مــقــتــطــفــات يــومــيــة [الأرشيف]

الاسطوري

11-02-05 ||, 03:59 PM

السلام عليكم ..
وشحالهم العرب ..

أعــزائــي

حبيت أجمع بعض المقتطفات من حياتنا اليومية في موضوع واحد ، لأن بعض المستجدات
والمواقف والأفكار والحقائق ؛ ماتحتاج لموضوع منفرد لطرحه ، وهو بيكون 
عبارة عن أخبار في مجالات مختلفة تحدث في الحياة
العامة ، وأتمنى تشاركوني
بمقتطفاتكم
<IMG src="http://oasis.bindubai.com/emoticons/smile.gif" border=0>

* الشرطة منتشرين هالفترة في كل مكان وخاصة فالليل ويوقفون أي حد مشتبه فيه أو مخالف
للقوانين ولكن المضحك يوم الشرطي اللي يوقف الناس يكون مغفي ويقول
الملكيه منتهيه وأصلا باقي عليها 6 شهور وبعدين
يعتذر ويقول (تعرف ياخي 
آخر الليل)

/\

* يقولون الشرطة في خدمة الشعب بس البارحه جدامي باص دعم سيارةوالدوريه
وراهم واللي في الدوريه شافوا كل شي والزحمه اللي صارت بس
هالايام قاموا يتبعون نظام الشردة نص المريله وبأسرع
مايمكن أشوف الدورية تبتعد عن مكان الحادث
(يمكن الشفت مخلص ويبى يظهر
فالليل لأنه كان وقت
المغرب)

/\

* ضحايا الشوارع : كل يوم أنشوف حيوانات أليفه (قطاو) مدعومه في الشوارع
والسيارات تدهسهم كل شوي وتسويهم هريس بلا رحمه والأعداد
في تزايد مستمر وخاصه على الشوارع
الرئيسية ، واليوم
الله ستر ولا كنت بدهس كلب (وأنتوا بكرامه) عود ياي يربع بسرعه 
صوب الموتر وأنا مسرع بعد ولو مالفيت عنه كان
بيدخل من الباب اللي ورا ويمكن
يظهر من الباب
الثاني

/\

* الرادارات زادت بشكل مب طبيعي لدرجة اني مره في عز المطر الساعة وحدة فالليل
شفت سيارة فيها رادار متحرك على شارع الوصل (كامري بيضه معروفه) 
وكل السيارات ماتتعدى سرعتها 50 أو 60 يعني هذا شو
ينتظر هالوقت ! ولا يمكن حالف مايروح
قبل مايزخ 10 سيارات
على الأقل

/\

* المنافقين يشوهون صورة الفئة اللي ينتمون لها ، وهالمره واحد يبين عليه ملتزم ومتدين 
ومربي لحيته وشكله مؤدب بس وقت التعامل معاه ماتشوف منه إلا الكلام
البذيئ والأخلاق الفاسدة ويظهر على حقيقته يعني مثل
مايقولون من برع هالله هالله ومن داخل
يعلم الله ، مب كل شي
يلمع ذهب

/\

* إنسان بلا ضمير ؛ سعودي ياي دبي سياحة مع عائلته اللي تتكون من الأم وأربع
بنات وولد ، وبعدما تعشى وياهم في أحد المطاعم وبكل بساطة يلس
يشرب خمر (يسكر) جدامهم كاس وراه الثاني والثلاث
والعيال عادي يسولفون وياه جنه
يشرب ماي ،
يعني لهدرجة صاروا الناس مايخافون ربهم ويسوون المناكر جدام
اعيالهم بعد عشان يشجعونهم ، يعني بناته باجر شو
تتوقعون منهن بعد اللي يشوفونه
من قدوتهم في
الحياة

ولي عودة قريبا مع مقتطفات
جديده والسموحه

الاســـــــــطوري
أخوكم

ا ل ز ع ي م

12-02-05 ||, 04:39 AM

00 عليكم السلام00

يا أبو الأساطير أسمحلي أشاركك في مقتطفاتك وما أظهرته بأناملك وعضلاتك الطيبه فـ قد يظن البعض بأنها ليست بقضيه أو أنها قضيه غير مهمه ولكن في حقيقة الأمر هي قضيه تبدأ بما سردته سيادتك هنا وفيها مبني على أخلاء النظام وقتل الضمير

الشرطي والليل
هو شيء زين أن يكون هناك في وقت الليل من يسهر عشان أمن المنطقه وزرع الأمان للسكان
وغريب أني أشوف شرطي يتعلث أو يستهبل كونه شاك في أمر المتواجد فليش ما يكون صريح ويطلب الهويه أو ليسن السياره والملكيه ويقول أنه بس هي كأحتياطات أمن وواجبه بحتم عليه ذلك وبعد ما يتأكد يعتذر من الشخص ويكون توديعه فيه أحترام وأبتسامه؟
وأذكرك عزيزي أن البعض من أهل الشرطه يقومون بمراقبة الشخص من دون أن يحس لدرجه أن ما عندهم حشمه إذا الشخص مع أهله

،

الشرطه في خدمة الشعب
ألي أتكلمت عنه شيء وارد بس لو كانت في سيارة الدوريه ضابط كبير لما أهملوا الأمر ويمكن يكون أنهم حصلوا أوامر على أن تبعث دوريه أخرى وكان بالأمكان أخذ رقم الدوريه وأبلاغ المسؤولين عن ما قاموا به
لأن هذا يؤدي للأهمال وتعطيل السير صدق جاسهم شيء أسمه الهيازه

،
القط والكلب
يكفينأ من هذه القطاوه المتشرده وأضيف معك أن القطاوه أيام زمان أول أتحصلهم أضعاف البنيه لدرجه أتشوف شكل العظام اللاصق بجلد القط أما اليوم أنحصلك قطو منفوخ ومكرش وأتحسبه أنه مايقدر يتسلق الجدران من كثر ما هو ثجيل وهذا كله يعود والله يخلي زبالة البيت وألي متروس فيها بقايا الأكل بكثره
ومن ناحية الدهس فأحس بنزات في قلبي وأنا أشوف مصارين القط ظاهره برع في الشارع
نسوا أن القطاوه مذكوره بأحدايث شريفه
وعن الجلاب والله يعزك فأنا مستغرب ليش هي متواجده في بيوتنا وما يدرون أن الملائكه ما تدخل لبيت فيه كلب ما أدري يمكن يتحرون عمارهم أمريكا وألا أوروبا
فلو سرنا لدول أجنبيه لشفنا الجلاب وتزيينهم لدرجه أن البعض ما أن يموت يوصي بورثه لرعاية الكلب
مساكين هذا بسبب ما عندهم شيء أسمه صلة رحم
والأكثر غرابه أن الكلب يتم ينابح وكأنه واثق من نفسه بس لو نتقرب منهم ونرفع في ويوهم النعله كرمك الله بتشوفه يربع شرده
وصدق ألي قال
الكلب ما ينبح إلا عند باب بيته

،
،

الرادار
والله الرادارات زادت بكثره وصدق ما كتبته
بس الملاحظ أن الرادارات متواجده بكثره على الخطوط الطويله
حتى أنها أمبينه أمامك
بس لو تكلمنأ عن الرادارات المتحركه والمتخفيه فتأكد أن أصحاب هذا الرادار ناقصنهم فلوس

،
،

مب كل شيء يلمع ذهب
هؤلاء صحيح ما قلته هم منافقين والمنافق مسيره ينكشف في يوم ما
ياليت ألي ينافق يعرف أن عذابه أشد من عذاب الكافر
وبالحقيقه هو يمكن يقدر يكذب على الناس بس ألا يعلم أنه ما يقدر يكذب على ربه
شو بيستفيد
وهؤلاء الصنف هم بالأساس دمار وتشويه صورة الإسلام

،
،

سعودي خارج السعوديه
أنت شو تتكلم هذا قليل عن ماهو الكثير
حقيقه إذا تبأ أتعرف السعودي فبتعرفه خارج السعوديه
لدرجه أنها وصلت بأنهم صاروا ديوثون
وحكايه حصلت لأحد الأقرباء أحكيها لك:
أنه في يوم كانت زوجة قريبي تسوق سياره وفجأه تدعملك سياره فيها أثنين من شباب السعوديه وألي يدرسون في الجامعه المتواجده في أحدى الإمارات
والسايق طبعاً أتغصص بأن سيارته مدعومه والحرمه طبعاً هي الغلطانه بس وألأي فيه العجائب أن السايق الطالب السعودي نزل من سيارته وتوجه لسيارة الحرمه وحاول يكسر زجاج السياره ويهددها أن لم تفتح الباب بيكسر زجاج سيارتها زياده أنه تم يسبها طبعاً الحرمه تأثرت كثيراً مما خافت وفي نفس الوقت تمت تبكي وأتصلت بالشرطه وهي داخل السياره زائده أنها أتصلت بزوجها وهي تبكي وتستنجد
ومعروف بأن زوجها كثير وكثير العصبيه وصل الزوج لمكان الزوجه ووجد الشرطه ونزل وهو يركض لكي يصل للسعودي لأنه أراد أن يضرب ضرب ما بعده ضرب حتى أني قد أقول وكما أعرفه يمكن يقتله
طبعاً الشرطه قبل ما يسوي هاجه يودوه وفهموه أن إذا تعدى عليهم بتستوي القضيه في صالحهم وهو وعلى عصبيته ما همه وأراد التعدي في نفس الوقت تم السعودي يترجاه بأن يسامحه وتم وضع السعودي بالتوقيف علماً بأن اليوم ألي بعده هو يوم أمتحانه النهائي في الجامعه وإذا لم يمتحن بيضطر يعيد السنه وطبعاً الزوج رافض التنازل
فألي مستغرب منه أن يظهر شعب مثل هؤلاء من دوله بدأ فيها الأسلام بنزول محمد صلى الله عليه وسلم بس بالأخير أقول مب كلهم بل فئه منهم لأن هناك صالحون

،
،
عزيزي سواء حيوان أو أنسان فمنهم المفيد ومنهم الغير ذلك وأنا ما ذكرته إلا المضر
،
،
ا ل ز ع ي م

المفتاح

12-02-05 ||, 09:26 AM

بسم الله الرحمن الرحيم
اللهم صل على سيدنا وحبيب قلوبنا محمد وعلى اله الطيبين الطاهرين
السلام عليكم ورحمة الله وبركاته

اشكرك يا اخى الكريم الاسطورى على بعض المقتطفات الجميلة والحزينة فى نفس الوقت
واحب ان اشارك ببيعض التعليقات اتمنى ان تنال اعجابكم.

الله يعين الشرطة خلال هذه الايام التى تمر بها دبي فى مهرجانها العاشر من تنظيم
والحفاظ على الامن حيث كما تعرف هناك اناس لا يريدون لبعض البلاد ان يسودها
الامن والامان ودائما يحبون الفوضى ....فالله يعينهم.

مسألة بعض الحيوانات هذا الموقف متكرر دائما وانا ايضا حدثت معى هذا رايت
قطا يمشي خففت السرعة ولكن صدمته وتألمت كثيرا.... المشكلة هذه حيوانات
لا نستطيع ان نمنعها.....فى السابق ايام الثمانيات كانت الجمال فى الشوارع
الرئيسية كم من الناس قتلوا من هذه الجمال السائبة.

بالنسبة للسعودي طبعا هذا حال كثير من الشباب السعوديين للاسف الشديد
حتى مرة وانا قادم من البحرين فى حدود الامارات التقيت بشاب سعودي يسالنى
اين اجد الفندق الذى فيه البنات والعياذ بالله ؟؟
طبعا ليس جميع السعوديين حيث فيهم المؤمنين .

والردار مهما عملت الدولة فكل يوم تزداد الحوادث ويزداد الخير على المرور.

