال المطرقه
تمت تضحك علي وتقول قصدج الوالد مطرقه أقولها لا بس جبرني ويعرف طبعي
وسلامتج وعساج سالمه يالشيخه وبانتظار المثل الياي

هزاايم

[الشوق]

هزايم .. تسلمين يالغاليه ع الموقف الطريف والرائع ..
يااخويتي .. صح ابوج جبرج ..
بس تراج قدها وقدود .. ومن خلال موقفج
هذا اثبتي ان الانسان مع المثابره ممكن انه يتعلم ..
ساعات الانسان الشي اللي ينجبر عليه ما يعرفه وما يحب يسويه لكن الايام اتعلم الانسان ..
وتسلمين يالغاليه .. على وجودج مره ثانيه بينا ...

الشوق

[الشوق]

عدنـــــــــا بتاريخ 23-8-2005
مثلنا هالاسبوع يقول:-
يلي ماشي في درب الزلق لا تآمن الطيحة...

هل تهورت في تصرفاتك في يوم من الايام ..
هل تصرفت بطيش سواء كان بالكلام او بالفعل من دون تفكير او وعي ..
هل انت من الناس الحذرين الذين يقدمون على اي خطوه من بعد تفكير عميق .؟؟
هل صادفت موقفا متهورا من احدا ما .. او في حياتك الخاصه .. وندمت على ما قمت به ..
حين تلقى نتيجة اتخاذ قراراتك وتكون سلبيه !!! هل تندم على ما قمت به ؟؟

مثلنا هالاسبوع .. يحذر الناس من التهور والتسرع في اخذ القرار او التصرف بطيش ؟؟ فهل انت واحد من هؤلاء .. خلونا نستمع لحكاوي الاعضاء وانشووف كيف اتصرفوا في مثل هذي المواقف ؟؟
تحياتي لكم / الشـــــــــوق

[هزاايم]

أوه غريب هزاايم أول رد شي عجيب

يلي ماشي في درب الزلق لا تآمن الطيحة

بالشهر اربع شهر من الأشهر إلي عشت فيها بدوون الأهل يعني ماعندي حد يوجهني ولا ينصحني
كنت ناويه على ترتيب الغرفه كنت اشيل القشاار والخادمه تساعدني طبعا كثرت القشاار ملينا صندووق كاامل وانترس عادي تعالي وشليه الخادمه قالت بنادي الخداام يشيل وأنا أقول لا ماشي رياييل يدخلون غرفتيه قلت بنظهره برع بالصاله وهو ياخذه المشكله طلع ثقيل و قلت حراام اكسر ظهر الحرمه قالت بتشيله معاي لكن عنادي أقوى شليته بروحي ومن هني شليته ومن هني صابني تشنج بالرقبه وتيبست علي وطحنا بالمستشفى من إبر وعلاج طبيعي وغيره وهذا الموقف إلي طرى على بالي أول ماقريته

وانتظر المثل الياي وعسااج عالقوه يالشيخه

[هزاايم]

شكرا على النصايح الحلوه منج ليه

[الدلووووعة]

تسلمين اختيه الشوق عالمثل بس الحينه ماعندي موقف على ها المثل يوم بتذكر برد اكتبه

[مخاوية الامل]

مشكورة ختيــه الشوق ع هالمثــل ..

الله يســلمج .. ف المدرسـة .. تعرفين يعني شردات ومادري كيفــ ..
وأنا وحدة كنت وايــد أشرد .. ويوم زختنــا المديـرة .. قالت لنـا إن لو تكرر هالشي بننفصل فصـل نهائي..
وطبعــا كل وحدة فينا ماودهـا تنفصــل .. فقلنا خلاص مابنـشرد ..
ومر يمكن أسبوع أو أكثر ماذكر والله .. جان تقول وحدة من الشـلة ملينــا نبى نشـرد ..
جان تقوملها وحدة وتقولها يلي ماشي في درب الزلق لا تآمن الطيحة..
ومن يومهــا .. قلنا خلاص نحن لا بنتهور ولا بنـشرد .. مافينــا يفصـلونــا بعــد ... !