والله الموفق
المفتاح

ألم ترى

12-02-05 ||, 10:00 AM

بسم الله الرحمن الرحيم

وعليكم السلام ورحمة الله وبركاته

::

::

الأســـطوري

سلــمت يــداك أخــي الكريـــم ففعـــلا هـذا مـانراه وتسمعــه

فالله المستعـــان 

<IMG src="http://oasis.bindubai.com/emoticons/smile.gif" border=0>

::

::

ربـــي يحفــظك ويرعـــاك

الاسطوري

12-02-05 ||, 11:33 AM

عدنــــــــــــــــــــــ ــــــا

كل يوم نشوف شي يديد والمقتطفات ياكثرها في ذاكرتنا فمنها القديم
ومنها الجديد ، واليوم عندي بعض السوالف
الخفيفه على القراء
<IMG src="http://oasis.bindubai.com/emoticons/smile.gif" border=0>

* الخربشة على النافذة الخلفية : الشباب قاموا يتبعون موضة يديدة ألا وهي الكتابه على الجامه الخلفيه
والبداية كانت بأنهم يحطون أسم النادي اللي يشجعونه وتطور الموضوع إلى وضع شعار
النادي وبعدين صارت جملة تحدي للي مايشجعون هذا النادي ، والحين
تغير الوضع فبعضهم قام يحط أبيات شعريه وبعضهم
قام يحط إيميله والبعض يحط الموقع
وماشابه ذلك واليوم
شفت سيارة بو شنب (كلوزر على قولة المنصوري) وكاتب ورا أمشي على درب الهوى
عكس قانونه (ياخي أمش على أي درب تباه والناس شو يخصهم فيك) 
يعني الجامه الخلفيه صارت مثل الماسنجر كل يوم نك
يديد والله يستر من اللي يحطون
صورهم بعد !
<IMG src="http://oasis.bindubai.com/emoticons/Oo.gif" border=0>

/\

* سائقي سيارة الأجرة (التكاسي) صدق من قال مال عمك مايهمك ، تحصل السايق ما يخلي شارع ما
يسرع فيه ويلفلف على الخلق ويسرع على المطبات ويتعامل مع السيارة جنه لاقنها في
الشارع ، وفي النهاية إذا دعم يقول أنا مسكين بيوقفوني عن الشغل
لين تتصلح السيارة وبيدفعوني غرامة و و و ،
يوم إنك ماأحترمت الوظيفة
اللي أنت فيها تستاهل اللي اييك ، وفي ناس بالعكس تحصل هالسايق يالس وكل ساعة
يدق بريك وخايف من هذا ومن هذا ويسوي زحمه ومره وحده تشوفه
يلف يمين لأن الزبون قاله كم مره وهو كان منشغل
بالبريكات ويشوف عمره على
الرصيف أو حد
دعمه

/\

* الخقه ونتايجها : واحد على قد حاله عنده سيارة أوكيه بس مب غاليه ، مره وحده تشوفه اشترى سيارة
آخر موديل عشان يخق على ربعه ويحصل من وراها اللي يباه ، الله يزيده إن شاء الله ، واللي
عطاه عطى غيره بس بعد فترة تلاقيه مب قادر يصب بترول للسيارة وتلفونه
مقطوع والديون مب قادر يدفها (ياخي مد ريلك على قد
لحافك) ويتصل لبرنامج بو راشد
ويتشكى من الديون اللي ماتخلص والسلفية اللي ماتنقص وأن البنوك ماترحم ، ياخي أنت اللي
حطيت على ظهرك ديون مالها أول ولا آخر على شي مايرزى ومشيت ورا
المظاهر والحين هذا جزاك ليش معصب ، المثل يقول القناعة
كنز لا يفنى واللي عنده درهم ويقول الحمدلله
أحسن من اللي عنده ملايين
ولا يحمد الله

/\

* الازعاج والواسطة : تلاقي الحبيب حاط هدرز ودبات وسوالف ومزود السيارة ومخلي صوتها يوصل آخر
الفريج ومايظهر من البيت إلى نص الليل عشان يوعي أهل الفريج كلهم ، والشرطة يمرون
صوبه ولا يقولون له شي لأنه ولد فلان الفلاني ورقمه يخوف ومن
يشوفون واحد بس حاط دبة صوت صغيرونه وقفوه
وحجزوا سيارته وسوه مجرم
(وين العدل)


ولي عودة مع مقتطفات
أخرى

الاســــطــــوري
أخوكم

إسهر معي ليله

12-02-05 ||, 08:33 PM

الإسطوري

موضوعك ولا أروع.. والمقتطفات حلوة.. وأحلى مافيها انها جزء من حياتنا ومجتمعنا

ننتظر المزيد

الله يحفظك

ولد الحكومة

13-02-05 ||, 05:01 AM

تسلم اخوي على  المــقــتــطــفــات اليــومــيــة الجميله وانا هاي عيبتني واااايد :
 ضحايا الشوارع : كل يوم أنشوف حيوانات أليفه (قطاو) مدعومه في الشوارع
والسيارات تدهسهم كل شوي وتسويهم هريس بلا رحمه والأعداد
في تزايد مستمر وخاصه على الشوارع
الرئيسية ، واليوم
الله ستر ولا كنت بدهس كلب (وأنتوا بكرامه) عود ياي يربع بسرعه 
صوب الموتر وأنا مسرع بعد ولو مالفيت عنه كان
بيدخل من الباب اللي ورا ويمكن
يظهر من الباب
الثاني

اخوي تسلم ع الموضوع وعندي طلب :
وياريت لو تستمر في متابعتك لهالمواقف الحلوة واتمنى والله من كل قلبي. <IMG src="http://oasis.bindubai.com/emoticons/nerd.gif" border=0> 

<IMG src="http://oasis.bindubai.com/emoticons/fa35.gif" border=0> ولد الحكومة

مسافرللجفا

13-02-05 ||, 07:10 AM

مقـــطتفــــــات يــــــوميــــــه

؛

الشرطــه في خـدمه الشعـــب
ليـله من الاليــالي و كعاده الاهــل في اخر الاسبــوع يبــاتون في المزارع
و في تمام الساعة 1:30 حصلـت سيــاره واقفـه حذال بيتنــــا ولا اشـوي اجـوف الدويـه يايـه ووقفـت راعي الموتر
و نزلـــت شخص واحـد من السيــارة وركب موتر الدوريـه
و ع المركز
<IMG src="http://oasis.bindubai.com/emoticons/cool.gif" border=0>
ومـا انكر اني جفـت موتر من ابعيـد مطفيـي النور وبعـده بكم دقيقـه
اشتغلت السيـاره و شردت
<IMG src="http://oasis.bindubai.com/emoticons/fa52.gif" border=0>
( لا تخـــالف ما تتخــالف )

؛

منافقـــون 2005

يـاهي بــلوه هذا الزمـان
كثروا هذي الفئـه من البشــر في هذا الزمــان ، اتجوفـه من بيـن النــاس حسن المظهر ( باطاله اللحيه ، و تقصير البس )
لكن اي قلب واي لسـان و اي اخلاق واي حسن واي خرابيط

تلقـى الانسـان العادي احسن منه بـ 100 مـره

وهذي فئه موجوده بكثره

لكـن ما ننكر الفئه الصـالحه منهم
فيهـم الخيــر و الخيــر في وجوهم و في قلوبهـم
<IMG src="http://oasis.bindubai.com/emoticons/fa42.gif" border=0>

( لا تغريك المظاهر ايها الانسان )

؛

التكبـر ( الخقـه ) ع الفــاضي
في احد الايـام ، والشيبـه راعي الاستيشن راجع من درب العين و هو ماشي بسرعة 140
ولا ايديـم له واحـد عنده ( بـورش . كايين . ) >> يا عيـني يمكـن احصـل كم بيزه منه
ووقف الشيبـه
-
راعي الكايين : لو سمحت اخوي انا ياي من العين و البترول امفضي عندي
الشيبه : خير ان شاء الله
راعي الكايين : بغيتك تعطيـني كم درهم عسب اقدر اكمل مشواري
الشيبه : فالك طيب >> وفي داخله يقول اي بورش واي خرابيط

اذا راعي الكايين بيزات البترول ما يملك
اي ديـن بيقدر ايسدد له
و اي بوراشد يقدر ايسـاعده
<IMG src="http://oasis.bindubai.com/emoticons/fa55.gif" border=0>

( مد ريولك على قد لحافك و ارضى بما قسم الله لك )

؛

عديـم الضمير

سعودي ولا اماراتي ولا بحريني و لا ايراني ولا كويتي ولا ولا ولا
كل مكان الزين و الشين
وليت الشين يزول

اذا كان الابو يغتصب بنته
اذا كان الابو يسكر جدام اولاده
و
اذا كان الابو يدخن جدام ولده الصغير او الكبير
اذا كان الابو ما يعرف كم ركعه صـلاة الصبح
و
اذا كان الابو يزور البيت في الشهر و الشهرين مرة ولاهي مع ربعـه في ( الديوانيه )
اذا كان وكان وكان وكان الابو عديم الضمير

<IMG src="http://oasis.bindubai.com/emoticons/fa55.gif" border=0>

فـأي فـــلاح لهذه الامه

وهذا صنف من اصناف ،، الله يســــتر من الجيــل القـــادم

( ان تنصروا الله ينصركم )


= = = = = =

( الاسطوري )

مـوضوعك في غــايه الاهميـه و الجمــال
لا حرمنــاك اخي الكريم و شـاكر لك جهودك الرائعه ، دمت لنا مبدع يا المبدع

الله يعطيـك العافيــة

؛

اخـوك
الجفــا

<IMG src="http://oasis.bindubai.com/emoticons/fa35.gif" border=0>

الهيثــم

13-02-05 ||, 07:19 AM

. . بسم الله الرحمن الرحيـم . .

السلام عليكم ورحمة الله وبركاته

/!×!/

الأسطــــوري

يــا حيك والله ، موضوعك عجيب شرااتك

عاادي .. ها شي مب غريب عليك لأنك مافيوي

///

وبعقب على فئـة سائقي الأجرة

انا مررة كنت راكب التكسي ، ويه وااحد عنده كورولا يبا يتراايس

راعي التكسي ما قصر ويااه ويدووس ما رحم الموتر ويسوق على 160 آخر شي اتعقد رااعي الكورولا ما طافنه

والحبيب يوم اتحررك من الدوار ريس كامل على طول ، يعني صدق إللي قال إنه مال عمك ما يهممك

وإذا حصلت مقتطفاات ثانيــة بضيــف إن شاء الله ...

/!×!/

ربي يحفظـــك ويرعـــاك

<IMG src="http://oasis.bindubai.com/emoticons/fa42.gif" border=0>

الاسطوري

13-02-05 ||, 09:36 AM

يــامــرحــــــبا الــســاع

ا ل ز ع ي م

 مقتطفاتك يبتها في الصميم وعرفت كيف توصف كل حاله بوضوح ،
مشاركتك لي في هالمقتطفات البسيطة أستعدتني وايد
وأتمنى ماتبخل علي بحروفك
الجميله

/\

الـمـفـتـاح

تعليقاتك جملية وأنت تناولت الجانب الإيجابي منها وأنا ماأنكر إن لكل شي جوانب
إيجابيه وجوانب سلبيه بس أنا تناولت السلبيه لأني قمت
أشوفها كل يوم و الإيجابيه
تكاد تذكر

/\

محب الشيخين

أنا كل اللي قلته أشياء من الواقع وتصير كل يوم ، تسلم
شيخي على المداخله ولا تحرمنا
من هالتواجد

ولي عودة مع باقي
الردود

الاســــطــــوري
أخوكم

العجيبة

14-02-05 ||, 02:47 AM

موضوع ولا أروع ..

هالمواقف أبطالها هم نحن أفراد المجتمع .. بس جان زين لو حد يستحي ع ويهه شوي
او انه يحس بتأنيب الضمير .. يالله ما عليه ان شاء الله الايام تغيرنا ...

اسمحلي اخوي بضيف كم موقف ..

أســـــــود في أســـــــود

السيارة آخر موديل ، لونها أسود ، المخفي شامل أسود ، السائق إمرأة من لابسي الأسود ( إماراتية تلبس عباة ) ، نقاب على الوجه وأسود بالتأكيد ، ولا ننسى النظارة السوداء التي تلبس بحجة الشمس ! .. تقود سيارتها بدون أن ترى .. " عنبو أصلا وين بتشوف وكل شي أسود جدامها " .. وعندما تتعرض للصدم تقول هم السبب ، وتنسى أنها هي " من طلعت في ويهه لانها اصلا ما شافته " ..

البسي نقاب وبدون نظارة .. أو البسي نظارة بدون نقاب .. وبتسويين خير لو ما تسويين مخفي على سيارتج حتى انتي ما تشوفين منه !

عيد الضب آت لا محالة

تتجهز الكثير من البنات لاستقبال هذا اليوم الذي يسمى بعيــد الحب لديهم قبل أن يأتي ، ولكن تصيبها حالة نفسية وأزمة قلبية عندما يأتي اليوم الذي قبل عيد الحب وتقوم إحدى المعلمات في مدرستها بطرح محاضرة في الطابور بينت فيها أن هذا العيد ماهو الا عيد للضب حيث قال الرسول صلى الله عليه وسلم : " لتتبعن اليهود والنصارى ولتأخذوا مثل أخذهم إن شبراً فشبراً وإن ذراعاً فذراعاً وإن باعاً فباعاً ،حتى لو دخلوا جحر ضب لدخلتم فيه "وقد أسمته المُحاضرة بهذا الاسم لأن هذا الحب لم يأت الا من اليهود والنصارى في الغرب ، وفي نهاية المحاضرة تنبه وتهدد الى أنه سوف يتم تفتيش الجميع في هذا اليوم منعا للتشبه باليهود ..

حينها لا أعرف أنا هل أضحك أم أستفيد أم أواسي من بجانبي لأن القلب لديها سيتوقف بعد أن كانت قد خسّرت "بيزاتها " لهذا اليوم الذي ألغي عنها

اممم هذا اللي يا ع بالي الحين .. <IMG src="http://oasis.bindubai.com/emoticons/laugh.gif" border=0>

واااصل أخوي .. خل نضحك على سخافتنا اللي ما تنتهي

<IMG src="http://oasis.bindubai.com/emoticons/cool.gif" border=0>

مسافرللجفا

14-02-05 ||, 07:14 AM

عـــــدت مع

مقــتــطـــفـــاتي اليوميــــــه

؛

اعــجوبــــه 2005

مـطوع ، صـاحب اللحـى و مقصـر البــس وصـاحب شــعر الـــ ( كيـــــرلي ) او الــ ( المــدرج )
<IMG src="http://oasis.bindubai.com/emoticons/crazy.gif" border=0>
ما قــدرت اكــذب عيـــني في 13 / 2

( اصبحـت الحـى و الالتــزام مـوضه عند البعـض )

؛

شــرطي مشغـــول وفي خـدمه الشعـب
في احدى ايــام المهرجــان ، وراعيـه الموتر غـــرزت صوب القريـه
وتطــلب المســاعده من الشرطــه ، ويردون عليــها : خلي الشبـاب يسـاعدونج من الي عندهـم كروزرات
<IMG src="http://oasis.bindubai.com/emoticons/crazy.gif" border=0>
عجيب والله عجيب

( في خــدمه الشعــب ؟! )


؛

الاسطوري

14-02-05 ||, 08:07 AM

عدنــــــــــــــــــــــ ــــــا

كل يوم في شي يديد وحتى إذا كنت يالس في البيت بمجرد إني
أسرح في ذكرياتي ألقى مقتطفات
كثيرة

* قبل كم يوم كنت في الجمعيه في وقت متأخر بعد نص الليل ، وأنا يالس أدور بعض
الأغراض تفاجأت بأنهم مشغلين جلسه لراشد الماجد ، يعني حتى
الجمعيه التعاونية قامت تحط أغاني وجلسات بعد 
واللي مايسمع أغاني ماعرف
وين بيقدر يتسوق
هالأيام !

/\

* أتذكرت بعض سوالف أيام المدارس .. لما كان الأستاذ يعصب علينا لسبب ما ؛ يقول أنا
بربيكم ياأولاد (........) يا (........) ، يعني يوم انك تقول هالكلمات الوضيعه
وتشتم كل الطلاب بسبب طالب واحد وين بتعرف تربي وأنت
بروحك ماعندك أخلاق من الأساس ولا لك
خص بالتربية ولا هم
يحزنون !

/\

* في ناس طيبين بطبيعتهم والإنسانية كبيرة فيهم ويتعاملون ويه الخدم بحب وكرم ؛ جنهم من أفراد
العايلة ، بس في خدم يفسرون هالشي ضعف في هالناس ويحاولون بل يعاملونهم
بطريقة دانيه (مب المغنيه) دنيئه يعني لين يصيرون هم الطرف
المسيطر في العلاقة وهالشي موجود لا تستغربون !
والمثل يقول إذا أكرمت الكريم ملكته
وإذا أكرمت اللئيم
تمردى

/\

* مره كنت أنا وربيعي على الخط رادين البلاد وفجأة شفت استيشن الجديم مذري لليديد
وطايرين وخطفوا علينا ، المهم قلت لربيعي شو هالناس مسرعين
جيه جان يقولي لا عادي مب مسرعين وايد وبعد
دقايق أشوف  واحد منهم
واقف منطر
عليه التاير والثاني يالس يرد له ريوس ، جان يقولي شو هذا عينك
حاره زين ماذبحت الريال .. أنا شو يخصني فيه الحين 
وهو اللي كان يبى ينتحر وآخر شي
يطيح الموضوع على
راسي أنا !

ولي عودة مع مقتطفات
أخرى

الاســــطــــوري
أخوكم

سكاىنت222

14-02-05 ||, 11:56 PM

سلامى للجميع

هاي شباب

شو هاى الفن يا الاسطورى
اكثر من روعه
يعطيك العافية ربي

باي

سكاي نت

ميامي 44

15-02-05 ||, 01:48 AM

الاسطوري .. مشكوووووور على الموضوع الحلو

واللي يتكلم عن المجتمع .. وبلاويه ..<IMG src="http://oasis.bindubai.com/emoticons/fa52.gif" border=0>

وشكراً لبقية الاعضاء على اضافاتهم ...

تحياتي

الاسطوري

15-02-05 ||, 02:46 AM

يـــامـــرحـــبـــا الـــســـاع

إسـهـر مـعـي لـيـلـه

تسلم الغالي هذا من ذوقك وأهم شي عندي
رضاكم ومشكور على
المرور

/\

ولـد الـحـكـومـة

الحمدلله إني قدرت أحقق رغبة الأعضاء وأوصل لإعجابهم
بماأكتب وطلبك شيخي على العين
والراس

/\

مـسـافـر لـلـجـفـا

ماشاء الله عليك كفيت ووفيت وضفت مقتطفات ولا أروع
ودومك مميز وأشوف حضورك يومي بس عاد
لا تقطع وخلك متواصل
ويانا

ولي عودة مع باقي
الردود

الاســــطــــوري
أخوكم

قلب الوصال

16-02-05 ||, 06:36 PM

تسجيل حضور
لي عودة باذن الله

ابدعت يالاسطوري ؟؟؟؟؟؟؟؟؟؟<IMG src="http://oasis.bindubai.com/emoticons/cool.gif" border=0><IMG src="http://oasis.bindubai.com/emoticons/cool.gif" border=0>

عنود الريف

16-02-05 ||, 06:50 PM

تسلم اخويه الاسطوري ..
مقتطفات حلووووه واااااايد .. ما شاء الله عليك ..
ابدعت ..
هذا حال بلادنا هالايام .. وهالزمن ..
اذا عندي مقتطفات برد وبحطها ..
ما قصرت اخويه ..
والسموووحه

ميامي 44

16-02-05 ||, 08:25 PM

خله الجمال ينفعج !!

نلاحظ في الاوانة الاخيرة .. قل الاحتشام لدى فتياتنا ..
يعني استغفر الله .. الكل يعرف وما في داعي اشرح ..

الشيله .. مسويتها .. شال .. عيل ليش مخسرة بيزاتج وشاريتها!!!!!!

ولا قبل ما تطلع من البيت .. يعني حوالي اممممممممم 
3 غراش عطور ونص تخلصها <IMG src="http://oasis.bindubai.com/emoticons/crazy.gif" border=0><IMG src="http://oasis.bindubai.com/emoticons/crazy.gif" border=0>..

وبعد المكياج اللي عندها يشتكي .. <IMG src="http://oasis.bindubai.com/emoticons/fa48.gif" border=0>
خلاص والله العظيم علب المكياج اللي عندج انحفرت ..
وما بقي فيها شي من طلعه واحدة ..
وياريت حق عرس .. <IMG src="http://oasis.bindubai.com/emoticons/fa36.gif" border=0>

وبعد إذا ما تعرف من وين تشتري ملابس محترمة ومحتشمة <IMG src="http://oasis.bindubai.com/emoticons/Oo.gif" border=0>.. .. 
ترى أرض الله واسعة .. والناس ما يقصروا .. استشيريهم .. وما بتندمين <IMG src="http://oasis.bindubai.com/emoticons/shutup.gif" border=0> ..

وبعد وبعد وبعد .............الخ

انامل

17-02-05 ||, 03:58 AM

الاسطـــــــــوري
وجميع الحضور
وعليكم السلام ورحمة الله وبركاته

مقتطفات اجتماعيه مختاره منتقاه اعجبتني واستمتعت في قرايتها
ابدعت اخــــــــي
موفق بعون الله

حابه اضيف شي لاح بخاطري
على الدنيا السلام:

تجرد الانسان من الانسانيه
واصبحت الانسانيه سلعه نادرة الوجود
نهرول في فيافي العمر ولا ندري اين المفر
الاعمار بيد الله
والنعم بالله
ولكن البشر والاشرار منهم اصبحوا يتفننون بكل السبل
لقتل بعضهم ونهش اخوانهم
على مراى من العالم وفي وضح النهار
والضحيه
ارواح لم تقترف اي اثم

على الدنيا السلام
الله يرحم كل موتانا
::
::
::
::

الاسطــــــــــــــــــــ ــــوري
استمر عزيزي

نحن نتابعك بشغف

كل الود
مساء الاساطيــــــــــر

الاسطوري

17-02-05 ||, 04:06 AM

يــامــرحــبــا الــســاع

خـطـاب

وعليكم السلام ورحمة الله
الموضوع عجيب بوجودك الغالي ، وبخصوص التكاسي صدق مايهمهم شي وأحيد الغزال
قبل تلاقيهم فوق 200 عادي و الحين الرادارات ماتخليهم بس يعوضون
هالشي على الشوارع الداخليه ، ومشكور شيخي
على المداخله ولاتحرمنا من
مشاركاتك

/\

الـعـجـيـبـه

صدقتي الناس هم أبطال هالمواقف والبعض منهم بتفنن في أداء دوره
ومسموحه الشيخه الموضوع موضوعكم
ويستقبل جميع المشاركات
والانتقادات

اللون الأسود صار موضه في كل شي وبخصوص المخفي ترا الناس تعتبره شي أساسي وبدونه
السيارة ماتمشي ، وأنا قبل كنت أحس المخفي ضروري وخاصه لوقت الظهر بس
الحين شليته وأقول قبل الناس ماعندهم لا سيارة ولا مخفي وعايشين
عادي واحنا بالمخفي ونقول لا نبى نسبة 70 أقل شي
ولا مابيسوي شي ، المتزوجين واللي دوم
أهاليهم وياهم يناسبهم بس
باقي الشباب .. !
اللون الأحمر هو لون عيد الظب وكل مانروح مكان نلاقي الناس لابسه أحمر واللي يزين
سيارته بالورود الحمره وغيره من هالسوالف اللي مالها صله بالدين
وصدق الأهالي مايدرون عن اعيالهم شو يسوون في
هاليوم (الله يهدينا ويرحمنا برحمته
ويكفينا شر ما في
الغيب)

مشكورة على المقتطفات الواقعيه وإذا
تذكرتي شي لا تبخلين
به علينا
<IMG src="http://oasis.bindubai.com/emoticons/smile.gif" border=0>

/\

مسافر للجفا

الظاهر زعل علينا ، ما له
شوفه هالأيام
<IMG src="http://oasis.bindubai.com/emoticons/shutup.gif" border=0>

/\

سكاي نت

هذا من ذوقك ومشكور أخوي
على المشاركه
<IMG src="http://oasis.bindubai.com/emoticons/smile.gif" border=0>

ولي عودة للتعقيب على
باقي الردود

الاســــطــــوري
أخوكم

الاسطوري

19-02-05 ||, 10:37 AM

عدنــــــــــــــــــــــ ــــــــا

في هالموضوع أنا ماحبيت أتطرق لسوالف البنات لأن يبالهن موضوع خاص
هذا ما بيكفي بس عشان أنوع المقتطفات بذكر فيه
بعض السوالف الواقعيه اللي
انشوفها
<IMG src="http://oasis.bindubai.com/emoticons/rock.gif" border=0>
* الكعب : كثير من البنات بل الأغلبية يلبسن كعب ، وكل وحده وهي تمشي تظهر صوت
بالكعب (لا شعوريا) وكل الموجودين يعرفون أن وحده بتمر الحين وصار
هالصوت مميز عند كثير من الشباب ومن بعد 100 متر
يلقطه بالرادار ، ومن باب الاحتشام لازم
الوحده تمشي بدون صوت
(سايلنت)
<IMG src="http://oasis.bindubai.com/emoticons/shutup.gif" border=0>