ووبس ،،


تسلمين مرة ثانيـة..

مخاويةالامل

[الشوق]

هزايم :-
الحمدلله على السلامه يا هزايك ... ومره ثانيه .. اسمعي الكلام ...
ساعات الواحد يتمنى ان يثبت مسؤوليته .. لكن مب على حساب صحته يالغاليه ..

مخاوية الامل:
يقولون يا مخووي ان الشرده نص المريله ..
بس لا تنسينا مثلنا اللي يقول لا تامن الطيحه ياللي ماشي بدرب الزلق
والواحد الشي الغلط يوم يسيرله شي اكيد .. في النهايه راح يندم على هذا الطريق في النهايه اتعلمتوا من اخطاءكم
والواحد ما يكررها ...

وتسلمون على المشاركه
فترقبوا عودتنا مره اخرى
تحياتي / الشوق

[دمعة شوق]

:woot:

عـــــــــــدنـــــــــــ ــــــا

امممممممم مامر عليه هالمثـــــــــل للحينه
:look:
::::::

بنتــظار المثــل اليديد

[الشوق]

من بعد فترة اعتبرها طويله
عدت اليكم لنكمل مشوارنا مع مواقف وامثال .. الصراحه اشتقت لهذه الصفحه .. ولا احب ان اراها وحيده
بعيده عن مواقف الاعضاء والحكم او النتيجه التي نظهرها من حياتنا العامه

عدنا مع مثل جديد في حياتنا يقول : - اللـــي مـــا يشــــوف وراه دومـــه خســــــران
هل انت من النوع الذي تدرس خططك المستقبليه ... قبل ان تقم على اي خطوه ..
هل انت من النوع الذي تتخذ قرارات دون ان تشاور احد او تدرس تلك القرارات ..
هل خضعت لهذا المثل في يوم من الايام وخسرت اي شيء من حياتك ( اهلك / صديقك / مالك / نجاحك / دراستك .. اي نوع من الخساره ... والسبب هو تهورك في بعض الامور ..

اذا كنت شخص متهور في حياتك ... وتصدر قرارات سريعه ... هل تندم في النهايه على هذه القرارات .. خاصة اذ كنت قد خسرت شيئا نتيجة عبثك او الامور التي تستعجل بها ..
تعتقد انك لو شفت وراك ... هل ستنجح في خطواتك ؟؟؟
خلونا انعيش تجاربكم الجديده مع ( أمثـــــــــــال ومــــــــواقف ) :fa34:

[دمعة شوق]

يـامرحبــابج السـاع في ذمتيـه

,.,

اامممم أنا من الـنوع اللي لازم أخطط للي ابا اسـويه وأحطليه السلبيات والايجابيات
وأشـوفه ,., ولازم أنيه أشـاور حد عسب يعطيـنـيه رايـه
وأشـوف وجـهـة الـنـظر
مثــلاً :
يـوم بـغيـت أكمـل دراسـتيه برا الـبلاد عقب ما أخلصـ الثـانوية العـامه
فـ ربيـعـتـيه قــالــت لاااااااا وألف لااا درسي هنيه وبينتلي
السـلبـيـات وتقـريباً أقتـنعـت
,.,

ويـوم من الأيام مادري شو كانت السالـفـه بس أنا تهـورت
وتصـرفت وكنت مستـعيـله
وخسـرت ربيعتيــه
:fa43:
وكلــه في هالتـهور
والله يـكون في الـعون
,.,

تـهـورت مره بحياتيه وخسرت إنسانه غاليـه ع قـلبي
ومن ذاك الـيوم مااتصـرف وما أتخـذ قرار
ألا وأبين سلبياته
وأدرسـه عــدل
,.,

يـالـلـه هــّا اللي في جعبـتـيه
ومشـكـوره يـ شـوقي
والسـموحوو منـج

,.,

[الشوق]