/\

* العيون : كثير من البنات نلاحظ أنهن يتمشن وعيونهن في عيون الناس ، وحتى الريال
هالأيام يستحي يحط عينه بعين حد والبنت صارت ماتستحي من هالشي
وغير هذا إذا كانت تمشي وتوزع إبتسامات للكل
وإذا حد تحرش فيها تقول أنا
ماسويت شي
<IMG src="http://oasis.bindubai.com/emoticons/mad.gif" border=0>

/\

* الصوت : هالأيام صوت البنات صار أعلى من صوت الشباب وهالشي نشوفه كل يوم
وفي كل مكان وتلاقي البنت ترمس ويه راعي المحل أو ويه ربيعتها
أو في التلفون وصوتها واصل آخر الدنيا وولا
على بالها ولا جنه صوتها
عورا

/\

* الشيلة : الموضة غيرة وظيفة الشيلة من الحجاب وتغطية الشعر للزينة ولفت النظر ،
وصارت شفافه وبألف لون ولون ويوم بعد يوم تصغر والسعر يرتفع أكثر
والماركات تلعب دور كبير وكل وحده تبى تطقم الشيلة
ويه الجوتي مادري النشطه فاللون
والدزاين وغيره ومرات
نلاحظ
إنها تكون على الجتف أغلب الأوقات وكلما عدلتها طاحت مره ثانيه ، وهالشي
بين البنات منتشر وبشكل كبير بس شو تقول يوم تشوف هالشي
بين دكاترة الجامعه (مواطنات) يسون هالشي وفي
الكلاس وتتعمد إنها ماتلف الشيلة عدل
عشـان بعـد شوي تـرفـعها 
وتـلـفـهـا مـره
ثانيه
 
السموحه مب قصدي أذكر السلبيات بس
هالشي تعدى حدوده
وايد

ولي عودة مع مقتطفات
متنوعة

الاســـطـــوري
أخوكم

الاسطوري

19-02-05 ||, 04:13 PM

عدنــــــــــــــــــــــ ــــــــا

الجن مذكورين في القرآن والكل يؤمن بوجودهم بس
مب كل الناس حسوا فيهم ولاحظوا
وجودهم !!

( اللي يخاف لا يقرا )

* مره كان أخوي يلعب بالرول بليت فالليل حدود الساعه 3 في الفريج بروحه ومحد وياه (أيام الغوص)
وعلى أيامها فريجنا كان بدون ليتات يعني ظلام والحبيب رايح راد في الشوارع ،
المهم وهو يلعب شاف بأن في ثلاثه يتمشون آخر الشارع
ويه بعض بس كل واحد إيديه للأرض
وبوضوح ، وقف شعره الحبيب وماعرف شو يسوي وهو بعيد والمكان
ظلام والساعه 3 وبروحه ، المهم قدر يرد البيت بعد
معاناه وحرم يظهر مره ثانيه بروحه
هالوقت في الظلام
<IMG src="http://oasis.bindubai.com/emoticons/biggrin.gif" border=0>

/\

* ربيعي (بيتهم جدام بيتنا) مره كان يالس في الميلس فالليل يمكن بعد الساعه 12 والجامه مفتوحه
ومن بيتهم يقدر يشوف إذا في حد يمر في الشارع ، شاف واحد يركض شكله شيبه
بس وهو يركض تطول رقبته وكل مايركض تطول رقبته 
أتشكل الحبيب وشعره وقف وأظن كان
بروحه فالبيت وماعرف
شو يسوي

/\

* مره كنت أنا راقد وأخوي يالس يقرا قرآن في الغرفه ومشغل ليت خفيف ومره وحده أخوي لمح شي
ياي من صوب الباب ومر علي وساير صوب الجامه (يعني مجرد لمحه ماشاف شي
واضح) وفي هاللحضه اللي مر فيها علي أنا نقزت ونشيت من الرقاد مره
وحده ، وبعدين أخوي يقولي ليش نشيت قلت له حلمت
إني كنت أطيح وآخر شي نشيت وخبرني
الموضوع وخلاني ماأرقد
هاك اليوم
<IMG src="http://oasis.bindubai.com/emoticons/wow.gif" border=0>

/\

* مره كنا في السفر انا وربيعي وفالليل كنا يالسين نسولف في مواضيع عامه وكل شي طبيعي وكل واحد
راقد على سريره ويتطالع الثاني ونسولف ومره وحده حسيت بشي صوبي (للحين ماذكر
شو هالاحساس) ، المهم وأشوف ربيعي تغير شكله وسكت وقالي
لا تتحرك وقام يتعوذ من الشيطان عاد أنا هني 
تشكلت جان أسأله شو بلاك
قالي ماحسيت
بشي قلت له هيه جان يقولي شكلك تغير قبل شوي جيه جنه شي شفاف ييه على ويهك
ومايبين عدل وطلع لك قرون ، عاد هني أنا صدق والله تروعت من
الخاطر ونشيت ويبت القرآن ويلست أقرا المعوذات
وآية الكرسي وغيرهم والحبيب
بعد تم يقرا وياي
<IMG src="http://oasis.bindubai.com/emoticons/crosseyed.gif" border=0>

/\
* مره كنا سايرين بيت خالي في أم القيوين ومحد ساكن في هالبيت (مهجور) يعني بس يروحون له
مره في السنه وعاد احنا كنا سايرين 6 أول مره وفالليل 2 قالوا بيردون لأن عندهم
شغل ثاني يوم الصبح ، المهم بقينا 4 واخترنا الميلس العود اللي برع
لأن القسم اللي فيه غرف يخوف والمكان كئيب بس
الميلس أوكيه مفتوح على بعضه
وكله جامات وفيه
غرفه وحمام في النهار رهيب بس فالليل شي ثاني ، المهم اللي كان يلعب بلاي ستيشن واللي
كان يتطالع التلفزيون واللي كان يرمس في التلفون ، وكل واحد كان في حال
سبيله وأنا الوحيد اللي كنت تعبان فيهم لأن كل شي
على راسي ورقدت أول واحد
ولا سويت لحد
سالفه ، والثاني رقد بعدي وآخر اثنين راحوا الغرفه اللي في الميلس على اساس انهم
بيرقدون هناك ومابيرقدون على الأرض ، المهم تموا شوي ورقد الأول
وبقىالثاني واعي وشوي ولا يسمع صوت حد يتمشى في
المدخل اللي بين الميلس والغرفه
وقال أكيد حد منا
ولبس الموضوع ورقد بس بعد شوي نش الثاني متروع لأنه كان يسمع صوت حد
يتمشى على على اليدار ويدور في الغرفه ومارام يتحمل الوضع
جان يوعي الثاني ويتروعون اثنينهم وتموا لين
الفير وبعدين رقدوا وأنا ولا على
بالي نشيت الصبح
مرتاح

هالسوالف والله العظيم من الواقع مب من الخيال واللي
مايصدق ؛ الليلة الجن بيأكدون
له هالشي
<IMG src="http://oasis.bindubai.com/emoticons/fa56.gif" border=0>

ولي عودة مع مقتطفات
أخرى

الاســـطـــوري
أخوكم

الاسطوري

21-02-05 ||, 08:15 AM

مـداخـلـه سـريـعـه

الاسطوري يعني يالس يكتب حق عمره ، قلنا انكم ماتردون على حد أو تكتفون بالرد مره وحده
أوكيه ؛ مانباكم تردون بس على الأقل مروا شوفوا هالبني آدم شو ضاف
وإذا ماتبون خلاص خلهم يغلقون الموضوع
ويحذفونه أحسن
<IMG src="http://oasis.bindubai.com/emoticons/sad.gif" border=0>

أنا يالس أضيف مقتطفات مب لأني مستانس بالموضوع هذا لأ ؛ بناء على طلبكم وتوقعت حد
بيعبرني بس أكتشفت إنكم تجاملوني من الصبح ، خلاص عناد فيكم بكتب
بروحي وبقرا بروحي بس عشان أغيض العذال
وأخليهم يتحرقصون
<IMG src="http://oasis.bindubai.com/emoticons/mad.gif" border=0>

نسيت أقول للي يقرون السلام عليكم ورحمة الله 
وأعتبروها مقتطفة اليوم 
<IMG src="http://oasis.bindubai.com/emoticons/biggrin.gif" border=0>

الاســـطـــوري
أخوكم

ميامي 44

21-02-05 ||, 05:03 PM

وعليكم السلام ورحمه الله وبركاته ..

مشكوور الاسطوري ..

وقواك الله <IMG src="http://oasis.bindubai.com/emoticons/smile.gif" border=0>

قلب الوصال

21-02-05 ||, 08:53 PM

افا من قال نجامل
لنا مرور على المقتطفات دايم لكن على شو والا شو نرد
تسلم الايادي
مجهود طيب

دمت
لا تحرمنا من يديدك <IMG src="http://oasis.bindubai.com/emoticons/wink.gif" border=0><IMG src="http://oasis.bindubai.com/emoticons/wink.gif" border=0>

الحاي بن احمد

23-02-05 ||, 09:15 AM

السلام عليكم

يعطيك العافية خوي الاسطورى
اول مره اشارك وياكم
 
تحياتى
الحاي بن احمد

الاسطوري

24-02-05 ||, 12:32 AM

يــامــرحــبــا الــســاع

مـيـامـي44

العفو عني وعن بقية الأعضاء ، وتعليقج على البنات واضح ومثل ماقلتي مايحتاي إنج تشرحين
وكل اللي يسون هالشي فاهمات ويعرفن هن شو يسون بس الله يهديهن وأنا بعد
ماحبيت أتعمق وايد في هالموضوع بالمقتطفات عشان
ما أشتت فكر القارئ ولا أدخلهم
في متاهات مالها
نهاية

الله يقويج .. وانتي أكثر وحده لها حضور مشهود من بين هالمقتطفات
 البسيطه ، وأنا شاكر لج مشاركاتج وتواجدج في
هالموضوع ولا تحريمنا من
هالحضور

/\

قـلـب الـوصـال

مشكوره على تسجيل الحضور بس لا تخافين أنا ما أسجل الغياب يعني عادي أحضر الكل بدون ما حد
يخبرني (واسطه للجميع) ، والابداع كلمه أنا ماستاهلها لأني ماسويت شي يذكر
وهذي مجرد أشياء شفتها وعشتها وكتبتها ، ومشكوره
على المرور الثاني والتشجيع
على الاستمرار

/\

عـنـود الـريـف

هذا من ذوقج الشيخه ، احرجتيني بهالكلام واشوفه وايد علي وصدقتي
هذا حال هالزمن والبلاوي تزيد كل يوم ، وأنتظر
مقتطفاتج إن وجدت وإن غابت
خيرها بغيرها

/\

أنـامـل

مشكورة الشيخه على الذوق الرفيع والاسلوب البديع ، ومن زمان على الدنيا السلام واللي يصير من
سابق العصر والأوان بس محد كان يلاحظه أو ماتعرض له والحين بدت النقاط تبين
على الحروف وكل شي يبين بوضوح ، والله يرحم الجميع
الاحياء منهم والأموات ، وشاكر لج
متابعتج لي

/\

الـحـاي بـن أحـمـد

الله يعافيك الشيخ ، وإن شاء الله ماتكون آخر
مشاركه لك ويانا ولا تحرمنا
من هالمرور
<IMG src="http://oasis.bindubai.com/emoticons/smile.gif" border=0>

وشكرا لكل من شارك في هالمقتطفات
ولي عودة مع مقتطفات
أخرى

الاســـطـــوري
أخوكم

قلب الوصال

24-02-05 ||, 12:51 AM

استأذنك بمداخلايه عن سالفه الجن
ترى ها اللى يطريهم اييون له <IMG src="http://oasis.bindubai.com/emoticons/fa56.gif" border=0>؟؟؟؟
المهم من تجربه شخصيه كنا انا وبنات يقربون لي يالسين انسولف فجاة حسيت عمري لابقه من الحر يمبي اليمين بس اما الجهه الثانيه مني عادي ... ما استهميت قلت عادي وكملت وشوي اختفت الحرارة ومن ضمن السوالف خبرت مرت اخوي قلتله جي جي صار قالت الله يبشرج بالخير ترى حد من العالم الثالث كان يالس عدالج .......  مت من الزيغه وقلتله كيف عرفتي قالت ينبعث منهم ما ادري اذا الكلمه صحيحه اشعاع باختصار حرارة اذا فجاة حسيتي معناته حد مر عدالج والا يلس ومن عقبها كملت يمكن شهر مستحيل ارقد روحي <IMG src="http://oasis.bindubai.com/emoticons/fa52.gif" border=0><IMG src="http://oasis.bindubai.com/emoticons/fa52.gif" border=0><IMG src="http://oasis.bindubai.com/emoticons/fa52.gif" border=0><IMG src="http://oasis.bindubai.com/emoticons/fa52.gif" border=0>

الابداع كتعريف فعل ما هو على غير العادة والتعبير روحه ابداع
تسلم الايادي <IMG src="http://oasis.bindubai.com/emoticons/fa42.gif" border=0>

الاسطوري

25-04-05 ||, 11:02 PM

يــامــرحــبــا الــســاع

قلب الوصال

بصراحه زين يوم يلس صوبج بدون مايظهر وتشوفينه بشكله وويهه البشوش ،
بس تيخلي إنج بالغلط رفعتي إيدج اليمين وعطيتيه كف خليتيه
يطيح ويورم خده عاد شو يفكج منه بعدين وراج
وراج والطويل وأنا مايخصني إذا
سمعني الحين
:fa56:
وعصب عليج تراج أنتي اللي يبتي السالفه وأنتي لازم
تتحملين المسؤولية بس صدق وناسه اللعب
وياهم وخاصه يوم يزيغون البنات
عشان يرقدون من وقت
ومايسهرون
:vampire:

اووووووووو:ghostface ووووووو
ووووووووووو
ووو

السموحه

الاســـــطـــــوري
أخوكم

شوق القلوب

25-04-05 ||, 11:38 PM

الاسطوري..

عاد خليتني اقرا موضوعك كله... و الحين الساعه 12 و انا بروحي...!! والاجواء حوالي هااااااااااااااااااديه...:fa 56:

بروحي هالايام جايسني ارق..!

عوذ بالله من الشيطان :fa44:

تحفه

26-04-05 ||, 09:22 AM

عليكم السلام والرحمه ..

على طاري السعوديين ..

احيد مره كنت في الستي والبشكاره بغت تشتري من كارفور موبايل .. مبايلها خبربان

جان اروح وياها ..

وينا ع الكاشير .. تبا تشتري بطايق .. إلا الي جدامنا الي تحاسب عايله سعوديه
ابو وحرمته و عياله

كنت واقفه اتريه الدور .. ما اشوف لك إلا الابو يطالع وعيونه امبقبقه اعوذ بالله
حرمته وياك يا ويه استح .. والله جدام عياله الصغار .. وعنده شباب كبار .. بس شكلهم استغفر الله
شكله الابو زطي ومسيطر عليهم .. وكابت حرياتهم
والمصيبه حرمته اتطالع وعادي .. وكلهم شكلهم مدينين ..
اي مدينين .. متزمتييين

وبشكارتنا روحها من الموقف فهمت وشقت لي هالابتسامه

عافانا الله .. حسيت عظامي اتذوب .. والله صدق الي يقول
انجس شعب على اطهر ارض عافانا الله

انا صدقت هالجمله والسبه هالموقف ..

..

مايهزك ريح

26-04-05 ||, 10:20 AM

رهيب يا الأسطوري ..
موضوع اكثر من رائع اتمنى انك تواصل مقتطفاتك .. :fa46:

دمعة شوق

26-04-05 ||, 11:26 PM

يـــ مرحبـــا ملاين بذمتيه ولايسدن وان سدن لاباس
وشـحالك يـ الاسطوري ربك بخير
...
شو هالموضوع يـزيــغ
:fa56:
...
بس بصراحه بصراحه أشــكر فنــــــــــك على هالموضوع الترتوب
وأحلى شي مال السكن لفت انتباهي
...
عادي عادي اذكر موقف ..
اممم ربي طولي بعماركم وحده الله يستر عليها ربيعت حد من المعارف
كان لابسنها يني (بسم الله ) المهم وكانت مريضه بسبب هالشي
ويت عندنا البيت مادل حق شوه الموهيم في الليل انجلبت فوق حدر
كانت راقده جان تينا الصاله واشوف الحرمه تظهر برع في الحوش
وووين سايره مادري ،،، جان ختها تربع وراها والحبيبه انا وراها
ويوم وصلت جي قريب الدروازه جان تقول : بسير قلنالها وووين
قالت : هناكي حرمه تزقرني تباني اسير عندها
وقســم بالله من الزيغه اللي فيني اني ربعت لاشعوري للبيت وانا خلاص done
الموهم رجعناها للبيت جان طالع من الدريشه وتقووول هكيه بتروح عني
خلوني اروح هكيه تزقرني ،،،
وحيـاتكم انا جي حذالها واحس عمري خلاص شوي وبيغمى علي
جان نرقدها وفي ملاحظه قالتها ألنا ختها ان يوم تكون جي يعني لبسها شي
يكون راسها ثجيـــل وبالفعل كان ثجيل ،،، الموهيم رقدت ونشت جي عقب ربع ساعه
جان تقول شو الســالفـــــــــــــــــ ــــــه...؟!!
وهي هب داريه عن شي
....
عوووذ بالله الله كفينا شرهم
..

سمحلي يالاسطوري طولت عليك بس ذكرتني بـ هالموقف
سمحلي ومشــكور على موضوعك الترتوووب
:woot:

دمعة شوق

09-03-06 ||, 07:39 PM

للأعـــــــلـى
:fa42:

الاسطوري

25-05-06 ||, 04:46 PM

السلام عليكم ..

* الخميس اللي طاف كنت راد من بوظبي أمشي ورا ولد خالتي وعقب
مادخلنا سيح شعيب حسيت ان هالمنطقه فيها إنه ودايما
يحطون رادارت وخاصه في الويك اند قلت باخذ
سيد اليمين عشان اشوف المتحرك
قبل ماأوصل له وشويه
ولا أشوف الرادار وخفيت عنده وزخ السيارات اللي جدامي ومن بينهم ولد
خالتي واليوم يخبرني يقولي المخالفه نزلت على نفس رقم
السيارة بس أزرق بدل أخضر والحين ضميره
يأنبه يبى يعرف شو يسوي
يخبرهم ولا
بس يدفعها ! هذا مع وجود رادار وصورة فما بالك بالمخالفات الغيابيــــه
ويكون الشرطي نظره ضعيف ،، مره خالفوا الوالد على الحزام
وأبوي قبل مايدق سلف يربط الحزام
وسار وأحتشر عليهم
وقالوا له
احنا بنييب الشرطي بس إذا قال إنه متأكد شافك بندبلك المخالفه
وعقب المحادثات والنقاشات تبين ان الشرطي
مخالف تويوتا فوريل لونها أبيض
وابوي عنده سيارة
ثانيه
:cop:

(نقل من السيارات)

الاســـطـــوري
أخوكم

دموع قلم

30-05-06 ||, 01:33 AM

وعليـكم السـلام ورحمـة الله وبركـاته

مـا شـاء الله مقتطفـات يـوميـة تصـور حقيقـة مجتمعنـا,
ومـواقـف غريبـة وعجيبـة تحـدث كـل يـوم أمـامنـا.. !!

بنـت محتشمـة متحجبـة رزينـة, ولكنهـا تحـط كحـل, عطـر, وألـوان على ويههـا, والأهـل واثقيـن
على أسـاس أنهـا متحجبـة ولكـن نسـوا زينـة الويـه, ومن هنـاك عيـونهـا يميـن يسـار, تضحــك,
تتمشـى وتتـرنح مع ربيعـاتهــا, والعطـر وصـل لآخـر محـل.. !!

ولا البنـات اللـي يلبسـن العبـاة وهـي مزخـرفة بمليـون زخـارف ومليـون ألـوان وهـي تـدري
أنهـا بتظهـر لمكـان فيـه شبـاب, فـ ليـش تلبـس هالنـوع من العبـاة دامهـا تلفـت الانتبـاه, حتى
ولو من وراهـا.. !!

:rock:

أشكـرك أخـوي الاسطـوري على مقتطفـاتك اليوميـة
ونتلـهف لمعرفة وقراية المزيد من هذه المواقف..

:)

كشره

30-05-06 ||, 05:04 AM

الاسطوري .. عليك سوالف انما ايه

وعلى طاري البنات والموضه .. شوالسالفه هاليومين اشوف البنت في المركز تمشي (كتكوته) صغيرونه ،،لكن الشنطة الي شالتنها اكبر عنها .. اتقول سايره مدرسه ؟؟؟

لي عودة (على قوله الاعضاء)

الاسطوري

09-06-06 ||, 08:02 AM

هــــــــــلا ..

"شوق القلوب"

تصدقين توني أنتبه أن ردج صار له أكثر من سنـــــه يالله السموحه منج
على التأخير ،، وبصراحه أحلى شي سويتيه إنج قريتيه فالليل
وبروحج عشان تحسين بطعمه ولا فالنهار وبين
الناس بيكون عادي يعني خليتج
تعيشين تجربـــــه
شعوريه
:ice:

"بوظبي"

مانقدر نعمم ونقول كل السعوديين جيه بس مـــــاننكر إن البعض منهم
يسوون هالشي وخاصه فدبــي المقر السياحي الأول لهم وأنا
كنت متوقع هالشي من العزاب الضايعين مب من
المتزوجين واللي عندهم أعيال وجدام
أسرهم ومن الموقف اللي
صار لج أحس
جنهم يايين من الجافليه قصدي من عصر الجاهليه بس بقنـــاع الإسلام
اللي شبه مايخصهم فيه بتصرفاتهم هاي وخاصه الموقف اللي
صار لي صدق إنصدمت يعني لو كنت في دولة
أجنبيه يمكن آخذ الموضوع بروح
رياضيه بس هني
صعبه
:doh:

"مايهزك ريح"

رهيب بوجودك حبوب وراح أواصل مشوار المقتطفات إن شاء الله بس
تعال مب جنك انت مختفي من الواحات ،، يالله رد نبى نشوف
مشاركات وهاي آخر فرصه قبل ما أبلغ عنك
في موضوع واي انتوا غايبين
وتسلم على
المرور
:yes:

الاســـطـــوري
أخوكم

الاسطوري

09-06-06 ||, 08:42 AM

عدنــــــــــا ..

*اليوم أنا خاطري أتكلم بصراحه شويه عن الأعضاء ،، أحس وايد أعضاء
عندنا يبالغون في المثاليه اللي واصلين لها من قمة في الإلتزام
وعدم التأثر بمتطلبات العصر وماعندهم أي أغلاط
وضد أي دخيل على العادات والتقاليد
وأن اللي نشوفهم في كل
مكان هم ناس
شواذ مب أكثر يعني لدرجة صار العقل مايتقبل هالشي لأن إذا الأعضاء
هم بالأساس من كل الأشكال والأنواع اللي فالمجتمع فكيف
كلهم يظهرون بصورة وحده عيل وين باقي الأصناف
وصح إن الواحد ورا الشاشــه تكون
شخصيته نوعــــا ما
مختلفه
يعني يمكن يحب يكون الشخص اللي ماقدر يكوّنه فالواقع ويعيش
شخصيتين بس مهما كان لازم تكون عنده جرأه ويتكلم
عن الأشياء اللي هو مقتنع فيها مهما كانت
ردة فعـــــل البعض ولا شو فايدة
الحوارات والنقاشات اللي
ندخل فيــها إذا
ما أبدينا
آرائنا الواقعيه وكل واحد لبس له قناع وتكلم بصورة أقرب للمثالية
منها للواقع عشان يكون صورة حلوه عند الباقيين وماعرف
إذا هذا هو هدفهم بس أنا ضد هالتناقض اللي
بدأ يصير ممل وغير جاد ومرسوم
بريشة فنان عشان يبين
بما يتناسب ويه
الرغبات

لي عودة لنفس المحور إذا
تطلب هالشي
:qor9anah:

الاســـطـــوري
أخوكم

صدى جوفي

09-06-06 ||, 12:42 PM

وعليكـم الـسـلام ورحـمـة الله وبـركــاته ..

المقتطـف الأخـير بـالـذات يبــاله موضوع بروحــه ..

الأسـطـوري .. شو بتسـوي لـو تـعرف - أو بالأحرى متــأكد - ان ردكـ بيكــون له تعــقيب من غيــركـ

وينــاقض ردكـ أو يستـهزء بــه ويــنرفـزكـ بردوده ؟؟؟!

عــن نفـسـي - حاليــاً- عندي رد ما يثير حفيظــة أحد أحطــه ،، وغــيرهــا أفضل احتــفظ برايي لنفسي..

موفق بالطرح .. صدى جوفي

صدى جوفي

09-06-06 ||, 12:55 PM

ما أقصد بالرد - كوني مثالية أو لا- القصــد أنه ما أقدر أعــبر عن رأيي بحرية ..

الاسطوري

09-06-06 ||, 03:21 PM

هــــــــــلا ..