عدنـــــــا ....
بعد غياب 6 اشهر تقريبا على هالموضوع لاكمل مشواره ..
واتمنى ان ارى فيه الروح ان شاء الله
نتوكل وانجرب !!! :ice:
.
.
.
فــــــال الله ولا فــــــالــك
طبعا الاخبار بغض النظر ان كانت حلوه .. فهناك اخبار غير طيبه ما يحب الواحد يسمعها
او شي سمعته .. او اشاعه تم ذكرها على شخص خاصة اذا كانت متعلقه بمرض او وفاة حد معين .
او كلمه عقيتها على حد .. لكن كانت هذي اتضره صحيا ...
هناك اشياء كثيره الواحد يسمعها في هالدنيا .... انت اخي الكريم/ اختي الكريمه؟؟؟
-هل جلبت اي خبر سيء لاي شخص قريب عنك ؟؟؟
او ذكرت أحد ( فسمعت منهم هذه الكلمه ) فال الله ولا فالك ؟؟
-ما هو الخبر .. كيف كان الموقف .. وكيف تداركت الموقف بعد ذلك
- واذا قلتها لاحد غيرك ( فال الله ولا فالك ) مالسبب الذي جعلك تقوله ؟؟ولماذا ؟؟COLOR="Navy"][/COLOR]؟؟

في انتظار تفاعلكم وياي :bow:
وجودكم هو اللي راح يخلي الموضوع يستمر brgll:
تحياتي :)
24-5-2006

[صدى جوفي]

مـرحــبا بج الــشوق ..

أنـــا مشــكلة :doh: مــا أنـــطق بشي إلا استــوى :boxed:

من كــمن ســنــة استــوى شرى الاعــصــار عــندنا .. وكنــا حــزتها بـعرس وما حسينــا باللي يصير برع بس التليفـــونات ما تقــصر :gof: .. ولمـــا ظهـرنا من هناك إلا الدنيــــا معتفــسة والشــير منجلع و.. الــخ ، وأنــا قول زيـــن ما طـــاح بيتنـــــا :fa39: إلا وصلنـا البيت والسور بزاوية وحــــدة طـــــايح ... مــــــا قطعـــوني حــزتهــا :narr: انــزين مــا يخصني من مســاع طـايح السور مب حـزة ما طـريت طيحـــة البيت..!.

وااايد مـواقف تستوي لي .. بس خـــلاص تبت ، أتم ســـاكته أبــرك لي

تحيــــاتي ..)

[الشوق]

صدى جوفي :kcl:
عيل المفروض انقولج (خمسه وخميسه):harhar1: والا ( أعوذ بالله من شر هاللسان )
الله يعين عيل ... يوم انج ما مــا تنــطقين بشي إلا واستــوى) ...:boxed:

عزيزتي اذكري الرحمن اذا شفتي شي وعيبج
عسب اذا صار واستوى لا يقولون من اب سبة لسان :hist: صدى جوفي ...

الغاليه ..
انزين معناته ان هالكلمه تسمعينها اكثر من مره .. خاصة يوم يعرفون ان لسانج:harhar1: يصيب ..
حاسبي عليه يالغاليه وكثري من كلمة ماشاء الله على السانج وراح اتحسين بالتغيير .. :yes:
.
.
على العموم تسلمين يالغلا على التواجد الرائع
:fa34:
ودمتي
الشوق

[دمعة شوق]

السـلام عليـكم

مرحبا السـاع
ويـنـج انتي عنا من زمـان
:qor9anah:
’’

اليوم أحدث حدث كنت اكلم ربيعتيه وأقولها باجر الشهايد يعني
بكره يكرم المرء أو يـهـان
جان تقوليه مترووعه في الانجليزي كان وايد صعب اخـاف اييب دور ثاني
قتلـهـا وكلـتــهـا :
فــــــــــــال الله ولا فـالج
قطعيها هالرمسه دامها جيه
إن شاءالله ناجحات والنسبه فوووق بأذن الله
:fa35:
هـذا أحدث حدث استواليه لـ هـالمقـوله
هن وايد بس هذا اللي اذكره للحين
:)

’’’

يالله شوقي لاتبطين علينا
بنتظار مثلج اليديد
:kcl:
السـموحـه طويلة العمـر
ويـامـرحبـانـي