"صدى جوفي"

أنا مقتنع بأن إرضاء الناس غاية لا تدرك وشي طبيعي وايد أعضاء بيكونون
ضدي كلامي وكل واحد له وجهة نظر بس القصد أنهم صاروا
الفترة الأخيرة يمشون ويه التيار سواء يمين
ولا يسار ،، يمكن صعبه الواحد
يتكلم بموضوعيه
عن نفسه جدام ناس صار يعرفهم ويعرفونه وأتوقع هذا أحد الأسباب وأنا
ماقصدت أنهم لازم يعبرون بكل صراحه عن الواقع لأن هالشي
صار فالحياة نادر فكيف عندنا بس يعني يبتعدون
عن التمثيل شويه لأن بدأ هالشي
يبين عليهم بوضوح
بتناقض الشخصـــيه بين الردود في النقاش والردود في باقي المواضيع
وهم مب مجبورين إنهم يشاركون في مثل هالمواضيع إذا ماكانوا
بيزيدون شي من واقع تجاربهم وما أقصد أهين حد
بكلامي بس على قولة خنفروش الله
يذكره بالخير كلام فخاطري
وقال بطلع
:yes:

هالكلام كله مب معناته إني أنا مثالي لأن محد كامل والكمال لله سبحانه
وتعالى ،، وأعرف اختي أن في بعض المواضيع وخاصه الحساسه
منها صعب أن البنت تشارك بحريه فيها إلا إذا كانت
بين بنات جنسها بس ولكن هذا تشعب
ثاني للموضوع مابندخل فيه
عشان ماتضيع
الفكرة

الاســـطــــوري
أخوكم

الاسطوري

09-06-06 ||, 07:23 PM

عدنــــــــــا ..

على طاري الشرطة

*سالفه جديمه شويه ،، أحيد مره ربيعي راد من بوظبي فالليل ومثبت
السرعه على 140 قبل لايزيدون سرعة الشارع لـ 160 ويمشي
فحاله والدرب فاضي المهم شويه ولا يشوف دوريه
يايه من ورا وتديم له المهم وقف
ونزله الشرطي
وطلب الليسن والملكيه وعقب قاله ليش مسرع رد عليه ربيعي أنا مب
مسرع مثبت على 140 قاله الشرطي لأن انا من متى امشي
وراك 160 ومب قادر أوصل لك رد عليه ربيعي أنت
مسرع مب انا ،، انا ماشي على
القانون 140 المهم
عقب نقاش
دام كم دقيقه عطاه الليسن والملكيه وقاله خلاص توكل ولا تسرع
وتحركت الدوريه فالوقت اللي ربيعي كان يرد الملكيه
والليسن مكانهم وعقبها تحرك ربيعي
على الخط بنفس السرعة
وبعد 10 دقايق
ربيعي
شاف نفس الدوريه موقفه شاحنه والشرطي داخل بين التواير
اللي ورا يجيك عليهم ،، الظاهر الشرطي بروحه
فالدوريه وفيه رقاد ويبى يستلى
بشي عشان يتم
واعي
:boxed:
*الشيبه يمشي فحاله يخلص كم شغله الصبح وراد البيت وطبعا بما أن
اللفه مسكره يدخل من الرمل ومافي سيد فالرمل يمشي على
الدرب اللي تمشي عليه كل السيارات ومره وحده
مايشوف إلا السيارة افترت عليه
وشاحنه عوده من
صوبه داعمتنه وماشيه وهو يدقدق هرنات ومحد يسمع لين ماحس
راعي الشاحنه ان الشاحنه ثجيله ووقف وعقب شاف سيارة
تحته ورجع شويه ومسكين الشيبه الجامات
تكسرت عليه وانجرح في ايديه
المهم اتصل فينا
وصاروخ كنت اول الواصلين وخليت الشيبه يرتاح فالسيارة عندي لين
توصل سيارة الإسعاف ورحت اشوف الباكستاني وشويه
وكنت باكله من الصريخ وعقب وصلوا الشرطه
واخواني ،، هني تبدأ السالفه
شافوا الشاحنه
بإسم حد من الكباريه وقالوا دام أن الحادث صاير في منطقه رمليه يعني
مافي سيد او خطوط او شي بنعتبر ان ابوكم غلطان لأنه طلع
جدامه يعني الشرطي مب عارف كيف يستهبل
شكله كان يبى ينكت حليله
المهم بعدما
شاف الكل معصب وانا اولهم والشرطي الثاني مب قادر يسوي شي
قال مافي غير نحولكم المركز وهناك جان تبون تسوونها قضيه
انا قلت لهم قضيه قضيه بس احنا مب غلطانين
وعقب مارحنا المركز ووصلت الدرويه
هناك بعد يوم شافوا
الإسم قالوا لا انتوا غلطانين وهذا باكستاني فقير مع انه الشاحنه ماياها
شي يذكر وحاول يخلي الغلط علينا عقب قال لأ في المنطقه
الرمليه الاثنين يكونون غلطانين وكل واحد يصلح
بروحه قلنا اوكيه رضينا بالحل هذا
على اساس نمشي
على القانون بس الشرطه دايما تمشي ويه المصالح وعقب ماكتب
التقرير عطانا الورقه الحمرا وعطى الباكستاني الورقه الخضرا
عشان يروح يصلح على اساس احنا متسببين
وهو متضرر ،، وين العدل ياناس
ويقولون مافي حد
يضيع حقه ؟!
:negab:

الاســـطـــوري
أخوكم

شمعة أمل

09-06-06 ||, 09:38 PM

ذكرتني بموقف بخصوص الشرطه... شرطة دبي صدق يضحكوني ساعات

احيد هالموقف استوى اليوم عقب عيدميلادي ... كانو بنات عازمينا على سينما وغدا .. انا واختي كنا سايرين امارات مول .. وياين بنوقف في الباركينغ *اختي تسوق* .. يايه بتوقف ولا فجأه يت سايره ورانا .. المهم السالفه انه دعمنا والغلط من اختي .. هي الى دعمت السياره لانه ماشافتها

في هاليوم لأول مره في حياتي اجوف شرطه كووول.. اول مره في حياتي اجوف شرطه لابسين نظارات شمسيه ولا بعد عالموضه O_O

المهم

الى دعمناه لبناني ..

تخيلوو انتو بس الشرطه شو سوو؟؟؟

اول مايو اختي قالتلهم انه هي الغلطانه .. وحتى يوم الشرطه يجوفون وين السياره مدعومه وكيف يبين انه هي الغلطانه .. جان ياخذها الشرطي على الصوب ويقوللها .. متأكده انج غلطانه؟ قولي انج مب غلطانه بعدين بيكون 50/50 وبنعطيج الورقه البيضا ... اذا قلتي انج غلطانه بنضطر نعطيج الورقه الحمرا ... وهي في خاطرها تبا تقوله *شو تتحراني غبيه!:puppyeyes: * .. حليلها عصبت قالتله لا عطني الورقه الحمرا .. هالعدل

يوم خبرتني السالفه *انا يالسه في السياره ولا يخصني في العالم* اسميني نقعت من الضحك:hist: ... معقوله عنا شرطه جي!!! *يعني صح هي اختي واتمنى ماتحصل الورقه الحمرا بس هالعدل وحرام جي نسوي في الريال .. حليله مايستاهل هو مب الغلطان*

مب جنه فوق السجن يكتبون شي يخص العدل ... العدل اساس الحق شي جي ... وين العدل؟؟؟ :hist:

الاسطوري

10-06-06 ||, 02:01 PM

هــــــــــلا ..

"دمعة شوق"

سالفتج انتي عجيبه يبالي اعيش بنفس الجو وناسه ،، بس كيف عرفتي
أن راسها ثجيل ؟ مسموحه بالحل الشيخه وحياج في أي
وقت الموضوع موضوعكم وإذا عندج
سوالف يديده اتحفينا
بـــــها
:yes:

"دموع قلم"

بصراحه في بنات محشتمات بس يحطن سوالف مثل ماذكرتي خفايف
على الويه وكم عطر ودخون وماعرف شو ويوم حد يمر صوبها
حتى لو ماكان منتبه عليها بينتبه وبياخذ فكره وعن
العباه حدث ولا حرج أم الزخارف على
قولتج صارت نوع من بين
مئات والله قمنا نشوف أشكال غريبه عجيبه وفي أنواع ماعرف كيف
يعتبرونها عباه او شو المغزى منها هل الحشمه ولا إبراز
المفاتن و و و و و ،، مشكوره اختي على
الإضافه الجميله ولاتحريمنا
من تواصلج
الدايم

"كشره"

بصراحه للحين ماشفت هالتطور اللي تتكلم عنه ،، تدري يمكن طالعه
من البيت بلبس وعقب لبست شي ثاني عشان جيه شاله
وياها شنطه عسب ترد تلبس نفس اللبس
اللي كانت لابستنه يوم طلعت
كل شي جايز ونتريا
العودة
brgll:

الاســـطـــوري
أخوكم

الاسطوري

12-06-06 ||, 09:26 PM

عدنــــــــــا ..

(الأجانــــب)

* أمس المواطن كانت له هيبه وإحترام من الأجانب بس اليوم لأ تمشي
في الشارع وعادي اييك الأجنبي ويعلي صوته عليــك إذا مامد
إيده يعني وإذا تكلمت يطلع الحق وياه ليش لأنه
أجنبي وراه دوله تسأل عنه وأنت
مواطن مالك غير إتم
ساكـــت
:fa36:

* اليوم ومع كل هالتسهيلات اللي تقدمها الدولة صار الأجنبي يعيش
أمير وكل اللي يباه يحصله والمواطن مسكيـــن بعده يتريا
الدور الطويل اللي يباله سنين ويمكن يحصل
ويمكن يوصل دوره ويقولون له
أصبر تغير القانـون
أو نفذت
الكمية أو الشروط ماتنطبق عليك اليوم أو إسمك يمكن انحذف بالغلط
من القائمة ومع هذا نقول الحمدلله مقارنة بالدول المجاورة
نعيش براحة وأمان وإستقــرار وكل شي
متوفر وحتى إن تصعبــت
بعض الأمور
اليوم

*باجر المواطن بيشتغل عند الأجنبي لأنه بيملك وبيتحكم في كل
شي وبيغير وبيبدل وبتصير كل الأنظمه أجنبيه وبيبيعون
وبيشتــرون في المواطن وهو بعده
غافل مستانس بالتطور
اللي يشوفه مايدري أنه خسر أغلى مايملك الأرض والوطن
وبيتحول المواطن أجنبي والأجنبي بيتحول
مواطن وبنكون مواطنين
بـلا وطـن
:bye2:

وايد مواقف تصادفنا ويه الأجانب بس معاملتهم اليوم جنهم
هــم المواطنين مب نحنا والله يستر من باجر ،،
وأستثني من كلمة أجانب العرب
والمسلمين وأقصد
الباقيين

الاســـطـــوري
أخوكم

مايهزك ريح

13-06-06 ||, 08:53 AM

هيه والله يالأسطوري .. والله محد ضايع في هالسالفه غيرنا نحنا .. المواطنين .. :bye2:
الأجنبي اي ..ويحصل بيت وسياره آخر موديل .. وتشييكاتها وبترولها على الدوام .. :nono:
مادري ليش بعد يعطونه راتب .. :no0:
شو بيسوي به .. مادري .. لا ويوم تسأل يقولك راتبه فوق ال50 ألف :puppyeyes:

شمعة أمل

13-06-06 ||, 10:10 AM

همم انا ماوافقكم الراي ويا سالفة الاجنبي..

حياة الاجنبي في الامارات مب سهله ..

انتو تحسون انه حياتهم مافيها تعب وكلها راحه لكن ماتدرون صدق كيف حياتهم

انتو تجوفون اكثرهم ناجحين .. لكن في الاخير لو تجوفون راتبهم اقل عن راتب المواطن وايد .. لكن الاجنبي يعرف كيف يستخدم فلوسه .. يحط اساسياته اول .. يدفع الاجار .. والمدارس.. والاكل للبيت.. والكهربا والماي .. والفلوس الى يبقاله نادرا يستخدمه لنفسه .. بتحصل انه مسيفنه في البنك لعياله يوم يكبرون ..