[عنود الريف]

يا هلا ومرحبا بالشوق
والله موضوع يستاهل نرد له لانه بعده ما خذ حقه كامل

اما بالنسبة للمقولة .. فوايد طبعا نسمعها ..
انا جذي يوم اكون في السيارة واللي يسوق يسرع خصوصا اخويه :fa39:
اقوووله لا تسرع حسبي الله على ابليسك .. اخاف نسوي حادث..
يقووول فال الله ولا فالج يالمنحوسة ..
شوفي الاخوان .. لوول :yes:
وفي مواقف ثانية بعد .. مثلا عند الاكل .. تعرفين مرات تمر علينا فترة كله ناكل من اكل المطاعم ..
اللي في البيت يقولون بتمرضون من كثر ما تاكلون هالسقم كل يوم .. فارد عليهم فال الله ولا فالكم ..
هذا اللي يحضرني الحين .. بس نحن بانتظار المثل الياي ..
والسموووحة

[شمعة أمل]

موضوع حلووو توني اكتشفه


فال الله ولا فالج

همممم نادرا استخدمها بس دوم يقولولي اياها لاني خوافه

مثلا يوم ابويه يطلعني في السبورتس كار مالته وايد يسرع وينخش بين السياير وانا خلاااااااااااااااااااااص قلبي طااااااح ميته من الزياغ واتم اقوله والله مابا أموت الحينه حرااام بعدني صغيييره واتم ايبله اشيا اقراها في الجريده نفس *تدري كم شخص ماتو على هالشارع هالسنه .. تباني انا الحقهم؟؟:bye2: * وطبعا يعصب ويقولي فال الله ولا فالج
خخخخخخخخخخخخخخخخخخخخخخخخخ خخخخخخخخ يحليلي

[ولد الحكومة]

وعليكم السلام ورحمة الله وبركاته

ثانكس اختي الشووووووق



قايد الريم

[هزاايم]

إختيه الحلوه,,الغائبه العائده لنا ان شاء الله وبعدها ماتغيب,,
مرحبابج خويتي اشتقناا للموضوع ولراعيته,,

عن المثل
توه قبل اشوي سمعته
يقولج كنت مع ربيعاتيه بالنادي,,وجاان اتفلسف واشل الحديد:fa38: ,,اقول لربيعتيه واقفه حذالي:اتخيلي لو اتزحلق من يدي وطااح على ريلج,,جان ترد عليه وهي:narr: :فال الله ولافالج,,امحق تخيل تخيلي على غيري ولا عليه,,

وسلامتج
ويا الله رجع موضوعنا المفضل
مرحبابه والله:fa34:

[الشوق]

اوووو ه زين يوم حصلنا جمهور يديد في الواحه التراثيه ..
عيل خلنا انكمل الموضوع ..
دمعة الشوق ..
الله يوفجكم ان شا ءالله ويسهل اموركم في الامتحانات واتحصلون ع النتايج الحلوه
اللي ترفع الراس ان شاء الله ..
.
.
عنود الريف :-
الله يحفظكم ان شاء الله من الشر ومن الحوادث ومن الامراض ان شاء الله
.
.
شمعة امل :-
هيههيه الله يعطيج طولة العمر . اتذكريني بموقف مشابه يوم اقولهم ..
اذا انتوا ما تبون عماركم ترى نحن نبى بعدنا ما عشنا دنيانا .. هيههيهي الله يحفظج يالغلا
وتسلمين ع التواجد الرائع اول مره اتزورينا في التراث سلمتي وكوني متابعه دايمه ان شاء الله

قايد الريم :-
حياك يااخوي تواجدك كان الاروع .. اتمنى اتابع جميع الامثله لانها حلقاتت متتابعه .. وحياك كفايه استمتاعكم ..
.
.
هزايم
عزيزتي المتابعه لواحتنا التراثيه دايما .. اشكرج ع الكلام احرجتينا ..
ان شاء الله راح اتحصلون الجديد والجديد .. بس اتريوو علي يالسه اعصر المخ اشووف شو في الانتظار ..
على فكره ودري عنج االتخيلات السئه تراها ساعات اتصيب ..
خليج ع الشي الحلو .. ترى الاحلام والتخيلات الحلوه اتفرح الواحد ..
,
,
ترقبوني .. :fa34:

[الشوق]

والله لولا ردودكم ع المواضيع جان ما كملت الموضوع من اساسه ..
بس حبكم للموضوع واستمتاعكم بيه خلاني اكمل مشوارنا في هالواحه ..
عدنـــــــــــــــا ..
الفضــــــــــــول قتـــــــــل العيــــــــــــوز
- امممم انت / انتي ؟؟
- هل انت من النوع الفضولي ؟؟
- في اشياء صارت من حولك من اقرب الناس لك .. وحبيت تعرف منه شخصيا .. وهو ما خبرك .. ؟؟
-جاسك الفضول انك تسمع شي معين ؟ وعقب ما سمعته .. اتدخلت فيه في النهايه .. اتوهقت في المسألة كلها بسبب تدخلك في خصوصيات الغير ؟؟
.
.
خلونا نشووف من الفضولي في هالموقف ..وشو صار ؟؟؟
.. بس في النهايه حابه اقولكم ودروا عنكم صفة الفضوليه:boxed: والا بنقرنكم بالفضول اللي قتل العيوز ...

[تنينه]

الفضــــــــــــول قتـــــــــل العيــــــــــــوز

- امممم انت / انتي ؟؟

انا تنيينه :ttmasha:

- هل انت من النوع الفضولي ؟؟

همم يقولون بـعش الشيء brgll:

- في اشياء صارت من حولك من اقرب الناس لك .. وحبيت تعرف منه شخصيا .. وهو ما خبرك .. ؟؟

. هممم الصراحـه مـريت بهالموقف قـبل شوي ,, كـنت يالسه أسولف ويا وحده أسمها الشوق :harhar1: ,, وكـنا نـرمس عـن موضوع ســاعة صـراحه أللي محب الشيخين حـاطنه في واحة الأصدقاء والشوق هـي الضيفه ,, والموضوع طبعاً عـاط الأعضاء المجال للأنتقاد وذكر سلبيات الـعضو أو أي كـلمه يوجـهونا لـه ,, وكـانت أتقولي الشوق إنـها بـعد ما قـرت الردود شي أشيا ذكروها الأعـضاء صدق فيها ,, وجاااااااااان يجيييييييسني الفضول شووووووو شوو شو الأشياء أللي ذكروها الأعضااء وصدق فييييج ^^ ,,جان أتقولي باجـر آخر يوم وبقولج عـنه بلاا هالفضول .. الفضول قتل العـيوز ,, وهـاي أول مره أسمع فيها هالمثل ههه brgll:

يـعني بـتريا ألين باجر ولا عقبه أليـن ما أعرف :bye2: ,,

ظهرت فضوليه عـيل :boxed:

-جاسك الفضول انك تسمع شي معين ؟ وعقب ما سمعته .. اتدخلت فيه في النهايه .. اتوهقت في المسألة كلها بسبب تدخلك في خصوصيات الغير ؟؟

الصراحه لااا مـا جت أتدخـلت في خصوصيات غـيري ,, يعني صـدق مرات يجيسني فضول لـناحية شـي بس عقب ما أتـدخل ولا أحاول أعرف من أي طـرف ثاني يعني ^^ ,,

[هزاايم]

الفضول جتل العيووز

انا من النوع الفضولي لكن مش على كل حدbrgll:
يعني احب اعرف السوالف,,وخااصة لما يتكلموون ومره وحده نسمع ضحكه:boxed: ,,يجيسني فضوول
وانا أصلا ينادوني العيووز,,فالمثل واايد اسمعه وينقاال عليه,,لكن ادخل بالسالفه لا ,,بس اعرفها وخلاص,,إلا إذ كان مصيريه متعلق بالسالفه أدخل,,ودوم القرار يطيح على راسي:no0:

وسلامتج
ننتظر المثل الياي يالشيخه