لكن المواطن يوم يحصل راتبه .. يخسره على اشيا لنفسه .. بعدين اذا معرس على عياله .. واذا كان في بيت اجار يدفع الاجار ... واذا لا مب لازم يدفع شي .. بعدين يدفع للكهربا والماي لكن الكهربا والماي عند المواطن ارخص .. بعدين طبعا عياله .. الولد لااااااازم يحصل ايدد لعبة بلي ستيشن .. والبنت لازم تشتري هالنعال من لوي فيتون لانه عايبنها لكن مب لانها محتاجتنه .. بعدين يمكن يبقاله شي من فلوسه .. مع انه ماتوقع

صعب على الاجنبي يثبت مكانه في الشغل الا اذا شهادته كانت من جامعه شييييييي من هارفرد ولا كيمبردج ولا ييل
انا المواطن .. الشركات لازم تشغله غصبا عنهم مب على كيفهم يقولون لا لانه هالقانون

مادري ليش انتو تحسون انه فشيله ولا شي جي المواطن يشتغل لواحد اجنبي .. انزين مب كلنا اذكيا ونستاهل مناصب عاليه نكون مدراء .. احسن يحطون واحد اجنبي ذكي ك مدير ولا يحطون واحد مواطن مايعرف شو يالس يسوي .. تراه كله لصالح الوطن .. والمواطن بيتم مواطن.. انا احس عادي لو مديري اجنبي .. حتى في شغلي في الصيف البوس مالتي اجنبيه .. عادي

اتوقع كلحد يمكن يكون معاك في هالنقطه عن الاجنبي .. بس عن نفسي لا .. لاني اعرف اجانب وايد .. انجليز، امريكان، من تايلاند، من روسيا، من الايران، من بكستان، من جنوب افريقيا... واعرف انه حياتهم صعبه.. وفي منهم عندهم اكثر من شغل بس عشان الفلوس الى يحصلونها من شركه وحده ماتكفيهم

الاسطوري

13-06-06 ||, 01:22 PM

هــــــــــلا ..

"مايهزك ريح"

مابنعمم الكلام على الجميع لأن في أجانب فادونا بتجاربهم وخبراتهم
بس العتب على اللي لهم نظرات إستغلالية ومايسوون
شي غير اليلسة على المكاتب وشرب
الشاي وقراية الجرايد
ومثل ماقلت
يستلمون رواتب راهيه ويغيرون لصالح تطلعاتهم مب لصالح
المكان اللي هم فيه والبلاد والله يعينا عليهم
ومشكور أخوي على التعقيب
ولا تحرمنا من
التواجد

"شمعة أمل"

أنا ماختلف وياج في النقطه اللي ذكرتيها وصح ان العمالة اللي يايه من
دول فقيرة أغلبهم في وظايف متوسطه أو أقل وأنا اسثنيت
بعضهم في ردي السابق وهالفئة مانستغني
عنهم كونهم يقومون بأدوار وايد
مواطنين يرفضون
تأديتها وأنا بعد أعرف ناس يشتغلون 12 ساعه برواتب جدا ضعيفه ومب
قادرين يوفرون شي حق عوايلهم على هالأسعار المرتفعة
ويدورون شغل بارت تايم عشان يطرشون
شويه لأسرهم برع وأحس
مكروفين أكثر
مما يقدرون بس أنا كنت أوجه كلامي للي بدت تصير لهم سلطة ومخلين
المواطن آخر إعتباراتهم وماله أي كيان او طوراق وقاموا يتعدون
على حقوق البعض وخسي إماراتي يقدر يسوي
جيه فبلادهم بس هم عادي
يسوون اللي يبونه
مب الكل بس فئة وبدت تكبر ومايمشون على نظام ياغريب كون أديب
لكن يطبقونها بالعكس ومحد بياكلها غيرنــــــــــا دام الحين
نسكت باجر شو بيسوون ! شاكر لج تواصلج
الدايم ولاتحرمينا هالتواجد
المميز

إختلاف الراي لا يفسد
للود قضيه

الاســـطـــوري
أخوكم

أمرين

13-06-06 ||, 02:26 PM

الأسطوري

ماشاءالله موضوووعك فـنـتـك ...
لوووووووووول

.
.
.

:)

أمرين

13-06-06 ||, 02:31 PM

الأسطوري

ماشاءالله موضوووعك فـنـتـك ...
لوووووووووول

.
.
.

:)

الاسطوري

26-06-06 ||, 07:20 AM

عدنــــــــــا ..

(شارع جميرا)

تعرفون إن شارع جميرا تم تعديله في الفترة الأخيرة من تكبير وتفخيم و
و و وهو حاليا يشهد اللمسات الأخيرة وطبعا صار الشارع كله
مطبات عبور مشاه وأشاير وتقاطعات والواحد
غصب عنه مايقدر يسرع إلا
فحدود وفوق
هذا كله حاطين ألف رادار على الروحه والرده والتقاطعات والأشاير يعني
أحس الرادارت أكثر من الدوريات اللي تمر في الشارع كل يوم
والمساكين اللي مايدرون يتفاجؤن بالفلاشات
ويتحرونها جزء من مفاجآت
صيف دبي
وغير اللي يطيرون على المطبات وتتكسر سياييرهم و و و يعني مافي
بقعه فاضيه الا وفيها شي ،، صح يمكن هالشي بيخفف نبسة
الحوادث في هالشارع اللي من فتح مافي يوم
مر بدون حادث للحين وخاصه
فالليل وفي بعض
الأشياء السلبيه اللي لاحظتها إن الإضاءه بالنسبه لعرض الشارع ضعيفه
والمطبات ماتبين عدل من بعيد يعني اللي مايدل الشارع
ومايعرف نظام الأشاير مابينتبه للمطبه إلا
يوم يوصل عندها يعني
لو حاطين
عكاسات أو ليتات صغيره او اي شي على المطبه عشان تبين من بعيد
وغير الغلطات الثانيه ،، بس في النهايه صار شارع حلو ان
الواحد يتمشى فيه وهو رايق على راحته
بس وقت الطواري مستحيل
ماينفع أبدا خير
شر

الاســـطـــوري
أخوكم

مايهزك ريح

26-06-06 ||, 08:19 AM

على طاري شارع جميرا ..صدقك .. انا عني موتري واطي .. وكمن مره دق في المطبه .. لا والمصيبه اذا كان ورايي ستيشن ياي مستن .. عادي يطوف المطبه وهو طاير أما انا فلا .. لأنه بيتكسر الموتر

ظبية

29-06-06 ||, 12:55 AM

الاسطوووووري

مــا شاااااء الله فكرة ومضمووووووووون راااااااائع

إلى الامااااااااام

وفي أنتظار يديدك :)

الاسطوري

05-08-06 ||, 10:10 PM

هــــــــــلا ..

"أمرين"

هذا من ذوقج اختي وننتظر مشاركاتج
وآرائج وتسلمين على
المرور

"مايهزك ريح"

الله يعينك بس الحين عقب ما إكتمل تغير والسلبيات قلت بنظري
والحين حفظت الشارع ولا شعوريا أخف قبل المطبات
حتى لو ماكنت منتبه وأحلى مافيه إنه
هادي ومافيه زحمه مثل
باقي الشوارع
:yes:

"ظبية"

تسلمين اختي وشكرا على التشجيع
وفي إنتظار تواجدج
الدايم

الاســـطـــوري
أخوكم

شمعة أمل

07-08-06 ||, 07:54 PM

دزاين هالشارع مب شي لكن استااااانس يوم اسير عليه لانه ماشي زحمــــــه .. يضحك الشارع كل شوي مطبه ولا لفه ولا انترلووك مخترب .. توه منفتح ونصه متكسر ... ياخساارة فلووس P:

هزاايم

11-08-06 ||, 12:57 PM

الإسطووري
الشيخ بالصرااحه موضوعك فنان ومرتب,,شراات اخباار الإمارااات
عجبنيه الصرااحه,,سلمت يمنااك لاهانت...
عن آخر خبر
"""شارع جميرا"""
يصير شاارع شوطوله وعرضه السرعه به 65 :puppyeyes:
الله يرحم الأياام الأوليه

متابعين لمقتطفاتك لاهنت

عذبة الرووووح

15-08-06 ||, 10:20 PM

موضوع ولا أروع ..

مقتطفاااات يومية واااااااقعيه 100%

تسلم ايدك http://oasis.bindubai.com/bin/http://uaegirlsclub.com/imagehost/uploads/760b6ab4ec.gif (http://uaegirlsclub.com/imagehost) ويسلم مخك http://oasis.bindubai.com/bin/http://uaegirlsclub.com/imagehost/uploads/cce843820d.gif (http://uaegirlsclub.com/imagehost)

المزوحي

16-08-06 ||, 12:03 AM

حبيت أجمع بعض المقتطفات من حياتنا اليومية في موضوع واحد ، لأن بعض المستجدات
والمواقف والأفكار والحقائق ؛ ماتحتاج لموضوع منفرد لطرحه ، وهو بيكون
عبارة عن أخبار في مجالات مختلفة تحدث في الحياة
العامة ، وأتمنى تشاركوني
بمقتطفاتكم

لالا شادين حيلهم الشرطة .. شفت لك من مساعه شرطي يخالف سعودي يمشي كتف الطريق ...
قلت الحين السعودي بيدعي عليه بيقوله نحن في بلادكم احشمونا .. يوم هو ماحشم عمره وخالف ..
ومن فترة شفت لك شرطة عندهم باث فايندر والله لو شفت كيف يسوق متأكد منك لو هندي بتدعمه
يبط الجبد الصراحة يعطيها ريس ويتشس بريك ....

/\
على طاري الضحايا ...مرات تشوف قطوة ومرات تشوف بني آدم ... العالم عايشة بتحدي
شكلنا بنوقف موترنا وبنركض للتجربة ..

أما الرادارات حفظنا وين حاطين الرادار .. حتى المتحرك اعرف وين بيحطونه الصبح وإلا المساء
ومع هذا يحطونه بشكل خيالي وكل يوم يحطونه قبل احيد بس آخر الشهر ...
الظاهر الناس زادت فلوسها من الاسهم .. لكن من كثر ما اقول هنيه رادار وهنيه رادار ..
كنت ياااي مستن .. واشوف كراع هندي منبطح على الحشيش اترحيته رادار ..

مانبغي نعمم على اللي تطريهم ومب كلهم جيه .. لكن تنصدم .. عندنا واحد في الدوام ..
ملتحي .. لحيته طويلة وهو متزوج .. يوم شفته ماسك صلب سيجارة .. قلت مب مشكلة براحته
لكن هنيه مب براحته يوم السبوع اللي عقبه يالس يغازل وحده متزوجه وهي فتنت عليه ..

انسان بلاضمير .. شفت لك سعودي مع عائلتة في برجمان .. البنات يدخنون سيجارة وهو ضرب سوالف وياهم .. كيفهم ..

دلع امونتي

17-08-06 ||, 08:11 PM

موضوع جدا جميل

وتستاهلون هالشارع عسب ما تسرعون خخخخخخ

والله يعينا ويعين الجميع

عذبة الرووووح

25-08-06 ||, 10:33 PM

مشكوووووووور اخووووي الاسطوووووري

وفعلا مقتطفات واقعيه

وننتظر جديدك

ولد الحكومة

26-08-06 ||, 10:29 AM

تسلم أخوي الاسطوري عالمقتطفات اليومية ،،

الاسطوري

22-06-08 ||, 11:52 AM

انسان بلاضمير .. شفت لك سعودي مع عائلتة في برجمان .. البنات يدخنون سيجارة وهو ضرب سوالف وياهم .. كيفهم ..

^
تدري يالمزوحي اكتشفت ان الشرب شي عادي عند فئة كبيرة في المجتمع وبتفاخر بعد وانه يت
فترة على الاجيال اللي قبلنا وكانوا كثير منهم يشربون جنهم يشربون ماي وماعرف
شو الحلـو فيه عشـان يكون جيه الاقبـال عليـه والله يبعدنـا
هالمحرمات صرنا نشك حتى في الكوفي
اللي نشربه يمكن في
الكحول
:fa52:

دموع قلم

01-07-08 ||, 06:07 AM

مقتطفات يوميـة ..!

الشباب الفاضيييييين اللي يتصلون ويلعوزون خلق الله ..
واللي ماااااادري من ويييين اييبون الأرقام ..!!!

انزين .. عرفنا وغلطتنا اننا ردينا عليهم ..
ونسكر في ويوههم .. ونطنش مكالمتهم ..
وبالأخييييــر ما يتوبون ويتصلون كــــل يوم .. كل دقيقة .. ><

وأزيدكم من الشعر بيت ..
بعضهم يملون ويوقفون .. وعقب شهووور يردون يتصلون !
يعني لا تعرفني ولا أعرفك؟ حتى أول مكالمة ما استمرت دقيقة .. وجيه يسوي ؟!

بســـم الله ..
من صدق يخرعون ..
وحوش .. حيواناااات >< ..

ما بسأل ليش يسوون جيه ..
أكيد فاضيين .. ماشي شغلة .. هبالة .. تخلف .. ومرض نفسي ..!

لكن السؤال ..
شــــوووو الحـــــل ..؟!!!

ومشكلة اللي ما تعرف تهزب وترمس بالقو من بداية المكالمة ..
ما أرد ع أرقام غريبة .. ماعطي رقمي لأي بنت ماعرفها عدل ..
أعطي أخوي التلفون يوم يتصلون .. ولا شو أسوي ..؟!!!

.
.

الله يبعدنا من شرهم وشرور الدنيا .. ياااالله ..

الاسطوري

01-07-08 ||, 09:16 AM

هــــــــــلا ..

"دموع قلم"

للأسف الشديد هالظاهرة قامت تنتشر في مجتمعنا وبشكل كبير في الفترة الأخيرة والتنطنيش
من أسهل الحلول ولكن الطرق اللي ذكرتيهم بعد ينفعون يعني
حولي المكالمات الغريبة
على أخوج أو عطي التلفون يرد لو كان قريب منج أو إذا تبين أسرع الحلول وأكثرها فاعلية غيري
رقمج ولاتعطينه حد غير المقربين بس وإن شاءالله هالامور
تنفع ويه هالاشكال

عن نفسي ماحب أرد على الأرقام الغريبة بس مرات أضطر إني اتصل واجيك اذا كان على الرقم
اللي استخدمه في الدوام اما الرقم الثاني في الغالب يكون حد سخيف
او هندي مغلط او حد من خارج الدوله يدق
مسدكول اما اذا
كانت المكالمه في وقت متأخر اعرف انه حد يستهبل ونفس ماذكرتني صادفتني حركة ان الرقم
اييني كل كم شهر مره ولكن في حالتي يختلف المتحدث حتى اني
خزنت الرقم باسم مغلطين وقمت
اشوفه عقب

عيل تخيلي إن في وحده صغيره كانت تتصل في واحد
شيبه ماتعرفه وتقوله أنا أحبك
وين تبى هاي!!!
:doh:

السموحه

دموع قلم

01-07-08 ||, 02:45 PM

امممم سالفة اسجل أسماءهم عشان مارد عليهم مرة ثانية .. سويتها ..
بس عقب شهووور مسحت رقمهم .. وردوا اتصلوا عقب فترة .. ><

ع قولتك أخوي الاسطوري ..
اعطي أخوي التلفون أفضل حل ..

آآآخ بس إذا بيدي أعالج عالتخلف اللي فيهم ..
جااان تحركت وسويت وشفيت مرضهم !

:glare:

تدرون ..
من زماااان وأنا أفكر وأقول .. عقب ماشتغل وعندي راس مال ..
بفتح لي مشروع يغير من الشباب والبنات التافهين ..
مشروع يغير عقولهم .. تفكيرهم .. يخليهم واعين ..

خخخ ..
ودووم يضحكون علي ..!

:fa46:

بوسلطان

01-07-08 ||, 08:03 PM

خلـيهم يتونــسو ياااخي.. الحياه حلوه..

,**.. امزح عاد..

وحي القلم

06-07-08 ||, 03:33 PM

(( خمس ملايين و الفايز .... هندي :shutup: ))

اللى يسمع البث المباشر تيه حالة اكتئاب من مشاكل المواطنين اللى ما يخلصن

الغلا .. البنيان .. الديون .. و .. و ...

بس يوم انشغل التلفزيون.. نتفاجأ "بالسحوبات" الملايين و السيايير أغلبهن يكونن للوافدين

الوافد هو المستفيد.. و المواطن يلتعن

جنها بلادهم مب بلادنا نحنى :bye2:

أنامل قلب

07-07-08 ||, 12:22 AM

^^ خله حلال عليهم لول

^_^ ..

:
.

اممم ..
هي كلمه قيلت لي بأول يوم لي بالعمل الصيفي ..
ولازالت ترن بمسامعي .. . !

أنامل قلب .. نحن اهني اخوان وخوات نتعامل بشكل طيب فخذي راحتج معانا ..
لا تنحرجين وتواصلي معانا عادي بالشكل اللي يريحج دون خجل .. . !
وكاهي زميلتج كانت معانا العام عارفه الوضع .. وأكمـــل .. . .

كنت أستمع وعيني بينه وبين الأرض وزميلتي تقول لي :
عادي بالبدايه يمكن تحسين انج منحرجه ومادري كيف .. لكن عقب بتتعودين لا تحاتين " .. !

والعجيب .. أني سمعت كلمه تصفني بالخجل وما شابه ذلك بأول يوم لي لأكثر من 10 مرات ..
والكل يذكره بصيغة اعتراض .. . !

كتمت ابتسامة بداخلي .. فكان الموقف طريفا ..
لأجيبها : منو قال بأني أبي آخذ راحتي .. ومتضايقه لأني منحرجه .. . ! "

:

لا أدري ولكن ما رأيته وأراه من وضع البعض لا يبهج عيناي ..
من غير الجميل أن نلقى حرية بطريقة التواصل لهذا الحد بين كلا الجنسين ..

غريبه .. . !

كل يوم أستغرب بزياده .. وزياده .. !

:

..

أنامل قلب

07-07-08 ||, 12:24 AM

^^

نسيت أشكر صاحب الموضوع عـ طرحه الطيب ..
وكل من أضاف هنا مقتطفا كريما ..

:

جزاكم الرحمن خير ..
ولا هانكم ..

:.

الهيثــم

07-07-08 ||, 08:21 AM

والنعم في تفكييرج اختي أنامل قلب ...

الحيـاء ومعرفـة كل شخص منا لحدوده لازم تكون من كلا الجنسين
ليس من الفتـاة فقـط ..

أحيي فيج هذه الأخلاق الطيبة ... وبارك الله فيج ...

ولنا عودة بمقتطفات هلت على مجتمعنا .. والله المستعان ..

وحي القلم

07-07-08 ||, 03:46 PM

يتهنون.. بس ما ننسى أنه عندنا ناس أولى

حياتنا شقايل استوت على هالغلا

كم راتب الموظف العادي؟؟

و كل بيت كمن نفر تقريبا فيه ما شا الله؟؟

مصاريف كل واحد منهم كم تكلف؟؟

البترول بكم؟؟

طلعة الجمعية بس كم تكلف؟؟ استوينا عادي نصرف فيها بالآلاف

..

الهيثــم

07-07-08 ||, 08:24 PM

^^ كفااية علينا انه استوينا غرباء في بلادنا ...

دموع قلم

07-07-08 ||, 09:10 PM

.
.

http://file9.9q9q.net/local/thumbnail/98581121/600x600.jpg

مو قصدي أغلط عالوافدين أو غيره ..

بس حسيت ان هالكاريكاتير يصور حال بعض المواطنين !

الله المستعان ..!

.
.

الهيثــم

07-07-08 ||, 09:34 PM

مع انه كاريكاتير ، بس قلبي عورني يوم شفتـه ...

وحي القلم

07-07-08 ||, 11:43 PM

اللى يقهر يوم تحصل ناس مب حاسين باللى يستوي في البلاد

و يظهرونك غلطان إذا قلت الصدق

بدت تستوي أشيا ما جد سمعنا بهن قبل

مظاهرات و مشاكل ما يخلصن.. و كل مره يظهرون شي يديد

ما أقول غير الله يحفظ المواطنين

يا خوفي ننقرظ آخر شي من كثر الوافدين :3:

.
.

دموع.. يعني ما غيرتي رايج ها؟؟ :4:

وحي القلم

07-07-08 ||, 11:51 PM

شفت لك سعودي مع عائلتة في برجمان .. البنات يدخنون سيجارة وهو ضرب سوالف وياهم .. كيفهم ..

المزوحي

عادي عندهم.. مب بس جقاره.. قدو بعد

و شي منهم في مكه

أنا انصدمت أول ما عرفت.. شقايل يسوون جيه عدال الحرم؟؟

يمكن يكونون متعودين و ما يحسون باللى يحسونه الغرب يوم يسيرون هناك

..

الهيثــم

08-07-08 ||, 01:01 AM

أختي وحي القلم

الفئة إلي ترمسين عنهم هااييل عيال حليب نيدوو
وساالفتهم ساالفة هااييل .. انولدوا وملعقة من ذهب في فمهم ...
إلا من رحم ربي

ومب حااسين باللي يستوي ف بلادنااا ..
لأنه يمكن تكون الحالة إلي وصلوها هم بسبة الاجانب .. والبيزاات إلي كودوها تحت مخدتهم بسبة الاجاانب

لكن ما يدرون إن الفئة الكبيرة من المواطنين صاروا غرباء في بلادهم ... وحياتهم انجلبت
الله المستعان بس ... الله المستعان ..

وحي القلم

08-07-08 ||, 01:37 AM

دموع قلم

08-07-08 ||, 01:24 PM

وحي القلم ..

امممم اشهد ان شي مواطنين وحليلهم عايشين على قد حالهم ..
وما انكر أن شي وافدين أحسن عن حالهم بوااايد وعايشين مرتاحين ..

بس اللي ذكرته بهاك اليوم ..
ان شي وااايدين من شباب بلادنا مايشتغلون عدل ..
او بالأصح ما يرضون بأي شغلة .. لازم شي يرتاحون له ويعيبهم ..
ولا ليش نحن نستعين بالهنود والأجانب ..؟!

هالواقع اللي مو عايبني ..
يعني اذا كل واحد منا .. شاب شابة .. يرضون بأي شغلة ..
حتى ان كان سواق تكسي .. او شي من هالأشغال البسيطة ..
ماااااافيها شي .. مو عيييييب أبدا أبدا ..

يعني اذا كل حد منا يفكر بهالطريقة .. ويعمل بها .. كنا بنضرب عصفورين بحجر ..
اولا .. بنقضي ع ظاهرة البطالة اللي منتشرة بيننا ..
ثانيا .. بيكون عندنا اكتفاء ذاتي وما بنستعين بالغرباء والأجانب ..!

^
^
^

ها إذا كان قصدج عالسالفة اللي رمسنا عنها هاك اليوم ..

بس ضحكتيني يوم قريت كلامج .. ^_______^

.
.

الاسطوري

08-07-08 ||, 01:55 PM

هــــــــــلا ..

صح نحن مب راضين ومب عايبنا اللي يصير وحال المواطن في تدهور يوم بعد يوم بسبب الاجانب اللي كل يوم يدخلون هالبلاد وياكلون من خيرها ويسبون شعبها ويدوسونهم بعد في بعض الاحيان ومحد يقدر يتكلم، المواطن اليوم ماعادت له قيمة في بلاده يعني محد يحسب له حساب ومافي شي يميزه وين مايروح يوقف وياهم ويتبهدل ويدفع ضريبة تواجد الاجانب وعلى هذا الحكومة تفضل انها تستفيد من فلوس الاجنبي على انها توفر راحة المواطن

في مثل كان يقوله لنا دايما مدرس التاريخ الله يذكره بالخير في نهاية كل درس عن الحضارات (ماطار طير وإرتفع إلا كما طار وقع) على مر التاريخ من قبل الميلاد إلى اليوم مافي حضارة بدت وارتفعت وازدهرت إلا وياها يوم وانهارت فيه، وقال الشيخ محمد بن راشد الله يحفظه (لو دامت لغيرك ماجاتك اليوم) صح في مناسبة مختلفة ولكن المغزى واحد بأن كل اللي يصير اليوم ممكن اييه يوم وينتهي كله ويروح في مهب الريح

الواحد بس يخلي ايمانه قوي شويه ويصمد ولابد في يوم بيصير شي وبتشوفون كل هالكائنات اللي حلت علينا مثل ماالنمل يحصلون قطعة حلاوة ويتيمعون عليها يتشاردون بسرعة البرق وتفضى البلاد حقنا حق أهلها اللي انولدوا هني وتبروا هني وعاشوا هني وتربطهم علاقة الدم بالارض وماراح يتخلون عنها وقت الشدة وبيتحملون عشانها وكل اللي يالسين بس ايمعون فلوس ليل نهار ويشفطون دم المواطن شفاط وحتى لو كان اسمهم مواطنين بتشوفونهم اول ناس يطلعون ويشلون فلوسهم وياهم واتمنى تكون روحة بلا رده

يمكن هالكلام كان انسب اني اقوله في موضوع غصات مواطن ولكن الواحد مايقدر يشوف
ويسكت القهر اللي فينا يوم بعد يوم يزيد والحكومة مشكلتها
ماتشبع كثر ماتاكل يعني مابنخلص
:fa44:

السموحه

وحي القلم

08-07-08 ||, 02:44 PM